UYehu Ulwela Unqulo Olunyulu
UYEHU wayengumlweli wonqulo olunyulu. Wakwazi ukuyiphumeza le ndima, kuba wayenamandla, engaphozisi maseko, engabuyi mva, enenzondelelo yaye ekhaliphile. UYehu wabonisa iimpawu ekunokuba kuhle ukuba sizixelise.
UYehu wafumana uthumo xa uhlanga lwakwaSirayeli lwalukwimeko emaxongo. Ilizwe laliphantsi kwempembelelo engendawo kaIzebhele, umhlolokazi ka-Ahabhi nonina wokumkani owayephethe ngelo xesha, uYehoram. Wakhuthaza ihlelo likaBhahali endaweni yonqulo lukaYehova, wabulala abaprofeti bakaThixo, waza wonakalisa abantu ‘ngohenyuzo nokukhafula.’ (2 Kum. 9:22; 1 Kum. 18:4, 13) UYehova wayalela ukuba kubulawe bonke abendlu ka-Ahabhi, kuquka uYehoram noIzebhele. NguYehu owayemele akhokele ekwenzeni oko.
Siqala ukuva ngoYehu eZibhalweni ngoxa ekunye neentloko zomkhosi, kwidabi elaliphakathi kwamaSirayeli namaSiriya eRamoti-giliyadi. UYehu wayenesikhundla esiphezulu, kusenokwenzeka ukuba wayeyinkumanda yomkhosi wakwaSirayeli. Umprofeti uElisha wathumela omnye woonyana babaprofeti ukuba athambise uYehu njengokumkani aze amyalele ukuba abulale onke amadoda endlu ewexukileyo ka-Ahabhi.—2 Kum. 8:28; 9:1-10.
Xa amanye amagosa ambuza ngesizathu sokutyelelwa kwakhe, uYehu wathandabuza ukuwaxelela. Kodwa xa amncinayo, wayichaza inyaniso yaye yena namaqabane akhe bamenzela iyelenqe uYehoram. (2 Kum. 9:11-14) Kusenokwenzeka ukuba, yayikho indawo yokungayifuni kwakunye nokuyivukela imithetho yokumkani owayelawula kwakunye nempembelelo kaIzebhele. Sekunjalo, uYehu wacingisisa nzulu ukuze afumane eyona ndlela ibhetele yokuphumeza uthumo lwakhe.
UKumkani uYehoram wayenzakele edabini waza wabalekela eYizereli, ngethemba lokuba uza kuchacha. UYehu wayesazi ukuba icebo lakhe alimele laziwe eYizereli ukuze liphumelele. Wathi: “Makungaphumi nabani na esixekweni aye kunikela ingxelo eYizereli.” (2 Kum. 9:14, 15) Mhlawumbi wayeyilindele into yokuba umkhosi othembeke kuYehoram ungazama ukuziphindezela. UYehu wayefuna ukuqiniseka ukuba abanalo nethuba eli lincinci lokuziphindezela.
UKUQHUBA NDLONGONDLONGO!
Ngenjongo yokubaqubula, uYehu wayiqhuba inqwelo yakhe kwiikhilomitha ezingama-72 ukusuka eRamoti-giliyadi ukuya eYizereli. Njengoko wayeqhuba ngesantya esiphezulu ukuya apho wayesiya khona, umlindi owayekwinqaba “wabona indimbane yamadoda kaYehu.” (2 Kum. 9:17) Kungenzeka ukuba uYehu wahamba nomkhosi omkhulu ukuze aqiniseke ngokufeza uthumo lwakhe.
Eqonda ukuba uYehu okhaliphileyo ukwenye yezo nqwelo, umlindi wakhwaza esithi: “Uqhuba ngobudlongodlongo.” (2 Kum. 9:20) Ukuba le yindlela awayeqhele ukuqhuba ngayo uYehu, kumele ukuba wayeqatsele ke kwesi isihlandlo.
Emva kokwala ukuthetha nabathunywa ababini ababethunywe kuye, uYehu wadibana noKumkani uYehoram nehlakani lakhe uAhaziya, ukumkani wakwaYuda, ingulowo enqweleni yakhe. Umbuzo kaYehoram othi, “Luxolo na, Yehu?” waphendulwa ngolu hlobo: “Lungakho njani uxolo logama kusekho uhenyuzo lukaIzebhele unyoko nokukhafula kwakhe okuninzi?” Othuswe yiloo mpendulo, uYehoram wajika wabaleka. Kodwa wayengenakumshiya uYehu! Wathi rhuthu isaphetha sakhe waza walutsho lwamila utolo entliziyweni kakumkani uYehoram, wamshiya ebanda loo kumkani enqwelweni yakhe. Nangona uAhaziya wakwazi ukubaleka, kamva uYehu wamkhangela wamfumana waza naye wambulala.—2 Kum. 9:22-24, 27.
