Intlungu Enganyamezelekiyo

UNicolle wayeyintwazana engabikwa hlaba. Kodwa ngeny’ ingokuhlwa wakhala ngentloko baza abazali bakhe bamsa esibhedlele. Ngengokuhlwa elandelayo ngoxa wayesesesibhedlele, uNicolle wahlaselwa yintliziyo. Kwafunyaniswa ukuba wayenesifo esinqabileyo nesahlasela amaphaphu, izintso nentliziyo yakhe. UNicolle wasweleka zingekapheli iiyure ezingama-48. Le ntwazana yayineminyaka nje emithathu ubudala.

UKUFELWA sisalamane kuyenye yezona zinto zibuhlungu ebomini. Maxa wambi le ntlungu isenokunganyamezeleki. Umama kaNicolle uIsabelle uthi, “Hay’ indlela endilukhumbula ngayo usana lwam. Ndikhumbula indlela esasithanda ukwangana ngayo nendlela olwalunothando ngayo. Ndikhumbula iintyantyambo awayethanda ukundipha zona yonke imihla uNicolle. Ndihlala ndicinga ngaye.”

Ngaba ufelwe sisalamane—mhlawumbi umntwana, iqabane lomtshato, umntwana wakowenu, umzali okanye umhlobo? Ukuba kunjalo, unokumelana njani naloo ntlungu?