Uya Kuthini Kumntu Ongakholelwayo Kubukho BukaThixo?
1 Unjingalwazi wasePoland waxelela umvangeli wasemazweni eAfrika oku, “andikholelwa kubukho bukaThixo.” Noko ke, lo dade waba nengxubusho neli bhinqa waza walinika incwadi ethi Life—How Did It Get Here? By Evolution or by Creation? Xa wabuyelayo lo mvangeli wasemazweni kwiveki elandelayo, lo njingalwazi wamxelela esithi: “Ngoku ndiyekile ukungakholelwa kubukho bukaThixo!” Wayeyifunde yonke incwadi ethi Creation kwaye wacela isifundo seBhayibhile. Yintoni onokuyenza ukuze ube nempumelelo ekunikeleni ubungqina kwabo bathi abakholelwa kubukho bukaThixo? Okokuqala, hlolisisa izizathu ezahlukahlukeneyo zokuba benze eli bango.
2 Oonobangela Bokungakholelwa: Asingabo bonke abantu abangakholelwayo kuThixo abakhuliswa ngolo hlobo. Abaninzi babeqhelene nohlobo oluthile lonqulo yaye ngaxa lithile bekholelwa kuThixo. Noko ke, iingxaki ezinzulu zempilo okanye ezentsapho okanye okuthile okungekho sikweni abaye bajamelana nako kwalwenza buthathaka ukholo lwabo. Kwabanye, zizifundo ezifundiswa kwizikolo zemfundo ephakamileyo eziye zanegalelo elingelihle kwindlela abamqonda ngayo uThixo. Phawula le mizekelo ilandelayo yabantu abangakholelwayo kubukho bukaThixo ababa nokholo olomeleleyo kuYehova uThixo baze bangamaNgqina akhe.
3 Ibhinqa elithile laseParis lazalwa linesifo esibuhlungu samathambo. Nangona lalibhaptizwe njengomKatolika, lalingakholelwa kubukho bukaThixo. Xa labuza oonongendi isizathu sokuba uThixo eye wavuma lazalwa lingumlwelwe onjalo, impendulo yabo yathi: “Kungenxa yokuba uyakuthanda.” Alizange liyamkele loo ngcamango ingacacanga. Kwakhona, khawucinge ngalo uselula waseFinland owafunyaniswa enesifo sezihlunu esinganyangekiyo owathi wahlala kwisitulo esinamavili sabaguli. Unina wamsa kumntu owayehamba icawa yamaPentekoste owayesithi unyanga abantu abagulayo. Kodwa akazange anyangwe ngokungumangaliso. Ngenxa yoku, eli tyendyana laphelelwa ngumdla kuThixo laza alakholelwa kubukho bukaThixo.
4 Indoda ethile eHonduras yakhuliswa njengomKatolika kodwa yafunda intanda-bulumko yobuSoshiyali nokungakholelwa kubukho bukaThixo. Yeyisekile yimfundiso yaseyunivesithi yokuba uluntu lwabakho ngendaleko, yayeka ukukholelwa kuThixo. Ngokufanayo, ibhinqa elithile eUnited States lakhuliswa lingumWesile. Kwanokholeji, lafunda inzululwazi ngengqondo. Lwaphenjelelwa njani ukholo lwalo? Lathi: “Ngehlobo nje elinye batshabalalisa kwanto engathi lukholo endandinayo ngonqulo.”
5 Ukufikelela Iintliziyo Zabo Banyanisekileyo: Abantu abaninzi abathi abakholelwa kuThixo baya kuxabisa ukwazi ukuba kukho isicombululo kwiingxaki zempilo enkenenkene, ukuqhekeka kweentsapho, ukungabikho kokusesikweni nokunye. Banomdla wokwenene wokufumana iimpendulo zemibuzo enjengethi: ‘Kutheni kukho ububi nje?’ ‘Kutheni kusenzeka izinto ezimbi kubantu abalungileyo’ yaye ‘Iyintoni injongo yobomi?’
6 Indoda nomfazi ababehlala eSwitzerland bobabini bakhuliswa bengakholelwa kubukho bukaThixo. Xa badibana okokuqala nenyaniso, intsabelo yabo yayingentle. Kodwa babeneengxaki ezinzulu zentsapho kwaye babecinga ngokuqhawula umtshato. Xa laphinda labatyelela eli Ngqina, labonisa esi sibini indlela yokucombulula iingxaki zaso ngokusuka eBhayibhileni. Esi sibini sasibambe ongezantsi sisiluleko esisebenzisekayo esiseZibhalweni, yaye sasamkela isifundo seBhayibhile. Umtshato waso womelezwa, benza inkqubela ngokomoya yaye babhaptizwa.
7 Oko Unokukuthetha Kumntu Ongakholelwayo Kubukho BukaThixo: Xa ubani ekuxelela ukuba akakholelwa kuThixo, zama ukufumana isizathu sokuba athethe oko. Ngaba kungenxa yemfundo aye wayifumana, iingxaki aye wajamelana nazo, okanye uhanahaniso lonqulo neemfundiso zobuxoki aye wazibona? Usenokumbuza oku: “Ngaba ubusoloko uvakalelwa ngale ndlela?” okanye “Yintoni ekwenze wafikelela kwesi sigqibo?” Impendulo yakhe iya kukunceda uqonde oko mawukuthethe. Xa kufuneka iingxubusho ezinamandla, incwadi ethi Is There a Creator Who Cares About You? isenokuba yeyona ifunekayo.
8 Unokuyiqhuba incoko nomntu ongakholelwayo kubukho bukaThixo ngokubuza uthi:
◼ “Ngaba wakha wazibuza: ‘Ukuba ukho uThixo, kutheni lento kukho ukubandezeleka okungaka nokungabikho kokusesikweni kweli hlabathi?’ [Vumela impendulo.] Ngaba ndingakubonisa imbono yeBhayibhile ngalo mbandela?” Funda uYeremiya 10:23. Emva kokumfunda, cela amagqabaza akhe ngeso sibhalo. Yandula ke umbonise iphepha 16 nele-17 kwincwadi ethi Will There Ever Be a World Without War? Okanye, unokusebenzisa isahluko 10 sencwadi ethi Creator. Mcele ukuba ayithabathe le mpapasho aze awufunde lo mbandela.—Ukuze afumane amacebiso angakumbi, bona incwadi ethi Ukuqiqa iphepha 354-6.
9 Kuyavunywa ukuba, asingabo bonke abantu abangakholelwayo kubukho bukaThixo abaya kuyamkela inyaniso. Kodwa baninzi abakulungeleyo ukuhlolisisa ezinye iimbono. Sebenzisa ingqiqo, ubabongoze yaye ngaphezu kwako konke, amandla eLizwi likaThixo ukubanceda babone inyaniso.—IZe. 28:23, 24; Heb. 4:12.