Chapter 12
Ngaba Uphawulelwe Ukusinda Okanye Ukutshabalala?
1. Esi sifundo sisikhuthazela ukuba siqwalasele yiphi imibuzo?
IMEKO yezonqulo ekhoyo namhlanje ifuna ukuba sibonise oko ngokwenene kusezintliziyweni zethu. Ngaba ngokwenyaniso siyamthanda uYehova neendlela zakhe? Ngaba sifana noNyana wakhe, uYesu Kristu, ekwathiwa ngaye: “Wathanda ubulungisa, wathiya okungendawo”? (Hebhere 1:9) Ngaba sikulungele ukubonisa oku ngokuphandle ukuze abanye bayazi indawo esimi kuyo? Ingxelo yeBhayibhile engoYehu noYehonadabhi unyana kaRekabhi iyasinceda ukuze sihlolisise isimo sengqondo sethu.
2. Wayengubani uYehu noYehonadabhi?
2 Ngenkulungwane yeshumi Ngaphambi kweXesha Eliqhelekileyo, uYehu wathanjiswa njengokumkani wezizwe ezilishumi zobukumkani bakwaSirayeli, obabunekomkhulu labo eSamariya. Wayalelwa ukuba atshabalalise bonke ababengabendlu engendawo kaKumkani uAhabhi, kuquka noKumkanikazi uIzebhele, owayekhuthaze unqulo lukaBhahali kwaSirayeli waze wazabalazela ukuphelisa unqulo lukaYehova. UYehonadabhi, umKeni (ngenxa yoko, wayengengomSirayeli), ngokungathandabuzekiyo wayesazi ngenkqubo kaYehu yokubulala xa waya kuhlangabezana noYehu. Kodwa lwalomelele kangakanani uthando lukaYehonadabhi ngoYehova? Ngaba ngokuphandle wayenokuzifanisa njengalowo wayekholelwa ngamandla ukuba kuphela yayinguYehova, uThixo oyinyaniso, owayemele anqulwe?
‘ITHE TYE NA INTLIZIYO YAKHO KUM?’
3. UYehonadabhi wasazisa njani ekuhleni isimo sakhe sengqondo ngonqulo lukaYehova?
3 Emva kokuba la madoda mabini ebulisene, uYehu wacela uYehonadabhi ukuba acacise isimo sengqondo sakhe. Wambuza ngelithi: “Ithe tye na intliziyo yakho, njengokuba injalo intliziyo yam kwintliziyo yakho?” Ngaphandle kokuthandabuza uYehonadabhi waphendula ngelithi: “Injalo.” UYehu wathi: “Ukuba injalo ke, ethe isandla sakho.” Wamthabatha ke uYehonadabhi baya enqwelweni yakhe waza wathi: “Hamba nam, ubone ikhwele lam ngenxa kaYehova.” UYehonadabhi akazange athi ngoloyiko arhoxobise.—2 Kumkani 10:15, 16; bona iDuteronomi 6:13-15.
4, 5. (a) UYehu wasebenzisa ziphi iindlela ukwenza abanquli bakaBhahali bazibonakalise? (b) Ngoko yintoni eyenziwa nguYehu, yaye wayephi uYehonadabhi? (c) Uthini wena ngokutshatyalaliswa kwabanquli bakaBhahali?\
4 Akufika eSamariya, uYehu wathabatha amanyathelo awayeya kufuna ukuba bonke ababenqula uBhahali bazifanise bona ngokwabo. Abaprofeti, ababingeleli nabo bonke abanquli bakaBhahali babizelwa ukuba benze umbingelelo omkhulu endlwini kaBhahali. Baziswa ukuba nabaphi na abantu ababenokusilela ukuya apho babeya kuphulukana nobomi babo. UYehu wayalela ukuba kukhutshwe iingubo zinikwe bonke abanquli bakaBhahali ukuba bazinxibe ukuze babonwe ngokucacileyo. Nabaphi na ababezibanga bekwanqula noYehova ngaloo ndlela bathi benziwa bazibonisa ukuba ngokwenene ngubani ababemkhonza. Oku kwabonakala kuyiyure ezukileyo kuBhahali nakuSathana uMtyholi, uthixo wobuxoki ngokwenene owayemelwa nguBhahali.
