Eyona Nto Ixabiseke Ngaphezu Kobomi Bethu Ngoku

Kubalisa uMurat Ibatullin

Ngowe-1987 iSebe Lezempilo LaseRashiya landithumela eUganda, eAfrika. Ndavuma ukuya kusebenza kwelo njengogqirha kangangeminyaka emine. Eneneni ndandingafuni ukubuyela eRashiya kodwa ndandifuna amava aza kundinceda ndisebenze kumazwe afana neOstreliya, iKhanada okanye iUnited States. Kodwa ngowe-1991, izinto zatshintsha ibe ndabuyela eRashiya. Makhe ndikuchazele ukuba kwakutheni.

NDAZALWA ngowe-1953 kwisixeko saseKazan’ esilikomkhulu leRiphabliki yaseTatarstan kuMbindi weRashiya. Abazali bam ngamaTatar yaye inkoliso yamaTatar ingamaSilamsi. Ndisengumntwana, ndandidla ngokubona utatomkhulu nomakhulu beguqile bethandaza kuAllah. Thina bantwana sasidla ngokukhutshwa kwelo gumbi ukuze singabaphazamisi. Abazali bam babesiba neentloni ngenxa yokuba babengamaKomanisi yaye ngelo xesha babesithi abakholelwa kubukho bukaThixo.

Xa ndandineminyaka emine ubudala ndaba nepoliyo eyayisasazeke kuyo yonke iSoviet Union. Endikukhumbulayo kukuba ndandiquqa ndibuyelela ezibhedlele. Utatomkhulu wayede andithandazele ukuba ndibe bhetele. Ekubeni ndandifuna ukuba sempilweni njengabanye abantwana, ndandidlala ibhola, ihockey neminye imidlalo nangona ndandiqhwalela.

Njengokuba ndandikhula ndafuna ukuba ngugqirha. Ndandingayihambi icawa kodwa ndandingenguye nomntu ongakholelwayo kubukho bukaThixo. Kuphela nje ndandingacingi nokucinga ngoThixo. Ngelo xesha ndandizigxeka iimfundiso zamaKomanisi yaye ndandidla ngokuphikisana notata nomalume. Umalume wayefundisa intandabulumko kwiyunivesithi yaye utata wayesebenzela iintlola zikarhulumente ezazibizwa ngokuba yiKGB. Ukugqiba kwam izifundo zonyango ndandifuna ukuba ngugqirha wengqondo ndize ndifudukele kwelinye ilizwe.

Ukufuna Ubomi Obubhetele

Ngowe-1984 ndafumana isidanga sam sokuba ngugqirha kwizifundo eziphathelele amathumba asebuchotsheni. Kwandula ke ngowe-1987 ndathunyelwa kwisibhedlele esiseMulago, eUganda. Ndafudukela kweli lizwe lihle nenkosikazi yam uDilbar nabantwana bethu uRustem, owayeneminyaka esixhenxe ubudala noAlisa owayeneminyaka emine ubudala. Kwakunzima gqitha ukusebenza kuloo kliniki yaye kwakufuneka ndenze notyando kwizigulana ezinentsholongwane iHIV. Ndandinyuka ndisihla ndisiya nakwezinye iikliniki ekubeni babebabini kuphela kwelo lizwe oogqirha ababesenza utyando lobuchopho.

Ngeny’ imini mna noDilbar sabona iBhayibhile yesiRashiya okwesihlandlo sokuqala kwenye indawo ethengisa iincwadi. Sathenga eziliqela saza sazithumela kubahlobo bethu abakwiSoviet Union, njengokuba kwakunzima ukuthenga iiBhayibhile ngelo xesha. Safunda izahluko ezimbalwa eBhayibhileni kodwa sayeka kuba kwakunzima ukuziqonda.

Noko ke, kangangeminyaka emithathu sasihamba iicawa ezahlukahlukeneyo zaseUganda sifuna ukuqonda iinkolelo zabantu balapho. Ndagqiba nakwelokuba ndifunde iKoran ngolwimi eyayibhalwe ngalo ekuqaleni. Eneneni, mna noRustem saqalisa ukufunda isiArabhu. Emva kweenyanga ezimbalwa sasisele sikwazi ukusithetha kancinane isiArabhu.

Kanye ngelo xesha sadibana nabathunywa bevangeli uHeinz noMarianne Wertholz ababesuka eJamani naseOstriya. Xa sasiqal’ ukuncokola asizange sithethe nokuthetha ngonqulo. Sasifana nje nabanye abantu abamhlophe abaqal’ ukudibana eAfrika. Sababuza isizathu sokuba beseUganda saza safumanisa ukuba bangabathunywa bevangeli bamaNgqina kaYehova yaye bakwelo ukuza kufundisa abantu iBhayibhile.

