Isahluko 3
Ulawulo ‘LoMthetheli Woxolo’ Phakathi Kweentshaba
1, 2. (a) Ngawaphi amazwi uYesu Kristu awawathetha xa wayesahlukana neqela labafundi bakhe? (b) Ngaba oku kwafuna ukuba ihlabathi liguquke ngaphambi kokuba alawule ‘njengoMthetheli Woxolo’?
NGAPHAMBI nje kokunyukela kwakhe ezulwini kwiinkulungwane ezingaphezu kwe-19 ezadlulayo, owayeza kuba ‘nguMthetheli Woxolo’ wexesha elizayo, uYesu Kristu, wathetha la mazwi xa wayesahlukana neqela labafundi bakhe abathembekileyo: “Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele . . . Niyabona, mna ndinani yonke imihla, kude kube sekuphelisweni kwephakade eli.”—Mateyu 28:19, 20.
2 Ngaba loo mazwi kaYesu afuna ukuba ihlabathi liguquke ngaphambi ‘kokupheliswa kwephakade eli’ okwaqalisa ngowe-1914? Hayi. Namhlanje, ngasekupheleni kwale nkulungwane yama-20, ihlabathi loluntu liselelingenakuguqulelwa kuYesu Kristu njengoMsindisi noKumkani walo ofanelekileyo. Noko ke, oku akukulibazisanga ukuphunyezwa koko uYehova wakuxela kwangaphambili kwiziprofeto zeBhayibhile. Akuzange kube yinjongo kaThixo ukuba ihlabathi liphela loluntu liguqulwe ngaphambi kokuba uYesu Kristu aqalise ukulawula ‘njengoMthetheli Woxolo.’ Ngokwahluke ngokungqalileyo koko, waxelelwa kwangaphambili ukuba makaqalise ukulawula phakathi kweentshaba zakhe.
3. Ukubhekisela kukaYesu kwiNdumiso 110 kwabonisa njani ukuba wayeza kulawula phakathi kweentshaba?
3 Kwanaxa wayelapha emhlabeni, uYesu Kristu wayesazi esi sibakala. Ngaphambi nje kokufa kwakhe njengomfelinkolo, waba nempikiswano nabachasi bakhe bonqulo waza wabhekisela kwiNdumiso 110. Sifunda ngako oku kuLuka 20:41-44: “Wathi ke kubo, Batsho ngani na ukuthi, uKristu ungunyana kaDavide? Kanti noDavide yena ngokwakhe uthi encwadini yeeNdumiso, Yathi iNkosi eNkosini yam, Hlala ngasekunene kwam, ndide iintshaba zakho ndizenze isihlalo seenyawo zakho. UDavide ngoko umbiza ngokuthi, Nkosi; aze abe ke ngunyana wakhe ngani na?”
4-6. (a) INdumiso 2 ibonisa njani nayo ukuba uYesu wayengayi kulindela ukuguquka kwehlabathi ngaphambi kokuqalisa ulawulo lwakhe ‘njengoMthetheli Woxolo’? (b) INdumiso 2:7 yazaliseka ngaliphi ixesha?
4 Ngoko, ngokucacileyo, uYesu Kristu, njengoNyana kaDavide, wayengayi kuqalisa ukulawula emva kokuguqulwa kwehlabathi. Kunoko, wayeza kuqalisa ukulawula phakathi kweentshaba awayeza kuthi uYehova uThixo ngokulwa ekugqibeleni azenze isihlalo seenyawo zoNyana wakhe osetroneni. Ngokukwanjalo INdumiso 2, kumazwi alandelayo, ibonisa ukuqaleka kolawulo lwakhe ‘njengoMthetheli Woxolo’ phakathi kweentshaba:
5 “Yini na ukuba iintlanga zenze imbuthumbuthu, izizwe zicamange into engeyakonto? Ookumkani behlabathi bazimisile, izidwangube zabhunga ngoYehova nangoMthanjiswa wakhe [uKristu wakhe]; besithi, Masiziqhawule iimbophelelo zabo, sizilahle izintya zabo kuthi. Ohleli emazulwini uyahleka, iNkosi iyabagculela. Iya kwandula ithethe kubo ngomsindo wayo, ibakhwankqise ngokuvutha kwayo. Ithi, Mna ke ndimmisile ukumkani wam phezu kweZiyon, intaba yam engcwele.