5 Le yayingeyondawo yabanquli bokwenyaniso bakaYehova. Kwenziwa uphando ukuze kuqinisekwe ukuba kuphela yayingabanquli bakaBhahali ababekho. Wandula ke waqhubeka umgidi. Kusenjalo, amadoda kaYehu ngaphandle ayezilungisa, aza athi ngokuyalelwa nguye aqalisa ukuhlasela. Wayalela ngelithi: “Ngenani nibabulale; makungaphumi mntu.” Bonke abanquli bakaBhahali babulawa. Indlu kaBhahali yadilizelwa phantsi. “UYehu wamtshabalalisa ke uBhahali kwaSirayeli.” UYehonadabhi wayengakwicala likaYehu ukuze abone ezo ziganeko. (2 Kumkani 10:18-28) Wena ngokwakho usabela njani koko kwenzekayo? Ngoxa kungekho namnye kuthi ovuyiswayo kukufa kwabanye, nokufa kwabantu abangendawo, ngaba siyasiqonda isizathu sokuba kube kwakuyimfuneko nesizathu sokuba oku kubhalelwe thina eBhayibhileni ukuze sikufunde namhlanje?—Thelekisa uHezekile 33:11.
6. (a) Iya kutshatyalaliswa njani iBhabhiloni Enkulu? (b) Xa wayesemhlabeni, uYesu wabonisa njani ukuba wayenekhwele ngoYehova?
6 Le ngxelo ayisigunyazisi ukuba sitshabalalise enoba zizakhiwo ezizezamaqela onqulo okanye abantu abazinikele kunqulo lobuxoki. UYehova umisele, kungekhona amangqina akhe anamhla, kodwa umisele uYesu Kristu ozukisiweyo, njengoYehu Omkhulu, ukuba aphumeze imigwebo Yakhe yobulungisa. Ngokuvumela amagunya obupolitika ahlanganisiweyo ukuba abonakalise intiyo yawo kwiBhabhiloni Enkulu, uKumkani wasezulwini uya kutshabalalisa ubukhosi behlabathi bonqulo lobuxoki. (ISityhilelo 6:2; 17:16; 19:1, 2) Xa wayesemhlabeni, uYesu akazange avume ukwenza kwanesenzo esinye sokunqula esasiya kuzukisa uMtyholi. Wakugxeka ukubekelwa bucala kweLizwi likaYehova ngenxa yezithethe zabantu nokusetyenziswa konqulo lukaThixo ngenjongo yokurhweba. Wayenekhwele ngoYehova.—Luka 4:5-8; Mateyu 15:3-9; 21:12, 13.
7. (a) Bubuphi obunye ubungqina banamhla bokunqulwa kukaBhahali? (b) Kutheni uKristu njengoKumkani ezinyamezele nje ezi zinto?
7 Ngoko, kutheni le nto uKristu, ngoku olawula phakathi kweentshaba zakhe, evumela ubuBhahali banamhla bubonakale busanda? Kutheni evumela abantu ababonakala bengohlwaywa ekuqhubekeni behlonela uthixo wale nkqubo yezinto ngokuzityhalela bucala izinto ezifunwa nguYehova? Kutheni ezinyamezela nje izenzo zabo ngokungathi uThixo akakuchasanga ukuziphatha kakubi kwabo ngokwesini, ukuzukisa kwabo indlela yobomi yokuthand’ izinto eziphathekayo, ukuzifica kwabo kuqheliselo lokukhafula ngoxa besithi bangamaKristu, nokufundisa kwabo iimfundiso zobuBhabhiloni ngokungathi ezi mfundiso zililizwi likaThixo? Le ngxelo yamandulo ibonisa ukuba oku kuvavanya abantu, kubenza bazibonise ngokuphandle ukuba banqula bani na, baze ngaloo ndlela bazibonise enoba bafanele balondolozwe okanye babulawe na.
8. Yiyiphi imibuzo enzulu thina ekufuneka sizibuze yona?
8 Liliphi ikhondo olikhethileyo? Ngaba ulutyeshele lonke uqheliselo olusenokukufanisa njengoqhelisela ubuBhahali banamhla? Ngaba uzahlulile kwihlabathi waza wema njengomnquli wokwenyaniso kaYehova?—2 Korinte 6:17.