Kodwa ke ndakhumbula ukuba kwizifundo zentandabulumko kwiyunivesithi yaseRashiya sasixelelwe ukuba amaNgqina lihlelo eliyingozi yaye abingelela ngabantwana bawo aze asele negazi labo. Ndamchazela uHeinz noMarianne ngoku, ekubeni ndandingakholelwa ukuba babengayenza into enjalo. Banika ngamnye wethu incwadi ethi Unokuphila Ngonaphakade KwiParadisi Esemhlabeni yaye sayifunda phantse yonke ngeeyure nje ezimbalwa. Xa ndabuza uDilbar ngoko akucingayo ngale ncwadi, wathi wayemangaliswe gqitha koko wayekufunda. Ndamchazela ukuba nam ndivakalelwa ngendlela efanayo.

Emva koko sasifuna ukuthetha noHeinz noMarianne kwakhona. Ukudibana kwethu nabo sancokola ngemibandela eliqela yeBhayibhile. Sakuthanda gqitha oko sakufundayo eBhayibhileni. Sasifuna ukuxelela abahlobo nabantu esisebenza nabo ngoko sikufundayo. Phakathi kwabo kwakukho unozakuzaku nabanye abameli baseRashiya kwakunye nommeli kaPopu. Ummeli kaPopu wasothusa xa wathi yonke into ebhalwe kwiTestamente Endala “yintsomi.”

Ukubuyela Kwilizwe Lethu

Kwinyanga ngaphambi kokuba sibuyele eRashiya ngowe-1991, mna noDilbar sagqiba ekubeni sibe ngamaNgqina kaYehova. Sasicinga ukuba ukubuyela kwethu eKazan’, siza kuqhubeka sisiya kwiintlanganiso. Kodwa into eyasothusayo kukuba kangangeenyanga ezintathu sikhangela iHolo yoBukumkani asizange siyifumane yaye asizange sibone nelinye iNgqina likaYehova. Sagqiba kwelokuba siye kushumayela kwindlu ngendlu njengoko esenza amaNgqina emhlabeni wonke nangona yayisithi nje sobabini. Oku kwakhokelela ekubeni siqalise izifundo zeBhayibhile eziliqela, kuquka nenye inkosikazi eyaba liNgqina.

Ekuhambeni kwexesha, satyelelwa ngomnye utatomkhulu oliNgqina owayefumene iadresi yethu kumaNgqina aseUganda. Saqalisa ukuhlanganisana nelinye iqela elincinane labantu abali-15 ababeqhuba iintlanganiso kwikhaya elinegumbi elinye. UHeinz noMarianne baqhubeka beqhagamshelana nathi bada beza kusityelela eKazan’. Emva koko, saya kubatyelela eBulgaria, ilizwe ababethunyelwe kulo ngoko nabasakhonza kulo njengabathunywa bevangeli nanamhlanje.

Ilizwe Lethu Livelisa Isiqhamo

Xa ndifumana ithuba ndiye ndichazele abanye oogqirha endisebenza nabo kwizibhedlele zaseRashiya ngeenyaniso zeBhayibhile. Kule minyaka idluleyo, abaninzi baye baba ngamaNgqina kaYehova kuquka nabanye oogqirha endisebenza nabo. Ngowe-1992 emva konyaka sifikile eKazan’, amaNgqina anda aya kufikelela kwangama-45 yaye kunyaka olandelayo aba ngaphezu kwe-100. Namhlanje eKazan’ kukho amabandla asixhenxe amaNgqina—amahlanu ngawolwimi lwesiRashiya, elinye lelolwimi lwèsiTatar ukanti elinye lona lelentetho yezandla. Kukwakho namaqela olwimi lwesiArmenia nesiNgesi.

Ngowe-1993 ndaya kwinkomfa yezonyango eyayikwiSixeko saseNew York, apho ndafumana ithuba lokuya kutyelela ikomkhulu lehlabathi lamaNgqina kaYehova eliseBrooklyn. Ndadibana noLloyd Barry owayencedisa ekwalathiseni umsebenzi wokushumayela wamaNgqina kaYehova ehlabathini lonke. Safumana ithuba lokuncokola nangona wayexakekile.

Sathetha ngokuba kukho imfuneko yokuguqulela uncwadi lweBhayibhile ngolwimi lwesiTatar. Kwiminyaka kamva, kwasekwa iqela labaguquleli bolwimi lwesiTatar eRashiya yaye kwatsho kwabakho uncwadi ngesiTatar. Savuya ngenene xa IMboniselo, iphephancwadi elilungiselelwe ukufunda iBhayibhile, lafumaneka rhoqo. Kungekudala emva koko, kwasekwa ibandla lokuqala lolwimi lwesiTatar.

