Kutheni Simele Sibancome Abanye?

ABANINZI bavakalelwa kukuba imizamo yabo ayikhathalelwa ngabanye. Ngokomzekelo, abasebenzi badla ngokuziva bengaxatyiswa ngabaqeshi babo. Abaninzi abatshatileyo bavakalelwa kukuba abaxatyiswanga ngamaqabane abo. Abanye abantwana bacinga ukuba abanakuze bakwazi ukukholisa abazali babo. Ezo mvakalelo beziya kuphetshwa nakanjani ukuba besisoloko sibancoma abanye.

Namhlanje inqabile into yokuncoma abanye ngokunyaniseka. Oku akusothusi, kuba iBhayibhile yaxela kwangaphambili yathi: “Ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, . . . abangenambulelo, abanganyanisekanga.”—2 Timoti 3:1, 2.

Ngaba wakha wanconywa ngokunyanisekileyo? Ngoko umele ukuba uyazi kakuhle indlela ekuvuyisa kuze kukomeleze ngayo oko. IBhayibhile ithi: “Hayi indlela elilunge ngayo ilizwi elithethwa ngexesha elifanelekileyo!” (IMizekeliso 15:23) IZibhalo Ezingcwele zinokusinceda siphathane ngobubele.

Khangela Iimpawu Ezintle Kwabanye

Ngenxa yokuba enomdla onyanisekileyo kuthi, uThixo uyazibona yaye uyazixabisa iimpawu nezenzo zethu ezihle. IBhayibhile isiqinisekisa ithi: “Amehlo [kaThixo] asingasinga emhlabeni wonke ukuba ababonise amandla abo bantliziyo ziphelele kuye.” (2 Kronike 16:9) Xa sibonisa indlela esimthanda ngayo uThixo ngokuthobela imithetho yakhe, ngokuqinisekileyo uya kukubona oko.

UYehova uThixo akakhangeli zimpazamo kuthi. Ukuba ebesenjenjalo, akukho namnye kuthi obeya kuma. (INdumiso 130:3) Kunoko, uYehova ufana nomntu osebenza emgodini othi ngomonde akhangele phakathi kwemfumba yamatye efuna lawo axabisekileyo. Lo mntu uthi akulifumana ilitye elixabisekileyo, avuye. Xa lingekasulungekiswa elo litye kusenokungacaci ukuba lelexabiso, abe yena loo mntu ebona ukuba lixabisekile. Ngokufanayo, xa uThixo egocagoca iintliziyo zethu, ukhangela iimpawu ezixabisekileyo, kungekhona iimpazamo. Xa ezifumana uyavuya. Uyazi ukuba xa sisiwa sivuka siphucula kwezo mpawu, sitsho sixabiseke ngokwenene—sibe ngabakhonzi bakaYehova abathembekileyo nabazinikeleyo.

Sinokufunda kumzekelo kaThixo. Xa sijonga abanye, sinokutyekela ngakumbi ekujongeni iimpazamo zabo. Kodwa, ukuba sijonga abantu ngendlela abajongwa ngayo nguYehova, siya kukhangela iimpawu ezintle abanazo. (INdumiso 103:8-11, 17, 18) Xa sizifumana, simele sibancome. Oko kuya kuphumela entweni? Amazwi ethu aya kubahlaziya, ibe basenokuzama ngakumbi ukwenza okulungileyo! Nathi, siya kufumana uvuyo lokupha abanye.—IZenzo 20:35.

Zincome Izenzo Ezihle

UYesu wayedla ngokubabona aze abancome abanye xa besenza izinto ezintle. Xa elinye ibhinqa elaligula nelalisoyika lathi ngobulumko lachukumisa ingubo yakhe ukuze liphile, uYesu walincoma, wathi: “Ntombi, ukholo lwakho lukuphilisile.”—Marko 5:34.

Kwesinye isihlandlo, xa wayefundisa etempileni eYerusalem, uYesu wabona izityebi ziphosa imali kwizikhongozelo zobuncwane. Wandula ke, wabona umhlolokazi ephosa “iingqekembe ezimbini ezincinane zexabiso elincinane kakhulu.” Abanye babenikele ngemali engaphezu kweyakhe. Kodwa, uYesu wamncoma esidlangalaleni lo mhlolokazi ngokunyaniseka kwakhe wathi: “Eneneni ndithi kuni, Lo mhlolokazi, nangona elihlwempu, uphose ngaphezu kwabo bonke. Kuba bonke aba baphose izipho ngokuphuma kwintsalela yabo, kodwa lo mfazi ekusweleni kwakhe uphose konke abenokuphila ngako.”—Luka 21:1-4.

Sinokumxelisa njani uYesu? IBhayibhile ithi: “Musa ukwala nokulungileyo kwabo kuselungelweni labo ukukufumana, xa kusemandleni esandla sakho ukukwenza.”—IMizekeliso 3:27.

Ukuncoma Kunamandla

Kweli hlabathi labantu abangenambulelo, sonke sifuna ukuziva sixatyisiwe yaye sithandwa. Xa sibancoma ngokunyaniseka abanye, siyabomeleza size sibakhe. Ukubancoma kwethu ngokunyaniseka kubenza bafune ukuhlala besenza konke okusemandleni abo.—IMizekeliso 31:28, 29.

IBhayibhile ibongoza onke amaKristu ithi: “Masinyamekelane, sivuselelane eluthandweni nasemisebenzini emihle.” (Hebhere 10:24) Ihlabathi beliya kwahluka, lingabi yile nto liyiyo namhlanje ukuba wonke umntu ebebonisa umdla kwabanye, akhangele iimpawu zabo ezintle, aze abancome ngezinto ezintle abazenzayo. Eneneni, ukuncoma kunamandla!

NGABA WAKHA WAZIBUZA?

● Kutheni simele sibancome abanye ngezinto ezintle abazenzayo?—IMizekeliso 15:23.

● Xa uYehova esigocagoca, yintoni ayikhangelayo?—2 Kronike 16:9.

● Kunini apho simele sibancome khona abanye?—IMizekeliso 3:27.

[Umfanekiso okwiphepha 29]

Ngaba uyakwazi ukuzibona uze ubancome abanye ngezinto ezintle abazenzayo?