9. (a) Ukuba ngokwenyaniso sifana noYehonadabhi, yintoni esiya kuyenza? (b) Izibhalo ezibonisiweyo zikucacisa njani ukubaluleka kwezi zinto?
9 UYehonadabhi, njengomnquli kaYehova ongengomSirayeli, wafanekisela kwangaphambili “ezinye izimvu” ngoku ezihlanganiswayo zinethemba lobomi obungunaphakade emhlabeni. Ngaba uyasibonisa isimo sengqondo sikaYehonadabhi? Ngaba ukulungele ukuzifanisa ekuhleni njengohamba noYehu Omkhulu nabalandeli bakhe abathanjisiweyo emhlabeni abavakalisa ‘imini esondelayo yempindezelo yoThixo wethu’? Ngaba unesabelo kunye nabo kuloo msebenzi ungxamisekileyo? (Isaya 61:1, 2; Luka 9:26; Zekariya 8:23) Ngaba uzinikele ngokupheleleyo kuYehova, ungavumeli nanye into iphazamise indawo amele ahlale kuyo entliziyweni yakho? (Mateyu 6:24; 1 Yohane 2:15-17) Ngaba ubomi bakho bubonisa ukuba ulwalamano lwakho naye yeyona nto uyixabisileyo, ngaba ubonisa ukuba yonk’ into eyiyenye yakhelwe kulo?—INdumiso 37:4; IMizekeliso 3:1-6.
NGABA UNALO UPHAWU?
10. IBhayibhile ibonisa njani ukuba kuphela ngabanquli bakaYehova abaya kusinda?
10 Bekuya kuba yimpazamo embi kakhulu ukugqiba ngelithi, ayikho into engakumbi efunekayo emntwini ukuba loo mntu uzama ukuphila ubomi “obulungileyo” yaye ukuba uyaziphepha iinkonzo ezenza izinto ngokucacileyo ezigwetyiweyo kwiLizwi likaThixo. Bonke abanethemba lokusindela ‘kumhlaba omtsha’ kwakhona ngendlela engenakuphazanywa bamele bazibonakalise njengabanquli bakaYehova. (ISityhilelo 14:6, 7; INdumiso 37:34; Yoweli 2:32) Esi sigidimi sadluliswa ngombono owanikwa umprofeti uHezekile ngaphambi kokutshatyalaliswa kweYerusalem ngowama-607 B.C.E.
11. (a) Khawuchaze umbono obhalwe kuHezekile 9:1-11. (b) Yintoni eyayifuneka ukuze umntu asinde?
11 UHezekile weva uYehova ethuma abo babeyalelwe ukutshabalalisa iYerusalem engathembekanga nabemi bayo. Wabona amadoda amathandathu exhobile ukuze ahlekeze, ibe kwakukho nenye indoda eyambethe ilinen, inezinto zokubhala ethangeni layo. Okokuqala uYehova wayalela le ndoda yambethe ilinen wathi: “Canda esazulwini somzi, esazulwini seYerusalem, ubeke uphawu emabunzini amadoda agcumayo, ancwinayo ngenxa yamasikizi onke awenzekayo esazulwini sayo.” Wandula ke wathi kwamanye amathandathu: “Candani esazulwini somzi emva kwayo, nixabele; malingabi nanceba iliso lenu, ningabacongi. Amaxhego, amadodana nomthinjana, abantwana nabafazi, babulaleni, ukuze batshabalale; ke bonke abantu abanophawu olo, musani ukufika kubo; nize niqalele ke engcweleni yam.” Embonweni uHezekile wabona intshabalalo eyalandelayo—yayinkulu kangangokuba kwabonakala ukuba wonke uSirayeli owayesekwelo lizwe wayeza kutshatyalaliswa. (Hezekile 9:1-11) Yayiyintoni into eyayifuneka ukuze umntu asinde? Yayiluphawu olwalubekwa kwibunzi likabani yindoda eyayinezinto zokubhala ethangeni layo.
12. (a) Zaziyintoni izinto ezingamasikizi abantu abaphawuliweyo ‘ababegcuma baze bancwine’ ngenxa yazo? (b) Kutheni uYehova wayezicekisa nje izinto ezinjalo?
