“Saye Ke Isandla SikaYehova Sinawo”
“Lenjenjalo ke ilizwi leNkosi [“likaYehova,” NW] ukwanda ngamandla nokweyisa.”—IZENZO 19:20.
1. (a) Iintshaba zobuKristu zakhalaza ngelithini kwinkulungwane yokuqala yeXesha Eliqhelekileyo? (b) Yintoni eyayisenzeka kwiindawo apho umvangeli wasemazweni uPawulos wayeshumayela khona iindaba ezilungileyo zoBukumkani bukaThixo, ibe yintoni eyayisoloko inamaKristu okuqala?
NGAPHEZU kweminyaka eli-1 900 eyadlulayo, iintshaba zesigidimi samaKristu nabachasi bompostile uPawulos owayengumvangeli wasemazweni bakhalaza besithi: “Aba baliqungaqungileyo elimiweyo, bona bafikile nalapha; . . . baye . . . aba besenza okuchasene nemimiselo kaKesare, besithi, Kukho kumkani wumbi unguYesu.” (IZenzo 17:6, 7) Naphi na apho uPawulos owayengumKristu nomvangeli wasemazweni wayevakalisa khona iindaba ezilungileyo zoBukumkani bukaYehova, kwakubakho abasabela ngokuvumayo nangokulandulayo, ibe ngokufuthi kwakubakho intshutshiso. Namanye amaKristu okuqala atshutshiswa. Kodwa “isandla sikaYehova” sasisoloko “sinawo.”—IZenzo 11:21, NW.
2. Ngubani owaqalisa umsebenzi wamaKristu wobuvangeli basemazweni, ibe njani?
2 Ngubani owaqalisa lo msebenzi wamaKristu ubalulekileyo wobuvangeli basemazweni? YayinguYesu, indoda ekhethekileyo eyayinesigidimi esichukumisayo nendlela engaqhelekanga yokusisasaza. Khumbula ukuba uYesu, uNyana kaThixo, weza kubantu abangamaYuda enesibhengezo esothusayo esingoBukumkani bukaThixo. Kodwa babenomdla kuphela kwindlela ababeza kusindiswa ngayo ngemisebenzi yoMthetho.—Mateyu 4:17; Luka 8:1; 11:45, 46.
“Kuzo Zonke Iintlanga”
3. Sisiphi isiprofeto sikaYesu esimele ukuba sothusa abafundi bakhe abangamaYuda, ibe kungani?
3 Ngaloo ndlela, sinokuwuthelekelela umothuko wabafundi bakaYesu ababengamaYuda xa wabaxelela oku kwiintsuku ezintathu ngaphambi kokufa kwakhe: “Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Abafundi bakhe bamele ukuba bamangaliswa lelokuba kwakunokwenzeka njani na ukuba bashumayele iindaba ezilungileyo “kuzo zonke iintlanga.” Elo qumrhu lincinane lamakholwa lalinokuze lisiphumeze njani esi sabelo sikhulu gqitha ngolu hlobo?—Mateyu 24:14; Marko 13:10.
4. Nguwuphi umyalelo owanikelwa nguYesu ovusiweyo kubafundi bakhe?
4 Kamva, uYesu owayevusiwe wongezelela lo myalelo, esithi: “Linikwe mna lonke igunya emazulwini nasehlabathini. Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele; nibafundisa ukuba bazigcine zonke izinto endiniwisele umthetho ngazo.” Ngaloo ndlela bathunywa ukuba base isigidimi seNkosi yabo ‘kubantu bazo zonke iintlanga.’—Mateyu 28:18-20.
5, 6. (a) Ukushunyayelwa kweendaba ezilungileyo zoBukumkani bukaThixo kwafikelela njani kwabeeNtlanga, ibe kwaba nawuphi umphumo? (b) Amadoda amakhulu aseYerusalem asabela njani xa uPetros wawabalisela oko kwenzeka kuye ngoKorneli ongoweeNtlanga?
