Oonobangela Bogonyamelo
ZITHANDA ukuntsonkotha izinto ezibangela ugonyamelo. Asinakuhlala sityhola unxulumano, indlela yokuzonwabisa okanye imeko yentlalo. Zininzi izinto ezinokuba ngoonobangela kuquka ezi zilandelayo.
Ukuxakaniseka nokuphelelwa lithemba. Maxa wambi abantu babhenela kugonyamelo xa becinezelwe, becalulwa, becinezelwa ngokwentlalo okanye ngokoqoqosho okanye xa bevakalelwa kukuba abakwazi kubulawula ubomi babo.
Umoya wehlokondiba. Njengokuba sisoloko sibona kwiziganeko zemidlalo, kubonakala ukuba abantu aboyiki ukwenza izinto ezimbi. Kubangelwa yintoni oko? Incwadi ethi Social Psychology ithi, “abayiqondi ncam imilinganiselo yokuziphatha, bavele bakhethe ugonyamelo njengesicombululo.” Enye incwadi ithi, abantu abanjalo, basenokuba ngoothoba sikutyele abangakwazi kucinga, “abangazikhathazi kwaphela ngembopheleleko abanayo ekuhlaleni.”
Intiyo nomona. Isiganeko sokuqala sokubulawa komntu esichazelwa ngaso kwimbali yoluntu senziwa yindoda egama linguKayin. (Genesis 4:1-8) Engaziva ngumona nentiyo, uKayin wambulala umntakwabo—nasemva kokuba ecetyiswe nguThixo ukuba azibambe emthembisa ngokumsikelela xa ezibamba. Kodwa ke achane ngokwenene amazwi eBhayibhile athi: “Kuba apho kukho ikhwele nokusukuzana, kubakho isidubedube nabo bonke ububi”!—Yakobi 3:16.
Ukusetyenziswa kakubi kotywala neziyobisi. Ukusetyenziswa kakubi kweziyobisi akwaneli nje ukonakalisa umzimba nengqondo, kodwa kwenza ingqondo yomntu ingakwazi ukuzilawula. Ngenxa yempembelelo yazo umntu unokuthanda ukuba nogonyamelo aze acaphuke msinya.
Ukusilela kweenkqubo zomthetho ukulwa ulwaphulo-mthetho. INtshumayeli 8:11 ithi: “Ngenxa yokuba isigwebo nxamnye nomsebenzi ombi singaphunyezwa ngokukhawuleza, ngoko intliziyo yoonyana babantu izele ngaphakathi kwabo kukwenza okubi.” Iinkqubo zomthetho ezibuthathaka, ezisilelayo ukwenza umsebenzi wazo nezonakeleyo ziyalukhuthaza ngandlel’ ithile ugonyamelo.
Unqulo lobuxoki. Unqulo lusoloko lunxulunyaniswa nogonyamelo, kuquka ugonyamelo lwamahlelo nolwabanqolobi. Noko ke, akunakugxekwa kuphela abo banenzondelelo yempambano ngonqulo. Kuzo zombini iimfazwe zehlabathi, amarhamente eecawa eziphambili—“ezobuKristu” nezo ingezozabuKristu—ayexhelana, lonke elo xesha esenjenjalo emva kokusikelelwa ziinkokeli zabo zonqulo. Izenzo ezinjalo ziyamcaphukisa uThixo.—Tito 1:16; ISityhilelo 17:5, 6; 18:24.
Ekubeni zininzi kangaka izinto eziphembelela okanye ezizukisa ugonyamelo, ngaba inokwenzeka into yokuba sibe ngabantu abathanda uxolo kweli hlabathi? Ewe, inokwenzeka njengokuba siza kubona.
[Ibhokisi ekwiphepha 6]
UGONYAMELO LUQALA KUTHI
Nakuba zininzi izinto ezinokubangela ugonyamelo, ubukhulu becala luphuma kwalapha kuthi. Njani? UYesu Kristu, owayenolwazi kakuhle ngentliziyo yomntu wathi: “Kuba ngaphakathi, entliziyweni yabantu, kuphuma iingcinga ezimbi: uhenyuzo, ubusela, ukubulala, ukukrexeza, iinkanuko, izenzo zobungendawo, inkohliso, ihambo evakalala, iliso elinomona, ukunyelisa, ikratshi, ukungabikho ngqiqweni.” (Marko 7:21, 22) Ezi zinto zivuselelwa kukuhlala kwethu sizijonga, siphulaphula okanye sicinga ngazo.—Yakobi 1:14, 15.
Kwelinye icala, xa iingqondo zethu sizondla ngezinto ezakhayo, njengezo zikhankanywe kwinqaku elikwiphepha 8, siyibulala ngendlala yaye ‘siyayibhubhisa’ iminqweno emibi size sikhulise leyo ilungileyo. (Kolose 3:5; Filipi 4:8) Uyakwandula ke uThixo asincede ‘asenze somelele kumntu esinguye ngaphakathi.’—Efese 3:16.
[Ibhokisi ekwiphepha 7]
UGONYAMELO LUZIXHAPHISA AMAGWEBU IINGCALI
Yintoni eyenza kubekho amazwe ekubulawa abantu ngomlinganiselo ophindwe izihlandlo ezingama-60 kunamanye? Kutheni iimfazwe nezinye iintlobo zogonyamelo zisoloko zikho kwimbali yoluntu? Mininzi imibuzo ephakamayo; zimbalwa iimpendulo ezanelisayo.
Abanye abaphandi bathi ugonyamelo lubangelwa bubuhlwempu nokungalingani. Olunye uhlolisiso luthi, malunga neepesente ezingama-90 zabantu abafa ngogonyamelo, baquka abo bazibulalayo, bakumazwe alambayo, yaye iindawo ezinamahlwempu ezixekweni isoloko izezona zinolwaphulo-mthetho gqitha. Kodwa ngaba ngamahlwempu abona bantu banogonyamelo? Ngaba ngawona ajamelana nogonyamelo ngakumbi ngenxa yokubikho kwemithetho eluqilima kwiindawo? Kodwa ke kukho iindawo ezifana neCalcutta, eIndiya, apho kuhlala izigidi zabantu abaziimpula zikaLujaca. Ukanti, iCalcutta yeyona ndawo inabantu abambalwa abafa ngogonyamelo ehlabathini.
Abanye batyhola ukufumaneka lula kwemipu. Yinyaniso, imipu yenza abantu abanogonyamelo babe yingozi ngakumbi. Kodwa kutheni kukho iindawo ezinabantu abaninzi gqitha abanogonyamelo? Nakuleyo inkalo, iingcali ziyaphikisana.