12 Abantu ababeza kuphawulelwa ukusinda kuphela ‘yayingabagcumayo nabancwinayo ngenxa yamasikizi onke’ awayesenzeka eYerusalem. Ayeyintoni loo “masikizi”? Amahlanu achazwe ngolu hlobo: (1) kwakukho ‘umfanekiso wobukhwele’ esangweni lentendelezo yangaphakathi letempile kaYehova. Nokuba wawubonakala unjani na, amaSirayeli ayezinikele kulo mfanekiso endaweni yokuba azinikele kuYehova. (1 Kumkani 14:22-24) (2) Izinto ezinambuzelayo namarhamncwa zazikrolwe ezindongeni, phambi kwazo kwakusenziwa isiqhumiso esasinikelwa ngaphakathi kanye etempileni. (3) Abafazi babekhala ngenxa yokufa kukathixo uTamuz, eyayilelinye igama likaNimrodi, owavukela uYehova. (Genesis 10:9) (4) Amadoda ayebonisa ukungabi nantlonelo ngokupheleleyo ngokunikela umva itempile kaYehova nangokuqubuda elangeni. (Duteronomi 4:15-19) (5) Njengesinyeliso sokugqibela, kwakukho abantu ababezalise ilizwe ngokwenza ugonyamelo bephethe ‘amasebe omdiliya,’ mhlawumbi oko kwakungumqondiso wesini, bewasondeza emathatheni kaYehova. Ngaba unokusiqonda isizathu sokuba uYehova abe wayebacekisile?—Hezekile 8:5-17.
13. (a) Uchaza lube lunye ngexesha, gqabaza ngoqheliselo lwanamhla olufanayo naloo ‘masikizi.’ (b) Uvakalelwa njani ngolu qheliselo?
13 Wena ngokobuqu usabela njani kuqheliselo lwanamhla olwenziwa yiNgqobhoko olufanayo nala “masikizi”? (1) Kwiicawa ezininzi zayo kukho imifanekiso eqingqiweyo abathi abantu baqubude phambi kwayo benqula, nangona iBhayibhile ilumkisa nxamnye nokwenjenjalo. (1 Korinte 10:14; thelekisa eyesi-2 yooKumkani 17:40, 41.) (2) Iyahambisana notyekelo lokuthi umntu wavela ezilwanyaneni kunokuba abe wadalwa nguThixo; kwakhona inesabelo ekuboniseni uzinikelo olunenzondelelo phambi kwemifuziselo yezilwanyana neentaka esetyenziswa njengemiqondiso yobuhlanga. (3) Kunqulo lwayo ibalaselisa umnqamlezo, owathi ukususela kwamandulo waba ngumqondiso wokunqulwa kukaTamuz, ibe iyathelela kwimigidi yokuzilela abo bafe kwiimfazwe eziphalaz’ igazi ezibonakalisa isimo sengqondo sikaNimrodi. (Kodwa bona uYohane 17:16, 17.) (4) Ikunikel’ umva oko uThixo akuthethayo ngeLizwi lakhe yaye, kunoko, ikhetha ‘ukhanyo’ olunikelwa yinzululwazi yanamhla nentandabulumko yabantu. (1 Timoti 6:20, 21; thelekisa uYeremiya 2:13.) (5) Ngokungathi ayanelisekanga koko, kwiindawo ezithile ixhasa imvukelo ibe inembono yokuzifica ngokugqith’ emgceni ekuziphatheni okubi ngokwesini, ngoxa izibanga ithetha egameni likaThixo. (2 Petros 2:1, 2) Bambi abantu olu tyekelo balujonga njengolubonakalisa inkululeko. Basenokungavumelani nalo lonke, kodwa basenokuvumelana nolunye okanye balubethe ngoyaba. Uziva njani ngoqheliselo olungamhloneliyo uThixo ngolo hlobo nolutyekisa abantu kuMdali woluntu?
14. Kutheni le nto isibakala sokuba umntu edanisiwe ziicawa ngokuyimfuneko kungathethi ukuba uya kusinda?
14 Abantu abaninzi badanisiwe ziicawa ibe abasayi. Kwakhona basenokuphazanyiswa kakhulu lugonyamelo nokunganyaniseki okusehlabathini. Kodwa oko akuthi ngokuyimfuneko kuthethe ukuba baphawulelwe ukusinda. Bamele baphawulwe ‘yindoda enezinto zokubhala ethangeni layo.’ Izibakala zibonisa ukuba udidi ‘lomkhonzi othembekileyo noqondayo’ lwenza loo msebenzi wokuphawula namhlanje.—Mateyu 24:45-47.