5 Oku kwaquka ukushumayela kwabeeNtlanga, nto leyo eyangqineka ilucelomngeni. Oko kungqinwa sisimo sengqondo sikaPetros kwiminyaka emithathu kamva. Kusetyenziswa umbono, uPetros waxelelwa ukuba adle izinto eziziinqambi njengokutya. Xa uThixo wambonisayo ukuba izinto ezazigqalwa ngaphambili njengeziziinqambi ngeli thuba kwakufuneka zijongwe njengezicocekileyo, uPetros wadideka. Emva koko uPetros walathiswa ngumoya kaThixo ukuba atyelele kwindlu kaKorneli ongoweeNtlanga, umthetheli-khulu womkhosi waseRoma. Apho, wafikelela ekuqondeni ukuba yayikukuthanda kukaThixo ngaye ukuba ashumayeze uKorneli, nangona ngaphambilana wayecinga ukuba ukunxulumana nabantu bezinye izizwe kwakungafanelekanga. Njengoko uPetros wayethetha, umoya oyingcwele wehlela phezu kwaloo ntsapho yabeeNtlanga, ibe ngenxa yoko, oku kwabonisa ukuba intsimi yamaKristu yomsebenzi wobuvangeli basemazweni ngeli thuba yayimele yandiswe ukuze iquke abo bangemaYuda.—IZenzo 10:9-16, 28, 34, 35, 44.
6 Xa uPetros wacacisa esi siganeko kumadoda amakhulu aseYerusalem, ‘athi cwaka, amzukisa uThixo, esithi, Kanti na ke neentlanga ezi uThixo uziphe ukuguqukela ebomini.’ (IZenzo 11:18) Ngeli thuba izizwe zabeeNtlanga zazinokuzifumana ngokukhululekileyo iindaba ezilungileyo zikaKristu nezoBukumkani bakhe!
Abavangeli Basemazweni Baya Kwiintlanga
7. Umsebenzi wamaKristu wobuvangeli basemazweni waqalisa njani ukusasazeka kumazwe ajikeleze iMeditera, ibe uYehova wakujonga njani oku?
7 Umsebenzi wokushumayela, owahambela phambili ngesantya emva kokubulawa kukaStefano njengomfeli-nkolo, ngeli thuba wenziwa ngomlinganiselo owahlukileyo. Ngaphandle kwabapostile, ibandla elaliseYerusalem lalichithakele liziintsali. Okokuqala, loo makholwa awayengamaYuda awayetshutshiswa ashumayela kuphela kumaYuda awayekwelaseFenike, eSipro nakwa-Antiyokwe. “Yaye ke inxenye . . . ingamadoda aseSipro naseKirene; . . . yathetha kwawesiGrike amaYuda, ishumayela iindaba ezilungileyo zeNkosi uYesu.” UYehova wawujonga njani lo msebenzi wobuvangeli basemazweni owawusenziwa kwiintlanga? “Saye ke isandla seNkosi [“sikaYehova,” NW] sinawo, kanjalo kwakholwa inani elikhulu, labuyela eNkosini.” Sibamba ngazibini kwinkalipho yaloo maKristu okuqala, nto leyo eyabangela ukuba umsebenzi wobuvangeli basemazweni ube nempumelelo njengoko wawuqalisa ukusasazeka kumazwe ajikeleze iMeditera. Kodwa kwakuseza kwenziwa okungakumbi.—IZenzo 4:31; 8:1; 11:19-21.
8. Walubonisa njani uThixo uzimiselo lokutyhalela phambili ulwando lomsebenzi wobuvangeli basemazweni?
8 Malunga nowama-47-48 C.E., uThixo, esebenzisa umoya oyingcwele, wabonisa inyathelo lozimiselo lokutyhalela phambili ukuze kwandiswe umsebenzi wobuvangeli basemazweni. Ingxelo ekwiZenzo 13:2-4 iyasixelela: “Wathi uMoya oyiNgcwele, Ndahluleleni ke uBharnabhas kwanoSawule, baye emsebenzini endibabizele kuwo. . . . Bona ke ngoko, bakuthunywa nguMoya oyiNgcwele, behla baya kwaSeluki [idolophu enezibuko yakwa-Antiyokwe eSiriya]; kanjalo besuka apho ngomkhombe, baya eSipro.” Hayi indlela ekumele ukuba kwabachwayitisa ngayo oko uPawulos noBharnabhas—ukuhamba ngolwandle besiya kwisabelo sabo sokuqala sasemzini! Umpostile uPawulos wayekhokela kumsebenzi wobuvangeli basemazweni. Kwakhona wayeqalisa isiseko somsebenzi owawuya kugqityezelwa kwinkulungwane yethu yama-20.
