Lisekho Ixesha Lokuba Ube Ngumhlobo KaThixo

Kubalisa uOlavi J. Mattila

“Ngaba wakha wayicinga into yokuba unako ukufumana ulwazi oluchanileyo ngoMdali?” Omnye wamaNgqina kaYehova wandibuza loo mbuzo, kwaye wandenza ndacingisisa nzulu. Ngelo xesha ndandineminyaka engaphezu kwama-80 ubudala kwaye ndisazana nabantu abaninzi ababalaseleyo, nkqu neenkokeli zepolitiki. Noko ke, ngaba kobo budala ndandinako ukumazi ngokwenene uThixo ndize ndibe ngumhlobo wakhe?

NDAZALWA ngo-Oktobha 1918 eHyvinkää, eFinland. Kwasebutsheni ndaqalisa ukwenza imisebenzi eliqela yasefama. Intsapho yasekhaya yayifuye iinkomo, amahashe, iinkuku kunye namadada. Ndafunda ukusebenza nzima nokuba neqhayiya ngomsebenzi endiwenzileyo.

Njengoko ndandikhula, abazali bam bandikhuthaza ukuba ndisukele imfundo. Xa ndandimdala ngokwaneleyo, ndalishiya ikhaya ukuze ndiye kufunda ekholejini. Ndazibandakanya kwimidlalo yeembaleki ndaza ndahlobana nosihlalo woMbutho Weembaleki waseFinland, u-Urho Kekkonen. Ngelo xesha ndandingazi ukuba uMnu. uKekkonen wayeza kuba yinkulumbuso yaseFinland aze kamva abe ngumongameli welizwe, zikhundla ezo awahlala kuzo kangangeminyaka engama-30. Ngaphezu koko, andizange ndiyicinge impembelelo enamandla awayeza kuba nayo ebomini bam.

Ukufumana Uzuko Negunya

Ngowe-1939, kwaqhambuka ubutshaba phakathi kweFinland neSoviet Union. NgoNovemba waloo nyaka, ndabizelwa emkhosini. Ekuqaleni ndandiqeqesha abantu abalungiselela ukuya emfazweni ndaza kamva ndaba ngumphathi womkhosi ohlaselayo. Umlo wawuseKarelia, phakathi komda waseFinland neSoviet Union. Ngehlobo lowe-1941, ngoxa idabi lalikufuphi nedolophu yaseVyborg, ndenzakala kakhulu ziimbumbulu ndaza ndasiwa kwisibhedlele somkhosi. Ngenxa yamanxeba endandinawo andizange ndikwazi ukuphinda ndilwe kwakhona.

NgoSeptemba 1944, ndakhululwa emkhosini ndaza ndabuyela ekholejini. Kwakhona, ndaqhubeka nemidlalo njengembaleki. Kangangezihlandlo ezithathu ndaba yintshatsheli yelizwe ndisaziwa njengembaleki egqwesileyo. Ndafumana nezidanga zaseyunivesithi kwezobugcisa nakwezoqoqosho.

Ngelo xesha, u-Urho Kekkonen wayezenzele igama njengosaziwayo kwezepolitiki. Ebudeni belo xesha ngowe-1952, wandicela ukuba ndiye kusebenza eTshayina njengonozakuzaku. Ngoxa ndandilapho ndadibana neziphathi-mandla zikarhulumente eziliqela kuquka uMao Tse-tung, owayeyinkokeli yaseTshayina. Sekunjalo, oyena mntu ubalulekileyo endadibana naye eTshayina yayilibhinqa elihle nelaliselula, uAnnikki, owayephangela kwiOfisi Yomphathiswa Wezangaphandle. Satshata ngoNovemba 1956.

Ngonyaka olandelayo, ndathunyelwa eArgentina njengommeli welizwe laseFinland. Ngoxa sasihlala eArgentina, safumana abantwana bethu bokuqala, oonyana ababini. NgoJanuwari 1960, sabuyela eFinland. Kungekudala emva koko, safumana umntwana wethu wesithathu, oyintombazana.

