“Ithe Tye Na Intliziyo Yakho?”
“Hamba nam, ubone ikhwele lam ngenxa kaYehova.”—2 KUMKANI 10:16.
1, 2. (a) Imeko yonqulo kwaSirayeli yaya isiba mbi njani? (b) Ngowama-905 B.C.E., ziziphi iinguqu eziphawulekayo ekwakusele kumbovu ukuba zenzeke kwaSirayeli?
UNYAKA wama-905 B.C.E. wawulixesha leenguqu eziphawulekayo kwaSirayeli. Kwiminyaka ephantse ibe li-100 ngaphambilana, uYehova wayebangele ukuba ubukumkani obumanyeneyo bakwaSirayeli bahlulwe ngenxa yokuwexuka kukaSolomon. (1 Kumkani 11:9-13) Ngelo xesha, ubukumkani basezantsi bakwaYuda, babulawulwa ngunyana kaSolomon uRehabheham ngoxa obasentla, bakwaSirayeli, baba phantsi koKumkani uYarobheham, umEfrayim. Okulusizi kukuba, ubukumkani basentla baba nesiqalo esibi gqitha. UYarobheham wayengafuni ukuba abantu bakhe baye kunqula etempileni kubukumkani basezantsi, esoyika ukuba babeza kuvukwa ziingcamango zokubuyela kwindlu kaDavide. Ngoko wamisela unqulo lwethole kwaSirayeli waza ngaloo ndlela waqalisa unqulo-zithixo olwahlala ixesha elide ukutyhubela imbali yobukumkani basentla.—1 Kumkani 12:26-33.
2 Izinto zaba mbi ngakumbi xa uAhabhi, unyana kaOmri, waba ngukumkani. Umfazi wakhe owayengowolunye uhlanga, uIzebhele, wakhuthaza unqulo lukaBhahali waza wababulala abaprofeti bakaYehova. Phezu kwazo nje izilumkiso ezingqalileyo zomprofeti uEliya, uAhabhi akazange amnqande. Noko ke, ngowama-905 B.C.E., uAhabhi wafa waza uYehoram, unyana wakhe, walawula. Ngoku kwakufike ixesha lokuba ilizwe licocwe. Owayengene ezihlangwini zikaEliya, uElisha, waxelela umphathi-mkhosi, uYehu, ukuba uYehova wayemthambisela ukuba abe ngukumkani olandelayo wakwaSirayeli. Lwaluyintoni uthumo lwakhe? Wayemele ayibulale indlu eyayinesono ka-Ahabhi aze aliphindezele igazi labaprofeti elaliphalazwe nguIzebhele!—2 Kumkani 9:1-10.
3, 4. UYehonadabhi wabonisa njani ukuba intliziyo yakhe ‘yayithe tye kwintliziyo kaYehu’?
3 Ethobela umyalelo kaThixo, uYehu wayalela ukuba abulawe uIzebhele ongendawo, waza emva koko waqalisa ukucoca uSirayeli ngokubulala indlu ka-Ahabhi. (2 Kumkani 9:15–10:14, 17) Emva koko wadibana nomnye wabaxhasi bakhe. “Wafumanana noYehonadabhi unyana kaRekabhi, emkhawulela; wambulisa, wathi kuye, Ithe tye na intliziyo yakho, njengokuba injalo intliziyo yam kwintliziyo yakho? Wathi uYehonadabhi, Injalo. Wathi, Ukuba injalo ke, ethe isandla sakho. Wamnika isandla sakhe. Wamnyusa wamkhwelisa enqweleni. Wathi, Hamba nam, ubone ikhwele lam ngenxa kaYehova. Bamkhwelisa ke naye enqweleni yakhe.”—2 Kumkani 10:15, 16.