9. Yintoni eyaphunyezwa ngumpostile uPawulos ngezihlandlo zokhenketho lwakhe lobuvangeli basemazweni?
9 UPawulos wakhenketha izihlandlo ezithathu ezibonakala kwingxelo yobuvangeli basemazweni nohambo lwakhe lokuya eRoma njengombanjwa. Ebudeni bezi ziganeko, waqalisa umsebenzi kwizixeko eziliqela eYurophu waza washumayela isigidimi soBukumkani kumazwe nakwiziqithi namhlanje ezaziwa njengeSiriya, iSipro, iKrete, iTurkey, iGrisi, iMalta neSicily. Usenokuba wade wafikelela naseSpeyin. Wanceda ekusekeni amabandla kwizixeko ezininzi. Yayiyintoni imfihlelo yomsebenzi wakhe onempumelelo wobuvangeli basemazweni?
Ukufundisa Ngokunempumelelo
10. Kutheni le nto uPawulos waba nempumelelo kangaka kumsebenzi wakhe wobuvangeli basemazweni?
10 UPawulos waxelisa indlela kaKristu yokufundisa. Ngoko ke wayeyazi indlela yokuzenza afanelane nabantu. Wayeyazi indlela yokufundisa nokuqeqesha abanye njengabafundisi. Wasekela imfundiso yakhe eZibhalweni. Akazange azame ukuchukumisa abanye ngobulumko awayenabo kodwa, kunoko, waqiqa ngeZibhalo. (IZenzo 17:2, 3, NW) Kwakhona uPawulos wayekwazi ukuzenza afanelane nabaphulaphuli bakhe nokusebenzisa imeko yasekuhlaleni njengesiseko sokuqalisa isigidimi sakhe. Kunjengokuba wathi: “Ndizikhonzisile kubo bonke, ukuze ndibazuze abona baninzi. KumaYuda ndaba njengomYuda, . . . kwabo bangenamthetho, ndaba njengongenamthetho . . . kwabo bangenamandla, ndaba njengongenamandla, ukuze ndibazuze abangenamandla; kubo bonke ndesuka ndaba ziinto zonke, ukuze ngeendlela zonke ndisindise inxenye.”—1 Korinte 9:19-23; IZenzo 17:22, 23.
11. Yintoni ebonisa ukuba uPawulos namaqabane akhe babengabavangeli basemazweni abanempumelelo, ibe ubulungiseleli bamaKristu basasazeka zwenibanzi ukusa kuwuphi umkhamo?
11 UPawulos namaqabane akhe babengabavangeli basemazweni abanempumelelo. Ngozingiso nangonyamezelo, baseka baze bomeleza amabandla amaKristu kuzo zonke iindawo ababehamba kuzo. (IZenzo 13:14, 43, 48, 49; 14:19-28) Ubulungiseleli bamaKristu okuqala babusasazeke kangangokuba ekugqibeleni uPawulos wayenokubhala ‘ngenyaniso yeendaba ezilungileyo; ezazikho kubo, njengoko zikhoyo nakulo lonke ihlabathi, zixakatha neziqhamo, nezashunyayelwayo kwindalo yonke ephantsi kwezulu.’ Ngokwenyaniso, abantu bachatshazelwa ngumsebenzi wobuvangeli basemazweni wamaKristu okuqala.—Kolose 1:5, 6, 23.