Kwizikhundla Eziphezulu Zikarhulumente

NgoNovemba 1963, uMongameli uKekkonen wandimema ukuba ndibe ngumphathiswa wezangaphandle. Kuloo minyaka ili-12, ndasebenza kwizikhundla ezahlukahlukeneyo ezithandathu epalamente, izihlandlo ezibini ndisebenza njengomphathiswa wemicimbi yangaphandle. Ngaloo mihla ndandiqinisekile ukuba iingxaki zehlabathi zazinokuconjululwa bubukrelekrele babantu. Kodwa kungekudala, ndaba lingqina lokuzibonela lendlela abantu abalinyolukele ngayo igunya. Ndazibona kwaneengozi ezibuhlungu ezibangelwa kukungathembani kunye nokumonelana.—INtshumayeli 8:9.

Kakade ke, ndabona ukuba bakho abantu abazama ngokunyanisekileyo ukutshintsha izinto. Ekugqibeleni nkqu nezona nkokeli ezineenjongo ezintle ziwa phantsi kusukelo lwazo.

Ngehlobo lowe-1975, iinkulumbuso ezingama-35 zahlanganisana eHelsinki ukuza kuzimasa iNgqungquthela Engonqabiseko Nentsebenziswano eYurophu. Ngelo xesha ndandingumphathiswa wezangaphandle kunye nomcebisi osondeleyo kaMongameli uKekkonen. Ndathunywa ukuba ndiququzelele loo ngqungquthela ibe ndafumana ithuba lokudibana nazo zonke iinkokeli zamazwe ezazilapho.

Ebudeni bezo ntsuku zimbalwa, ubuchule bam bokulungelelanisa izinto bavavanywa gqitha. Kwakuluxanduva kwaukuba amalungu aze kule ngqungquthela avumelane ngeendawo zokuhlala! Kodwa ke, ndandivakalelwa kukuba loo ngqungquthela kunye nezinye iintlanganiso ezalandelayo, zaba negalelo ekuphuculeni amalungelo abantu nasekuphuculeni ubudlelane phakathi kwamagunya ongamileyo.

Ukuphaphela Intswelo Yam Yokomoya

Ngowe-1983 ndathatha umhlala phantsi ndaza mna nentsapho yam safudukela eFransi, apho intombi yethu yayihlala khona. Emva koko kwehla intlekele. NgoNovemba 1994, kwafunyaniswa ukuba uAnnikki unomhlaza wamabele. Kuloo nyaka mnye ndazibhaqa ndibandakanyeke kumbandela wotyalo zimali owathi kamva waba nobuqhophololo. Ndasebenza nzima ubomi bam bonke ndizenzela igama elihle. Kodwa le mpazamo yalicima kwaphela igama elihle endandinalo

Ndandiqhelene namaNgqina kaYehova. Ndandiluxabisa utyelelelo lwawo, ndiwamkela namaphephancwadi awo, kodwa ndandixakeke gqitha ndingenalo ixesha lezinto zokomoya. Noko ke, ngowama-2000 ndandinyamekela uAnnikki, owayelwisana nesifo somhlaza. Ngomny’ umhla, ngoSeptemba 2002 ndatyelelwa ngomnye wamaNgqina kaYehova. Wandibuza umbuzo okhankanywe kwintshayelelo yeli nqaku. Ndacingisisa ngokunzulu: ‘Ngaba ngokwenene ndingafunda inyaniso ngoThixo? Ingenzeka into yokuba ndibe ngumhlobo wakhe?’ Ndakhupha iBhayibhile yam eyayiqokelele uthuli ngenxa yokugqityelwa kudala ukufundwa, ndaza ndaqalisa ukufundisisa ngeZibhalo ngokuthe rhoqo namaNgqina.

NgoJuni 2004, inkosikazi yam ethandekayo yafa, ndaza ndashiyeka ndedwa. Kakade ke abantwana bam babendixhasa ngokweemvakalelo. Kodwa ndandinombuzo mayelana noko kwenzekayo xa sisifa. Ndabuza abefundisi ababini bamaLuthere. Baphendula besithi, “hayi, inzima le mibuzo.” Andizange ndoneliseke yimpendulo yabo. Yaya icaca nangakumbi into yokuba ndinentswelo engonelisekanga yokomoya.

