IziYobisi

Ingcaciso: Kukho iingcaciso ezahlukahlukeneyo ngegama elithi “iziyobisi.” Ngokwendlela ekuxutyushwa ngayo apha, iziyobisi zizinto ezingekokutya neziguqula isimilo nezingajongwa ziyimfuneko ngokwasemayezeni kodwa ezisetyenziswa kumzamo wokusaba iingxaki zobomi, ukuba nemvo yokungathi uyaphupha, okanye ukuziva ngokungathi akubikwa hlaba okanye ukuziva unemincili.

Ngaba iBhayibhile okunene iyakwalela ukusetyenziswa kweziyobisi ngokuziyolisa?

Ayizikhankanyi izinto ezinjengeheroin, icocaine, iLSD, iPCP umya necuba. Kodwa iyalulungiselela ukhokelo oluyimfuneko ukuze sikwazi emasikwenze nemasikuphephe ukuze sikholise uThixo. Ngokufanayo, iBhayibhile ayithi kuphosakele ukusebenzisa umpu ukubulala omnye, kodwa iyakwalela ukubulala.

Luka 10:25-27: “Ndenze ntoni na ukuze ndibudle ilifa ubomi obungunaphakade? . . . Uze uyithande iNkosi uThixo wakho ngentliziyo yakho iphela, nangomphefumlo wakho uphela, nangamandla akho ephela, nangengqondo yakho iphela; nommelwane wakho, njengoko uzithanda ngako.” (Ngaba umntu umthanda ngenene uThixo ngomphefumlo wakhe uphela nangengqondo yakhe iphela ukuba kungumkhwa kuye ukwenza izinto ezibunciphisa ngokungeyomfuneko ubomi bakhe zize zidodobalise ingqondo yakhe? Uyamthanda na ummelwane wakhe ukuba uyeba kwabanye ukuxhasa umkhwa wakhe weziyobisi?)

2 Kor. 7:1: “Sinawo nje ngoko la madinga [okuba noYehova njengoThixo wethu noBawo wethu], zintanda, masizihlambulule kuko konke ukudyobheka kwenyama nokomoya sibufeza ubungcwele, sisoyika uThixo.” (Kodwa besingakulindela na ukuba nenkoliseko kaThixo ukuba sithi ngabom senze izinto ezidyobha imizimba yethu?)

Tito 2:11, 12: “Lubonakele kubantu bonke ubabalo lukaThixo, lulolusindisayo; lusiqeqesha ukuze sithi, sikuncama ukungahloneli Thixo nokukhanuka okukokwehlabathi, sihlale ngokunesidima [“sizinqanda,” JB; ‘siphile ubomi bokuzeyisa,’ TEV], nangokubulungisa, nangokuhlonela uThixo, kweli phakade langoku.” (Ngaba ukusebenzisa iziyobisi ezidodobalisa ingqiqo kabani okanye ezibangela umntu aphulukane nokuzeyisa kuyavisisana neso siluleko?)

Gal. 5:19-21: “Iyabonakala ke yona imisebenzi yenyama, eyile: . . . ukukhafula . . . iindywala, nezinto ezinjengezo, . . . ukuba abazenzayo izinto ezinjalo abayi kubudla ilifa ubukumkani bukaThixo.” (Intsingiselo yokoqobo yegama lesiGrike elithi phar·ma·kiʹa, apha eliguqulelwe ngokuthi “ukukhafula,” lelithi “iziyobisi.” IAn Expository Dictionary of New Testament Words, nguW. E. Vine, ekugqabazeni ngeli gama lesiGrike, ithi: “Ekukhafuleni, ukusetyenziswa kweziyobisi, enoba zezingenamandla okanye zezinamandla, ngokuqhelekileyo kwakuphelekwa ngamazwi athile okuvumisa nezibongozo kumagunya obugqwirha, nelungiselelo loomabophe abahlukahlukeneyo, amakhubalo, njl., ekuthiwa zicetyelwe ukuba zikhusele onyangwayo okanye umguli ekondelweni nasemandleni eedemon, kodwa eneneni zezokuchukumisa onyangwayo ngemithombo eyimfihlelo namandla kasiyazi.” [London, 1940, Umqu. IV, iphe. 51, 52] Ngokufanayo namhlanje, abaninzi abasebenzisa iziyobisi babandakanyeke ekukhafuleni okanye banxulumana nabo babandakanyeke kuko kuba ingqondo engenanto okanye lowo ubona izinto ezingabonwayo usisisulu seedemon. Thelekisa uLuka 11:24-26.)

Tito 3:1: “Bathobele oozilawuli noomagunya.” (Kwimimandla emininzi, ukuphatha okanye ukusebenzisa iziyobisi ezithile kukwaphula umthetho.)