12. Yintoni eyabangela ukuba umsebenzi wobuvangeli basemazweni bokwenyaniso bamaKristu uphele okwexeshana?
12 Noko ke, ekuqaleni kwenkulungwane yesibini yeXesha Eliqhelekileyo, uwexuko lwalunyebelezela kwibandla lamaKristu, kanye njengokuba uYesu nabapostile babelumkisile. (Mateyu 7:15, 21-23; IZenzo 20:29, 30; 1 Yohane 2:18, 19) Kwiinkulungwane ezalandelayo, imfundiso yezakwalizwi neyobuhedeni zasintywilisela isigidimi soBukumkani. INgqobhoko yathumela abavangeli, kungekhona ukuba baye kushumayela uBukumkani bukaThixo obuyinyaniso, kodwa ukunyanzelisa ngenkani abantu baloo mazwe babethunywe kuwo abangakwaziyo ukuzikhusela ukuba bamkele—ngokufuthi besebenzisa ikrele—ubukumkani bobupolitika beenkosi zabo nababexhaswa zizo ngemali. Umsebenzi wokwenyaniso wobuvangeli basemazweni bamaKristu waphela kodwa kungekhona ngonaphakade.
13. Laqalisa njani iphulo lobuvangeli basemazweni kumaxesha anamhla, ibe kwathi kuphela owe-1916 kwabe kuphunyezwe okungakanani?
13 Ngasekupheleni kwenkulungwane ye-19, uCharles T. Russell, umongameli wokuqala weWatch Tower Society, wabona imfuneko yokwenziwa komsebenzi wobuvangeli basemazweni. Ngaloo ndlela walungelelanisa iphulo lokunikela ubungqina kwimimandla ekude, ibe yena ubuqu watyelela izixeko ezininzi eziseUnited States, ibe walihamba ihlabathi lonke ngenqanawa ukuze atyelele amazwe amaninzi kangangoko kunokwenzeka. Iincwadi zakhe ezisekelwe eBhayibhileni zapapashwa ngeelwimi ezingama-35. Kuthiwa wahamba iikhilomitha ezingaphezu kwesi-1 600 000 njengesithethi sasesidlangalaleni kwaye wanikela iintshumayelo izihlandlo ezingaphezu kwama-30 000 ngaphambi kokufa kwakhe ngowe-1916.
14. Yintoni eyenziwa nguJoseph F. Rutherford ukuze andise umsebenzi wobuvangeli basemazweni?
14 Owangena ezihlangwini zakhe, uJoseph F. Rutherford, naye wayiqonda imfuneko ebalulekileyo yomsebenzi wobuvangeli basemazweni. Ekuqaleni kweminyaka yee-1920, wathumela amadoda anobunkunkqele kumazwe awahlukeneyo ukuze ancede ekuqaliseni umsebenzi wokushumayela. Abavangeli basemazweni bavula indlela kulo msebenzi woBukumkani eSpeyin, eMzantsi Merika naseNtshona Afrika. Ngowe-1931 kwahlatyw’ ikhwelo kumatsha-ntliziyo ukuba axhase lo msebenzi eSpeyin. Amagatyana abafana abathathu awayevela eSpeyin asabela aza akhonza apho phantsi kwezona meko zinzima neziqobayo kangangeminyaka emine de kwalixesha lokuqhambuka kweMfazwe Yamakhaya yaseSpeyin ngowe-1936. Ngoko kwafuneka ukuba asabe ukuze asindise ubomi bawo.
15. Kwenzeka ntoni ngeminyaka yee-1940 eyathi yandisa umsebenzi wobuvangeli basemazweni ngokuphawulekayo?
15 Ebudeni beminyaka elishumi yee-1940, kwakuza kwenzeka izinto ezincomekayo kumsebenzi wobuvangeli basemazweni. Umongameli wesithathu weWatch Tower Society, uNathan H. Knorr, wayeneqela lamadoda anenzondelelo elalisebenza naye. Kuyabonakala ukuba ngenxa yolwalathiso lomoya oyingcwele, ngowe-1942 wabona imfuneko yokuvula isikolo sobuvangeli basemazweni elungiselela ucelomngeni lwasemva kweMfazwe Yehlabathi II. Ngethuba lokugquba kwaloo mfazwe yehlabathi, wathabatha inyathelo lokuqala, ibe iSikolo seWatchtower saseGiliyadi savulwa ngokusesikweni kumantla esiXeko saseNew York ngoFebruwari 1943. Kuso kusebenza abahlohli abane, salungiselela ukunikela uqeqesho olusekelwe eBhayibhileni kwinkonzo yobuvangeli basemazweni kubalungiseleli abangoovulindlela abanenzondelelo ababengaphezu kwekhulu, abangamadoda namabhinqa, ngazo zonke iinyanga ezintandathu. Ngaba umsebenzi wabo ongumphumo wolo qeqesho uye wanempumelelo?
