“Ndikhule Ndingakholelwa Kubukho BukaThixo”

UNJINGALWAZI uFrantišek Vyskočil weCharles University yasePrague, waziwa ehlabathini jikelele ngophando lwakhe lwendlela esebenza ngayo imithambo-luvo. Ngoku ukhonza uThixo nangona wayekade engakholelwa kubukho Bakhe. Kudliwano-ndlebe lwakhe noVukani!, uNjingalwazi uVyskočil uchaza isizathu sokutshintsha kweenkolelo zakhe.

Wawulujonga njani unqulo ngaphambi kokuba ufundele ezenzululwazi?

Ndikhule ndingakholelwa kubukho bukaThixo yaye utata wam wayethanda ukuhlekisa ngabefundisi. Ngowe-1963 ndafumana isidanga kwibhayoloji nakwikhemistri. Ngoxa ndandisesesikolweni ndandikholelwa ukuba yonke into ekhoyo yabakho ngamabona-ndenzile.

Khawusichazele ngomsebenzi wakho kwezenzululwazi.

Emva kokuba ndifumene isidanga sobugqirha kwezenzululwazi, ndaye ndafunda banzi ngendlela yokusebenza kweesynapse zemithambo-luvo. Kwakhona ndafunda ngemithambo-luvo, indlela ulwelo oluzithutha ngayo izinto, ukususwa kwamalungu athile omzimba kunye nokuxhathisa komzimba amachiza athile. Izinto ezininzi endiye ndazifumanisa ziye zapapashwa yaye amanye alo manqaku axatyiswa kakhulu. Ethubeni, ndaba lilungu leLearned Society of the Czech Republic, iqela lezazinzulu ezikhethwa ngoogxa bazo. Emva kokubhukuqwa korhulumente wamaKomanisi ngoDisemba wowe-1989, ndaba ngunjingalwazi kwiCharles University yaye ndavunyelwa ukuba ndityelele amazwe aseNtshona ukuze ndidibane nezinye izazinzulu ekwakukho phakathi kwazo ezazikhe zawongwa ngebhaso likaNobel.

Ngaba wakha wacinga ngoThixo?

Ndingatsho. Ngamanye amaxesha ndandikhe ndizibuze ukuba kutheni abantu abaninzi abafundileyo kuquka nabanye oonjingalwazi, bekholelwa kuThixo—nangona babengatsho ngokuphandle ngenxa yokoyika amaKomanisi. Noko ke, ndandisithi uThixo ngumntu nje wasemaphupheni. Kwakhona kwakundicaphukise gqitha ukubona izinto ezimanyumnyezi ezazisenziwa egameni lonqulo.

Yintoni eyakwenza wathandabuza ukuba ubomi babakho ngamabona-ndenzile?

Ndaqala ukuyithandabuza loo nto xa ndandifunda ngeesynapse. Kwandikhwankqisa gqitha ukubona indlela oluntsonkothe ngayo unxibelelwano lweeseli zayo. Ndazibuza ukuba ‘Indlela ezisekwa zize zisebenze ngayo ezi seli yayinokwenzeka njani ngamabona-ndenzile?’ Yayingekho ngqiqweni loo nto.

Ekuqaleni kweminyaka yee-1970 ndaphulaphula intetho eyayisenziwa ngomnye unjingalwazi owayesisazinzulu esingumRashiya esaziwayo. Wathi izinto eziphilayo azinakubangelwa kukuguquka kwemizila yemfuza nokuzikhethela kwemvelo. Omnye umntu owayekuloo klasi wabuza ukuba zavela phi. Lo njingalwazi wakhupha iBhayibhile encinane yesiRashiya epokothweni yebhatyi, wayiphakamisa waza wathi, “Funda iBhayibhile—ngokukodwa ibali lendalo elikwiGenesis.”

Kamva ndambuza lo njingalwazi ukuba wayengaqhuli na xa wayethetha ngeBhayibhile. Wathi: “Ibacteria iyakwazi ukuvelisa ezinye ezininzi qho emva kwemizuzu engama-20 yaye inokuvelisa amakhulukhulu eeprotini ezahlukeneyo, nganye kuzo ibe neentlobo ezingama-20 zeeamino acid ezilandelelaniswe zangamakhulukhulu ukuze zenze into efana netyathanga. Ukuziphindaphinda kwebacteria okunjalo bekuya kuthabatha ixesha elide kuneebhiliyoni ezine zeminyaka, xesha elo izazinzulu ezininzi ezikholelwa ukuba yiminyaka yobukho bobomi emhlabeni.” Wayesithi, oko kuthethwa yincwadi yeBhayibhile yeGenesis kuvakala bhetele.

Zakuchaphazela njani izinto ezathethwa ngulo njingalwazi?

Izinto awazithethayo, kuquka namathandabuzo ekwakukudala ndinawo andenza ndathetha nabanye abantu endandisebenza nabo kuquka nabahlobo bam ababenomdla kunqulo, kodwa ke iimbono zabo azizange zindanelise. Ndaye ndathetha nomnye ugqirha owayeliNgqina likaYehova. Wachitha iminyaka emithathu efundisa mna nomfazi wam uEma iBhayibhile. Zimbini izinto ezasimangalisayo. Okokuqala, iicawa ezininzi ekuthiwa zezobuKristu azifundisi izinto eziseBhayibhileni. Okwesibini, iBhayibhile iyavumelana nenzululwazi nangona ingeyoncwadi yayo.

Ngaba ukutshintsha kweembono zakho kuye kwakuphazamisa ukuphanda kwakho ngenzululwazi?

Akuzange kube njalo. Zonke izazinzulu zifanele zisekele iimbono zazo kwizibakala, kungakhathaliseki ukuba zikholelwa entwenini. Kodwa ke ukholo lwam luye lwanditshintsha. Kunokuba ndizithembe ngokugqithiseleyo, ndithande ukhuphiswano ndize ndibe nekratshi ngenxa yokuba sisazinzulu esiphum’ izandla, ndibulela uThixo ngabo nabuphi na ubuchule endinabo. Kwakhona, kunokuba ndithi izinto zabakho ngamabona-ndenzile, mna nezinye izazinzulu ezininzi siyazibuza ukuba, ‘UThixo wayenza njani yonke le nto?’

[Amagama acatshulweyo akwiphepha 9]

Mna nezinye izazinzulu ezininzi siyazibuza ukuba, ‘UThixo wayenza njani yonke le nto?’