Elinye ilungu lendlu ka-Ahabhi elalimele libulawe nguKumkanikazi uIzebhele ongendawo. UYehu wayefanele ukumbiza ngokuba ‘ngulo uqalekisiweyo.’ Xa wayengena eYizereli, uYehu wambona emi phezulu kwifestile yebhotwe lakhe. Engathethanga kakhulu, uYehu wayalela amagosa enkundla ukuba amphose ezantsi. Wandula ke wamnyathelisa ngamahashe akhe lo kumkanikazi wayenempembelelo embi kuSirayeli wonke. Emva koko, uYehu waqhubeka nokubulala inkitha yamanye amalungu endlu engendawo ka-Ahabhi.—2 Kum. 9:30-34; 10:1-14.
Nakuba ukucinga ngogonyamelo kungekho mnandi, sifanele siqonde ukuba ngemihla yangaphambili, uYehova wayesebenzisa abakhonzi bakhe ukuphumeza imigwebo yakhe. IZibhalo zithi: “Kwakuvela kuThixo ukuba ukuwa kuka-Ahaziya kwenzeke ngexesha lokuza kwakhe kuYehoram; yaye ekuzeni kwakhe, waphuma noYehoram baya kuYehu umzukulwana kaNimshi, awathi uYehova wamthambisa ukuba anqumle indlu ka-Ahabhi.” (2 Kron. 22:7) Xa wayelahla isidumbu sikaYehoram esasikwinqwelo yakhe, uYehu waqonda ukuba eso senzo sasizalisekisa isithembiso sikaYehova sokohlwaya uAhabhi ngenxa yokubulala uNabhoti. Ngaphezu koko, uYehu wayeyalelwe ukuba ‘aliphindezele igazi labakhonzi bakaThixo’ elaphalazwa nguIzebhele.—2 Kum. 9:7, 25, 26; 1 Kum. 21:17-19.
Namhlanje, akukho mkhonzi kaYehova ulwa ngezigalo ukuze akhusele unqulo olunyulu. UThixo uthi: “Impindezelo yeyam.” (Heb. 10:30) Kodwa ukuze kukhuselwe ibandla kwiimpembelelo ezimbi, kusenokufuneka abadala abangamaKristu babe nenkalipho efana nekaYehu. (1 Kor. 5:9-13) Yaye onke amalungu ebandla amele azimisele ukukuphepha ukunxulumana nabantu abasusiweyo kubudlelane.—2 Yoh. 9-11.
UYEHU AKAZANGE ALUNYAMEZELE USUKUZWANO NOYEHOVA
Injongo kaYehu yokuphumeza olu thumo icaca kakuhle kumazwi awawathetha kuYehonadabhi othembekileyo: “Hamba nam uze ukhangele indlela endingalunyamezeli ngayo usukuzwano noYehova.” Wavuma uYehonadabhi, wakhwela kwinqwelo kaYehu, waza waya naye eSamariya. Apho, uYehu “wenza ngobuqili, ngenjongo yokubatshabalalisa abanquli bakaBhahali.”—2 Kum. 10:15-17, 19.
UYehu wenza isaziso sokuba uceba ukwenzela uBhahali ‘umbingelelo omkhulu.’ (2 Kum. 10:18, 19) Omnye umphengululi uthi: “Apha uYehu wabeka izinto ngobuchule.” Ngoxa ibinzana elisetyenziswe apha “ngokuqhelekileyo libhekisela ‘kumbingelelo,’ liyasetyenziswa naxa kubhekiselwa ‘ekubulaweni’ kwabawexuki.” Kuba wayengafuni kubekho namnye kubanquli bakaBhahali ophoswayo sesi sihlandlo, uYehu wabahlanganisela endlini kaBhahali waza wathi mabanxibe izambatho ezinokubonwa lula. “Kamsinya nje akuba egqibile ukwenza umnikelo otshiswayo,” uYehu wathumela amadoda axhobileyo angama-80 ukuba abulale abo banquli bakaBhahali. Wayalela ukuba indlu kaBhahali idilizwe ize yenziwe indlu yangasese, nto leyo eyayenza ayalufanelekela unqulo.—2 Kum. 10:20-27.
Kuyinyaniso kona ukuba uYehu waphalaza igazi elininzi. Sekunjalo, iZibhalo zimchaza njengendoda ekhaliphileyo eyakhulula uSirayeli kwingcinezelo kaIzebhele nentsapho yakhe. Nayiphi na inkokeli yakwaSirayeli eyayiza kuphumelela ekwenzeni oko yayimele ibe yindoda ekhaliphileyo, enenzondelelo nezimiseleyo. Esinye isichazi-magama sithi: “Yayingumsebenzi onzima awawuphumeza ngokucokisekileyo engabuyi mva. Mhlawumbi ukuba wayeyekelele ngewayengazange alususe unqulo lukaBhahali kwaSirayeli.”
