Iqokobhe Lenkumba Enamaxolo Ezinyaweni

Ngaba Ladalwa?

● Le nkumba inelinye lawona maqokobhe omeleleyo kwawakhe abonwa. Ifumaneka enzulwini yoLwandle lwaseIndiya, inako ukudada ingakhukuliswa ngamanzi naxa ikubunzulu obuziimitha ezingama-2 400. Ukongezelela, le nkumba ayenzakaliswa yiasidi esemanzini okanye kukutshintsha-tshintsha kobushushu bawo kuquka namanzi atshisayo avela phantsi kwesanti. Iqokobhe layo liyikhusela nakwezinye izilwanyana.

Khawucinge ngoku: Iqokobhe lale nkumba lineengcamba ezintathu. Ucamba lokuqala lwenziwe ngeiron sulfides; olwesibini lufana neqokobhe lweprotini oludla ngokufumaneka nakwezinye iinkumba; olwesithathu lwenziwe ngearagonite. Ekubeni eli qokobhe lineengcamba ezintathu liyakwazi ukukhusela le nkumba koononkala abazama ukulophula ngeenzipho zabo. Ngamanye amaxesha unonkala ukhe alibambe kangangeentsuku eli qokobhe ezama ukulophula kodwa atsho phantsi.

Iphephancwadi iDiscover lithi abaphandi ababetha iqokobhe lale nkumba ngesixhobo esitsolo bafumanisa ukuba “umphandle walo wenziwe ngohlobo lokuba kungaveli iintanda ezinkulu xa lichachamba. Iintanda zivela kuphela kule ngcamba yokuqala. Loo nto ithintela ukuvela kweentanda ezinkulu.” Ukanti ingcamba engaphakathi ixhathisa izinto ezihlasela iqokobhe.

Abaphandi bafunda indlela eyenziwe ngayo le nkumba enamaxolo ezinyaweni ngethemba lokuba nabo baza kukwazi ukwenza oomakarabha, iibulletproof vest, amacangci eenqanawa naweenqwelo-moya omelele ngakumbi. Iphephancwadi iDiscover lithi: “Nemibhobho yeoli edla ngokubethwa ngumkhenkce kwiindawo ezinjengeArctic isenokuphuculwa.”

Ucinga Ntoni? Ngaba iqokobhe lenkumba enamaxolo ezinyaweni labakho ngamabona-ndenzile? Okanye ngaba ladalwa?

[Umzobo okwiphepha 23]

(Ukuba ufuna inkcazelo ehlahlelwe kakuhle, yiya kwimpapasho)

Isixhobo esitsolo abaphandi abasisebenzisayo

Ingcamba yangaphandle

Ingcamba yesibini

Ingcamba yesithathu

[Inkcazelo Ngomfanekiso okwiphepha 23]

Courtesy Anders Warén