Ukuzinziswa Ngokupheleleyo Kwembambano Yendalo Iphela
“INkosi ngasekunene kwakho iya kuphalusa ookumkani ngemini yomsindo wayo.”—INDUMISO 110:5.
1, 2. Ngonyaka wama-70 C.E., sisiphi isiganeko esisenokuba sahlwayela amathandabuzo kwinto yokuba uYehova uThixo ungumongami wendalo iphela, kodwa ngelo xesha, inkoliseko yakhe wayiphethulela kubani?
ULONGAMO lwendalo iphela loMdali wezulu nomhlaba luyeyona mbambano iphambili ejongene nabantu nezithunywa zezulu. Kungekudala, le mbambano iya kuzinziswa ngokupheleleyo, kodwa kangangeenkulungwane ezininzi iintshaba zikaYehova ziye zalucel’ umngeni ulongamo lwakhe. Ngokwenene, ukutshatyalaliswa kwesixeko saseYerusalem ngowama-70 C.E. netempile yaso eyayinikezelwe kuYehova kusenokuba kwahlwayela amathandabuzo kwinto yokuba ulongamo loMdali lolwendalo iphela. Sekunjalo, kwakukho isizathu esivakalayo sokuba ngelo xesha uYehova engazange akhethe ukuba nguThixo ongumphumi-mkhosi ngenxa yoSirayeli wokwenyama.
2 Sasiyintoni isizathu? Ngelo xesha uYehova uThixo wayeyiphethulele kuhlanga olutsha inkoliseko yakhe, uSirayeli wokomoya, ‘uSirayeli kaThixo,’ njengokuba umpostile uPawulos elibiza ngolo hlobo ibandla likaYesu Kristu. (Galati 6:16) Noko ke, ukuza kuthi ga ngoku, ebudeni bexesha elibizwa ngokuba liXesha lobuKristu, uYehova akamlwelanga uSirayeli wokomoya njengoThixo ongumphumi-mkhosi ngendlela efanayo nawamlwela ngayo uSirayeli wokwemvelo phantsi koMnqophiso woMthetho kaMoses. Wade wavumela amajoni aseRoma, awayexhokonxwa ngamaYuda, ukuba abulale uYesu Kristu ngokumxhoma kumthi wentuthumbo eKhalvari. Oko kwenzeka kwiminyaka engama-37 ngaphambi kokutshatyalaliswa kwesibini kweYerusalem ngamaRoma, ngowama-70 C.E.
3, 4. Ukususela kwimihla kaMoses ukuhla ukuza kutsho kuKumkani uHezekiya, uThixo wayezibonakalise njani ukuba ungumphumi-mkhosi, kodwa ngoSirayeli wokomoya, yintoni eye yayinyaniso ngokulwa kwakhe nokulwa kwabo?
3 Ukususela kwimihla yomprofeti uMoses ukuhla ukuza kutsho kulawulo lukaKumkani uHezekiya waseYerusalem, uYehova uThixo walulwela ngokungummangaliso uhlanga lwakwaSirayeli, yaye amaSirayeli alwa phantsi kwakhe ngezixhobo ezibulalayo. (Duteronomi 1:30; 3:22; 20:3, 4; Yoshuwa 10:42) Kodwa akunjalo ngoSirayeli wokomoya! Ukususela ekufeni kukaYesu Kristu ngaphandle kweYerusalem ukuhla ukutyhubela iXesha lethu Eliqhelekileyo, lo Thixo ongumphumi-mkhosi akakhethanga ukulwa imfazwe yokoqobo ngenxa yoSirayeli kaThixo. Ngokuvisisana noko, akamgunyazisanga uSirayeli wokomoya obumba ibandla lamaKristu ukuba asebenzise izixhobo zemfazwe. AmaKristu anolunye uhlobo lwemfazwe amele ayilwe.