Ngaphandle kwamathandabuzo kuyabonakala ukuba iimeko amaKristu ajamelana nazo namhlanje zifuna ukuba abonise iimpawu ezithile awayenazo uYehu. Ngokomzekelo, simele sithini xa sihendelwa kuyo nantoni na ayithiyileyo uYehova? Sifanele singaphozisi maseko, sikhaliphe size sikukhabe ngaw’ omane oko. Njengoko sizinikele kuThixo, asilunyamezeli naluphi na usukuzwano noYehova.
KUNYAMEKELE UKUHAMBA NGOMTHETHO KAYEHOVA
Isiphelo seli bali siyasilumkisa. UYehu ‘akazange aphambuke ekulandeleni amathole egolide elinye lawo elaliseBheteli elinye likwaDan.’ (2 Kum. 10:29) Kwenzeka njani ukuba umntu owayebonakala enenzondelelo ngonqulo olunyulu anyamezele unqulo zithixo?
Kusenokwenzeka ukuba uYehu wayecinga ukuba, ukuze ubukhosi bakwaSirayeli bukwazi ukuzimela kobakwaYuda, kwakumele kubekho umahluko kunqulo. Ngenxa yoko, njengabanye ookumkani bakwaSirayeli, wazama ukuwenza ubonakale lo mahluko ngokukhuthaza ukunqulwa kwethole. Kodwa oku kwakubonisa ukungabi nalukholo kuYehova, owamenza ukumkani.
UYehova wamncoma uYehu kuba ‘wenza okuhle emehlweni kaThixo.’ Noko ke, uYehu “akazange akunyamekele ukuhamba ngomthetho kaYehova uThixo kaSirayeli ngentliziyo yakhe yonke.” (2 Kum. 10:30, 31) Xa ucinga ngazo zonke izinto ezenziwa nguYehu ngaphambilana, usenokuba wothukile yaye udanile. Sekunjalo, oku kusifundisa isifundo. Ulwalamano lwethu noYehova asimele siluthathe lula. Suku ngalunye, simele sihlakulele ukuthembeka kuThixo ngokufunda iLizwi lakhe, sicamngce ngalo size sithandaze ngokusuka entliziyweni kuBawo wethu wasezulwini. Ngoko masenze unako nako wokunyamekela ukuhamba ngomthetho kaYehova ngentliziyo yethu yonke.—1 Kor. 10:12.
[Ibhokisi ekwiphepha 4]
Indlela Ajongwa Ngayo UYehu Kwimbali Yehlabathi
Abahlalutyi bebesoloko bethandabuza enoba abantu ekuthethwa ngabo eZibhalweni babekhe baphila kusini na. Ngaba bukho obunye ubungqina ngaphandle kobo buseBhayibhileni, obuphathelele ubukho bukaYehu?
Mathathu ubuncinane amaxwebhu aseAsiriya yamandulo akhankanya lo kumkani wakwaSirayeli ngegama. Elinye lala maxwebhu libonisa uYehu, okanye mhlawumbi omnye wabathunywa bakhe, equbuda phambi kukaKumkani uShalmanesere III waseAsiriya yaye esenza umnikelo. Umbhalo okula maxwebhu ufundeka ngolu hlobo: “Nanku umnikelo endawufumana kuYehu (uIa-ú-a), unyana kaOmri (uHu-um-ri); yisilivere, igolide, isitya segolide esiyisaplu, ivazi yegolide etsolo ngezantsi, iimagi zegolide, iiemele zegolide, itoti, umsimelelo kakumkani, (kwakunye) nepuruhtu eyenziwe ngomthi [asazi ke ukuba lithetha ukuthini eli gama lokugqibela].” UYehu wayengenguye ngokuthe ngqo “unyana kaOmri,” kodwa eli binzana lasetyenziselwa ukuchaza ookumkani bakwaSirayeli ngokulandelelana kwabo, ekusenokwenzeka ukuba kwasetyenziswa uOmri ngenxa yokuba wayedumile nangenxa yokwakha kwakhe ikomkhulu lakwaSirayeli, iSamariya.
Akukho bungqina bunokuxhasa amazwi kakumkani waseAsiriya ngokuphathelele umnikelo owawuvela kuYehu. Sekunjalo, ukhankanya uYehu izihlandlo ezithathu—kolu xwebhu lungasentla, kwilitye lesikhumbuzo likaShalmanesere, nakwimbali yasebukhosini yama-Asiriya. Ezi mbekiselo zisusa nawaphi na amathandabuzo ngokuphathelele ubukho balo mfo kuthethwa ngaye eBhayibhileni.