Ucelomngeni Lokunganyaniseki
“Abantu abanyanisekileyo kwezoshishino bashiywe lixesha, yaye abo bazama ukunyaniseka abanakuze baphumelele.”—UStephen, waseUnited States.
NGABA uyavumelana nale ngcamango? Liyinyaniso elokuba, ukunganyaniseki kudla ngokuba yingenelo—kodwa ke ayihlali ihleli. Loo nto iye yabangela ukuba abantu abaninzi abazama ukunyaniseka balingeke ukuba banganyaniseki kwezi meko zilandelayo.
Isilingo Somntu Ngamnye. Wonke umntu angakuvuyela ukuba nemali okanye izinto ezingakumbi ebengenakukwazi ukuba nazo. Loo nto yenze ukuba kube nzima ukuzibamba xa kuvela ithuba lokuba nemali engakumbi ngondlela-mnyama.
● “Ndim okhupha izivumelwano zomsebenzi kwinkampani endiyisebenzelayo. Ngenxa yoko ndihlala ndinunuswa ngezinyobo. Kunzima ukungazamkeli kuba kaloku le yimali eza lula.”—UFranz, wakuMbindi Mpuma.
Ucelomngeni Lokuba Nengeniso Ethe Chatha. Kwiminyaka yakutshanje, ehlabathini jikelele, amashishini aye atsala nzima ngenxa yokudodobala kwezoqoqosho. Akwafanele amelane notshintsho olukhulu kwezobugcisa nokhuphiswano oluya lukhula ngakumbi. Ngoko abaqeshwa banokuziva benyanzelekile ukuba banganyaniseki ngenxa yokufuna ukufikelela usukelo abalubekelwe ngabaqeshi nabaphathi babo.
● “Sasicinga ukuba sinyanzelekile ukuba singanyaniseki. . . . Kungenjalo sasisithi inkampani yethu iya kuwa.”—UReinhard Siekaczek, owabanjwa ngenxa yokunyoba.—INew York Times.
Ucelomngeni Oluvela Kwabanye Abantu. Maxawambi abantu osebenza nabo okanye abathengi banokukucebisa okanye bakunyanzele ukuba ubathelele kumacebo okunganyaniseki.
● “Omnye umphathi wenkampani esasisebenzisana nayo wathi kum, ‘ukuba andimnyengezeli mali uya kuyeka ukusebenzelana nale nkampani yethu’—nto leyo yayinokubangela ukuba siphulukane nomsebenzi omninzi.”—UJohan, waseSouth Africa.
Izithethe. Kwezinye iindawo, kuyinto eqhelekileyo ukuba umntu aphiwe izipho ngokwenza umsebenzi wakhe. Ngexa yeso sipho kunokuba nzima ukuqonda ukuba umsebenzi lowo wenziwe ngokunyaniseka kusini na. Kwamanye amazwe abantu abasemagunyeni baye bafune ukunyotywa ukuze bancede abantu, yaye bayakuvuyela ukuhlawulelwa ukuba baphathe umntu othile ngendlela eyahlukileyo kwabanye.
● “Oku kubangela ukuba kube nzima ukwahlukanisa isipho kwisinyobo.”—UWilliam,waseColombia.
Indawo Ohlala Kuyo. Abantu abahlala kumazwe ahlwempuzekileyo apho kungekho mithetho ingqongqo bajamelana nocelomngeni olukhulu kakhulu. Kwiindawo ezinjalo abantu abangakufuniyo ukuqhatha okanye ubusela basenokujongwa njengabangakwaziyo ukunyamekela iintsapho zabo.
● “Ukunganyaniseki kujongwa njengento eqhelekileyo neyimfuneko yaye kwamkelekile ukuba nje akubhaqwa”—UTomasi, waseCongo Kinshasa.
Indlela Ekusingelwa Phantsi Ngayo Ukunyaniseka
Ucelomngeni lokunganyaniseki luye lwanegalelo elikhulu ebantwini. Uhlolisiso lwabaphathi bamashishini eOstreliya lubonisa ukuba abaphathi abalithoba kwabalishumi bathi ubuqhetseba nokunyoba “akulunganga kodwa ke akunakuphepheka.” Abo babebuzwa kolo hlolisiso bathi banokuzityeshela izazela zabo ukuba nje oko kuzisa iingenelo kwiinkampani zabo.
Noko ke, abo babandakanyeka kwizenzo zokunganyaniseki bazibona njengabantu abanyanisekileyo. Bakwazi njani ukulungelelanisa indlela abajongwa ngayo nendlela abenza ngayo izinto ezinganyanisekanga? IJournal of Marketing Research ithi: “Abantu abasaziva kukunganyaniseki bade bacinge ukuba banyanisekile nokuba benza izenzo zokunganyaniseki.” Ukuze bangatyiwa sisazela bakujonga njengento engabalulekanga ukunganyaniseki yaye bade bakuthethelele ngeendlela ezininzi.
Ngokomzekelo, ukunganyaniseki kunokuchazwa ngendlela ebonakala ngathi akukho nto imbi ngako. Ubusela okanye ubuqhetseba kunokuthiwa nje “kukuhamba ngezinqumlayo” okanye “kukukhuphisana.” Ukunyoba kunokuchazwa nje ngokuthi “kukunceda” okanye “kukongeza emvuzweni.”
Abanye bathethelela indlela yabo yokuziphatha ethandabuzekayo ngokukungxenga oko kukuko ukunyaniseka. UTom osebenza kwezoqoqosho ukubeka ngoluhlobo oku: “Indlela abakuchaza ngayo abantu ukunyaniseka ixhomekeke kubuchule babo bokutolika umthetho kunoko ikuko eyona nyaniso.” UDavid owayesakuba ngumphathi weshishini uthi: “Nakubeni ukunganyaniseki kujongwa njengehlazo xa kubhenciwe, kodwa kujongwa njengobamkelekileyo ukuba umntu uye wafumana indlela yokubufihla. Abantu abakwazileyo ukuphuncula bajongwa njengabakrelekrele.”
Abantu abaninzi banokude bathi kufuneka unganyaniseki ukuba ufuna ukuphumelela. Usomashishini oligqala uphawula oku: “Isimo sengqondo sokukhuphisana sibenza abantu bathi, ‘Kufuneka wenze nantoni na ukuze uwufumane umsebenzi.’” Kodwa ngaba yinyaniso leyo? Okanye ngaba abo bakuthethelelayo ukunganyaniseki ‘bazikhohlisa ngokuqiqa okuphosakeleyo’? (Yakobi 1:22) Funda ngeengenelo zokunyaniseka kweli nqaku lilandelayo.
[Amagama acatshulweyo akwiphepha 5]
“Indlela abakuchaza ngayo abantu ukunyaniseka ixhomekeke kubuchule babo bokutolika umthetho kunoko ikuko eyona nyaniso”
[Umfanekiso okwiphepha 5]
Abantu abaninzi bathi kufuneka unganyaniseki ukuba ufuna ukuphumelela