Ukuvala Umsantsa Phakathi Koogqirha Nabaguli AbangamaNgqina

EHLABATHINI lonke inye kuphela into eyaziwa ngoogqirha ngamaNgqina kaYehova: Awakwamkeli ukutofelwa igazi. Noko ke, oogqirha abaninzi bazi okuncinane gqitha ngamaNgqina. Ngoko xa befuna ukutofela igazi kumguli oliNgqina, ukungakwamkeli kwakhe bakujonga njengokungekho ngqiqweni ngokupheleleyo. Ngenxa yoku, kunokuvuleka umsantsa omkhulu phakathi kogqirha nomguli.

Bebonke bambalwa gqitha oogqirha abaqondayo ukuba amaNgqina kaYehova awachasananga nonyango lwezamayeza nokuba ukuma kwawo kumbandela wegazi akunakuguqulwa yaye kusekelwe ngokunzulu kumthetho ongokweZibhalo. Kwangaxeshanye, ukuba sengqiqweni koku kuma okungokweZibhalo ngokuqhubekayo kuye kwangqinwa luthotho lwencazelo entsha eye yafunyaniswa ngokwezenzulwazi mayela neengozi zokutofelwa kwegazi elingokwemvelo nokukhuseleka kokusetyenziswa kwezinye izinto endaweni yokutofela igazi. Kodwa amaNgqina kaYehova anokubenza njani oogqirha bezamayeza bayifumane le nkcazelo?

IiKomiti Zokunxibelelana Nezibhedlele

Kulo mba, iQumrhu Elilawulayo lamaNgqina kaYehova liye layalela ukuba kusekwe iikomiti zokunxibelelana nezibhedlele kwizixeko ezikhulu nezinamaziko amakhulu ezonyango. EUnited States, iikomiti ezinokuba likhulu, inye inamalungu amahlanu ngokomlinganiselo, sele zisenza unxibelelwano phakathi kwabo bakwimicimbi yezonyango namaNgqina. Ekuqaleni kwalo nyaka eli lungiselelo liye ladluliselwa nakwamanye amazwe. Ukususela ngoFebruwari 19 ukusa kuMatshi 27, amalungu amathathu eSebe Lenkcazelo Yezibhedlele eBrooklyn aye atyelela iiofisi zamasebe ezisibhozo zamaNgqina kaYehova kummandla wePasifiki.

Injongo yolu tyelelo yayintlu-ntathu: kukuqhuba iinkomfa zokuqeqesha abalungiseleli abangamaNgqina nabanyulwe kusengaphambili kumsebenzi weekomiti zokunxibelelana nezibhedlele, ukuqeqesha abasebenzi bamasebe ukwalathisa kwiSebe Lenkcazelo Yezibhedlele kwisebe ngalinye, nokutyelela izibhedlele noogqirha ukubakhuthaza ukuba baqhubeke baze bakhulise ubuchule babo ekunyangeni amaNgqina kaYehova ngaphandle kokusebenzisa igazi. Kwaqhutywa iinkomfa ezine; eyokuqala yayiseSydney kulungiselelwa isebe laseOstreliya nelaseNew Zealand; kwaqhutywa enye eManila ukwenzela iiPhilippines, iHong Kong neTaiwan; kwisiXeko sase-Ebina kwaqhutywa eyaseJapan neyaseKorea; yaye eyokugqibela yaseHawaii yaqhutyelwa eHonolulu.

Kule nkqubo kwakusetyenziswa iimifanekiso yeeslides neyevideo ekuchazeni imisebenzi noko kuqulethwe ligazi noludwe olwandayo lwezinto ezinokusetyenziswa endaweni yegazi elingokwemvelo. Kwezi ngxubusho kwagutyungelwa iindlela zokunceda amaNgqina kaYehova xa ejamelene neengxaki ezibandakanya igazi. Kwakule nkomfa kwagxininiswa imbaluleka yokusebenzisana noogqirha nezibhedlele, ngaloo ndlela kusenza kube lula ngabo ukukuhlonela ukuma kwamaNgqina. Elinye ilungu lale komiti yaseJapan lathi: “Enyanisweni olu cwangciso lusixhobisele ukuba siwusingathe kakuhle lo msebenzi wokuhlakulela ukuqondana.” AmaNgqina angaphezu kwangama-350 azo zonke iindidi zabantu aqeqeshwa kwezi nkomfa zine.

