INQAKU ELINGUMXHOLO | KUTHENI UMELE UNYANISEKE?

Ukunganyaniseki Kwenza Ntoni Kuwe?

“Zihlala zikho izinto ezinzima ezifuna ukulungiswa ngokuxoka.”—USamantha, eMzantsi Afrika.

Ngaba nawe utsho? NjengoSamantha sonke sikhe sakwimeko efanayo. Indlela esenza ngayo xa sikwimeko enokusilingela ekubeni singanyaniseki ibonisa ukuba yiyiphi eyona ndlela yokuziphatha esiyithandayo. Ngokomzekelo, ukuba asikuthandi ukuhlazeka, sisenokuqonda ukuba eyona nto kufuneka siyenze kukuxoka. Xa inyani ivela, ukunganyaniseki kuba nemiphumo emibi. Khawucinge ngoku.

UKUNGANYANISEKI KUPHELISA UKUTHENJWA

Ubuhlobo bakhiwa ngokuthembana. Xa abantu ababini bethembana, baziva bekhuselekile. Sekunjalo, ukuthembana akwenzeki ngokuqhwanyaza kweliso. Xa bechitha ixesha kunye, bencokola kwaye bengacingeli iziqu zabo, abantu bayathembana. Kodwa oko kuthembana kunokupheliswa sisenzo nje esinye sokungathembeki. Ibe xa kuphelile, kuba nzima ukuphinda kube khona.

Ngaba wakha waqhathwa ngumntu owawumthembile? Ukuba kunjalo, wathini? Kusenokwenzeka ukuba waphoxeka ibe waba buhlungu. Kuyaqondakala oko. Ngokuqinisekileyo ukunganyaniseki kunokusihlutha izinto ezixabisekileyo, njengobuhlobo.

UKUNGANYANISEKI KUYOSULELA

Kuphando awalenzayo uprofesa Robert Innes wezoqoqosho kwiYunivesithi yaseKhalifoniya wafumanisa ukuba “ngokwenene ukunganyaniseki kuyosulela.” Kunokufaniswa nentsholongwane—njengoko usiya usondelelana nomntu onganyanisekanga, uzibeka esichengeni “sokosulelwa” kukunganyaniseki kwakhe.

Ungawuphepha njani umgibe wokunganyaniseki? IBhayibhile ingakunceda. Khawufunde le migaqo yeBhayibhile ilandelayo.

Iintlobo Zokunganyaniseki

Ubuxoki

YINTONI? Kukuthetha into engeyonyani kulowo unelungelo lokwazi inyani. Ubuxoki busenokuquka ukujija inyaniso, ukushiyelela inkcazelo ebalulekileyo nokubaxa inyani.

OKUTHETHWA YIBHAYIBHILE: “Umntu otenxayo uyinto ecekisekayo kuYehova, kodwa ukusondelelana naye kokwabo bathe tye.” (IMizekeliso 3:32) “Ekubeni nikulahlile ukuxoka, ngamnye kuni makathethe inyaniso nommelwane wakhe.”—Efese 4:25.

Ukunyelisa

YINTONI? Kukutyabeka umntu ngezimangalo zobuxoki ezinokungcolisa igama lakhe.

OKUTHETHWA YIBHAYIBHILE: “Umntu oliqhophololo uhlala ebangela usukuzwano, yaye umnyelisi wahlukanisa abo bazanayo.” (IMizekeliso 16:28) “Apho kungekho nkuni uyacima umlilo, nalapho kungekho mnyelisi usukuzwano luyadamba.”—IMizekeliso 26:20.

Ubuqhetseba

YINTONI? Kukubangela ukuba umntu afumane imali okanye indlu ngondlela mnyama.

OKUTHETHWA YIBHAYIBHILE: “Uze ungamqhathi umqeshwa osenkathazweni nolihlwempu.” (Duteronomi 24:14, 15) “Oqhatha osweleyo uyamngcikiva uMenzi wakhe, kodwa obabala ihlwempu uyamzukisa.”—IMizekeliso 14:31.

Ubusela

YINTONI? Kukuthatha into yomnye umntu ngaphandle kwemvume yakhe.

OKUTHETHWA YIBHAYIBHILE: “Lowo ubayo makangabi seba, kunoko makasebenze nzima, esenza umsebenzi olungileyo ngezandla zakhe, ukuze abe nento yokwabela lowo usweleyo.” (Efese 4:28) “Ningalahlekiswa. Amasela, nabantu ababawayo, namanxila, nabatshabhisi, nabaphangi abayi kubudla ilifa ubukumkani bukaThixo.”—1 Korinte 6:9, 10.