Ekubeni ezinye iziyobisi zisenokumnceda umntu onwabe, ngaba ziyingozi kangako ngenene?

2 Tim. 3:1-5: “Ngemihla yokugqibela kuya kufika amaxesha anomngcipheko. Kuba abantu baya kuba . . . [ngabathandi] beziyolo kunokuba bathande uThixo; . . . Kwabo ke khwebuka.” (Ngokucacileyo iBhayibhile ilumkisa ngokukhanuka isiyolo kangangokuba sisikhokelise ngaphambi kokusebenzisa imigaqo yobulungisa yeLizwi likaThixo nokuba nenkoliseko yakhe.)

Zimbi IZIYOBISI EZIZIINARCOTIC zithomalalisa intlungu yaye zinokumenza umntu azive anelisekile, kodwa zikwanokukhobokisa yaye ukugqithisa ekuzisebenziseni kunokuphumela ekufeni. Ukurhogola IZIYOBISI EZIRHOGOLWAYO kunokukwenza uzive uvuyile, kodwa kunokuphumela kwanasekushwantshwatheni, ekuboneni goso, kukungayondelelani kwezihlunu, ukongezelela kumonakalo ongenakulungiswa wobuchopho, isibindi nezintso. IZIYOBISI EZIKUDIDI LOMYA zikubangela uzive “usemqheleni” ibe kubonakala ngathi ziphelisa ukudinwa, kodwa zikwabangela ukuba ungawuboni kakuhle umgama, zidodobalise ukucinga kakuhle, zinokubangela iinguqulelo ezingenakuguqulwa zobuntu yaye ziphumele ekukwenzeni utyekele ekuzibulaleni okanye ekubulaleni nabanye.

Kuthekani ngomya—ngaba awunangozi? Bambi oogqirha bathe awuyongozi

UGqr. David Powelson, owayesakuba yintloko yoogqirha bengqondo, kwiSibhedlele saseCowell, kwiYunivesithi yaseCalifornia, eBerkeley, wakha wayithethelela into yokuba semthethweni kokusetyenziswa komya. Kamva, kwakuba kufumaneke ubungqina obungakumbi, wabhala wathi: “Ngoku ndikholelwa ekubeni umya usesona siyobisi siyingozi esimele silwe naso: 1. Xa uwusebenzisa okokuqala uyakhohliseka. Owusebenzisayo uzithelekelela esegcibhala; akakuboni ukonakala kwengqondo nokomzimba wakhe. 2. Ukuwusebenzisa ngokuzingisileyo kukhokelela ekucingeni okuphitheneyo. Ngemva konyaka omnye kuse kwemithathu usetyenziswa rhoqo, iindlela ezigqwethekileyo zokucinga zisuka zongamele amandla okucinga.”—Executive Health Report, Oktobha 1977, iphe. 8.

UGqr. Robert L. DuPont, owayesakuba ngumalathisi weZiko Lesizwe Lokusetyenziswa Kakubi Kweziyobisi eUnited States, owayekhe ngaphambili wacatshulwa njengoyisingela phantsi ingozi yomya, kutshanje uchazwe esithi: “Imbambano yokwenene yingozi yempilo ebangelwa ngulo bhubhani [wokusetyenziswa komya sisizukulwana esiselula], ubuncinane iindidi ezimbini zengozi. Eyokuqala yimiphumo yokunxila, esusela kwiingozi ezimbi ezindleleni ise ekungakhathalini ngento yonke. Enye inkalo inento yokwenza nomzimba ngokupheleleyo. Apha inkxalabo isusela kubunkenenkene obuthe gqolo besifuba esiqatha esihlasela abasebenzisi bomya kuse ezintweni ezinokwenzeka kunene ezimiphumo iyingozi kwincindi yamadlala, imiphumo kwiinkqubo zomzimba ezixhathisa izifo, mhlawumbi kwanomhlaza.”—IGazette yaseMontreal, Matshi 22, 1979, iphe. 9.

IScience Digest yanikela ezi nkcukacha: “Ukutshaya umya maxa onke kusenokuthi, ekuhambeni kwexesha, kwandise izithutyana eziphakathi kwemithambo-luvo yobuchopho eyimfuneko kwimisebenzi ebaluleke njengenkumbulo, imvakalelo nesimilo. Ukuze imithambo-luvo yenze imisebenzi yayo, imele ithungelane.” Landula ke, ligqabaza ngemiphumo yeemvavanyo ezibandakanya izilwanyana, eli nqaku lahlabela mgama lathi: “Eyona miphumo iphawulekayo ibonakele kwiseptum esebuchotsheni; kwihippocampus nayo elapho, leyo inento yokwenza nokuyila inkumbulo; neamygdala esebuchotsheni, enoxanduva lwemisebenzi ethile yesimilo.”—Matshi 1981, iphe. 104.