6 “Athi yena, Ndiya kuwuvakalisa ummiselo: UYehova uthe kum [kuKristu], UnguNyana wam wena; mna namhla ndikuzele. [INdumiso 2:7 yazaliseka xa uYehova wavusa uNyana wakhe kwelabafileyo, ngaloo ndlela esiba nguYise ongunaphakade kuYesu. (Roma 1:4)] Cela kum, ndikunike iintlanga zibe lilifa lakho, iziphelo zehlabathi zibe zezakho. Uya kuzivikiva ngentonga yentsimbi, uzihlekeze, zinge zizitya zodongwe. Ngoko ke, nina bookumkani, qiqani; bagwebi basehlabathini; yalekani. Mkhonzeni uYehova nisoyika, gcobani nithuthumela. Mangeni uNyana, hleze aqumbe, nitshabalale endleleni, ngokuba ungahle uvuthe umsindo wakhe. Hayi, uyolo lwabo bonke abazimela ngaye!”
7. Abapostile bakaYesu Kristu babhekisela njani kwiNdumiso 2 emva komhla wePentekoste?
7 Ngokutsho kweZenzo 4:24-27, abapostile bakaYesu Kristu babhekisela kule ndumiso yesibini emva kosuku lwePentekoste, ngowama-33 C.E.: “Baphakamisa izwi kuThixo ngamxhelo mnye, bathi, Mnini-nto-zonke, wena unguThixo owalenzayo izulu nomhlaba nolwandle, neento zonke ezikwezo nto; owathi ngomlomo kaDavide umkhonzi wakho, Zazibhavumelani na iintlanga, zaza izizwe zacamanga izinto ezingento? Bazimisa ookumkani behlabathi, nabaphathi bahlanganisana ndawonye ngokuyichasa iNkosi, naye uKristu wayo. Kuba, inyaniso, ngaye uMkhonzi wakho oyingcwele onguYesu, owamthambisayo, kwahlanganisana uHerode, kwanoPontiyo Pilato, ndawonye neentlanga nabantu bakwaSirayeli.”
Inzaliseko Enkulu YeNdumiso 2
8. (a) Yabakho nini inzaliseko yokuqala yeNdumiso 2:1, 2? (b) Inzaliseko enkulu yeNdumiso 2 ibisenzeka ukususela nini?
8 Ngonyaka wama-33 wenkulungwane yokuqala kwazaliseka okokuqala loo mazwi esiprofeto eNdumiso 2:1, 2. Oku kwakunxibelelene noYesu Kristu emhlabeni. Wayethanjiswe ngomoya oyingcwele kaYehova ngexesha lokubhaptizwa kwakhe nguYohane uMbhaptizi. Kodwa inzaliseko enkulu yeNdumiso 2 ibisenzeka ukususela ekupheleni kwamaXesha Eentlanga ngonyaka we-1914. (Luka 21:24) Kube yinto engqinelwa ngokupheleleyo ukuba ‘amaxesha eentlanga,’ awaqalisa ekutshatyalalisweni kokuqala kwesixeko saseYerusalem ngowama-607 B.C.E., aphela ngonyaka we-1914.a Emva koko ukufa kweentlanga zeli hlabathi kwathi kwasondela, kuquka ezo zeNgqobhoko.
9. Kwenzeka ntoni kwintshabalaliso yokuqala yeYerusalem ngokubhekisele kuBukumkani bukaThixo njengoko babumelwa ngumnombo wasebukhosini kaKumkani uDavide?
9 Ekutshatyalalisweni kokuqala kweYerusalem ngamaBhabhiloni, uBukumkani bukaYehova uThixo phezu kohlanga lukaSirayeli, njengoko babumelwa ngumnombo wasebukhosini kaKumkani uDavide, bathi baphela. Ukususela ngoko, amaYuda okwemvelo akazange abe naye ukumkani kumnombo wendlu yasebukhosini kaDavide. Kodwa uBukumkani boThixo Osenyangweni obulawulwa yinzala kaDavide, awathi uYehova wenza kunye naye umnqophiso woBukumkani obungunaphakade kumnombo wakhe, babungayi kuxinzelelwa phantsi emhlabeni ngonaphakade.
10, 11. (a) Wathini uThixo ngomprofeti wakhe uHezekile ngokubhekisele kwitrone kaDavide? (b) Ngubani oweza ‘enokugweba’ kwitrone kaDavide? (c) Zathini izihlwele zamaYuda xa wathi wazibonakalisa njengendlalifa engokwasemthethweni?