4 Ngokungqinelana noku, omnye wabalweli bokholo lwamaKristu abaphambili wabhalela amaKristu angoowabo aseKorinte, eGrisi esithi: “Iintonga esiphuma ngazo umkhosi. azizezenyama; kuye uThixo zinamandla okuwisa iinqaba; siwisa ngazo nje amabhongo, nayo yonke into ephakamileyo, eziphakamisayo ngokuchasa ukwazi uThixo; iingqiqo zonke sizithimbela ekumlulameleni uKristu; sizilungisele ukuphindezela konke ukungamlulameli, xa kuthe kwazaliseka okwenu ukumlulamela.” (2 Korinte 10:4-6) Ngaphambilana kwakwincwadi enye, uPawulos wathetha ‘ngeentonga zobulungisa zasekunene nezasekhohlo.’—2 Korinte 6:7; bona kwaneyabase-Efese 6:11-18.
UYehova Uza Kulwa EArmagedon
5. Kumyezo waseGetsemane, sisiphi isimo sengqondo uYesu awayenaso ngokusebenzisa izixhobo eziphathekayo ekuzikhuseleni, ibe liliphi ikhondo lesenzo abafundi bakhe abalithabathayo?
5 Ngoxa uYesu Kristu wayesemhlabeni, akazange abhenele ekusebenziseni izixhobo ezibulalayo ngenjongo yokuzikhusela. Ngobusuku awanikelwa ngabo kumyezo waseGetsemane, umfundi wakhe ozinikeleyo uSimon Petros warhola ikrele waza wanqumla indlebe yesicaka sombingeleli omkhulu wamaYuda. Kodwa uYesu ngokumangalisayo wayibuyisela indlebe endaweni yayo waza wathi: “Bonke abathabatha ikrele baya kutshabalala likrele. Uba andinako na ngoku ukumbongoza uBawo, andikhuphele imikhosi yezithunywa zezulu engaphezu kweshumi elinamibini? Bezingathini na ke oko ukuzaliseka izibhalo ezithi, kumele ukuba kube nje?” (Mateyu 26:52-54) Embonakalweni yako konke oku, abaxelisi bokwenyaniso bonyana kaThixo owazincamayo bahlala bengoondilele, ngendlela engqalileyo nengangqalanga, kwiimfazwe zehlabathi.—Yohane 17:16; 18:36.
6. Ebudeni bemfazwe yaloo mini inkulu kaThixo uSomandla eArmagedon, sisiphi isimo sengqondo amaNgqina kaYehova aya kuba naso?
6 Ngoko, apha, iintlanga mazaziswe ukuba ebudeni ‘bemfazwe yaloo mini inkulu kaThixo uSomandla, endaweni ekuthiwa ngesiHebhere yiArmagedon,’ amaNgqina kaYehova akayi kuba nesabelo ekulweni. Oko aya kukushiyela kuThixo ongumphumi-mkhosi, ‘uYehova wemikhosi,’ kunye nemikhosi yakhe yezithunywa zezulu phantsi kokhokelo lukaYesu Kristu.—ISityhilelo 16:14-16; 19:11-21; INdumiso 84:12.
UYehova Sekumbovu Ukuba Aqalise Imisebenzi Yakhe Yemfazwe
7. NjengoThixo ongumphumi-mkhosi, liliphi igama uYehova awathi wabizwa ngalo, ibe ngaba usabizwa ngalo?
7 UThixo kaSirayeli wamandulo wayesaziwa yaye ebizwa ngokuba nguYehova tseva·ʼohthʹ, okanye uYehova wemikhosi. (1 Samuweli 1:3, 11) KumaRoma 9:29 umpostile ongumKristu uPawulos ubhekisela kuIsaya 1:9 aze abhale oku: “Ukuba iNkosi yemikhosi ibingasishiyelanga mbewu, ngesibe saba njengeSodom, ngesibe senziwa safana neGomora.” Kwakhona, umfundi ongumKristu uYakobi ubhala athi: “Ukubhomboloza kwabavuni abo kungenile ezindlebeni zeNkosi yemikhosi.” (Yakobi 5:4) Ngoko uPawulos noYakobi bamjonga uThixo njengoYehova wemikhosi ebudeni benkulungwane yokuqala yeXesha lethu Eliqhelekileyo. Ebudeni beenkulungwane ezili-18 ezilandeleyo, uThixo akakhange abandakanyeke kwimfazwe yokwenyama ngenxa yoSirayeli wokomoya, uSirayeli kaThixo, ngendlela awenza ngayo kuSirayeli wamandulo, ukanti usenguYehova wemikhosi.
