Idengue—Isifo Esiyingozi Esisasazekayo

“Isebe Lezempilo laseMorelos . . . , neBhodi yezeMpilo yeSigqeba seDolophu yaseEmiliano Zapata lijizeka iHolo yoBukumkani yamaNgqina kaYehova ngesatifiketi . . . ngenxa yomsebenzi [wamaNgqina] wokucoca le holo ukuze ingabi nandawo zinokuzalela kuyo iingcongconi ezithwala isifo sedengue.”

ABASEMAGUNYENI eMexico banesizathu esivakalayo sokuxhalaba ngenxa yeengcongconi ezithwala izifo. Ezi zinambuzane zinokudlulisela iintsholongwane eziyingozi ezinokubangela isifo sedengue esibulalayo nesiye safunyanwa ngabantu baseMexico abangaphezu kwama-57 000 ngowama-2010. IMexico ilelinye lamazwe angaphezu kwe-100 esisasazeke kuwo esi sifo. Eneneni, sithethanje iWorld Health Organization (WHO) iqikelela ukuba basenokuba zizigidi ezingama-50 ehlabathini abantu ababa nesi sifo nyaka ngamnye, yaye abantu ababini kwabahlanu kubo bonke abemi behlabathi basesichengeni sokuba nesi sifo. Ngenxa yoko, amagosa ezempilo aye aphuma iphulo lokubulala iingcongconi ezinebala elimhlophe ekuthiwa ziiAedes aegypti, esinye sezona zinambuzane zidlulisela intsholongwane yesifo sedengue.a

Idengue ixhaphakile kwiindawo ezinemozulu eshushu neneemvula, ingakumbi ngexesha leemvula nasemva kweentlekele ezifana nenkanyamba okanye izikhukula. Oku kubangelwa kukuba ingcongconi iAedes elithokazi izalela amaqanda ayo naphi na apho kukho amanzi amileyo.b Ekubeni abantu bakuMbindi nakuMzantsi Merika nabakwiziqithi zeCaribbean besikha amanzi baze bawafake kumatanki esamente, iingcali zezempilo zibakhuthaza ukuba bawavale la matanki. Oku kuthintela iingcongconi ukuba zingazaleli kula matanki. Kwakhona, abantu bayakuthintela ukwanda kwezi ngcongconi xa beqiniseka ukuba emizini yabo azikho izinto ezifana namatayara amadala, nezinye izinto ezingasetyenziswayo njengeetoti, iivazi zokufaka iintyantyambo, iiemele zeplastiki ezindala—nayo nantoni na enokugcina amanzi.

Ukuxilonga Nokumelana Nesifo Sedengue

Esi sifo asidli ngakuqapheleka kuba iimpawu zaso zifana nezomkhuhlane. Kodwa ke i-WHO ithi ufanele ulumke xa unomkhuhlane yaye ugubhuka, uqaqanjelwa ngamehlo, izihlunu namalungu. Lo mkhuhlane udla ngokuthatha iintsuku ezintlanu ukusa kwezisixhenxe.

Okwangoku oogqirha abakalifumani iyeza lokunyanga esi sifo kodwa ke izihlandlo ezininzi unokuchacha kuso ngokuhlala ekhaya nangokusela izinto ezahlukahlukeneyo. Noko ke, izigulana zifuna ukubekwa esweni ukuze lo mkhuhlane ungade uqatsele kangangokuba zide zophele ngaphakathi. Oku kunokwenzeka emva kokudamba komkhuhlane xa kubonakala ngathi isigulana siyachacha. Ubona ngantoni xa esi sifo sifikelela kweli nqanaba liyingozi? Uye uqaqanjelwe kakhulu sisisu, usoloko uhlanza, umongoze uze wophe kwiintsini, ukhuphe ilindle elimnyama uze ube namaqhakuva abomvu phantsi kolusu. Ezinye iimpawu zisenokuquka ukungabi nabuthongo, ukunxanwa ngokugqithiseleyo ukujika kwebala nokubanda kolusu kunye nelow blood pressure.

Okubuhlungu kukuba amachiza alwa nezifo akakwazi kuyinyanga idengue ngenxa yohlobo lwentsholongwane eyibangelayo. Kwakhona, umntu onesi sifo kufuneka akulumkele ukusela amayeza anjengeaspirin neibuprofen ekubeni enokubangela ukuba ophe. Kukho iintlobo ezine zentsholongwane yedengue yaye umntu usenokuhlaselwa sesi sifo izihlandlo eziliqela.

Xa unesi sifo kufuneka uphumle ngokwaneleyo uze uqiniseke ukuba usela iziselo ezahlukahlukeneyo. Kwakhona qiniseka ukuba uyazikhusela ukuze ungalunywa ziingcongconi zize zisasaze esi sifo nakwabanye abantu.

Unokuzikhusela kanjani kwiingcongconi? Nxiba impahla enemikhono emide, ibhulukhwe okanye ilokhwe ende uze uthambise izinto ezigxotha iingcongconi. Nangona iingcongconi zinokukuluma nangaliphi na ixesha, zinobungozi kwiiyure ezimbini ngaphambi kokutshona kwelanga okanye ngaphambi kokuphuma kwalo. Kwakhona, ukulala phantsi kwenethi ezingakwazi ukungena kuyo iingcongconi nefakwe amayeza okuzigxotha kuyakhusela.

Mhlawumbi liza kude lifunyanwe iyeza lokunyanga esi sifo. Kodwa ekugqibeleni, uBukumkani bukaThixo buza kuziphelisa zonke izifo kuquka nalo mkhuhlane. Eneneni liyeza ixesha laxa uThixo eya “kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4.

[Imibhalo esemazantsi]

[Umzobo okwiphepha 25]

(Ukuba ufuna inkcazelo ehlahlelwe kakuhle, yiya kwimpapasho)

Iindawo Ezidla Ngokuzalela Kuzo Iingcongconi

1. Amatayara amadala

2. Imibhobho ekhongozela imvula

3. Iivazi zeentyatyambo

4. Iiemele zeplastiki ezindala

5. Iitoti ezilahliweyo

Zikhusele Kwiingcongconi

a. Nxiba impahla enemikhono emide, ibhulukhwe okanye ilokhwe ende. Thambisa izinto ezigxotha iingcongconi

b. Lala phantsi kwenethi ezingakwaziyo ukungena kuyo iingcongconi

[Inkcazelo Ngomfanekiso okwiphepha 24]

Source: Courtesy Marcos Teixeira de Freitas