16. (a) Ayemangaphi amaNgqina awayeshumayela ngowe-1943, ibe athelekiseka njani nalawo akhoyo namhlanje? (b) Abavangeli basemazweni baye banendima engakanani kolu lwando? Cacisa.
16 Ngowe-1943 kwakukho kuphela amaNgqina ali-126 329 awayeshumayela kumazwe angama-54. Injani imeko namhlanje? Sithetha nje, kwiminyaka engama-45 kamva, kukho amaninzi ngokuphindwe kangangezihlandlo ezingama-28, engabalungiseleli abakhutheleyo abangaphezu kwezigidi ezithathu ezinesiqingatha kumazwe angama-212 nakwiziqithi zolwandle. Inxalenye ephawulekayo yolu lwando iye yabangelwa sisiseko esihle esiqaliswe ngabavangeli basemazweni abangaphezu kwama-6 000 abaphumelele kwiSikolo saseGiliyadi. Aba bebevela kumazwe angama-59 ibe baye bathunyelwa kumazwe awahlukeneyo ali-148 kwithuba elidluleyo leminyaka engamashumi amahlanu. Ngoncedo lwabo, kunokuba kubekho nje amaNgqina angaphezu kwekhulu lamawaka kwihlabathi lonke, njengoko kwakunjalo kwiminyaka engama-45 edluleyo, ngoku kukho amazwe alishumi ekukho kulo ngalinye abalungiseleli abangaphezu kwekhulu lamawaka abashumayela baze bafundise iindaba ezilungileyo. Kuninzi lwala mazwe, abavangeli basemazweni baseGiliyadi bebekhokela emsebenzini wokushumayela iindaba ezilungileyo.
17. Ngabaphi oothunywashe abathathu abasisiseko abaye benza umsebenzi wobuvangeli basemazweni wamaKristu okuqala nawanamhla ukuba uphumelele?
17 Enoba sibhekisela kumsebenzi wobuvangeli basemazweni owenziwa ngamaKristu okuqala okanye anamhla, kukho oothunywashe abasisiseko abawenze wanempumelelo. Omnye ngulowo wokudibana ngokungqalileyo nabantu okuye kwabangelwa bubulungiseleli bendlu ngendlu nokunikelwa kobungqina obungacwangciswanga, ndawonye nelungiselelo lesifundo seBhayibhile sekhaya. (Yohane 4:7-26; IZenzo 20:20) Omnye uthunywashe sisigidimi esingqalileyo nesilula esisekelwe eBhayibhileni esibalaselisa uBukumkani bukaThixo njengekuphela kwesicombululo esihlala sihleli kwiingxaki zoluntu. (IZenzo 19:8; 28:16, 23, 30, 31) Ibe uninzi lwabavangeli bethu basemazweni lukhonza kumazwe asakhasayo apho imfuneko yolawulo lukaThixo lobulungisa inokubonwa nanguthathatha khona. Uthunyashwe wesithathu luthando awafundisa ngalo uKristu abathi kananjalo abavangeli bethu basemazweni banamhla balubonakalisa kwiinkqubano zabo zemihla ngemihla nabantu bazo zonke iintlobo neemvelaphi. Alithandabuzeki elokuba, kwiminyaka engaphezu kwama-45 eyadlulayo, abavangeli basemazweni beWatch Tower baye bafak’ isandla kanobom kulwando lwazwenibanzi lwentlangano kaYehova.—Roma 1:14-17; 1 Korinte 3:5, 6.
