Abantu Abaselula Bayabuza
Bekutheni Ukuze Ndithethe Loo Nto?
Eli nqaku liza kukunceda uqonde ukuba
KUTHENI uthetha izinto eziphosakeleyo ngamanye amaxesha
YINTONI ofanele uyenze xa uthethe ungacinganga
Unokululawula NJANI ulwimi lwakho
“Andifane ndithethe ndingacinganga kodwa ngamanye amaxesha ndikhe ndiphazame ndize ndizisole!”—UChase
“Ngamanye amaxesha ndikhe ndithethe izinto ebendingafanele ndizithethe. . . ndize ndizisole!”—UAllie
ISIZATHU SOKUBA OKO KUSENZEKA
sibhalo esinokukunceda: “Ukuba kukho nabani na ongakhubeki zwini, lowo uyindoda egqibeleleyo.” (Yakobi 3:2) Sithetha ukuthini esi sibhalo? Akukho mntu unokuze alulawule ngokupheleleyo ulwimi lwakhe. Abantu abaninzi banokuvakalelwa njengoAnnette,a othi: “Ngamanye amaxesha ndikhe ndizimisele ukungakhuphi nelimdaka, kodwa ndizive sele ndithetha yonk’ into le.”
Ibali lokwenyaniso: “Umhlobo wam wakha wathi uthanda impahla ethile endandifun’ ukuyilahla. Ndaziva sele ndithe, ‘andiqondi ukuba iza kukulingana.’ Waphendula wathi, ‘Uzam’ ukuthi ndityebile ke ngoku?’”—UCorrine.
Ukuze uqonde isizathu sokuba ukhe uthethe ungacinganga, zama ukusebenzisa ezi ndlela zilandelayo.
● Zama ukuqonda apho ubuthathaka khona.
․․․․․ Ndidla ngokudubuleka xa ndinomsindo
․․․․․ Ndidla ngokusuka ndithethe ndingakhange ndicinge
․․․․․ Ndidla ngokuphendula ndingakhange ndive kakuhle ukuba kuthiwani
․․․․․ Ezinye ․․․․․
Umzekelo: “Ndinengxaki yokuthanda ukuqhula, yaye ngamanye amaxesha abantu baye bakhubeke.”—UAlexis
● Ngoobani ekusenokwenzeka ukuba uphulukwe xa uthetha nabo?
․․․․․ Umzali
․․․․․ Umntwana wakowenu
․․․․․ Umhlobo
․․․․․ Abanye abantu ․․․․․
Umzekelo: UChristine oneminyaka engama-20 ubudala uthi: “Okubuhlungu kukuba, abona bantu ndidla ngokubakhathaza ngezinto endizithethayo iba kwangabo ndibathandayo. Mhlawumbi ndikhululeka gqitha xa ndikunye nabo ndize ndithethe nje ndingacinganga.”
INTO OFANELE UYENZE XA UPHULUKWA
Isibhalo esinokukunceda: “Masisukele izinto ezisingisa eluxolweni.” (Roma 14:19) Enye into onokuyenza ukuze uthobele eli cebiso kukucela uxolo.
Ibali lokwenyaniso: “Umama wasweleka xa ndandineenyanga nje ezilishumi ubudala yaye utata andimazi nokuba uphi, ngoko ndakhuliswa ngumakazi nomyeni wakhe. Ngeny’ imini xa ndandimalunga neminyaka eli-10 okanye eli-11 ubudala, ndaziva ndililolo yaye ndinomsindo ngenxa yokufa kukamama ibe ndandifun’ umntu wokumbek’ ityala. Xa umakazi wandicela ukuba ndimncede ngento ethile, ndathetha ndashiya endingalaziyo; yaye ndada ndathi kuye ‘Ndiyakucaphukela’ yaye ‘Akungomama.’ Amothusa gqitha umakazi la mazwi. Waya kuzivalela egumbini lakhe lokulala waza wantywizisa. Kwaba ngathi ndingasothula isikhalo. Wayendikhulisile waza wandenzela yonk’ into, kodwa mna ndamphatha kakubi. Umyeni wakhe wathetha nam, waza wandifundela izibhalo ezithetha ngokulawula ulwimi. Emva kwayo yonke loo nto, ndacela uxolo kumakazi wam. Kwafuneka ndivume ukuba ndimonile.”—UKaren.
