Okwenzeka Ehlabathini
KwiRiphabliki yeGeorgia ekumzantsi-mpuma weYurophu, “phantse liphindwe kabini inani labo baqhawule umtshato kule minyaka ilishumi idluleyo.” Inkoliso yabo isengaphantsi kweminyaka engama-20 ubudala.—FINANCIAL, EGEORGIA.
EIreland, kubantwana abaneminyaka eli-11 ukusa kweli-16 ubudala, i-17 leepesente kubo “liye lanikisa kwi-Intanethi ngeenkcukacha zabo kubantu elingazange libabone.” Ishumi leepesente liye lanikisa “ngeeadresi ze-email, iinombolo zefowuni okanye iifoto zabo.”—THE IRISH SOCIETY FOR THE PREVENTION OF CRUELTY TO CHILDREN.
Kwihlabathi jikelele, imalunga neepesente ezi-4 kuphela imililo yamahlathi ebangelwa zizinto zemvelo. Yonke eminye, ibangelwa ngabantu—ngokungakhathali okanye ngabom.—PRESSEPORTAL, EJAMANI.
“Phantse umntwana omnye kwabali-10 eMerika [abakubudala beminyaka eli-12 nangaphezulu] kuthiwa usebenzisa iziyobisi, kuquka intsangu, icocaine, iheroin, ihallucinogen, i-inhalant okanye iipilisi ezifumaneka koogqirha kodwa bezisebenzisa njengeziyobisi.”—USA TODAY, EUNITED STATES.
Ukuzibamba Kuyakhusela
ITimes ithi, “Uphando lubonisa ukuba xa abantwana bengakwazi kuzibamba beselula oko kukhokelela kwiingxaki zempilo, ukusebenzisa kakubi mali, nokuba zizaphuli-mthetho.” Olu hlolisiso lwenziwa kubantwana abangaphezu kwe-1 000 ukususela ekuzalweni kwabo de baba neminyaka engama-32 ubudala. Ebudaleni babo, “abo babesenza ngokungakhathali, becaphuka msinya, bengenambulelo yaye bengakwazi kulinda [besengabantwana],” bahlala begula, befumana imivuzo ephantsi, bekhulisa abantwana bodwa okanye bekhe baba zizaphuli-mthetho phantse ngokuphindwe kathathu kunabanye. Eli phephancwadi lithi, “singakufunda ukuzibamba, xa esikolweni nasekhaya abantwana befundiswa oku kwasebutsheni, bangakwazi ukuhlala besempilweni baze balungelelane.”
Ukufundisa Isifundo Abo Baqhuba Kakubi
Abasemagunyeni eIndiya bazama iindlela ezintsha zokohlwaya abo baqhuba kakubi ngokubenza amapolisa endlela. Injongo kukubanceda baqonde umonakalo wabo. Ngoko, amapolisa aseGurgaon, kumntla-ntshona weIndiya akaneli nje ukubahlawulisa amatikiti kodwa aphinda abanyanzele ukuba bancedise amapolisa endlela ekwalathiseni iimoto kangangesiqingatha seyure okanye ngaphezulu. Abanye abaqhubi bayavuma ukuba oku kuye kwayitshintsha indlela abacinga ngayo. Isekela lomphathi wamapolisa alapho uBharti Arora uthi: “Sikhupha iwaka lamatikiti ezohlwayo mihla le, eGurgaon. Besinokufumana i-1000 lamapolisa angakumbi mihla le.”