Ukusebenzisa Iindlela Zokunyanga Ezonga Igazi

Ndiyayithobela yonke imithetho kaThixo, kuquka nalowo ufumaneka kwiZenzo 15:20 oyalela abakhonzi bakaThixo ukuba ‘bakhwebuke . . . egazini.’ Indinyana 29 yongezelela isithi, abakhonzi bakaThixo bafanele “bakhwebuke kwizinto ezingcoliswe zizithixo nakuhenyuzo nakwinto ekrwitshiweyo.”

Ngoko xa amaNgqina kaYehova efuna uncedo lwezonyango, aye acele oogqirha ukuba basebenzise iindlela zokunyanga ezingasebenzisi igazi. Kangangexesha elithile, ndandisebenza neKomiti Yokunxibelelana Nezibhedlele yamaNgqina yaseKazan’.a Ngowe-1997, xa uPavel waseNovosibirsk owayenonyaka ubudala kwakufuneka enziwe utyando ngokukhawuleza, umama wakhe waqhagamshelana nathi ukuze simncede. Ngelo xesha, eRashiya babembalwa oogqirha abanamava ababevuma ukwenza utyando ngaphandle kokusebenzisa igazi. Savuma ukukhangela ugqirha owayeza kulenza olu tyando ngaphandle kokusebenzisa igazi.

Kungekudala safumana ugqirha kwikliniki eyenza utyando lwentliziyo eseKazan’ nowavumayo ukwenza olu tyando kuPavel. NgoMatshi 31, 1997, oogqirha batyanda uPavel ngaphandle kokusebenzisa igazi ukuze banyange isifo sentliziyo esibizwa ngokuba yitetralogy of Fallot. NgoAprili 3, iphephandaba iVechernyaya Kazan lathi: “Le nkwenkwana ibhetele ngoku yaye akuseyomfuneko ukuba isebenzise amayeza. . . Umama kaPavel watsho wonwaba okokuqala emva kweenyanga ezilishumi elinanye.” Kungekudala uPavel wachacha watsho wakwazi nokuhamba-hamba esibhedlele.

Ngoku uPavel ungumqabaqaba. Uyakuthanda ukuqubha, ukudlal’ umtyibilizi nebhola. Ufunda kwibanga lesithandathu yaye yena nomama wakhe bakwibandla lamaNgqina kaYehova elikwisixeko saseNovosibirsk. Emva kolu tyando oogqirha bale kliniki batyanda ngokuphumelelayo ezinye izigulana ezingamaNgqina kaYehova ngaphandle kwegazi. ETatarstan kwenziwa inkqubela kwezonyango yaye kuxhaphakile ukuba kwenziwe utyando kungakhange kusetyenziswe igazi.

Umsebenzi Wam Namhlanje

Mna nenkosikazi yam namanye amaNgqina sisebenza ekliniki enceda izigulana ezineengxaki zemithambo-luvo okanye ezentliziyo. Sityanda izigulana eziliqela ingakumbi ezo zisebenzisa iindlela zokonga igazi. Ndixilonga abantu ebuchotsheni yaye ndifundela ukwenza utyando ebuchotsheni ngaphandle kwegazi. Njengonjingalwazi weSebe Lezifundo Zemithambo-luvo kwiState Medical University yaseKazan’, ndifundisa abafundi abafundela ukuba ngoogqirha kunye noogqirha yaye ndizama ukubanceda babone iingenelo zokunyanga ngaphandle kokusebenzisa igazi.b

Sisebenza kunye nenkosikazi yam kodwa yona isebenza kwicandelo lokuxilonga. Siyawuthanda umsebenzi wethu kuba sinceda abantu. Kodwa eyona nto isivuyisa kakhulu kukubona indlela inyaniso yeBhayibhile ebanceda ngayo abantu babe nokholo kuThixo. Kuyasivuyisa ukuxelela abantu ngesithembiso sikaThixo sokuba kungekudala emhlabeni, “akakho ummi wakhona oya kuthi: ‘Ndiyagula.’”—Isaya 33:24.

[Imibhalo esemazantsi]

[Umfanekiso okwiphepha 12]

Xa ndandingugqirha eAfrika

[Umfanekiso okwiphepha 13]

Ngowe-1990, xa mna nenkosikazi yam saqalisa ukufundiswa iBhayibhile ngamaNgqina kaYehova

[Umfanekiso okwiphepha 14]

Ngowe-1993, xa ndandityelele eBrooklyn, eNew York ndikunye noLloyd Barry

[Umfanekiso okwiphepha 15]

UPavel ukunye nomama wakhe namhlanje

[Umfanekiso okwiphepha 15]

Ndisentsimini kunye nenkosikazi yam uDilbar