Abalungiseleli Bexesha Elizeleyo Bayakhokela Kumsebenzi Wokushumayela
Kusenokwenzeka ukuba owokuqala wamaNgqina kaYehova ukuba akutyelele wayengumlungiseleli wexesha elizeleyo onguvulindlela okanye ongumvangeli wasemazweni. Ekubeni amaNgqina kaYehova engenabo abalungiseleli abahlawulwayo, usenokuba uye wazibuza ngendlela aba bantu abanesabelo ngayo kubulungiseleli ixesha elizeleyo.
Onke amaNgqina kaYehova azahluleleyo aza abhaptizwa angabalungiseleli, kodwa amaninzi aneentsapho okanye ezinye iimbopheleleko eziwathintelayo ukuba anikele iiyure ezininzi kubulungiseleli bawo. Phofu ke, amawakawaka amaNgqina jikelele ehlabathini aye awuhlisa umgangatho wokuphila kwawo ukuze akwazi ukugubungela iindleko zawo ezicuthiweyo ngomsebenzi wesingxungxo aze anikele iiyure ezili-1 000 okanye ngaphezulu ngonyaka kubulungiseleli.
Liyinyaniso elokuba, abalungiseleli abangoovulindlela bexesha elizeleyo abanamali ininzi abanokuyichithela kwiziqu zabo, kodwa kubo oku kuyindlela yokufuna tanci uBukumkani bukaThixo. Ibe bafumana iintsikelelo ezininzi. Ukukwazi nje ukuthetha nabanye ngeLizwi likaThixo iiyure ezingama-90 okanye malunga nezo kukodwa nje kungamava amyoli. Umlungiseleli wexesha elizeleyo uphucula ubuchule bakhe kubulungiseleli yaye ukwanexesha lokulandela abantu abanomdla ngokufanelekileyo. Oku kuvelisa imiphumo ekhuthaza kunene. Banazo izinto eziphathekayo abazisweleyo, ibe bakuxabisa kakhulu oko banako.—Mateyu 6:33.
NgoFebruwari we-1943, iWatch Tower Society yaseka iSikolo SeBhayibhile SeWatchtower saseGiliyadi. Injongo yoku yayikukuqeqesha abalungiseleli abangoovulindlela bexesha elizeleyo nabanamava ukuba bakhonze njengabavangeli kumazwe asemzini. Izifundo ezithabatha iinyanga ezintlanu ziqulethe ukufundisiswa kweBhayibhile okunzulu, imbali yeBhayibhile, intlangano kaYehova nemibandela ehlobene nokulungiselelwa inkonzo kwintsimi yasemzini.
UMbutho uhlawula iindleko zothutho ukuya kwisabelo sobuvangeli uze ulungiselele izidlo ezakhayo neendawo zokuhlala ezindilisekileyo kumakhaya abavangeli basemazweni. Ukwanika umvangeli ngamnye umxhesho omncinane ukwenzela iindleko zobuqu. Abavangeli basemazweni bayatshintshatshintshana ngemisebenzi yekhaya ngokuya kuthenga, ukulungiselela izidlo nokucoca. Ekubeni kukho le nyameko isengqiqweni abavangeli basemazweni bayakwazi ukunikela ubuncinane iiyure ezili-140 ngenyanga ekushumayeleni kwindlu ngendlu nasekuqhubeni izifundo zeBhayibhile nabantu abanomdla.
Uninzi lwaba bavangeli basemazweni lunikwa isabelo esikude ngamawakawaka eekhilomitha ukusuka ekhaya nakwintsapho. Kuye kwafuneka ukuba baziqhelanise nomgangatho wokuphila nowempucuko eyahlukileyo, ukutya okutsha, imozulu eyahlukileyo nokuthetha olunye ulwimi. Benza lo msebenzi kuba bayabathanda abantu ibe banomnqweno obukhali wokubanceda bafunde ngoBukumkani bukaThixo.
Ukususela ngowe-1943 ukusa kowe-1985, iSikolo SeBhayibhile SeWatchtower saseGiliyadi saqhuba iiklasi ezingama-80 saza sathumela abavangeli basemazweni abangaphezu kwama-6 000. Ngaphantsi kokongamela koMbutho, aba baye bakhokela ekwandiseni imfundo yeBhayibhile ukutyhubela iAfrika, uMbindi noMzantsi Merika, elaseMpuma nakuMzantsi Pasifiki, ibe baye bafeza okukhulu eYurophu.
Enoba amaNgqina kaYehova anesabelo kubulungiseleli ixesha elizeleyo njengoovulindlela okanye njengabavangeli basemazweni okanye okwexeshana, akhonza ngaphandle kwenzuzo yemali. Achitha ixesha nemali yawo, ibe ayazibhokoxa, ukuze ancede abanye bazuze ulwazi olukhokelela kubomi obungunaphakade.—Yohane 17:3.
• Amanye amaNgqina kaYehova akwazi njani ukunikela ixesha lawo lonke kubulungiseleli, yaye kutheni ekwenza nje oku?
• Abalungiseleli bawuqeqeshelwa njani umsebenzi wobuvangeli basemazweni?
• Abavangeli basemazweni baxhaswa njani kwizabelo zabo kumazwe asemzini?
[Imifanekiso ekwiphepha 22]
Ekhohlo: Igumbi lokufundela leSikolo saseGiliyadi, eBrooklyn, N.Y., U.S.A.
Ekunene: Umvangeli wasemazweni efundisa iLizwi likaThixo ePapua New Guinea
Abalungiseleli abangoovulindlela nabangabavangeli basemazweni beshumayela iLizwi likaThixo kumazwe awahlukahlukeneyo
[Imifanekiso ekwiphepha 23]
EBrazil
KwiRiphabliki yaseDominica
ESpeyin
ESierra Leone, eAfrika