8-10. (a) Ngubani owagunyazisa imfazwe ezulwini, ibe kwakutheni ukuze uMikayeli abe ngoyena ufanelekele ukwenza eli dabi? (b) Waba yintoni umphumo wemfazwe eyabakho ezulwini, yaye lingakanani ixesha eliseleyo ngaphambi kwemfazwe yaloo mini inkulu kaYehova?
8 Ekuzalweni koBukumkani obungoMesiya ngowe-1914 ekupheleni ‘kwamaxesha eeNtlanga,’ kwaqhambuka imfazwe kummandla osezulwini wolawulo lukaYehova uThixo. (Luka 21:24) Ngubani owagunyazisa loo mfazwe? NguYehova uThixo. Wathumela uNyana wakhe ohlaliswe etroneni kummandla wedabi esebenzisa igama elithi Mikayeli ngenxa yokuba Lo ngoyena ufaneleke ngokonakona ukuphendula umbuzo okwelo gama, ongulo, “Ngubani na onjengoThixo?” UMikayeli ngokukhawuleza wenza isenzo njengommeli olwayo kaYehova wemikhosi.
9 Mayela noku, siyafunda kwiSityhilelo 12:7-10: “Kwaza kwabakho imfazwe emazulwini, uMikayeli nezithunywa zakhe besilwa nenamba, inamba nezithunywa zayo zisilwa; azaba nakweyisa, kanjalo ayaba safunyanwa indawo yazo emazulwini. Yaphoswa phantsi inamba enkulu, inyoka yakudala, leyo kuthiwa nguMtyholi, uSathana ke, lowo ulilahlekisayo elimiweyo liphela; yaphoswa emhlabeni, nezithunywa zayo zaphoswa kunye nayo. Ndaza ndeva izwi elikhulu emazulwini lisithi, Ngoku luthe usindiso, namandla, nobukumkani, lwaba lolukaThixo wethu, negunya laba lelikaKristu wakhe; ngokuba ukhahlelwe phantsi ummangaleli wabazalwana bethu.”
10 Ukuza kuthi ga ngoku, ngaphezu kwama-70 eminyaka ngemva kwelo dabi emazulwini, ‘lixesha elincinane’ kuphela eliseleyo ngaphambi kokuba kuqhambuke imfazwe yaloo mini inkulu kaYehova aze uThixo azibonakalise ngokucacileyo ukuba unguYehova wemikhosi kwisizukulwana esikhoyo soluntu.—ISityhilelo 12:12; Zekariya 14:3.
Umlweli Wokuthethelelwa KukaYehova
11. Liliphi ixesha elimisiweyo intsalela yomhlambi omncinane nesihlwele esikhulu esililindeleyo, ibe ngelo xesha yintoni abaya kuyiqhwabel’ izandla ngemincili?
11 Ephantsi kwempefumlelo, uKumkani owayesisilumko uSolomon woSirayeli wamandulo wabhala esithi: “Into yonke inexesha elimisiweyo, nomcimbi wonke unexesha lawo phantsi kwezulu: . . . kukho ixesha lemfazwe, kukho nexesha loxolo.” (INtshumayeli 3:1-8) Emhlabeni abafundi boKumkani olawulayo “omkhulu kunoSolomon” balindele ixesha nesihlandlo sokuba Yena akhokele izithunywa zasezulwini ezinoloyiso ekubandakanyekeni kwidabi laseHar– Magedon. (Mateyu 12:42; ISityhilelo 19:11-16) Apho “uya kuzalusa [iintlanga] ngentonga yentsimbi,” azihlekeze “ngentonga yentsimbi.” (ISityhilelo 19:15; INdumiso 2:9) Hayi indlela abafundi bakhe abagcin’ uxolo, abakhuselweyo abaya kukuzukisa ngayo ukuhlangulwa kwabo kwenkalipho! Oku kuya kuquka intsalela ‘yomhlambi omncinane’ wabo baza kulawula naye eBukumkanini ‘nesihlwele esikhulu sezinye izimvu’ zakhe esinethemba lokuzuz’ ilifa umhlaba oyiParadisi phantsi kolawulo lwakhe loxolo lweminyaka eliwaka. (Luka 12:32; ISityhilelo 7:9-17; Yohane 10:16) Ngemincili, ‘besemthunzini kaSomandla,’ baya kuluqhwabel’ izandla uloyiso oluzukileyo loKumkani onguMalusi, uYesu Kristu, lokuthethelela ulongamo lwendalo iphela lukaYehova uThixo.—INdumiso 91:1.
