Okwenzeka Ehlabathini

Ekupheleni kowama-2011. inani labemi bomhlaba laqabela ngaphaya kwe-7 bhiliyoni, “lanyuka lisuka kwi-6 bhiliyoni ngowe-1999.”—IHARVARD SCHOOL OF PUBLIC HEALTH, EUNITED STATES.

“Abantu abangaphezu kwama-58.8 ekhulwini [United Kingdom] bathi bavakalelwa ukuba iintsapho zabo beziya kuzuza lukhulu ukuba bekukho ixesha lokuba wonke umntu angasebenzisi zixhobo zonxibelelwano zicinywe zonke izixhobo ze-elektroniki. . . . Umntu omnye kwabathathu udinwe kangangokuba ufuna ukuwabaleka la majelo onxibelelwano.”—IYUNIVESITHI YASECAMBRIDGE, EBRITANI.

“Ukususela ngo-1976, inkomfa yoobhishophu bamaKatolika aseMerika ibisenza izaziso . . . ngaphambi konyaka ngamnye wonyulo lomongameli ukuze incede amaKatolika avotele lowo uthandwa ngabo bhishophu.”—IFORDHAM UNIVERSITY, EUNITED STATES.

“Ukuba iqela elaneleyo lezaphuli-mthetho lifuna ukudala uqhushululu ezitratweni, linako. . . . Ulutsha oluthile lwaseBritani loyisiwe kukuziphatha, yaye luninzi ngokwaneleyo ukuba lungakwazi ukuqhwaya udushe luze luhlazise ilizwe lalo.”—THE ECONOMIST, EBRITANI.

Zingaphi Iintlobo Zezinto Eziphilayo Emhlabeni?

Kuphando olwavela kwiphephancwadi iPLoS Biology, esinye isazinzulu sathi: “Asikaqiniseki nangoku ukuba zingaphi iintlobo zezinto eziphilayo, yaye oko kutyhila ubuncinane bolwazi esinalo ngezinto eziphilayo.” Nangona ziqikelela ukuba izinto eziphilayo zingaphantsi okanye ngaphezulu kwizigidi ezisi-8.7, ezinye iingcali zithi inani lazo liphakathi kwezigidi ezi-3 ukusa kwezili-100. Okwangoku, lisemalunga ne-1.2 yezigidi inani lezinto eziphilayo ezibhalwe phantsi zathiywa amagama, yaye kukholelwa ukuba ngokwesantya okwenziwa ngaso oku, kungathabatha iminyaka engaphezu kwe-1 000 ukuze zigqitywe. Abaphandi bathi, “Esi santya sikhoyo sithetha ukuba ezinye iintlobo zezinto eziphilayo ziya kutshabalala ziphele singakhange sazi nokuba zakha zakhona kusini na.”

Ukwembiwa kwezinto zakudala ngeSatellite

Abembi bezinto zakudala basebenzisa indlela entsha yokukhangela iindawo abanokwemba kuzo. Basebenzisa inkqubo yekhompyutha ebanceda babone iindawo ezinamabhodlo kwiifoto zesatellite. Ngokomzekelo, imifanekiso ethatyathwe kumgama weekhilomitha ezingama-700 phezu kweYiputa, kuthiwa ibonisa ukuba kukho iindawo ezili-17 ezineepiramidi ebezikade zingaziwa, amangcwaba amandulo ali-1 000, nezinye iindawo ezingama-3 000 ezazihlala abantu. Ekubeni le ndlela intsha ikwazi ukufota ngaphantsi komhlaba, obu bugcisa butyhila izinto ezalityalwayo nezangcwatywayo, ezingabonakaliyo xa usemhlabeni.