4 UYehonadabhi (okanye uYonadabhi) wayengengomSirayeli. Noko ke, ngokuvisisana negama lakhe (elithetha ukuthi “UYehova Uyathanda,” “UYehova Uphakamile,” okanye “UYehova Unesisa”) wayengumnquli kaYehova. (Yeremiya 35:6) Ngokuqinisekileyo, wayenomdla ongaqhelekanga wokubona ‘ikhwele likaYehu ngenxa kaYehova.’ Sazi njani? Kaloku, ukudibana kwakhe nokumkani othanjisiweyo wakwaSirayeli kwakungenzekanga ngengozi. UYehonadabhi ‘wayemkhawulela,’ ibe oku wakwenza ngexesha uYehu wayesele embulele uIzebhele nabanye bendlu ka-Ahabhi. UYehonadabhi wayeyazi into eqhubekayo xa wamkela isimemo sikaYehu sokuba akhwele kwinqwelo yakhe. Ngaphandle kwamathandabuzo wayemi kwicala likaYehu—icala likaYehova—kule mbambano eyayiphakathi konqulo lobuxoki nolwenyaniso.
UYehu NoYehonadabhi Bale Mihla
5. (a) Ziziphi iinguqu eziza kwenzeka kungekudala kulo lonke uluntu? (b) Ngubani uYehu Omkhulu, ibe ngubani ummeli wakhe emhlabeni?
5 Namhlanje, kungekudala izinto ziza kuluguqukela kakubi uluntu luphela njengoko kwenzekayo kuSirayeli emva phayaa ngowama-905 B.C.E. Ngoku sele lisondele ixesha lokuba uYehova awucoce umhlaba kuyo yonke imiphumo emibi yempembelelo kaSathana, kuquka nonqulo lobuxoki. Ngubani uYehu wale mihla? Akakho omnye ngaphandle kukaYesu Kristu, abhekiswa kuye amazwi angokwesiprofeto athi: “Bhinqa ikrele lakho ethangeni, gorha, bhinqa indili yakho nobungangamela bakho. Tyhudisa, ukhwele uhambe, unobungangamela bakho, ngenxa yenyaniso, nolulamo olunobulungisa.” (INdumiso 45:3, 4) Emhlabeni uYesu umelwa ‘nguSirayeli kaThixo,’ amaKristu athanjisiweyo ‘agcina imiyalelo kaThixo nanomsebenzi wokunikela ubungqina kuYesu.’ (Galati 6:16; ISityhilelo 12:17) Ukususela ngowe-1922 aba bazalwana bathanjisiweyo bakaYesu baye ngokungenadyudyu balumkisa ngemigwebo kaYehova ezayo.—Isaya 61:1, 2; ISityhilelo 8:7–9:21; 16:2-21.
6. Ngoobani abaphume ezintlangeni beze kuxhasa amaKristu athanjisiweyo, yaye ngokufuziselayo, baye bakhwela njani enqwelweni kaYehu Omkhulu?
6 AmaKristu athanjisiweyo ebengewodwa kulo msebenzi. Kanye njengokuba uYehonadabhi wamkhawulelayo uYehu, abaninzi abavela ezintlangeni baye baphuma beze kuxhasa uYesu, uYehu Omkhulu, kunye nabameli bakhe basemhlabeni ekumeleni kwabo unqulo lokwenyaniso. (Zekariya 8:23) Ekubeni uYesu wababiza ngokuthi ‘zezinye izimvu,’ ngowe-1932 bagqalwa njengoYehonadabhi wale mihla ibe bamenywa ukuba ‘bakhwele enqwelweni’ kaYehu wale mihla. (Yohane 10:16) Njani? ‘Ngokugcina umyalelo kaThixo’ nangokuncedisa abathanjiswa ‘kumsebenzi wokunikela ubungqina kuYesu.’ Kule mihla, oku kuquka ukushumayela iindaba zoBukumkani bukaThixo obumiselweyo nobulawulwa nguYesu njengoKumkani. (Marko 13:10) Ngowe-1935 la “maYonadabhi” afaniswa ‘njengesihlwele esikhulu’ ekuthethwa ngaso kwiSityhilelo 7:9-17.