12. Ivela phi imfazwe esongela iintlanga, yaye oko kuya kuba nawuphi umphumo ngokweNdumiso 68:1, 2?
12 Ngaphandle kokuzibaxa izinto, ngoku kusenokuthiwa imfazwe engaphaya kolawulo lomntu nebandakanya ukusetyenziswa kwezixhobo ezijoliswe ngokuchanileyo ezizigqwesa lee iibhombu zakhe zenyukliya isongela zonke iintlanga zomhlaba, enoba zingaphakathi okanye zingaphandle kwentlangano yeZizwe Ezimanyeneyo. Khawubek’ indlebe: “Makasuk’ eme uThixo, zibe ziintsali iintshaba zakhe, basabe ebusweni bakhe abamthiyayo. Njengokuphetshethwa komsi, baphephethe; njengokunyibilika komthwebeba phambi komlilo, mabadake ngokunjalo abangendawo ebusweni bukaThixo.”—INdumiso 68:1, 2.
13. Njengoko amalungiselelo emfazwe eqhubeka, amazwi eNdumiso 45:1-6 ngoku abhekiswa kubani ngendlela esexesheni ngakumbi?
13 Amalungiselelo eyona mfazwe inkulu kunazo zonke ngoku ayaqhubeka. NjengoMlwi ongoyena uphambili kaThixo, uMphumi-mkhosi wokuthethelelwa kukaYehova kuthethwa naye la mazwi alandelayo awaqanjwa phantsi kwempefumlelo lelinye ilungu lohlanga lwakwaSirayeli: “Umhle wamhle ngaphezu koonyana babantu; kugalelwe ubumnandi emlonyeni wakho; ngenxa yoko ukusikelele uThixo wakho ngonaphakade. Bhinqa ikrele lakho ethangeni, gorha, bhinqa indili yakho nobungangamela bakho. Tyhudisa, ukhwele uhambe, unobungangamela bakho, ngenxa yenyaniso, nolulamo olunobulungisa. Sikuyale ngezinto ezoyikekayo isandla sakho sokunene. Iintolo zakho zitsolile; kuya kuwa izizwe phantsi kwakho; zitsolile entliziyweni yeentshaba zokumkani. Itrone yakho, itrone kaThixo, ingunaphakade kanaphakade; yintonga ethe tye intonga yobukumkani bakho.”—INdumiso 45:1-6.
Iintlanga Ziyahlanganisana Ndawonye Nxamnye NoYehova
14, 15. Emva kokukhululwa eluvalelweni, ngawaphi amazwi eNdumiso 2 abapostile abawacaphulayo njengazalisekileyo, yaye sisiphi isicelo abasenzayo kuThixo?
14 Kungekudala emva kokumiselwa kwebandla lamaKristu ngosuku lwePentekoste yowama-33 C.E., amaKristu athanjisiweyo akuqonda ukusebenza kweNdumiso 2:1, 2. Esi sibhalo sifundeka ngolu hlobo: “Yini na ukuba iintlanga zenze imbuthumbuthu, izizwe zicamange into engeyakonto? Ookumkani behlabathi bazimisile, izidwangube zabhunga ngoYehova nangoMthanjiswa wakhe.” Emva kokuba abapostile boMthanjiswa kaYehova baye babanjwa okokuqala baza baphathwa kakubi ngamaYuda aziintshaba zawo, babuya bahlangana namaKristu angoowabo baza ke bacaphula la mazwi eNdumiso 2 njengoko aqanjwa nguKumkani uDavide. IZenzo 4:23-30 zinikela ingxelo ngalo mbandela, zisithi:
15 “Ke kaloku, bakundululwa, baya kwababo, babika oko zingako izinto abazithethayo kubo ababingeleli abakhulu namadoda amakhulu. Bona ke, bekuvile oko, baphakamisa izwi kuThixo ngamxhelo mnye, bathi, Mnini-ntozonke, wena unguThixo owalenzayo izulu nomhlaba nolwandle, neento zonke ezikwezo nto; owathi ngomlomo kaDavide umkhonzi wakho, Zazibhavumelani na iintlanga, zaza izizwe zacamanga izinto ezingento? Bazimisa ookumkani behlabathi, nabaphathi bahlanganisana ndawonye ngokuyichasa iNkosi, naye uKristu wayo. Kuba, inyaniso, ngaye uMkhonzi wakho oyingcwele onguYesu, owamthambisayo, kwahlanganisana uHerode, kwanoPontiyo Pilato, ndawonye neentlanga nabantu bakwaSirayeli, ukuba benze izinto zonke ezamiswayo ngenxa engaphambili sisandla sakho nalicebo lakho, ukuba zibekho. Okwangoku ke, Nkosi, zikhangele izisongelo zabo, ubanike abakhonzi bakho ukuba balithethe ilizwi lakho ngako konke ukungafihlisi, ekusoluleni isandla sakho ukuba uphilise, nokuba kubekho imiqondiso nezimanga ngegama loMkhonzi wakho oyingcwele, uYesu.”
