Igawuthi—Oonobangela Nezinto Ezikubeka Esichengeni
IGAWUTHI lolunye lwezona ntlobo ziqhelekileyo kwizifo zamathambo kwaye ibuhlungu gqitha. Incwadi ethi Arthritis ithi: “Ivuka xa umzimba ungakwazi ukucola nokusebenzisa iuric acid esemzimbeni.” Ukongezelela, “uyaziwa unobangela wayo—ubukho beekristale zeuric acid kwisynovial fluid esemalungwini . . . , ngakumbi ubhontsi omkhulu.”
Iuric acid kukungcola okuphuma egazini, kwaye ibangelwa ziipurine. Ukukhula kweuric acid kudla ngokubangelwa kukungaphumi kakuhle komchamo, iikristale ezifana nenaliti ziqokelelana kwilungu likabhontsi,nangona inokuhlasela namanye amalungu. Ilungu linokukrala kwaye lidumbe, kubenzima nokuliphatha, libe buhlungu kakhulu.a “Nokuluchukumisa nje kuba yintlungu engathethekiyo,” utsho njalo uAlfred onesi sifo.
Ngokutsho kwengxelo epapashwe yiArthritis Australia, “xa igawuthi inganyangwa idla ngokuba buhlungu phantse iveki. Kunokudlula iinyanga okanye iminyaka ngaphambi kokuba iphinde ihlasele. Xa igawuthi ingakhathalelwanga, idla ngokuquqa ibuyelela ekuhlaseleni, kwaye ibe buhlungu ngakumbi de amalungu onakale ngokupheleleyo. Maxa wambi igawuthi igqibela ngokunganyangeki.”
Igawuthi yeyona inyangekayo kwizifo zamathambo. Olu nyango ludla ngokwenziwa ngamayeza athile naluncedo ukuphelisa iintlungu, okanye xa iquqa ibuyelela okanye iqatsela kuye kusetyenziswe iallopurinol, ethintela ukuvela kweuric acid. Ngaba igawuthi inokuthintelwa ingaphinde ivuke? Inako, xa umntu ezazi izinto ezimbeka esichengeni.
Izinto Ezibangela Ukuba Ibuye
Ezona ziphambili yiminyaka yobudala, isini nemfuza. Amanye amagunya athi, kubantu abanayo bangaphezu kwama-50 ekhulwini abayifumana ngemfuza. UAlfred ocatshulwe ngaphambili uthi: “UTata notatomkhulu babenayo.” Enye into, igawuthi ihlasela kakhulu amadoda, ngakumbi lawo aphakathi kweminyaka engama-40 nengama-50 ubudala. Enyanisweni, kumadoda mathathu okanye mane amathuba okuba nesi sifo kunokuba kunjalo ngabafazi, abangafane babe naso bengekayeki ukuya exesheni.
Ukutyeba ngokugqithisileyo nendlela yokutya: IEncyclopedia of Human Nutrition ithi: “Abo balawula ukutya ukuze kuthintelwe igawuthi abasabeki miqathango yokutya okunepurine eninzi, kodwa sebenikela ingqalelo ekusileleni komzimba ukucola ukutya eyona nto sele ingunobangela wegawuthi: ukutyeba ngokugqithisileyo, ingxaki yokuxhathisa i-insulin, nedyslipidemia,” okanye ukugqithisa kwamafutha egazini, njengecholesterol.
Ngoko ke, abasemagunyeni bacebisa ukuba umntu ayeke ukutya okunepurine eninzi, njengegwele, iintlanzi ezithile, neentlobo ezahlukeneyo zenyama ebomvu.b
Ukusela: Ukusela utywala kakhulu kunokwenza umzimba wakho ungakwazi ukukhupha iuric acid emzimbeni.