7. Namhlanje amaKristu aye abonisa njani ukuba ‘iintliziyo zawo zisathe tye’ kwintliziyo kaYesu?
7 Ukususela kwiminyaka yee-1930, isihlwele esikhulu kunye nabazalwana baso abathanjisiweyo siye ngenkalipho sazingqina siluxhasa unqulo lokwenyaniso. Kumazwe athile aseMpuma naseNtshona Yurophu, kwiMpuma Ekude naseAfrika, abaninzi baye balufela ukholo lwabo. (Luka 9:23, 24) Kwamanye amazwe, baye bavalelwa ezintolongweni, bahlaselwa ngamahlokondiba, okanye batshutshiswa ngezinye iindlela. (2 Timoti 3:12) Enjani ukuba ntle indumasi yokuba nokholo abaye bazenzela yona! Ibe iNgxelo Yonyaka Wenkonzo We-1997 ibonisa ukuba basazimisele ukumkhonza uThixo, nokuba sekumnyam’ entla. ‘Iintliziyo zabo zithe tye’ kwintliziyo kaYesu. Oku kuye kwabonakaliswa ebudeni bowe-1997, xa abavakalisi boBukumkani abazizi-5599-931, abaphantse bebonke ‘babe ngamaYonadabhi’, baye bachitha isimbuku seeyure ezili-1179-735 841 kumsebenzi wokunikela ubungqina kuYesu.
Basashumayela Ngenzondelelo
8. AmaNgqina kaYehova ayibonakalisa njani inzondelelo yawo ngonqulo lokwenyaniso?
8 UYehu wayedume ngokuyiphaphathekisa inqwelo yakhe—nto leyo ebonisa inzondelelo awayenayo ekwenzeni umsebenzi wakhe. (2 Kumkani 9:20) UYesu, uYehu Omkhulu, uchazwa ‘njengodliwa’ yinzondelelo. (INdumiso 69:9) Akumangalisi ngoko ukuba, namhlanje amaKristu okwenyaniso, ebonakala ngenzondelelo yawo. Ebandleni nakuwonke wonke, ‘ashumayela ilizwi ngokungxamisekileyo ngexesha elilungileyo nangexesha lenkathazo.’ (2 Timoti 4:2) Inzondelelo yawo yabonakala ngokukhethekileyo ngasekuqaleni kowe-1997 emva kokuba inqaku loBulungiseleli Bethu BoBukumkani lakhuthaza abaninzi kangangoko kunokwenzeka ukuba babe nesabelo kubuvulindlela bobuncedani. Ilizwe ngalinye labeka inani loovulindlela abangabancedani elinqwenela ukulifikelela. Yaba njani intsabelo? Yayisemagqabini! Amasebe amaninzi abetha ngaphaya kwelo nani. IEcuador yayizibekele usukelo lwama-4000 kodwa ngoMatshi kwafakwa ingxelo yoovulindlela abangabancedani abangama-6936. IJapan yanikela ingxelo yesimbuku sabali-104 215 ebudeni bezo nyanga zintathu. EZambia, apho bekulindelwe ama-6000, baba ngama-6414 oovulindlela abangabancedani abanikela ingxelo ngoMatshi; baba ngama-6532 ngoAprili; yaye ngoMeyi baba ngama-7695. Emhlabeni wonke, incopho yoovulindlela abangabancedani nabathe ngxi xa idibene yaya kufikelela kwisi-1110 251, ulwando lwe-34,2 ekhulwini xa kuthelekiswa nowe-1996!
9. Ukongezelela kumsebenzi wendlu ngendlu, ziziphi ezinye iindlela amaNgqina kaYehova abafumana ngazo abantu ukuze abaxelele iindaba ezilungileyo?
9 Umpostile uPawulos wabaxelela oku abadala base-Efese: ‘Andizange ndirhoxe ekunixeleleni nanye yezinto ezaziyingenelo nasekunifundiseni esidlangalaleni nakwizindlu ngezindlu.’ (IZenzo 20:20) Namhlanje amaNgqina kaYehova axelisa umzekelo kaPawulos yaye ashumayela iindaba ezilungileyo ngenzondelelo kwindlu ngendlu. Noko ke, kusenokungabi lula ukufumana abantu emakhayeni abo. Ngenxa yoko, “ikhoboka elithembekileyo neliyingqondi” likhuthaza abavakalisi boBukumkani ukuba baye ebantwini kwiindawo abashishina kuzo, ezitratweni, elwandle, ezipakini—naphi na apho abantu bafumaneka khona. (Mateyu 24:45-47) Imiphumo ibe yencumisayo.
