Ukunyaniseka Kuneenzuzo
“Siyayolisa emntwini isonka esizuzwe ngobuxoki, kodwa emva koko umlomo wakhe uya kuzaliswa luhlalutye.”—IMizekeliso 20:17.
NGABA kunyanzelekile ukuba ubhenele ebuxokini ukuze uphumelele kwezoshishino? Akunjalo. Eneneni, xa umntu enganyanisekanga ufaka kwayena engxakini. Ngoba? Ngenxa yokuba ukunganyaniseki kukwenza ungathenjwa ngabantu. Ukunyaniseka kubalulekile kuba kukwenza uthembeke, nto leyo enokukunceda uphumelele.
Ukubaluleka Kokuthembeka
Ukwaziwa njengomntu onyanisekileyo kuba negalelo kwimpumelelo yakho—enoba uyayazi loo nto okanye akuyazi. Ubungqina boku sibubona koko kwenzeka kuFranz, obekhankanywe kwinqaku lokuqala. Uthi: “Xa ndandiqala ukusebenzela abaqashi bam, bandilinga ngeendlela ezininzi ukuze babone enoba ndinyanisekile kusini na, ibe mna ndandingayazi loo nto. Ndayazi kamva into yokuba babekholisekile ndim. Ngexa yoko, ndanikwa iimbopheleleko ezininzi nenkululeko engakumbi kwaye abaphathi bam bandivuza ngokunyaniseka. Ndiyazi ukuba bakho abanye abantu abakrelekrele abebenokuwenza bhetele umsebenzi endiwenzayo. Noko ke, ndicinga ukuba lo msebenzi ndiwunikwe kuba abaqashi bam bendithembile.”
Kuphephe Ukuzifaka Engozini
UDavid, usomashishini ebesikhe sathetha ngaye kwinqaku elandulela eli, uthi: “Njengoko ndandibukele abantu besenza ubuqhophololo ukuze bafumane inzuzo yokwexeshana, ndandizixelela oku, ‘Iya kufika imin’ esisidenge apho isikhuni siya kubuya nomkhwezeli.’ Ngamany’ amazwi, ekugqibeleni ukunganyaniseki kuzisa iingxaki. Sakhaba iindlela ezininzi zoshishino ezingaqondakaliyo. Iinkampani ezininzi ezazifak’ isandla kwezo ndledlana zobuqhophololo zatshona, yaye abanye abantu babanjwa. Kodwa eyethu inkampani yaziphepha ezo ngxaki.”
UKen, owayeneshishini lokufuya iinkomo kumzantsi-mpuma Afrika, wayesenokuhendeka ukuba anyobe amagosa karhulumente ukuze angenise iinkomo ezingakumbi ngaphandle kokuhlawula irhafu. Uthi: “Maninzi amanye amafama awaziqhelisa lo mkhwa. Ngenxa yokuba sasihamba ngomgca wempuku kwinto yonke, kwasithatha iminyaka elishumi ukuze ifama yethu iqhube kakuhle. Ngaba sancedakala phofu? Kunjalo kanye! Abo bantu babeziqhelise ukunyoba babedla ngokuphela sele bexhatshazwa ngaloo magosa anobuqhophololo efuna imali engakumbi.”
Ukumelana Neengxaki Zoqoqosho
Xa ishishini libonakala lisecicini lokutshona, kuba lelona xesha linzima yaye umntu anokuzibona sele ebhenela ekunganyanisekini. Noko ke, ikwalelona xesha onokuzibona ngalo iingenelo zokwaziwa njengomntu onyanisekileyo.
Khawucinge nje ngoBill, owayeneshishini lokwakha elatshona ngexesha lokudodobala kwamashishini okwakha izindlu eUnited States. Uthi: “Abantu abaninzi esasibakhela baphulukana namashishini abo yaye babesityala amakhulu amawaka eerandi. Kwathi xa kubonakala ngathi amathemba aphelile kuthi, ndaya kwenye inkampani yokwakha ukuze ndibone enoba bangasiqasha kusini na. Kungekapheli neentsuku ezimbini emva koko, bandithembisa ngokundiqasha kunye noninzi lwabasebenzi bam. Ndaxelelwa ukuba ukuthembeka kwam nomsebenzi omhle endandiwenza wawusaziwa kulo lonke.”
Bonke aba bantu ekuthethwe ngabo ngasentla bangamaNgqina kaYehova. Indlela abawaqhuba ngayo amashishini abo, kunye nazo zonke iinkalo zobomi babo, zisekelwe eBhayibhileni. Njengoko ubonile, kunokuba ukunyaniseka kutshonise amashishini abo kuye kwabazisela iingenelo ezininzi.
Sekunjalo, kuya kusoloko kukho imeko apho ukungayaniseki kunokubonakala ngathi kuneengenelo. Ngaba ukuzuza imali kuyeyona nto iphambili ukuze umntu aphumelele?
[Amagama acatshulweyo akwiphepha 6]
Ukwaziwa njengomntu onyanisekileyo kuba negalelo kwimpumelelo yakho—enoba uyayazi loo nto okanye akuyazi
[Umfanekiso okwiphepha 7]
“Ndaxelelwa ukuba ukuthembeka kwam nomsebenzi omhle endandiwenza wawusaziwa kulo lonke.”—UBill, waseUnited States