Izimvo Zabafundi BakaVukani!
Iintsikelelo Ezingaphezu Kobutyebi (Matshi 2009) Eli nqaku licaphula uKostas, owathi: “UThixo akafuni siphile kubunewunewu.” Ndicinga ukuba uYehova akabekanga mlinganiselo esingamele sigqithe kuwo ngezinto eziphathekayo esimele sibe nazo, ukuba nje simbeka kwindawo yokuqala. Ngaba kuphosakele ukuba nobunewunewu ngoxa kwangaxeshanye sikhonza uYehova ngokuthembeka?
UJ. D., waseUnited States
“UVukani!” uyaphendula: IBhayibhile ayithi kuphosakele ukuba sisityebi. Enyanisweni, abakhonzi bakaThixo abaninzi bamandulo babezizityebi. (Genesis 25:5; 26:12-16; Yobhi 1:1-3) Noko ke, abo bazizityebi bafanele bakhumbule ukuba ‘ukuqhayisa ngezinto zobu bomi akuphumi kuBawo, kodwa kuphuma ehlabathini.’ (1 Yohane 2:16) Ukongezelela, umpostile uPawulos wathi: “Ukuthanda imali yingcambu yazo zonke iintlobo zobubi.” Waphawula ukuba ngokuncama izinto zokomoya ngenxa yobutyebi, “bambi baye balahlekana nokholo, bezingxwelerha ngeentlungu ezininzi.” (1 Timoti 6:10) Kakade ke, iLizwi likaThixo alithi abo bazizityebi bafanele bazive benetyala kuba benezinto ezininzi kunabanye abantu. AmaKristu akhuthazwa ukuba ‘angagogotyi lutho, alungele ukwabelana’ enoba awanazinto zingako okanye anezinto ezininzi eziphathekayo.—1 Timoti 6:18.
Nangona Engakwazi Ukuthetha Uyeviwa (Oktobha 2008) Liye landikhuthaza ngokwenene eli nqaku lithetha ngoHillary, owayenesifo esibizwa ngokuba yiRett syndrome. Umzukulwana wam oneminyaka emihlanu ubudala akaboni, akeva ngeendlebe, akakwazi ukuhamba, akakwazi ukuthetha yaye akakwazi nokuhlala phantsi. Ngoku ndinethemba lokuba xa ndimculela, ndimfundela, ndithetha naye okanye ndiphulula izihlunu zakhe ikho into eyenzekayo engqondweni yakhe. Ndiye ndalila ndakufunda amazwi kamama kaHillary athi: “Nangona ndingamva ukuba uthini, uYehova uyamva.” Andincede ndaqonda ukuba nangona umzukulwana wam engakwazi ukuthetha, uYehova uyakwazi okusentliziyweni yakhe.
UM. A., waseJapan
Intombi yam ineminyaka engama-43 ubudala, kodwa ndiyaqala ngqa ukufunda inqaku elindincede ndayiqonda imeko yakhe nezizathu ezibangela ukuba akhubazeke. Ndiyavelana noHillary, umama wakhe nodade wabo. Nangona singahlali endaweni enye, sikwimeko efanayo yaye ndiyawuxabisa umzekelo wabo wokuba nokholo, uthando nokunyamezela.
UT. Y., waseGhana
Ukuqhomfa Akungondlela-lula (Juni 2009) Ndibamba ngazo zozibini ngongcelele lwamanqaku athetha ngokuqhomfa. Xa ndandineminyaka engaphezu kwengama-20 ubudala, ndakhetha ukuqhomfa yaye ndiyazisola kakhulu ngalo nto ndayenzayo. Ukuba inyaniso bendingayazi, ngendingenathemba. Ndiyabulela kuba ndinethemba yaye ndiyayazi into yokuba uYehova uyaxolela.
Igama alichazwanga, waseUnited States
Abantu Abaselula Bayabuza . . . Ndinokuhlangabezana Njani Nokufelwa Ngumzali? (Agasti 2009) Ndineminyaka nje engama-22 ubudala yaye ukusweleka kukatata ngokukhawuleza nendandingakulindelanga kwandishiya ndixinezelekile. Njengokuba inqaku lisitsho, ndiza kukukhumbula ukwenza ezona zinto ezibalulekileyo ebomini kunye naye. Sele kudlule iminyaka emithathu kodwa ndisakufumanisa kunzima ukuqhubeka nobomi. Sekunjalo, eli nqaku liye landithuthuzela kakhulu. Amacebiso akweli nqaku andincede ndakwazi ukujamelana nokufelwa, nakuba bekunzima ukuwasebenzisa. Ndibulela kakhulu ngomsebenzi wenu omhle.
UN. P., eFransi