Njengokuba ndandiqhubeka ndifunda iBhayibhile namaNgqina, ndakhulisa ulwazi oluchanileyo endandilulangazelela. Ngokomzekelo, iBhayibhile icacisa into yokuba ukufa yimeko yokungabikho zingqondweni, njengokulala, nokuba abafi banethemba lokuphila kwakhona njengabantu apha emhlabeni. (Yohane 11:25) Oku kwandinika ithemba kwaza kwandithuthuzela gqitha.

Kungekudala emva koko ndazifundela iBhayibhile ndayigqiba. Umbhalo owandichumisayo ngokaMika 6:8, othi: “Yintoni ayibizayo kuwe uYehova ngaphandle kokuqhelisela okusesikweni nokuthanda ububele nokuthozama ekuhambeni noThixo wakho?” Le ngcamango yanditsala gqitha. Ityhila nendlela anothando nanokusesikweni ngayo uYehova uThixo.

Ndafumana Ithemba Ngekamva

Njengoko ndifunda inyaniso ngoThixo, ukholo nentembelo yam kuye zakhula. Ubuhlobo bokwenene noMdali wam baye bomelela ngakumbi! Ndachukumiseka ngamazwi akhe abhalwe kuIsaya 55:11 athi: “Ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.” Ngokwanene, uThixo uye wazizalisekisa izithembiso zakhe ukuzakuthi ga ngoku, kwaye usezakuzizalisekisa nakwixhesha elizayo. Uyakulufezekisa lonke usukelo olungazange lukwazi ukuphunyezwa ngoorhulumente babantu, abangazange beze nesicombululo kwiingqungquthela zabo ezininzi zepolitiki. Ngokomzekelo, iNdumiso 46:9 ithi: “Uphelisa iimfazwe kuse esiphelweni somhlaba.”

Ndingenelwe kakhulu ngokuya kwiintlanganiso zamaNgqina kaYehova. Apho ndiye ndalingqina lokuzibonela lothando lokwenyaniso lobuKristu, oluluphawu lwabalandeli bokwenene bakaYesu. (Yohane 13:35) Olu thando lodlula ubuhlanga kwaye alwaziwa kwezopolitiko nakwezorhwebo.

Elona Lungelo Lixabisekileyo

Ngoku sele ndidlule kwiminyaka engoma-90 ubudala, kwaye elona lungelo lakha lalikhulu ebomini bam kukuba ngomnye wamaNgqina kaYehova. Unxano lwam lokomoya luqatyulwe. Ndiye ndanelungelo lokufunda injongo yobomi nenyaniso ngoThixo.

Ndivuyiswa nakukuba, kule minyaka ndikuyo, ndiyakwazi ukubakho rhoqo kwintlanganiso zamaKristu nakumsebenzi wokushumayela. Nangona ndakha ndadibana namadoda abalaseleyo ndaza ndathwala neembopheleleko ezinzima, ayikho into enokuthelekiswa nokwazi uMdali, uYehova uThixo, nokuba ngumhlobo wakhe. Ndinombulelo ongazenzisiyo kuye, kwaye ndifuna ukumdumisa ngelungelo lukuba ‘ngumsebenzi olidlelane’ lakhe. (1 Korinte 3:9) Ixesha lisekhona lokuba ube ngumhlobo woMdali, uYehova uThixo!

[Umfanekiso okwiphepha 25]

Ndikunye noMongameli uKekkonen noMongameli uFord waseUnited States kwingqungquthela yaseHelsinki ngowe-1975

[Umfanekiso okwiphepha 25]

Ndikunye nomongameli uKekkonen nenkokeli yaseSoviet uBrezhnev

[Umfanekiso okwiphepha 26]

Ndinenxaxheba ezeleyo kwimisebenzi yobuKristu

[Inkcazelo Ngemifanekiso ekwiphepha 25]

Lower left: Ensio Ilmonen/Lehtikuva; lower right: Esa Pyysalo/Lehtikuva