Izigulo: Ngokutsho kweMayo Clinic, yaseUnited States, igawuthi inokubangelwa zezinye izigulo, kuquka “uxinezeleko olunganyangwanga (ihypertension) nezifo ezinganyangekiyo njengesifo seswekile, amafutha amaninzi egazini necholesterol (ihyperlipidemia), nokuvaleka kwemithambo (iarteriosclerosis).” Ezinye izinto ezibangela igawuthi “kukugula ngequbuliso okanye kakhulu okanye ukwenzakala, nokulala ebhedini ungaphumi,” kuquka isifo sezintso. Kuyacaca ukuba ubhontsi omkhulu ngoyena uthanda ukuhlaselwa yigawuthi kuba igazi lihamba nzima kuwo yaye uthanda ukubanda—zinto ezo zenza iuric acid yakhele.
Amayeza: Amayeza andisa amathuba okufumana igawuthi aquka ithiazide nediuretics (ezi zipilisi ezichamisayo,ezisetyenziswa ikakhulu ngabantu abanoxinezeleko lwegazi), iaspirin eselwa ngomlinganiselo, iipilisi ezinikwa izigulane eziza kufakelwa amalungu amatsha, kunye neepilisi zechemotherapy.
Iindlela Ezintlanu Zokuthintela Ukuphinda Uhlaselwe Yigawuthi
Ekubeni igawuthi inxibelelene nendlela esiphila ngayo, la macebiso anokunceda abo banayo banciphise amathuba okuba iphinde ibahlasele.c
1. Ekubeni igawuthi ibangelwa kukusilela komzimba ukucola ukutya, abo banayo bamele balumkele umzimba omkhulu banciphise ukutya okutyebisayo. Ngaphezu koko, umzimba onzima wongeza uxinezeleko kumalungu omzimba.
2. Zilumkele iindlela ezingafanelekanga zokutya kuba kusithiwa zinciphisa umzimba ngokukhawuleza, kuba zinokuyandisa iuric acid egazini.
3. Kulumkele ukutya inyama kakhulu. Abanye bacebisa ukuba kutyiwe iigram ezili-170 zenyama engenamafutha, kuquka inkukhu nentlanzi kuphela ngemini.
4. Ukuba uyasela, sela ngobungcathu. Ukuba unegawuthi, kuya kuba bubulumko ukukuphepha ngokupheleleyo utywala.
5. Sela kakhulu iziselo ezingenabo utywala. Ezi zinto zinceda ekungxengeni iuric acid esemzimbeni itsho iphume emzimbeni.d
Ezi ndlela zokuzikhusela zingasentla zisikhumbuza ngoko kuthethwa yiBhayibhile isithi simele ‘sibe ngcathu ngemikhwa’ singazinikeli “kwiwayini eninzi.” (1 Timoti 3:2, 8, 11) Siqinisekile ukuba, uMdali wethu onothando uyakwazi okona kusilungeleyo.
[Imibhalo esemazantsi]
a Ezi mpawu zinokubakho naxa kuvuka iikristale zecalcium pyrophosphate emalungwini, ngakumbi kwintlala esekudibaneni kwamathambo. Kodwa leyo igawuthi asiyiyo ncam “ngusinga-gawuthi” nje onyangwa ngendlela eyahlukileyo.
b Ngokutsho kwenqaku elipapashwe yiAustralian Doctor, ukutya amakhowa neemifuno enepurine eninzi, njengeembotyi, iintlumayo, iiertyisi, isipinatshi, nekholiflawa, “akwayanyaniswa nonoobangela begawuthi.”
c Injongo yeli nqaku asikokucebisa abantu ngendlela yonyango. Mntu ngamnye onegawuthi kusenokufuneka azifunele unyango. Akamele ayeke iipilisi azinikiweyo okanye atshintshe indlela yokutya engakhange adibane nogqirha wakhe.
d Le nkcazelo isekelwe kumacebiso eMayo Foundation for Medical Education and Research.
[Umzobo/Umfanekiso okwiphepha 24]
(Ukuba ufuna inkcazelo ehlahlelwe kakuhle, yiya kwimpapasho)
Ilungu eliqaqambayo
Incindi ethambisa amalungu
[Umfanekiso]
Ikristale zeuric acid xa ziqokelelene