10, 11. Abavakalisi kumazwe amabini baye bazibhokoxa njani ekufumaneni abantu abanomdla abadla ngokungafumaneki emakhayeni?
10 ECopenhagen, eDenmark, iqaqobana labavakalisi belishumayela kwizitrato ezikufuphi kwisikhululo sikaloliwe. Ukususela ngoJanuwari ukusa kuJuni, lahambisa amaphephancwadi angama-4733, laba neengxoxo ezivus’ umdla nabantu, laza lenza amabuyelo amaninzi. Abavakalisi abaliqela kwelo lizwe baye benza imizila yamaphephancwadi ezivenkileni. Kwenye idolophu kubakho imarike rhoqo ngooLwezihlanu, yaye kubakho amawaka eendwendwe. Ngoko ibandla liye lenza ilungiselelo elithe rhoqo lokunikela ubungqina kuloo marike. Kwenye indawo kutyelelwa izikolo zize zishiyelwe isixa seempapasho ngokukhethekileyo ezilungele abafundisi-ntsapho.
11 NaseHawaii kuye kwenziwa imigudu yokufikelela abo bangafumanekiyo emakhayeni. Intsimi ekhethekileyo iquka iindawo zikawonke wonke (izitrato, iipaki, iindawo zokupaka iinqwelo-mafutha, neendawo ekukhwelwa kuzo ooduladula), iindawo ezisembindini wedolophu, oobhazabhaza beevenkile nakwizikhululo zeenqwelo-moya, kunikelwa ubungqina ngemfonomfono, kwizithuthi zikawonke wonke (kushunyayelwa kooduladula), nasezikholejini. Kuyaqinisekiswa ukuba inani elaneleyo lamaNgqina labelwa intsimi enye nokuba lawo abelwayo abe aqeqeshwe kakuhle. Nakwamanye amazwe kunikelwa ingxelo yemigudu elungelelaniswe kakuhle efanayo. Ngenxa yoko, kufunyanwa abantu abanomdla abebenokungafumaneki kubulungiseleli bendlu ngendlu.
Ukuma Ngokuqinileyo
12, 13. (a) Liliphi iqhinga elisetyenziswe nguSathana nxamnye namaNgqina kaYehova ebudeni bowe-1997? (b) Ubuxoki obasasazwa kwelinye ilizwe baba nayiphi imiphumo engalindelekanga?
12 Ngowe-1997, kuninzi lwamazwe bekusasazwa inkcazelo ebubuxoki nenyelisa amaNgqina kaYehova ngenjongo ecacileyo yokuwamangalela ukuba kunokwenzeka. Kodwa akakhange arhoxobise! (INdumiso 112:7, 8) Aye akhumbula umthandazo womdumisi othi: “Abakhukhumali bathungele ubuxoki ngam; mna ndizibamba ngentliziyo yonke iziyalezo zakho.” (INdumiso 119:69) Ukusasazwa kobuxoki ngolo hlobo kububungqina bokuthiywa kwamaKristu okwenyaniso njengoko kwakuprofetwe nguYesu. (Mateyu 24:9) Ibe maxa wambi isikhuni besibuya nomkhwezeli. Indoda ethile yaseBelgium yafunda inqaku elithob’ isidima eliphathelele amaNgqina kaYehova elalikwiphephandaba elaziwayo lemihla ngemihla. Isothuswa ngala magqabaza anyembayo, yaya kwintlanganiso eyayikwiHolo yoBukumkani kwiCawa elandelayo. Yalungiselela ukufundisisa iBhayibhile nelinye iNgqina lasekuhlaleni yaza yaqhubeka isenza inkqubela ekhawulezileyo. Ngaphambilana, le ndoda yayililungu leqela elithile. Isifundo sayo seBhayibhile sayinceda yabucoca ubomi bayo, nto leyo eyaphawulwa ngabantu abayingqongileyo. Ngokuqinisekileyo, umbhali welo nqaku linyembayo akazange acinge ukuba izinto zaziya kuhamba ngolo hlobo!
