Yintoni Emele Itshintshe?
“Urhulumente akasiso isicombululo seengxaki zethu; yena ngokwakhe uyingxaki.”—URonald W. Reagan, kwintetho yakhe yokubekwa njengomongameli wama-40 eUnited States.
SEKUDLULE iminyaka engaphezu kwamashumi amathathu uRonald Reagan wathetha loo mazwi. Ngelo xesha, iUnited States yayijamelene nengxaki enkulu—“uxinzeleko olungathethekiyo kuqoqosho,” ngokutsho kukaReagan. Wathi: “Zange khe itsale ixesha elide kangaka ingxaki yokunyuka kwamaxabiso kweli lizwe. Sekuqengqeleke iminyaka sisongeza ityala phezu kwelinye, sithengisa ngekamva lethu nelabantwana bethu kuba nje sifuna ulonwabo lomzuzwana. Ukuba siyaqhubeka siphila ngale ndlela, asinakuziphepha tu iingxaki zentlalo, zesithethe, ezopolitiko nezoqoqosho.”
Nakuba indlela awayeyijonga ngayo le meko yayinganiki themba kwaphela, uReagan wayesenalo ithemba. Wathi: “Ezi ngxaki zoqoqosho sijamelene nazo zithabathe iminyaka ukuze zibe nje. Aziyi kusuka ziphele kwiintsuku nje, iiveki okanye iinyanga, kodwa ziza kuphela.”—Akekeliswe sithi.
Injani le meko namhlanje? Ingxelo yowama-2009 yeSebe Lezindlu Nophuhliso Lweedolophu eUnited States yathi: “Bayanda abantu abazisa uxinzeleko olungakumbi kwiziseko ezifana neendlela, amanzi nombane, izindlu ezinqongopheleyo, nenkqubo endala yezonyango. Enyanisweni, [iarhente yeZizwe Ezimanyeneyo] UN-HABITAT iqikelela ukuba kule minyaka ingamashumi amathathu umntu omnye kwabathathu uya kube engenalo kwaphela ithemba lokuphucula ubomi bakhe—engakwazi kufumana amanzi acocekileyo nenkqubo yogutyulo, ethwaxwa kanobom yimiphumo yokuguquka kwemozulu, nto leyo eya kubangela ukusasazeka kwezifo emhlabeni wonke.”
Into Exhalabisa Ihlabathi
Kungakhathaliseki ukuba uhlala phi na, khawucinge ngale mibuzo ilandelayo:
● Ngaba uziva ukhuseleke ngakumbi ngokwasemalini kunokuba kwakunjalo kwiminyaka elishumi edluleyo?
● Ngaba wanelisekile yindlela enyanyekelwa ngayo impilo yakho neyentsapho yakho?
● Ngaba unethemba lokuba imeko ohlala kuyo iza kuphucuka ize icoceke?
● Njengoko ukhangela phambili kwikamva, ngaba uvakalelwa kukuba izinto ziza kuba bhetele kwiminyaka eli-10, engama-20, okanye ama-30 ezayo?
Isivumelwano Nabantu
Oorhulumente abaninzi basebenzisa oko kuthiwa sisivumelwano nabantu—isivumelwano esibhaliweyo okanye ekuvunyelwene ngaso ngabantu nabalawuli esichaza amalungelo abanawo abantu nalawo anawo urhulumente. Ngokomzekelo, ngokuqhelekileyo abantu kulindeleke ukuba bathobele imithetho yelizwe, bahlawule irhafu baze bahlawulele nokhuseleko lwemeko-bume. Bona ke, abalawuli badla ngokuthembisa impilo esemgangathweni, ukulingana kwabantu nokhuseleko lwezoqoqosho.
Oorhulumente baye baqhuba njani kwezo nkalo zintathu? Khawuqwalasele ubungqina obukula maphepha mathathu alandelayo.
Impilo esemgangathweni
Into enqwenelwa ngabantu: Unyango olufikelelekayo nolusebenzayo.
Eyona nto yenzekayo:
● Ingxelo yogutyulo nococeko eyakhutshwa yiWorld Bank ithi, “mihla le kufa abantwana abangama-6 000 ngenxa yezifo ezibangelwa ziingxaki zogutyulo, ucoceko kunye nezamanzi. Utyatyazo lulodwa nje lubulala umntwana omnye rhoqo kwimizuzwana engama-20.”
