Uncedo Kubantwana Abasentlungwini

Siyazi kakuhle indlela ekunzima ngayo ukuphalaza ebantwini umphanga wokufa kwesalamane sabo. Unokucinga ukuba kunjani xa kuza kufuneka ukuxelele umntwana oko.

ABANTWANA abaninzi bayadideka de batyhwatyhwe luloyiko xa besiva ngokufelwa sisalamane okanye umhlobo. Kuba lucelomngeni ukunceda umntwana kule meko, ngakumbi kubazali ekufuneka benze loo nto ngoxa nabo bekwintlungu efanayo. Kaloku nabo, basafuna ukomelezwa.

Abanye abazali baye bazame ukuyilungiselela le meko ngokuxelela abantwana babo ukuba loo mntu ubashiyile okanye umkile. Noko ke, asiyonyaniso ukuthetha oko yaye kuyinkohliso. Ngoko ke, umntu unokumxelela njani umntwana ngokufa?

URenato noIsabelle bakha bajamelana nayo le ngxaki. Xa kwafa intombi yabo eneminyaka emithathu nesiqingatha, uNicolle kwafuneka bancede uFelipe, unyana wabo owayeneminyaka emihlanu ubudala ngoko, anyamezele loo ntlungu.

UVukani!: Nakwazi njani ukumchazela uFelipe?

UIsabelle: Sazama ukuthetha inyaniso nokuba singafihli kwanto. Samkhuthaza ukuba abuze imibuzo, yaye sihlala sizama ukuyiphendula ngendlela aza kuyiqonda. UNicolle wabulawa ziintsholongwane, samchazela ukuba kukho irhorho encinane engene emzimbeni wakhe kodwa oogqirha abakhange bakwazi ukuyibulala.

UVukani!: Namchazela ngokholo lwenu ngokuphathelele ukufa?

URenato: SingamaNgqina kaYehova, ngoko sasisazi ukuba ukumxelela ngeenkolelo zethu ngokuphathelele ukufa kwakuya kumthuthuzela. IBhayibhile ikuchaza ngokucacileyo—ifundisa ukuba abafileyo abazi nto tu. (INtshumayeli 9:5) Sagqiba kwelithi xa sixubusha naye uFelipe, oko kukuya kuphelisa naluphi na uloyiko asenokuba nalo—ngokomzekelo oyike ukushiywa yedwa ebusuku.

UIsabelle: IBhayibhile isifundisa nokuba abo bafileyo baza kuvuselwa kumhlaba oyiparadesi. Siyakukholelwa oko, ibe sasivakalelwa kukuba kwakuza kumnceda noFelipe. Samchazela ngoko kufundiswa yiBhayibhile. Samxelela ngengxelo yeBhayibhile yentombi kaYayiro eneminyaka eli-12 eyavuswa nguYesu. Emva koko samcacisela ukuba naye uNicolle uza kuvuswa. Yile nto kanye efundiswa yiBhayibhile.—Marko 5:22-24, 35-42; Yohane 5:28, 29.

UVukani!: Nicinga ukuba uFelipe uyayiqonda yonke le nkcazelo?

URenato: Ewe, sicinga ukuba uyayiqonda. Abantwana bayinyamezela bhetele intlungu yokufa xa bechazelwe ngendlela echanileyo, elula, ecacileyo neyinyaniso. Akuyomfuneko ukubafihlela. Ukufa yinto yokwenene. Okubuhlungu kukuba, okwangoku akuphepheki, yinxalenye yobomi bethu. Ngoko ke, abazali kufuneka bafundise abantwana babo indlela yokujamelana nokufa, njengokuba senzayo kamva nakunyana wethu omncinane uVinicius.a

UVukani!: Ngaba nahamba naye uFelipe xa nisiya emangcwabeni?

URenato: Emva kokucingisisa ngoko, sagqiba ekubeni singahambi naye. Abantwana abakule minyaka akuyo ubudala bathabatheka yinto le yonke. Kakade ke, abanye abazali basenokugqiba ekubeni bahambe naye umntwana wabo, ibe abantwana abafani. Ukuba umntwana kuhanjwa naye, kubhetele achazelwe into eza kwenzeka apho.

UVukani!: Ukufa kukaNicolle kumele ukuba kwakubuhlungu gqitha kuni. Ngaba nanikhathazekile ngento yokuba unyana wenu anibone nikhala?