13 Abanye abantu abantliziyo zinyanisekileyo eBelgium baye bayigxeka le nkcazelo ilahlekisayo esasazwayo. Phakathi kwabo ibingowayesakuba yinkulumbuso owavuma ukuba wayewothulel’ umnqwazi umsebenzi ophunyezwe ngamaNgqina kaYehova. Ibe elinye ilungu lendlu yowiso-mthetho labhala: “Ngokuchaseneyo nezinyeliso ezisasazwa ngamaxesha athile, kum [amaNgqina kaYehova] akabonakali esisisongelo nakancinane kumaziko kaRhulumente. Angabahlali abathanda uxolo, abanezazela nababahlonelayo abasemagunyeni.” Ngokwenene, abubulumko amazwi ompostile uPetros athi: “Gcinani ihambo yenu intle phakathi kweentlanga, ukuze, kwinto ezithetha ngayo ngokunxamnye nani njengabenzi-bubi, zithi ngenxa yemisebenzi yenu emihle eziye zangamangqina okuzibonela kuyo zimzukise uThixo ngemini yokuvelela kwakhe.”—1 Petros 2:12.
Umbhiyozo Obalaseleyo WeSikhumbuzo
14. Ziziphi ezinye zeengxelo ezibangel’ imincili zoziwo lweSikhumbuzo sowe-1997?
14 Kuyinto efanelekileyo ukuba abo banikela ubungqina kuYesu bafanele basigqale iSikhumbuzo sokufa kwakhe njengento ebalulekileyo enyakeni. Ngowe-1997, abazizi-14 322 226 abebekho ngoMatshi 23 beze kubhiyozela esi siganeko. Bebengaphezulu ngesi-1400 000 kwababekho ngowe-1996. (Luka 22:14-20) Kumazwe amaninzi abebeze eSikhumbuzweni babengaphezulu lee kwinani labavakalisi boBukumkani, nto leyo enika ithemba ngolwando lwexesha elizayo. Ngokomzekelo, eHaiti, ngowe-1997 bekukho incopho yabavakalisi abangama-10 621, ngoxa bengama-67 259 abebekho eSikhumbuzweni. Usenokukhangela ingxelo yonyaka ekwiphepha 18 ukusa kwelama-21 uze ubone indlela aphakame ngayo amanani ababezile kwamanye amazwe xa ethelekiswa nenani labavakalisi.
15. Kwamanye amazwe, abazalwana bethu baye bazoyisa njani iingxaki ezinkulu ukuze babhiyozele iSikhumbuzo?
15 Kwabanye, ukuya eSikhumbuzweni kwakungelula. EAlbania kwakukho umqathango wokuba kungabikho mntu uhamba esitratweni ngeyesi-7:00 ngokuhlwa ngenxa yezidubedube. Kumaqela amancinane ali-115 elo lizwe, iSikhumbuzo saqalisa nge-5:45 ngokuhlwa. Ilanga latshona nge-6:08 ngokuhlwa, liphawula ukuqala kukaNisan 14. Imifuziselo yahanjiswa kwisithuba se-6:15 ngokuhlwa. Phantse kuzo zonke iimeko umthandazo wokuqukumbela wenziwa nge-6:30 ngokuhlwa, ibe abo babekho bakhawuleza bagoduka ngaphambi kokuba lifike ixesha lokusebenza komqathango. Sekunjalo, abebeze eSikhumbuzweni bebengama-3154, ukanti incopho yabavakalisi ili-1090. Kwelinye ilizwe laseAfrika, imfazwe yamakhaya yabangela ukuba abantu bangakwazi ukufikelela kwiHolo yoBukumkani, ngoko abadala ababini bagqiba kwelokuba badibane kwikhaya lomnye umdala wesithathu ukuze benze amalungiselelo okuqhuba loo mbhiyozo kumaqela amancinane. Ukuze bafike kwelo khaya, aba badala babini kwafuneka banqumle kumsele ohamba amanzi. Noko ke, kwakusiliwa kuloo mmandla, ibe kwakukho abantu ababezifihle endaweni ethile ababedubula wonke umntu ozama ukunqumla kuloo msele. Omnye umdala wabaleka enqumla yaye akuzange kubekho nto ixhomisa amehlo. Owesibini weva isithonga xa anqumlayo. Waziphosa phantsi waza warhubuluza ukuze asinde njengoko iimbumbulu zazidlula phezu kwentloko yakhe. Le ntlanganiso yabadala yaqhutywa ngempumelelo, ibe iintswelo zebandla zanyanyekelwa kakuhle.