Ngaphambi kolu tyelelo, iiofisi zamasebe zalungiselela ukubonana noogqirha namalungu aphambili kwizibhedlele ezikhulu ukuze zixubushe ukungalwamkeli kwamaNgqina kaYehova unyango ekusetyenziswa kulo igazi. Amaqela amathathu kwisebe ngalinye abelwa ukuba enze olu tyelelo, qela ngalinye likhokelwa ngomnye wabameli abathathu abavela eBrooklyn. Oku akuzange nje kuphela kunikele uqeqesho olukhawulezileyo kwabo babelwe ukuba babe ngamalungu kwezi komiti zezibhedlele kodwa kwabenza baziva bekhululekile xa bethetha noogqirha neengcali zezempilo. Kwixesha leeveki ezintandathu kwenziwa amatyelelo anjalo angaphezu kwama-⁠55.

Unxibelelwano Olubangela Intsebenziswano

Oku kube nemiphumo emihle gqitha. EOstreliya elinye iqela elityelelayo lahlangana nesekela lomphathiswa wezempilo welizwe laseNew South Wales. Laxubusha naye ngokwenziwa kotyando ngaphandle kokusetyenziswa kwegazi kumaziko amaninzi ezempilo, licebisa ukuba elaseOstreliya linokuba liziko lotyando olunjalo lwamaNgqina kaYehova kuMzantsi Pasifiki. Eli sekela alizange lisibone isizathu sokuba kungenakusekwa amaqela oogqirha okwenza utyando olunjalo. Kwatyelelwa iindawo ezingama-22 eOstreliya. Omnye umalathisi wesinye isibhedlele wathi: “Ninolwazi olugqithisileyo ngombandela wegazi nowonyango ngaphandle kwalo kunokuba thina sisazi.” Intsumpa yequmrhu lezibhedlele ezisixhenxe yaqinisekisa ukuba yayiza kumisela unjingalwazi wotyando ukuba akhe aphande ngelinge lokumisela iqela labatyandi kwesinye sezibhedlele zabo ukuba silungiselele unyango lwamaNgqina kaYehova ekungasetyenziswa gazi kulo.

Kwiziko loqhaqho-fakelo lwentliziyo laseManila​—⁠eligqalwa ngabathile njengelilelona liphambili eMpuma⁠—​umalathisi wezamayeza waxelelwa ukuba amaNgqina kaYehova anokuba likhulu nalindele ukutyandwa iintliziyo ayebekwe ekugqibeleni kuludwe kuba engalamkeli igazi. Wathi uza kukutshitshisa oku. Umalathisi wezamayeza kwesona sibhedlele siphucukileyo kwiiPhilippines, iSt. Luke, waboniswa oko kuthethwa ziincwadi zonyango ngotyando ekungasetyenziswa gazi kulo, yaye wavuma ukuba lolona lukhuselekileyo. Wavuma esithi: “Le yeyona nto ifanelekileyo. Ikuphela kwendlela esinokuphepha ngayo uGawulayo nesifo sesibindi.” Wabonisa ukuba ukulungele ukuwavumela amaNgqina ukuba anyangwe ngaphandle kwegazi kwisibhedlele sakhe; ukwangumongameli weziko lokulondoloza igazi.

Kwinkomfa eyayiseJapan yeentsuku ezintathu, elaseKorea lalikwanabameli, kukho amaNgqina kaYehova angama-44, aba-⁠5 bawo bengoogqirha. Kwakukho abalungiseleli abangama-255 abangamaNgqina abavela eJapan, kuquka oogqirha abangama-41, phakathi kwabo kukho noogqirha bokutyanda bezigulo ezinxulumene nentloko nabokuphelisa iintlungu ngexesha lotyando, ndawonye namagqwetha amabini. Kwasekwa iikomiti ezingamashumi amabini eJapan, nezisixhenxe eKorea.