Ngaba ukusebenzisa umya kubi ngaphezu kokusela iziselo ezinxilisayo?

Utywala bukukutya yaye busetyenzwa ngumzimba ukuze bunikele amandla; okuseleyo kuyakhutshwa ngumzimba. Noko ke, isazi sengqondo namachiza sathi: “Umya usisiyobisi esinamandla gqitha, yaye eyona mpazamo yethu inkulu ikukusithelekisa notywala.” “Sithelekisa isuntswana ngesuntswana, iTHC [kumya] inamandla ngokuphindwe kali-10 000 kunotywala kumandla ayo okunxilisa okungephi . . . iTHC ishenxiswa ngokuthe ngcembe emzimbeni, yaye kufuneka iinyanga ezininzi ukuze uchache kwimiphumo yayo.” (Executive Health Report, Oktobha 1977, iphe. 3) UMdali uyayazi indlela esibunjwe ngayo, yaye iLizwi lakhe lithi mazisetyenziswe ngobungcathu iziselo ezinxilisayo. (INdu. 104:15; 1 Tim. 5:23) Kodwa ukwakugweba kabukhali ukuselwa kweziselo ezinxilisayo ngokungenabungcathu, kanye njengokuba egweba ubudlakudla.—IMize. 23:20, 21; 1 Kor. 6:9, 10.

Kutheni amaNgqina kaYehova ekujonga ukutshaya icuba kusisono esinzulu gqitha?

Kukungabi naluxabiso ngesipho sobomi

Ize. 17:24, 25: “UThixo yena, owenza ihlabathi neento zonke ezikulo, . . . inguye nje obanika bonke ubomi, nomphefumlo, nazo zonke izinto.”

“Ubungqina bokuba imidiza inciphisa ubomi buyintabalala; unxibelelwano olungunobangela woko lumiselwe ngokuqinileyo njengakuyo nayiphi na into kwezamayeza.”—Science 80, Septemba/Oktobha, iphe. 42.

Iingxelo zibonisa ukuba eUnited States inani labafayo ngonyaka ngenxa yokutshaya lifikelela kuma-300 000; eBritani, kuma-50 000; eKhanada, kuma-50 000. “Ngabantu abangaphezu kwesigidi abafa minyaka le zizifo ezihlobene nokutshaya yaye amazwe asakhasayo, wona anegalelo elingama-52 ekhulwini lokutshaywa kwecuba ehlabathini, afak’ isandla ekukhawuleziseni ukunyusa umlinganiselo wabo bafayo.”—The Journal (Toronto), Septemba 1, 1983, iphe. 16.

Owayesakuba nguMphathiswa wezeMpilo, Imfundo Nentlalontle eUnited States, uJoseph Califano, wathi: “Namhlanje alinakuthandabuzeka elokuba ukutshaya okunene kukuzibulala okuthe ngcembe.”—Scholastic Science World, Matshi 20, 1980, iphe. 13.

Alivisisani noko uThixo afuna amaKristu akunikele kuye

Roma 12:1: “Ndiyanivuselela ngoko, bazalwana, ngeemfefe zikaThixo, ukuba niyinikele imizimba yenu ibe lidini eliphilileyo, elingcwele, elikholekileyo kuThixo: inkonzo yenu ke leyo yasengqondweni.”

Ugqirha jikelele wotyando welaseUnited States, uC. Everett Koop, wathi: “Ukutshaya imidiza kufaniswa ngokucacileyo kungunobangela ophambili onokuthintelwa wokufa ebuthweni lethu.” (The New York Times, Februwari 23, 1982, iphe. A1) “Uphengululo lwezamayeza lubonisa ukuba . . . umlinganiselo wobomi beentshayi unganeno ngeminyaka emithathu kuse kwemine kunobomntu ongatshayiyo. Ubude bobomi bengendle yecuba—umntu otshaya iipakethe ezimbini okanye ezingaphezulu zemidiza ngemini—bunokuba bufutshane kangangeminyaka esibhozo kunobomntu ongatshayiyo.” (The World Book Encyclopedia, 1984, Umqu. 17, iphe. 430) Ngaba kufanelekile ngomntu ukunikela ngobomi bakhe enkonzweni kaThixo andule ke abutshabalalise ngokuthe ngcembe obo bomi?

“Ukutshaya kuyabhuqa, ngokukodwa entliziyweni nasemiphungeni, kangangokuba olunye unyango lwamayeza athintelayo luba lolungenamsebenzi ngentelekiso ukuba umntu uyatshaya.” (IJelo Leendaba leYunivesithi yaseMzantsi California, Februwari 18, 1982) “Kunokwenzeka ukuba ukutshaya kungoyena nobangela mnye mkhulu gqitha unokuthintelwa wempilo enkenenkene ehlabathini.” (UGqr. H. Mahler, umalathisi jikelele weNtlangano Yehlabathi Yempilo, kwiWorld Health, Februwari/Matshi 1980, iphe. 3) Ngaba kusengqiqweni ngomntu ukuzinikela kwinkonzo engcwele kaThixo andule ke ayonakalise ngabom impilo yakhe?