“Siphuma Kuzo Zonke Iintlanga Nezizwe . . . Neelwimi”
16. Udidi lwekhoboka elithembekileyo neliyingqondi liye lenza waphi amalungiselelo ukuze iindaba ezilungileyo zisasazwe kumaqela eelwimi amancinane?
16 Umpostile uYohane wathi isihlwele esikhulu sasiza kuphuma “kuzo zonke iintlanga nezizwe namaqela abantu neelwimi.” (ISityhilelo 7:9) Ngenxa yoko, iQumrhu Elilawulayo lilungiselela ukuba uncwadi lufumaneke ngeelwimi ezininzi ngakumbi—kuquka ezo zithethwa ziintlanga ezisemaphandleni nangamaqela amancinane abantu. Ngokomzekelo, eMozambiki iphecana elithi Ubomi Kwihlabathi Elitsha Elinoxolo likhululwe ngeelwimi ezongezelelekileyo ezintlanu. ENicaragua, incwadana enemifanekiso ethi Bunandiphe Ubomi Emhlabeni Ngonaphakade! yenziwe yafumaneka ngolwimi lwesiMiskito—impapasho yokuqala yeWatch Tower Society epapashwe ngolo lwimi. AmaIndiya amaninzi athetha isiMiskito ayamkela ngovuyo loo ncwadana inemifanekiso akubona into ebhalwe ngolwimi lwawo. Ngowe-1997 uMbutho upapashe uncwadi ngeelwimi ezongezelelekileyo ezingama-25 waza washicilela amaphephancwadi angaphezu kwewaka lesigidi.
17. Lisebenzisa yiphi intetho iqela eliye lancedwa eKorea, ibe iividiyo ziye zaluncedo njani kwaba bantu?
17 EKorea kwancedwa elinye iqela labantu abathetha ulwimi oluthile. Ngowe-1997 kuye kwakho indibano yokuqala yentetho yezandla eKorea. Kukho amabandla ali-15 abantu bentetho yezandla eKorea yaye anabavakalisi abangama-543, kodwa bali-1174 ababekho kuloo ndibano, yaye bangama-21 ababhaptiziweyo. Ukuze kuncedwe abangevayo abangakwaziyo ukufunda, kuveliswa iimpapasho ezikwividiyo ngeentetho zezandla ezili-13 ezahlukahlukeneyo. Ngaloo ndlela, abangevayo bayancedwa ukuba “balese” bade bafundisise iindaba ezilungileyo, kuze kubekho imiphumo encumisayo. EUnited States, ngaphambili bekuthabatha iminyaka emalunga nemihlanu ukuba umntu ongevayo enze inkqubela ade abhaptizwe. Ngoku, ekubeni zininzi iividiyo ezifumaneka ngeNtetho Yezandla YaseMerika, kwabanye abangevayo, oko kuye kwathabatha ithuba elimalunga nonyaka nje kuphela.
‘Ukuhlala Enqwelweni’
18. Emva kokudibana noYehonadabhi, yintoni awaqalisa ukuyenza uYehu?
18 Xa sibuyela emva phayaa ngowama-905 B.C.E., emva kokuthelelwa nguYehonadabhi, uYehu waqalisa ukulutshabalalisa unqulo lobuxoki. Wakhupha isimemo kubo bonke abanquli bakaBhahali esithi: “Mmemeleni ingqungquthela engcwele uBhahali.” Wandula ke wathumela kulo lonke ilizwe ukuze aqiniseke ukuba akukho namnye umnquli kaBhahali owayesele. Njengoko ezo zihlwele zazithontelana kwitempile yalo thixo wobuxoki, kwaqinisekwa ukuba kwakungekho mnquli kaYehova ukhoyo apho. Ekugqibeleni, uYehu nomkhosi wakhe babacim’ igama abanquli bakaBhahali. “UYehu wamtshabalalisa ke uBhahali kwaSirayeli.”—2 Kumkani 10:20-28.