Umoya Wobuvulindlela Uyaphembelela
18. Ngoobani abanye abaye bangenwa ngulo moya wenzondelelo wobuvangeli basemazweni njengabo baphumelele eGiliyadi?
18 Ngokungathandabuzekiyo umzekelo wenzondelelo wabo baphumelela eGiliyadi ushukumisele abanye ukuba babe nomnqweno wokuba ngabalungiseleli bexesha elizeleyo. Namhlanje, kukho amakhulu amawaka amanye amaNgqina kaYehova aye angenwa ngulo moya wenzondelelo wobuvangeli basemazweni. Aba bantu bangoovulindlela ngengqiqo yokwenene, belandela kumanyathelo kaYesu, “uVulindlela wosindiso lwabo.”—Hebhere 2:10; 12:2, Moffatt.
19. AmaNgqina amaninzi anomoya wobuvulindlela aye azinikela ngokuzithandela ukuba enze ntoni, ibe aziva evuzwe njani?
19 Ukususela kwiminyaka yee-1960 bekunzima kakhulu ukuthumela abavangeli basemazweni kumazwe aliqela. ISikolo SeBhayibhile SeWatchtower saseGiliyadi siyaqhubeka sikhupha abavangeli basemazweni, ukusa kumlinganiselo ekunokwenzeka ngawo, ngokwentswelo yamazwe asemzini. Phofu ke, zwenibanzi kukho intsimi enkulu elungiselelwe loo maNgqina anomoya wokwenyaniso wobuvulindlela. Abaninzi, beqhutywa ngumoya wokuzithandela, baye benza amalungiselelo angawabo ukuze bakhonze emazweni apho kukho imfuneko enkulu khona. Ngaba wena ungomnye wabo banokubathelela? Abo benjenjalo ngokufuthi bagqabaza ngelithi amanzithinzithi nezinto abaye bazincama zibuyekezwa ngokuphindaphindiweyo ngovuyo olukhulu lokondla ababumvu abakumazwe asakhasayo ngeenyaniso zoBukumkani. Banikwa umvuzo ophindwe kalikhulu ngokufumana ‘abazalwana noodade noomama nabantwana’ abatsha nangokwabelana nabo ngethemba elimangalisayo lobomi obungunaphakade “kwelizayo iphakade.”—Marko 10:28-30.
20. (a) Ngoobani abenza inxalenye enkulu yokushumayela kumazwe amaninzi? (b) Kwenzeka njani ukuba iJapan ifak’ ingxelo yesimbuku seeyure ezininzi zenkonzo yasentsimini minyaka le phantse kunalo naliphi na elinye ilizwe? (c) Nguwuphi umbuzo ebesiya kuba senza kakuhle ukuwuqwalasela?
20 Ngaphezu koko, kukho amakhulu amawaka abakhonzi bakaYehova namhlanje abafak’ ingxelo yenkonzo engcwele nyanga nganye njengoovulindlela abathe ngxi okanye abangabancedani. Uninzi lwaba lusebenza ngenkuthalo kwimimandla yentsimi yasekuhlaleni. Kumazwe amaninzi, aba benza inxalenye enkulu yomsebenzi wokushumayela, ibe ngokufuthi batyelela loo makhaya iiveki ngeeveki. Ithemba labo loBukumkani libonakala kwimbonakalo yabo eqaqambileyo nakwisimo sengqondo sovuyo njengoko bezenzela abahlobo abatsha yaye behlakulela umdla ongakumbi kwimimandla yabo yentsimi. Oovulindlela abangakumbi bathetha iiyure ezininzi ngakumbi ezichithelwa ekudumiseni uThixo. Ngaphezu kweminyaka elishumi, eJapan, apho uninzi lwamaNgqina kaYehova belungamaBhuda ngaphambili, luye lwafak’ ingxelo yesimbuku seeyure ezingakumbi zenkonzo yasentsimini minyaka le ngaphezu kwalo naliphi na elinye ilizwe elingaphandle kwaseUnited States. Oku kwenzeka ngenxa yokuba phantse isiqingatha sabavakalisi boBukumkani beli lizwe singoovulindlela. Ngaba nawe unokuhlengahlengisa iimeko zakho ukuze ube nesabelo kweli lungelo lilelona lizukileyo, inkonzo yobuvulindlela?