Ukutshaya kukuvukela into efunwa nguThixo yokuba sithande ummelwane wethu

Yak. 2:8: “Uze umthande ummelwane wakho ngoko uzithanda ngako.”—Thelekisa uMateyu 7:12.

“Uphengululo lwakutshanje . . . lutyhile ukuba abafazi abangatshayiyo bamadoda atshayayo ngokwesilinganiselo bafa benganeno ngeminyaka emine kunabafazi abamadoda abo angatshayiyo.” (The New York Times, Novemba 22, 1978, iphe. C5) “Ukutshaya ukhulelwe kunokubangela iziphene eziqatha ekuzaleni kangangokuba kusenokufa okukhawuleyo, okanye usana lufe kwaoko lwakuba luzelwe.” (Family Health, Meyi 1979, iphe. 8) Ukuwaphatha ngendlela engenaluthando ngolo hlobo amalungu entsapho bubungqina obucacileyo bokuba umntu akaziphathi okomKristu.—Thelekisa eyoku-1 kuTimoti 5:8.

“Uphengululo lubonise ukuba ekubeni intshayi eqhelekileyo iwutshaya qho umdiza wayo ngexeshana nje elingephi iwulumekile, umntu ongatshayiyo eneneni unokunyanzelwa nxamnye nokuthanda kwakhe aphefumle ikhabhon monoksayidi, itela nentshongo ephantse ibe ngangaleyo ifunyanwa yintshayi ehleli ecaleni kwakhe.” (Today’s Health, Aprili 1972, iphe. 39) Umntu ongamthandiyo ngaloo ndlela umntu onguwabo akanikeli bungqina bakumthanda noThixo.—Bona eyoku-1 kaYohane 4:20.

Kutheni le nto uThixo wenza izityalo ezenziwa ngazo iziyobisi ukuba kuphosakele ukuzisebenzisa?

Izinto ezisetyenziswa kakubi zidla ngokuba zezikwasetyenziswa kakuhle. Kukwanjalo nangamandla omntu okuzala. Kunjalo ngewayini. Umya wenziwa ngamagqabi omisiweyo nangamagqabi aphezulu adubulayo ehemp, evelisa iintsinga eziluncedo zokwenza iintsontelo namalaphu. Amagqabi ecuba, asetyenziswa kakubi ziintshayi, nawo anokusetyenziswa ekwenzeni izibulala-ntsholongwane nezibulala-zinambuzane. Ngokuphathelele ubuncwane obuninzi bomhlaba, kusekuninzi okufuneka kufundiwe ngendlela obunokusetyenziswa ngayo ngokuyingenelo. Kwanokhula luyingenelo ekuthinteleni ukhukuliseko lomhlaba nasekugcineni ukufuma xa umhlaba ungalinywanga.

Yintoni enokwenziwa ngumntu ukuba uzamile ukwahlukana nokutshaya okanye ukusebenzisa ezinye iziyobisi waza akaphumelela?

Kuqala, ngokufundisisa iBhayibhile nokucamngca kufuneka uhlakulele umnqweno onamandla wokukholisa uThixo nowokuphila kwinkqubo yakhe yobulungisa entsha yezinto. Ukuba uyasondela kuye, naye wosondela kuwe, ekunika uncedo olufunayo.—Yak. 4:8.

Kubalulekile ukuba weyiseke bububi bale mikhwa nokukhulisa intiyo yokwenyani ngayo. (INdu. 97:10) Oku kunokwenziwa ngokuhlolisisa kwakhona izibakala ezandlalwe kweli candelo lencwadi nokucamngca, kungekhona ngesiyolo sokomzuzwana sangoku esinokufumaneka kule mikhwa, kodwa ucamngce ngoko kukholisa uThixo nendlela enokuba lizothe ngayo imiphumo yale mikhwa mibi.

Ukuba uziva unqanqatheka okanye ufuna ukusebenzisa nasiphi na sezinye iziyobisi, luthandazele ngokunyaniseka uncedo lukaThixo. (Luka 11:9, 13; thelekisa abaseFilipi 4:13.) Yenjenjalo ngoko nangoko. Kwakhona, thabatha iBhayibhile yakho uze ufunde ngokuvakalayo kuyo, okanye nxibelelana nomKristu okhulileyo. Mxelele ngento eyenzekayo uze ucele uncedo lwakhe.