19. Ngenxa yoko sele kuza kwenzeka eluntwini, nguwuphi umoya esifanele siwubonakalise, ibe nguwuphi umsebenzi esifanele sizixakekise gqitha ngawo?
19 Namhlanje, ukutshatyalaliswa okokugqibela kwalo lonke unqulo lobuxoki sele kusemnyango. Esalathiswa ziingelosi, amaKristu avakalisa iindaba ezilungileyo kulo lonke uluntu, elukhuthaza ukuba loyike uThixo luze luzahlule kunqulo lobuxoki. (ISityhilelo 14:6-8; 18:2, 4) Abalulamileyo bakhuthazwa ukuba bazithobe kuBukumkani bukaThixo obuphantsi koKumkani obekwe etroneni nguYehova, uYesu Kristu. (ISityhilelo 12:10) Kweli xesha libangel’ imincili, asifanele sivumele inzondelelo yethu ihle njengoko simela unqulo lokwenyaniso.
20. Yintoni ozimisele ukuyenza ebudeni bonyaka wenkonzo we-1998?
20 Ngesinye isihlandlo, xa uKumkani uDavide wayephantsi kwengcinezelo, wathandaza esithi: “Izimasekile intliziyo yam, Thixo, izimasekile intliziyo yam; ndiya kuvuma, ndiya kubetha uhadi. Ndiya kubulela kuwe phakathi kwezizwe, Nkosi yam.” (INdumiso 57:7, 9) Ngamana nathi singazimaseka. Ebudeni bonyaka wenkonzo we-1997, phezu kwawo nje amanzithinzithi amaninzi, kuye kwavakaliswa indumiso ngomlinganiselo ophakamileyo nto leyo eye yezisa uzuko kuYehova uThixo. Ngamana kungenziwa okufanayo, mhlawumbi kude kuthi kratya, ebudeni balo nyaka wenkonzo sikuwo. Ibe ngamana oko kunganjalo kungakhathaliseki ukuba uSathana wenza ntoni na ukuze asidimaze okanye asichase. Ngaloo ndlela, siya kubonisa ukuba intliziyo yethu isathe tye kwintliziyo kaYehu Omkhulu, uYesu Kristu, ibe siya kusabela ngomphefumlo uphela kwisibongozo esiphefumlelweyo esithi: “Vuyani kuYehova, nigcobe, nina malungisa, nimemelele, nina nonke bantliziyo zithe tye.”—INdumiso 32:11.
Ngaba Unokuchaza?
◻ Ziziphi iinguqu ezenzeka kwaSirayeli ngowama-905 B.C.E.?
◻ Ngubani uYehu wale mihla, yaye “isihlwele esikhulu” siye sabonisa njani ukuba ‘iintliziyo zaso zithe tye’ kwintliziyo yakhe?
◻ Ngawaphi amanani akwingxelo yonyaka abonisa inzondelelo ebonakaliswe ngamaNgqina kaYehova ebudeni bonyaka wenkonzo we-1997?
◻ Enoba yintoni na esinokuyenziwa nguSathana, nguwuphi umoya esiya kuwubonakalisa ebudeni bonyaka wenkonzo we-1998?
[Umfanekiso okwiphepha 15]
Uziwo olusemagqabini lweSikhumbuzo lubonisa ulwando oluthembisayo lwexesha elizayo
[Umfanekiso okwiphepha 16]
Njengoko uYehonadabhi wamxhasa uYehu, namhlanje senjenjalo “isihlwele esikhulu” ukuxhasa uYehu Omkhulu, uYesu Kristu, nabazalwana bakhe abathanjisiweyo