● Uphando olukhulu olwenziwa yiWorld Health Organization (WHO) ngowama-2008 ngokunyanyekelwa kwempilo yabantu “kumazwe ahluthayo nahlwempuzekileyo” lwafumanisa ukuba “kukho umahluko oyingozi kunyango olufunyanwa ngala mazwe” yaye “alufezekiswa ulindelo abanalo abantu ngendlela efikelelekayo nephumelelayo.”
Kwiminyaka emibini kamva, iWHO yafumanisa ukuba “ehlabathini lonke oorhulumente bayasilela ukuhlawulela ezempilo. Njengokuba abantu besaluphala, abanye begula zizifo ezinganyangekiyo kube kuvela namachiza amatsha namaninzi abiza imali eninzi, iindleko zonyango ziya zintinga.”
● Kukho nezinye iingxaki eziyingozi ezivelayo kule nkalo yezempilo: Amachiza awayekade eluncedo akasasebenzi. Izifo ezosulelayo njengeqhenqe neTB, ezazisakubulala izigidi zabantu zathonyalaliswa ngeeantibhayotiki, ezaqala ukusetyenziswa ngeyee-1940. Noko ke, ngokwengxelo yeWHO yeWorld Health Day 2011, ngoku sijamelene nengxaki ethande ukungalawuleki “yokuvela nokusasazeka kwezifo ezikwaziyo ukuxhathisa la mayeza. Amachiza angakumbi awayekade eluncedo akasasebenzi. Abantu baya bephelelwa ngamacebo okuvela namachiza okuhlangula kule meko.”
Into emele itshintshe: Sifuna ukubona kuzaliseka isiprofeto seBhayibhile esaxela kwangaphambili ngexesha apho ‘kungayi kubakho mmi uya kuthi: “ndiyagula.”’—Isaya 33:24.
Okusesikweni Nokulingana Kwabantu
Into enqwenelwa ngabantu: Ukuphela kwento yokucalulwa kwabantu abaligcuntswana nokuphathwa gadalala kwamabhinqa; ukuvalwa komsantsa phakathi kwabo bazizityebi nabo bangamahlwempu.
Eyona nto yenzekayo:
● Ingxelo eyenziwa yiLeadership Conference on Civil Rights Education Fund yathi: “Ugonyamelo olwenziwa ebantwini, kwiindawo zonqulo nakumaziko oluntu ngenxa yocalucalulo lobuhlanga, unqulo, isini okanye ilizwe ovela kulo luseyingxaki enkulu eMerika.”
● Ingxelo yeZizwe Ezimanyeneyo eyaphuma kwiNkqubela Yamabhinqa Ehlabathi: Iphulo Lokufuna Okusesikweni ithi: “Izigidi zamabhinqa ehlabathini lonke zisaphathwa ngokungekho sesikweni, ugonyamelo nokungalingani kumakhaya azo, emsebenzini nakubomi bemihla ngemihla.” Ngokomzekelo, eAfghanistan, malunga namabhinqa alapho angama-85 kwalikhulu akukho nyango alufumanayo xa ezala. EYemen, akukho mthetho uthintela ugonyamelo lwasekhaya. Ngokomlinganiselo, kwiDemocratic Republic of the Congo angaphezu kwewaka amabhinqa adlwengulwayo suku ngalunye.
● Ngo-Oktobha 2011, uNobhala-Jikelele weZizwe Ezimanyeneyo uBan Ki-moon wathi: “Kunzima ukuyichaza eyona nto iqhubekayo kweli hlabathi lanamhlanje. Kuveliswa intabalala yokutya kodwa kukho ibhiliyoni yabantu abalambayo. Kukho iqaqobana labantu abaphila ubunewunewu, kodwa inyambalala ithwaxwa yintlupheko. Ezonyango zihambele phambili ngoxa oomama besifa mihla le xa bebeleka . . . Kuchithwa iibhiliyoni kuthengwa izixhobo zokubulala abantu kunokuba bakhuselwe.”
Into emele itshintshe: Sifuna ukubona abantu abaligcuntswana namabhinqa bephathwa kakuhle nesiphelo sabo ‘bahlutha okusesikweni kwabaxhwalekileyo.’—Isaya 10:1, 2.
Ukhuseleko Lwezoqoqosho
Into enqwenelwa ngabantu: Bonke abantu babe nomsebenzi; bakhuseleke ngokwasemalini.