Apha ngezantsi, bhala isizathu sibe sinye sokuba usenokukufumanisa kunzima ukucela uxolo.
․․․․․
Kutheni kunokuthi qwenge nje emva kokuba ucele uxolo?
․․․․․
Inkcazelo enokukunceda: Khawuhlole le migaqo ifumaneka kwiMizekeliso 11:2 nakuMateyu 5:23, 24.
Kakade ke, kuhle ukuyiphepha into ethile zisuka nje ukuze kungafuneki ukuba ude ucele uxolo. Unokuyenza njani loo nto?
INDLELA YOKULAWULA ULWIMI LWAKHO
Isibhalo esinokukunceda: ‘Khawuleza ukuva, ucothe ukuthetha, ucothe ukuqumba.’ (Yakobi 1:19) Nanga amanye amacebiso anokukunceda usebenzise esi sibhalo.
Funda ezi zibhalo zilandelayo ukuze ubone ukuba zihambisana neliphi icebiso.
1 “Musa ukuzicingela ngokugqithiseleyo; loo nto iya kukunceda ungakhawulezi ukhubeke.”—UDanette.
2 “Ndiye ndihambe kuze ndibethwe ngumoya. Loo nto indinika ithuba lokuba ndedwa ndize ndithomalalise umsindo.”—UBrielle.
3 “Xa ndandisemncinci ndandicing’ ukuba akufanele umyeke umntu akhwele ezehlela kuwe ibe ndandisilwela yonk’ into le. Kodwa ndiye ndafund’ ukuba ezinye izinto zifun’ ukuyekwa nje.”—UCelia.
4 “Umntu ude adinwe aze akuyeke ukuba akuphenduli xa ethetha amazwi ahlabayo. Kufuneka nje ube nomonde. Mus’ ukuxambulisana naye.”—UKerrin.
5 “Ndikhe ndicatshukiswe ngabantu. Kuye kube ngathi ndingaphendula. Kodwa ukungakhawulezi ndithethe kundenza ndiqonde ukuba ukuphendula bekungazi kunceda. Ndiye ndafunda ukungakhawulezi ndiphendule.”—UCharles.
Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype
[Umbhalo osemazantsi]
a Amanye amagama kweli nqaku atshintshiwe.
[Ibhokisi/Imifanekiso ekwiphepha 22]
UAllie—Ngaphambi kokuba ndithethe, ndiye ndiqale ndizibuze le mibuzo: ‘Ngaba le nto ndiza kuyithetha iza kwenza izinto zibe bhetele? Iza kumphatha njani umntu endiyithetha kuye?’ Xa ungaqinisekanga ngento oza kuyithetha, kubhetele ungayithethi.
UChase—Xa ndifuna ukuthetha into ethile, ndiye ndiqale ndicinge ukuba iza kuvakala njani kwabo ndiyithetha kubo. Ingathi ngokuya ndikhula ndiya ndikwazi ukululawula ulwimi lwam. Uyafunda njengoko ukhula.
[Ibhokisi ekwiphepha 23]
BUZA ABAZALI BAKHO
Ekubeni kungekho mntu ufezekileyo—njengoko uYakobi watshoyo ukuba “sonke siyakhubeka izihlandlo ezininzi”—thetha nabazali bakho ngeengxaki ababenazo zokulawula ulwimi.—Yakobi 3:2.
[Umfanekiso okwiphepha 22]
“Awunakukwazi ukuphinda uyibuyisele ebhotileni yayo intlama yamazinyo xa sele uyikhuphile. Kunjalo nangamazwi ahlabayo esiwathethayo. Xa sele siwatshilo, asikwazi ukuphinda siwabuyisele.”—UJames.