15. (a) Luyintoni uphawu? (b) Umntu ulufumana njani?
15 Bonke abafuna ukuphawulwa njengabakholisekileyo kuThixo bamele bayamkele imfundiso uYehova ayidlulisa ngolo didi ‘lomkhonzi’ baze babe ngabanquli bokwenyaniso bakaYehova. Abamele babe ngabantu ababeka uYehova ngemilomo yabo kodwa ngokwenene bethanda iindlela zehlabathi. (Isaya 29:13, 14; 1 Yohane 2:15) Bamele bamthande uYehova nemilinganiselo yakhe baze bazive bebuhlungu ezintliziyweni, ‘bagcume baze bancwine,’ ngenxa yeemfundiso noqheliselo olungamhloneliyo. Akukho mntu uya kubeka uphawu lweinki yokoqobo kumabunzi abo. Kodwa xa benophawu lokomfuziselo kuya kucaca kubo bonke ukuba, njengamaKristu azahluleleyo nabhaptiziweyo, bambethe “umntu omtsha” ochazwe kumaEfese 4:24. Banokholo oluphilileyo. Ekuhleni nangasese bazabalazela ukwenza oko kuya kubeka uYehova. Abamele babe nolu phawu asingabo baphume kwiNgqobhoko kuphela kodwa bonke, kungakhathaliseki imvelaphi yabo, abanethemba lokusindela ‘kumhlaba omtsha’ njengezinxulumani zodidi oluthanjisiweyo.
16. Kutheni le nto lo mbono ubaluleke ngokukhethekileyo ebantwaneni nakubazali babo?
16 Into ebaluleke ngokukhethekileyo yile yokuba ababulali ababethunywe nguYehova baxelelwa ukuba kwakungamele kusindiswe namnye umntu owone uYehova kungakhathaliseki ukuba babusithini na ubudala bakhe, isini, engatshatanga okanye etshatile. Umntu otshatileyo eyedwa umele abe nophawu lwakhe ukuze asindiswe. Ukuba abazali abavumi ukuba abantwana babo baphawulwe okanye ukuba bayasilela ukubakhulisa njengabakhonzi bakaYehova, bamele babe nembopheleleko ngento eyenzekayo kwabo bantwana. Nangona abantwana abathobelayo babazali abahlonel’ uThixo bejongwa ‘njengabangcwele’ nguYehova, abavukelayo abajongwa njalo. (1 Korinte 7:14; INdumiso 102:28; IMizekeliso 20:11; 30:17) Ukuba abantwana badala ngokwaneleyo ukuba babe ngamaKristu abhaptiziweyo kodwa abafuni ukuphila ngokuvisisana nezinto ezifunekayo, enoba babhaptiziwe okanye ababhaptizwanga, ubudala babo abuyi kuphumela ekubeni basindiswe. Ngoko, hayi indlela ekubaluleke ngayo ngamnye wethu okubudala anokuziphendulela kubo ukuba aphawulwe ngokucacileyo njengomntu ozahlulele kuThixo nowenza ukuthanda kwakhe!
17. Yintoni esiyifundileyo apha ngemfesane kaYehova?
17 UYehova ubonakalise imfesane enkulu kuluntu ngokuthumela amangqina akhe ukuba alumkise ngentshabalaliso esondelayo nokuba alathe indlela yokusinda. Kodwa uyazi kakuhle imbali yonqulo lobuxoki nesiqhamo esibolileyo esiveliswe lulo. Xa iBhabhiloni Enkulu itshatyalaliswa, akuyi kubonakaliswa mfesane kuye nabani na ozingisa ekubambeleleni kuyo. Ukuze sisinde ekuphunyezweni komgwebo wobuthixo ozayo, simele sihambe emanyathelweni kaYesu Kristu njengabanquli bakaYehova bokwenyaniso, uMdali wezulu nomhlaba.
[Imifanekiso ekwiphepha 95]
Ngaba ngokwenene unalo uphawu olufunekayo ukuze usinde?