Emva kwale nkomfa, abahlohli bahamba namalungu asekuhlaleni eekomiti zesibhedlele ukuya kutyelela oogqirha nezibhedlele ezikwimimandla yaseTokyo ukuze kusekwe umoya wentsebenziswano. Omnye umlungiseleli waseJapan unikela le ngxelo: “Satyelela isekela likanjingalwazi wezokubelekisa kwisibhedlele saseyunivesithi. Uye wabelekisa abafazi abalishumi abangamaNgqina kaYehova. Omnye wabo ngenxa yokopha walahlekelwa ligazi elingangekyubhiki sentimitha ezingama-2 800, yaye umlinganiselo wehemoglobin yakhe wehla waba ziidesilitha ezisisi-3,5 ngegram nganye. (Umlinganiselo owamkelekileyo kwibhinqa ngalinye ziidesilitha ezili-14 ngegram.) Kodwa lo gqirha wakwazi ukumbelekisa ngaphandle kokusebenzisa igazi. Nangona engumBhuda, inkqubo yakhe yeyokuxabisa inkolelo yabaguli abanyangayo. Wavuma ukuqhubeka ebamkela abaguli abangamaNgqina kaYehova.”

Umalathisi wezamayeza waseYokohama wavuma ukuba isibhedlele sakhe sibalelwe kwizibhedlele ezikulungeleyo ukusebenzisana nabaguli abangamaNgqina waza wathi baya kukuvuyela nokwamkela lawo angamkelwanga kwezinye izibhedlele. Lo gqirha wathi: “Ukunyanga amaNgqina kaYehova ngaphandle kokusebenzisa igazi enyanisweni kulucelomngeni, kodwa ndiyawaxabisa amaNgqina kuba andivulele ithuba lokuphucula ubuchule bam njengogqirha.” Kwakhona omnye ugqirha ongumbelekisi eYokohama wathi: “Ndiya kuwalwela amalungelo omguli nasenkundleni ukuba bendiya kumangalelwa ngokungatofeli igazi ngenxa yokuthobela oko kukukuthanda komguli.”

Iikomiti ezasekwa eKorea zinikela ingxelo yempumelelo entle. NgoMeyi 26 kwatyelelwa iSibhedlele seYunivesithi iYonsei. Saziwa ngokubanzi kwelaseKorea yaye sinamasebe amathathu. Amalungu awo onke la masebe ayekho, abantu abangama-62 bebonke. Unjingalwazi wokuphelisa iintlungu ebudeni botyando wathetha phantsi komxholo othi “Ukusetyenziswa Kwamayeza Okuphelisa Iintlungu Kubaguli AbangamaNgqina KaYehova.” Inkcazelo awayinikelayo iza kubhalwa kulindixesha waseKorea wezamayeza okuphelisa iintlungu. Ekubeni sisesinye sezibhedlele eziphambili eKorea, oku kufanele kube nempembelelo entle nakwezinye izibhedlele nakwabanye oogqirha. Akukho mbuzo waphakanyiswayo ongazange uphendulwe ngokucokisekileyo kwinkomfa eyayiseJapan.

Kwasekwa iikomiti zantlanu zonxibelelwano eHawaii, yaye zonke zeza eHonolulu ukuze zibekho kule nkomfa. Inkoliso yamalungu azo kwahanjwa nayo ukuya kutyelela izibhedlele. KwiZiko Lezempilo laseHawaii, umalathisi wasixelela ukuba wayeza kubhala inqaku elithetha ngathi kwincwadi yamalungu ukuze ithunyelwe kuzo zonke izibhedlele zaseHawaii.

Kwelona ziko likhulu lezempilo, iQueen’s eHonolulu, le komiti yabonisa ukuba ifomu etyobelwa ngumguli ngaphambi kotyando inamazwi athile ayimpazamo nangathethi kakuhle ngamaNgqina kaYehova. Le fomu yayibonisa ukuba amaNgqina axolele ukufa kunokuba atofelwe igazi “elisindisa ubomi.” Kwacaciswa ukuba le asiyondlela esizijonga ngayo izinto kwaphela, ukuba siza esibhedlele ngenjongo yokukhusela impilo nobomi bethu. Amazwi abo aye adlulisela ingcamango yokuba igazi lilunge gqitha yaye alikho igazi elibulalayo. Amazwi abo awazange ayikhankanye into yokuba ubani usenokufa ngenxa yokutofelwa igazi, ngaloo ndlela bengamniki umguli ilungelo lokukhetha enolwazi ngeengozi akulungeleyo ukujamelana nazo. Igqwetha lesi sibhedlele lathi: “Khawuthi ke ndibone!” Njengoko lalifunda, lathi: “Andizange ndibhale le nto mna!” Njengoko igqwetha nomlawuli babehamba, umlawuli wathi kwigqwetha: ‘Ndicinga ukuba sifanele siluhlole kwakhona sisobabini olu xwebhu.’