Eyona nto yenzekayo:
● IWorldwatch Institute ithi, “kukho abasebenzi abangakumbi abanokuba negalelo kuhlumo loqoqosho, kodwa imbalwa imisebenzi ekhoyo. Ngenxa yemeko emaxongo yoqoqosho, i-International Labor Organization (ILO) iqikelela ukuba baye bafikelela kwizigidi ezingama-205 abantu abangenamsebenzi ngowama-2010.”
● Ingxelo yeendaba zeBBC ithi: “I-International Labour Organization (ILO) ilumkise ngelithi, uqoqosho lwehlabathi lukwimeko enokwenza abantu abaninzi baphulukane nemisebenzi kuze oko kuphumele kwisidubedube. Ukudodobala kohlumo lwezoqoqosho kwakutshanje kubonisa ukuba sisiqingatha kuphela nje esiya kuveliswa kwimisebenzi efunekayo. . . . Eli qela [ILO] lazama nokufumanisa umlinganiselo wokungoneliseki ngenxa yokunqongophala kwemisebenzi nomsindo ngenxa yokuba kubonakala ngathi abathile abenzi migudu yokucombulula le ngxaki. Yathi amazwe amaninzi ajamelane nezidubedube entlalweni, ngakumbi lawo akwiEU nakummandla wama-Arabhu.”
● Incwadi ethi Narcissism Epidemic, epapashwe ngowama-2009 ithi, eUnited States “ngokomlinganiselo, mntu ngamnye unetyala elingaphezu kwee-R86 000, inani eliliphinda kathathu elo lalikhona ngowe-1990.” Abantu abaninzi bazifaka ematyaleni kuba nje befuna ukujongwa njengabantu abemi kakuhle. Le ncwadi ithi, “Abantu baseMerika babona abantu abahamba ngeemoto zodidi nempahla babe sele becinga ukuba banemali. Enyanisweni, eyona nyaniso kukuba badla ngokuba besematyaleni.”
Into emele itshintshe: Bonke abantu bamele babe nomsebenzi, yaye balungelelane kwindlela abasebenzisa ngayo izinto. IBhayibhile iyavuma ukuba ‘imali iyakhusela’ kodwa iphinda ilumkise ngelithi “ukuthanda imali yingcambu yazo zonke iintlobo zobubi.”—INtshumayeli 7:12; 1 Timoti 6:10.
Ngokusuka kwinkcazelo ekwiphepha 4 ukusa kwele 8, kusenokubonakala ngathi limfiliba ithemba lokuba nekamva elihle. Noko ke, lisekho ithemba. Eli hlabathi liza kutshintsha libe bhetele—nto nje oko akuyi kwenziwa ngoorhulumente babantu.
[Ibhokisi/Igrafu ekwiphepha 5]
Abaselula bathi yintoni abebeya kuyitshintsha kweli hlabathi? Ngokutsho kweWeb site 4children.org, uhlolisiso olwenziwa eBritani kubantwana abamalunga nama-2 000 abaphakathi kweminyaka emi-4 neli-14 lubonisa ukuba bebeya kuphelisa ezi zinto:
[Igrafu]
(Ukuba ufuna inkcazelo ehlahlelwe kakuhle, yiya kwimpapasho)
100%
INDLALA
IMFAZWE
UBUHLWEMPU
75%
UKUNGALINGANI
UKUFUDUMALA KOMHLABA
50%
25%
0%
[Ibhokisi/Igrafu ekwiphepha 5]
Uhlolisiso lowama-2009 olwenziwa yiBertelsmann Foundation eJamani lwatyhila ezona zinto zixhalabisa abaselula abamalunga nama-500 abaphakathi kweminyaka eli-14 neli-18.
Phakathi kwezinto oluvakalelwa ukuba azibalulekanga njengezi zikhankanywe ngasentla olu lutsha, bubunqolobi nokwanda kwabemi bomhlaba. Nkqu nengxaki yemali aluzange luyijonge njengenye yezinto ezingundoqo. Xa ichaza oku iBertelsmann Foundation ithi, mhlawumbi oku kubangelwa yinto yokuba olo lutsha kwadliwana nalo iindlebe alukachatshazelwa zezi ngxaki ebomini.
[Igrafu]
(Ukuba ufuna inkcazelo ehlahlelwe kakuhle, yiya kwimpapasho)
100%
75%
UBUHLWEMPU
UKUTSHINTSHA NOKONAKALISWA KWEMEKOBUME
UKUNQONGOPHALA KOKUTYA/NAMANZI
UKUGULA
50%
25%
0%