10 Ngaphambi nje kokutshatyalaliswa okokuqala kweYerusalem yamandulo, uYehova wabangela ukuba umprofeti wakhe uHezekile abhekise la mazwi kukumkani wayo: “Wena ke, mbulawa ungendawo, sikhulu sakwaSirayeli, umini yakho ifikileyo ngexesha lobugwenxa bokuphela, itsho iNkosi uYehova ukuthi, Luya kususwa unkontsho, sithulwe nesithsaba; oko koko, namhla kunamhla; okuthobekileyo kuya kuphakanyiswa, okuphakamileyo kuya kuthotywa. Ndiya kukuphenula ndikuphenule, ndikuphenule; kwanako oko akuyi kuba kuko, koda kufike lowo kukokwakhe ukugweba; ndikunike yena.”—Hezekile 21:25-27.
11 Lowo “kukokwakhe ukugweba” weza engumntu onguYesu Kristu, ibe umnombo wakhe wenzala ophuma kuDavide ubhalwe kuMateyu 1:1-16 nakuLuka 3:23-31. Ngokuqhelekileyo wayebizwa ngokuthi ‘nguNyana kaDavide.’ Ngosuku awathi ngoloyiso wangena eYerusalem, ekhwele e-esileni ukuze azalisekise isiprofeto, isihlwele samaYuda esasinemincili nesasimpheleka nabapostile bakhe ngovuyo badanduluka bathi: “Hosana kuye unyana kaDavide! Makabongwe lo uzayo egameni leNkosi! Hosana enyangweni!”—Mateyu 21:9.
“UNyana KaDavide” Ubekwe Etroneni Ezulwini
12. Xa amaXesha Eentlanga aphelayo ngowe-1914, uYesu Kristu, njengendlalifa esisigxina kaDavide, wabekwa phi etroneni?
12 Iminyaka engama-2 520 yokucinezela kweeNtlanga uBukumkani bukaThixo obulawulwa yindlu kaDavide yaphela ngowe-1914. Ngelo xesha kwafika ithuba lokuba uYesu Kristu, “uNyana kaDavide,” abekwe etroneni, angabekwa apha kwitrone yasemhlabeni, kodwa abekwe kwawona mazulu aphakamileyo kwisandla sokunene sikaYehova uThixo!—Daniyeli 7:9, 10, 13, 14.
13. (a) Kukususela ngawuphi unyaka owathi unyaka we-1914 waxelwa kwangaphambili njengowokuphela kwamaXesha Eentlanga, ibe wawuxelwa ngoobani? (b) Sasiyintoni isimo sengqondo seentlanga zomhlaba ‘ngoNyana kaDavide’ owayesandul’ ukubekwa etroneni?
13 Loo mhla ubalulekileyo kwakuthethwa ngawo ukususela ngowe-1876 ngabo bathi banxulumana neWatch Tower Bible and Tract Society. Kodwa iintlanga zomhlaba, kwanezo zeNgqobhoko, zakugatya ukuwugqala njengexesha lokuba zidlulisele ulongamo lwazo lwasemhlabeni ‘kuNyana kaDavide’ owayesandul’ ukubekwa etroneni. Azizange zivume ukuba wayenelungelo lokuba nolongamo awayelunikwe nguThixo phezu komhlaba, osisihlalo seenyawo zikaYehova uThixo. (Mateyu 5:35) Zabonakalisa ukumgatya kwazo ngokuphandle lo Kumkani unelungelo ngokuzibandakanya kwimfazwe yehlabathi yokuqala.
14. (a) Yakuqhambuka iMfazwe Yehlabathi I, sisiphi isimo sengqondo amazwe awasibonakalisayo kuloo maKristu awayenxulumene neWatch Tower Society? (b) Ngenxa yoku, ibonisa ntoni imeko yazwenibanzi?
14 Kuwo onke amazwe awayesemfazweni, amaKristu azahluleleyo awayenxulumene neWatch Tower Society aba phantsi kwengcinezelo enkulu yokuba atyeshele isigqibo sawo sokuphepha ukuba netyala legazi. Ngelo xesha ayengayiqondi ngokupheleleyo imfuneko yobundilele bobuKristu. Isiprofeto ‘soNyana kaDavide,’ uYesu Kristu, kubafundi bakhe ‘esingokupheliswa kwephakade eli’ saba yinyaniso ngendlela ebuhlungu: “Niya kuthiywa ziintlanga zonke ngenxa yegama lam.” (Mateyu 24:9) Le ntiyo ayithothanga ukususela ekupheleni kweMfazwe Yehlabathi 1. Ngenxa yezi zibakala zinentsingiselo zembali yanamhla, ibonisa ntoni imeko yazwenibanzi? Ibonisa oku: “UMthetheli woxolo” ulawula phakathi kweentshaba ezilapha emhlabeni!