UIsabelle: Zange sizame ukuyifihla indlela esivakalelwa ngayo kuye. Ukuba noYesu “zasuka zathi waxa iinyembezi” xa kwafa umhlobo wakhe, yintoni enokusibamba thina? (Yohane 11:35, 36) Yintoni enokwenza simfihlele uFelipe xa silila? Ukungamfihleli kwethu intlungu esikuyo kwamnceda wabona kakuhle ukuba akukho nto iphosakeleyo ngokulila. Yindlela nje yokubonakalisa indlela esivakalelwa ngayo. Sasifuna aqonde ukuba naye unokuyibonakalisa indlela avakalelwa ngayo, kunokuba azibambe.

URenato: Xa kusehla into ebuhlungu entsatsheni, abantwana badla ngokuziva bengakhuselekanga. Ngoko ke, ukuba thina bazali sibaxelela inyaniso yaye sibe phandle ngendlela esivakalelwa ngayo, nabantwana baya kukhululeka. Emva kokuphulaphula ngenyameko izinto ezibaxhalabisayo, sitsho sikwazi ukubaqinisekisa nokuthomalalisa uloyiko abanalo.

UVukani!: Ngaba lukho uncedo eniye nalufumana kwabanye?

URenato: Ewe, saxhaswa ngokwenene ngabazalwana bethu ebandleni. Ngokubabona bengena bephuma, besifowunela yaye besithumelela namakhadi, uFelipe wakwazi ukuyibona indlela abasikhathalele nabasithanda ngayo.

UIsabelle: Namalungu entsapho yethu ayeluncedo gqitha. Emva kokufa kukaNicolle, uTata wagqiba ekubeni aze kutya nathi isidlo sakusasa yonk’ imihla. Le yindlela awagqiba ekubeni asixhase ngayo. Ubukho bukayise omkhulu kwamnceda gqitha uFelipe.

URenato: Ukhuthazo lokomoya esalufumana kwiintlanganiso alunakuthelekiswa nanto. Senza umgudu wokuba singaphoswa zizo, nakuba maxa wambi sasingakwazi kuzibamba iinyembezi. Ukuba kwiintlanganiso zebandla kwakusikhumbuza izinto ezininzi ngoNicolle. Kodwa sasiqonda ukuba simele somelele, ngakumbi ngenxa kaFelipe.

[Umbhalo osemazantsi]

[Ibhokisi/Imifanekiso ekwiphepha 14]

Iincwadi ezidweliswe apha ngezantsi, zipapashwe ngamaNgqina kaYehova zinokubathuthuzela abo bafelweyo.

EZABANTU ABADALA:

Yintoni Ngokwenene Efundiswa YiBhayibhile?

Isahluko 6: Baphi Abafileyo?

Isahluko 7: Ithemba Lokwenene Ngabantu Obathandayo Abafileyo

EZABANTWANA ABANCINANE:

Incwadi Yam Yamabali EBhayibhile

Ibali 92: UYesu Uvusa Abafileyo

EZABANGABAPHANTSI KWESHUMI ELIVISAYO:

Funda Kumfundisi Omkhulu

Isahluko 34: Kuya Kwenzeka Ntoni Xa Sisifa?

Isahluko 35: Sinako Ukuvuka Ekufeni!

Isahluko 36: Ngoobani Abaza Kuvuswa? Baza Kuhlala Phi?

EZABAFIKISAYO:

Imibuzo Yabantu Abaselula Iimpendulo Eziluncedo Umqulu 1

Isahluko 16: Ngaba Le Yintlungu Eqhelekileyo?

[Ibhokisi/Umfanekiso okwiphepha 15]

INDLELA YOKUNCEDA

● Bakhuthaze ukuba babuze. Zama ukuba imeko yenze umntwana wakho athethe ngokufa nangento okuyithethayo.

● Kuphephe ukusebenzisa amagama angaqondakaliyo, nagwegwelezayo—ngokomzekelo, uthi lowo ufileyo “usishiyile” okanye “umkile.”

● Chaza ukufa ngamagama alula nangqalileyo. Abanye badla ngokuthi umzimba waloo mntu ufileyo “uyekile ukusebenza” yaye “awunakulungiswa.”

● Umntwana mxelele oko amele akulindele emngcwabeni; mcacisele ukuba umfi akayi kukwazi ukukubona okanye akuve oko kwenzekayo.

● Sukumfihlela indlela ovakalelwa ngayo. Xa usenjenjalo umntwana uya kutsho abone ukuba yinto yokwemvelo ukuba buhlungu.

● Khumbula ukuba, akukho ndlela “ichanileyo” yokukhupha intlungu. Kumntwana ngamnye—nakwimeko nganye—kukho umahluko.

[Inkcazelo]

Source: www.kidshealth.org

[Umfanekiso okwiphepha 15]

Ukusuka ngasekhohlo: UFelipe, uRenato, uIsabelle, noVinicius