21. (a) Amanye amaNgqina ameko zawo zingawavumeliyo ukuba akwazi ukubhalisa njengoovulindlela abathe ngxi anokuwubonisa njani sekunjalo umoya wobuvulindlela? (b) Abaselula banokuwubonisa njani umoya wobuvulindlela?
21 Akho namanye amaNgqina “azondelela imisebenzi emihle.” (Tito 2:14) Aquka abantu abakhulileyo, abo banempilo enkenenkene, abaninzi abaneembopheleleko zentsapho, nolutsha olusahamba isikolo olumeko yalo isenokungaluvumeli ukuba lubhalise njengoovulindlela abathe ngxi. Aba bantu nabo banokubonisa umoya wobuvulindlela ngokunikela inkxaso yokhuthazo koovulindlela, ngokuba nesabelo kunye nabo kangangoko kunokwenzeka enkonzweni, nangokulondoloza isimo sengqondo esingqalileyo mayela namathuba avulekileyo abo okunikela ubungqina. Abaselula banokwenza inkonzo yoBukumkani yexesha elizeleyo ibe lusukelo lwabo, yaye, besakubhaptizwa, babe nesabelo kubuvulindlela bobuncedani ngamaxesha athile. NjengoTimoti oselula, banokumilisel’ ingqondo kwezi zinto khon’ ukuze bahambele phambili kunye nabo bonke abantu bakaThixo.—1 Timoti 4:15, 16.
22. Kungakhathaliseki ukuba injani na imeko yethu ebomini, yintoni esifanele sizimisele ukuyenza, ibe oko kuya kuba nawuphi umphumo omhle?
22 Kungakhathaliseki ukuba iyini na imeko esikuyo ebomini, ngamana sonke singashukunyiswa ngumoya kaYehova ukuba sibe nesabelo ngokuzeleyo enkonzweni yakhe. Ngamana “isandla sikaYehova” singaqhubeka sikunye naye ngamnye wethu ukuze ngenxa yemigudu yethu engeni yani kuthiwe “lenjenjalo ke ilizwi likaYehova ukwanda ngamandla nokweyisa.”—IZenzo 11:21, NW; IZe 19:20.
Imibuzo Yempinda
◻ Waqaliswa njani umsebenzi wamaKristu wobuvangeli basemazweni, ibe wawuza kwenziwa ngomkhamo ongakanani?
◻ Umpostile UPawulos waba nayiphi indima ekwandiseni umsebenzi wobuvangeli basemazweni?
◻ Wavuselelwa njani umsebenzi wobuvangeli basemazweni kumaxesha anamhla?
◻ Ngabaphi oothunywashe abenze inkonzo yobuvangeli basemazweni neyobuvulindlela yaba nempumelelo?
◻ Sinokungenwa njani ngumoya wobuvulindlela namhlanje?
[Isicangca esikwiphepha 13]
Umsebenzi WoBukumkani Kumazwe Alishumi—1988
(Onke la afak’ ingxelo yabavakalisi abangaphezu kwe-100 000)
Incopho Isilinganiselo Iiyure Uziwo
Ilizwe Yabavakalisi Soovulindlela Zokushumayela KwiSikhumbuzo
IU.S.A. 797 104 96 947 161 478 732 1 822 607
IMexico 248 822 32 117 58 061 457 1 004 062
IBrazil 245 610 22 725 44 218 022 718 414
I-Itali 160 584 25 477 43 354 687 330 461
INigeria 134 543 14 022 27 800 623 398 555
IJapan 128 817 52 183 60 626 840 297 171
IJamani 125 068 8 416 22 029 942 215 385
IBritani 113 412 11 927 22 103 713 211 060
IPhilippines 107 679 21 320 26 337 621 305 087
IFransi 103 734 9 189 21 598 308 205 256
[Umfanekiso okwiphepha 10]
UPawulos noBharnabhas banduluka besiya kuba ngoovulindlela kumsebenzi wobuvangeli basemazweni