Ungalibali Ukuthi Enkosi!

WAGQIBELA nini ukufumana umyalezo othi enkosi? Waqgibela nini wena ukuwuthumela emntwini?

Kweli hlabathi linxibelelana ngekhompyutha, inqabe kangangokuba uyothuka xa efumana umyalezo wokubulela obhalwe ngesandla. Ukanti, ukubhala ikhadi elithi “enkosi” yindlela ekhethekileyo yokuxelela abantu indlela obuxabisa ngayo ububele babo. Apha ngezantsi kukho amacebiso eendlela zokwenza oko.

1. Wubhale ngesandla ukuze ube namandla.

2. Libhale phantsi igama laloo mntu ufuna ukumbulela.

3. Ukuba ubufumene isipho, bhala igama laso uze uchaze nendlela oza kusisebenzisa ngayo.

4. Waphinde amazwi athi enkosi ekugqibeleni.

Umyalezo wokubulela umchukumisa gqitha umntu obhalelwe yena.

Xa kukho umntu ovula isandla sakhe kuwe kwixa elizayo, ekwenzela ububele, ekupha isipho, mbonise ukuba uyakuxabisa oko. Ungakulibali ukuthi enkosi!

[Ibhokisi/Imifanekiso ekwiphepha 28, 29]

Makazi uNomha Endimthandayo, (2)

Enkosi kakhulu ngealam ondiphe yona! (3) Ekubeni ndilithongorha sele indinceda gqitha xa ndivuka. Kundivuyise gqitha ukukubona kwiveki ephelileyo, kwaye ndinethemba lokuba uhambe kakuhle xa ugoduka. Sikhangele phambili ekukuboneni kwixa elizayo.

Ndithi enkosi kwakhona ngesipho sakho! (4)

Owakho umtshana,

Odwa

[Umfanekiso]

(1)

[Ibhokisi ekwiphepha 29]

AMACEBISO

● Sukuzikhankanya ngokungqalileyo izipho zemali. Ngokomzekelo, kunokuchaza imali oyiphiweyo, unokuthi: “Enkosi ngesi sipho singaka. Ndiza kusisebenzisa kule nto . . . ”

● Bhala inkcazelo enokuthanani nesipho eso noxabiso onalo ngaso. Eli asilothuba lokubalisa ngendlela olichithe ngayo ikhefu lasehlotyeni okanye uhambo lwakutshanje esibhedlele.

● Sukukhalela naziphi na iingxaki onazo ngeso sipho. Ngokomzekelo, ibingayi kuba ntle into yokuthi, “Enkosi ngetoaster—kodwa ayilifaneli ikhitshi lam!”

[Ibhokisi ekwiphepha 29]

IBhayibhile isikhuthaza ukuba sibe nombulelo. (Luka 17:11-19) Isiluleka ukuba ‘sithandaze ngokungapheziyo’ kuThixo, ize yongezelele ithi: “Ezintweni zonke bulelani.”—1 Tesalonika 5:17, 18.