Ikomiti Entsha Iyayifeza Injongo Yayo

Emva kweentsuku nje ezimbalwa emva koqeqesho lwaseHawaii, iNgqina elithile labalekiselwa esibhedlele ngenxa yokopha gqitha, umlinganiselo wegazi lalo uphantsi ngokuyingozi. Akuzange kufunyaniswe ukuba lopha phi na; kwafuneka kwenziwe utyando lokuhlola. Ugqirha zange afune ukwenza utyando ngaphandle kwegazi. Ladluliselwa kwesinye isibhedlele nalapho ugqirha wala ukwenza utyando. Yavela apho ke ikomiti yonxibelelwano ebisandul’ ukusekwa, yaza yathethathethana nogqirha ongumalathisi nogqirha owayesingathe lo mcimbi, yaza yacacisa ukuba, ngandlel’ ithile oku kukungakhathalelwa komguli. Sekunjalo oogqirha bala ukwenza utyando baza bashiywa benjalo. Abanye oogqirha ababini bafika. Balwenza utyando, baza bawufumana unobangela wokopha, yaye bawulungisa loo ndonakele. Udade wethu waphila. Ukuba yayingazange ingenelele ikomiti yonxibelelwano, mhlawumbi ngewayefile, yaye amaziko eendaba ngewayesichaze esi siganeko njengenye imeko yeNgqina ‘elifa ngenxa yokungalamkeli igazi eliyimfuneko.’ Enyanisweni, kwiimeko ezinjalo amaNgqina aye afa kungakhange kwenziwe utyando olufunekayo ngoxa oogqirha abawaziyo umsebenzi wabo ngebewasindisile.

Ngoko, ngokomlinganiselo wehlabathi lonke, iikomiti zonxibelelwano nezibhedlele zisebenzela ukuvalwa komsantsa phakathi kwabezonyango namaNgqina kaYehova ngothethathethwano olunentsingiselo nangokuqondana. Oku kuye kwanemiphumo emihle. Oogqirha abangakumbi baya bebona ukuba ngokusetyenziswa kakuhle kwamayeza nangobuchule bokutyanda banokukwazi ukusebenzisana neenkolelo zamaNgqina kaYehova. EUnited States, oogqirha abangaphezu kwama-6 500 bakulungele ukwenjenjalo.

Kwelawo icala, amaNgqina afanele aqhubeke esenza wonke umgudu wokuba ngabaguli abanentsebenziswano nabasebenzisa ingqiqo. Ngenxa yoko, abanye oogqirha bade babonise ukuwahlonela amaNgqina ngenxa yokunamathela kwawo kwimigaqo ephakamileyo. Kunjengokuba isekela likanjingalwazi oyingcali kumalungu ahamba umchamo kwikholeji yezamayeza yaseTokyo lathi: “Ndiyabahlonela abaguli abangamaNgqina kaYehova. Banemigaqo ababambelele kuyo kwihlabathi elinabantu abangenayo.”

Eyona njongo iyintloko yezi nkomfa nala matyelelo kukukhuthaza umoya wokusebenzisana ngokunesidima yaye ngaloo ndlela kupheliswa ukungavisisani. Bonke abo babebandakanyekile kweli phulo bavakalelwa lelokuba le njongo yafikelelwa ngemiphumo emihle. Sinenkolelo yokuba uYehova uya kuqhubeka eyisikelela imigudu elolu hlobo aze abazimase abo bathobela ulwalathiso lukaYehova lokuzinxwema egazini, njengoko iLizwi lakhe libayalela ukuba benjenjalo.

[Ibhokisi ekwiphepha 31]