15. Kwenzeka ntoni kuSathana uMtyholi nemikhosi yakhe eziidemon xa kwaqhambuka imfazwe ezulwini, ibe imiphumo kumele ukuba yaba yeqinisekileyo ngawuphi unyaka?
15 UThixo uSomandla wabangela ubukho boBukumkani obuthenjisiweyo nobungoMesiya ngexesha elimiswe nguye phezu kwazo nje zonke iintshaba ezazikho ezulwini nasemhlabeni. ISityhilelo 12:1-9 sibonisa ukuba emva kokuzalwa, ngokungathi kunjalo, koBukumkani ‘obungumntwana oyinkwenkwe’ emazulwini ephuma kwisibeleko sentlangano kaYehova ebumfazi, kwaqhambuka imfazwe ngokukhawuleza ezulwini. Amazulu angcwele ayengaseyiyo indawo yenamba yokomfuziselo, uSathana uMtyholi nezithunywa zezulu zakhe eziziidemon. Kule mfazwe, eyayingabonakali emehlweni abantu, “uNyana kaDavide” owayenikwe amandla asebukhosini walwa waza woyisa wandula wamkhupha uSathana uMtyholi nemikhosi yakhe eziidemon emazulwini yaye wabavalela kummandla womhlaba wethu. Oku kuthotywa kwemikhosi ebusathana ngokucacileyo kwaphunyezwa ngokupheleleyo ngowe-1918, unyaka waxa iMfazwe Yehlabathi I yathi yafikelela esiphelweni.
Akuthotywa, UMtyholi Uvus’ Imfazwe
16, 17. (a) USathana uMtyholi othotyiweyo ulwa noobani? (b) Ngoobani abasebenzisayo ukuphumeza lo mlo?
16 USathana uMtyholi othotyiweyo, inamba yokomfuziselo, ngoku inomsindo ngokukhethekileyo kwintlangano kaYehova uThixo ebumfazi. (ISityhilelo 12:17) Ngaloo ndlela ngoburhalarhume ulwa nentsalela ezelwe ngomoya yamaKristu azahluleleyo anobungqina bokuba le ntlangano ingumama wawo wokomoya.—Galati 4:26.
17 USathana ukwalwa “nezinye izimvu,” ezithi ngokuthobekileyo zisebenze nentsalela ethanjisiweyo ekunikeleni ubungqina bokuzalwa koBukumkani. (Yohane 10:16) Akasebenzisi nje kuphela imikhosi yakhe eziidemon nethotyiweyo, ngoku ekummandla womhlaba, kodwa ukwasebenzisa nenxalenye ebonakalayo yentlangano yakhe ukuphumeza le mfazwe nxamnye nentsalela “nezinye izimvu.”
18. (a) Nangona uMtyholi esithi ngoburhalarhume alwe nentsalela ethanjisiweyo namaqabane ayo, yiyiphi inkuselo abanayo? (b) Yiyiphi inkalo yolawulo ‘loMthetheli Woxolo’ esondela ekupheleni kwayo?
18 Ulawulo ‘loMthetheli Woxolo’ phakathi kweentshaba zakhe apha emhlabeni lusondele esiphelweni salo. Uye wayiqwalasela ngenyameko le meko. Imini nobusuku izithunywa zezulu zakhe ezingcwele nezinyanisekileyo zima ziphaphile, zilungele ukufumana imiyalelo yasebukhosini evela kuye ukuze ziyiphumeze ngokukhawuleza. Zikhonza njengabakhuseli bentsalela ethanjisiweyo namaqabane ayo, “isihlwele esikhulu” ‘sezinye izimvu,’ njengoko aba beqhubeka bekhonza izilangazelelo zoBukumkani ebudeni beli xesha liphela ngokukhawuleza xa “uMthetheli woxolo” elawula phakathi kweentshaba zakhe.—ISityhilelo 7:9.
[Umbhalo osemazantsi]
a Ukuze ufumane iinkcukacha, bona incwadi ethi Unokuphila Ngonaphakade KwiParadisi Esemhlabeni, iphepha 138-41, eyapapashwa yiWatchtower Bible and Tract Society of New York, Inc.