16, 17. (a) Kuyo yonke imbali yoluntu, ngaba kukhe kwenzeka nantoni na enokuthelekiswa noko kwaqala ukuhla ngowe-1914? Cacisa. (b) Liliphi ikhondo lesenzo iintlanga eziqhubeka zilithabatha, ngaloo ndlela zinyanzela uThixo ukuba abhale ntoni, ‘ngokwencwadi yeemfazwe zakhe’?
16 Noko ke, xa kufikelelwa kwiintlanga ezinesiphithiphithi, ookumkani besima kwicala elinye bemanyene, iinkokeli zobupolitika zihlanganisana ndawonye ngokuchasene noYehova noMthanjiswa wakhe, uYesu Kristu, kuyo yonke imbali yoluntu yintoni enokuthelekiswa noko kwaqala ukuhla ngowe-1914 kwiminyaka engama-76 edluleyo? Lowo yayingengonyaka nje wokuqhambuka kwemfazwe yokuqala yehlabathi kubukho bomntu kodwa ngokukhethekileyo yaba ngunyaka wokuphela kwamaxesha eeNtlanga, “amaxesha amisiweyo eentlanga!” (Luka 21:24, NW) Ngokucacileyo iNdumiso 2 yaba nenzaliseko enkulu ekuqaleni kwaloo nyaka.
17 Ekupheleni kwamaxesha eeNtlanga ngowe-1914, akukho naziphi na iintlanga—kwanezo kuthiwa zezeNgqobhoko, ezinabemi abaninzi abazigqala ngokonqulo benguSirayeli wokomoya—ezazityekele ekumamkeleni lowo unguMthanjiswa kaYehova, uYesu Kristu, kwitrone yolawulo phezu komhlaba. Ibe ngoku, kwiminyaka engama-71 emva kokuba “ezi ndaba zilungileyo zobukumkani” zaqalisa ‘ukuvakaliswa kulo elimiweyo liphela, ukuze zibe bubungqina kuzo zonke iintlanga,’ ukususela kowe-1919 ukusa phambili, iintlanga ezingaphakathi nezingaphandle kweNgqobhoko ngokuqinisekileyo aziyi kumkhahlela uKumkani kaYehova ekukudala evakaliswa zize zizithobe kuye njengoko ziyilahla eyazo indlela yokulawula phezu komhlaba. (Mateyu 24:14) Ngokwahlukileyo koko, ekugqibeleni ziye zafikelela kwixesha nakwimeko apho zinyanzela uYehova ukuba, ngokungathi kunjalo, abhale incopho ezukileyo “yencwadi yeeMfazwe zikaYehova.”—Numeri 21:14.
Uloyiso Oluzukileyo LoThixo Ongumphumi-mkhosi
18. Sisiphi isenzo esihambisana naso esenziwa nguYehova, ibe ngubani oya kuba ngakuye, ngokungathi kunjalo, ngenzaliseko yeNdumiso 110?
18 Ngoko, phambili edabini, Yehova wemikhosi, noNyana wakho wasebukhosini, uYesu Kristu, esecaleni kwakho! Kuye kubhekiswa la mazwi esiprofeto: “Yiba nobukhosi phakathi kweentshaba zakho. INkosi ngasekunene kwakho iya kuphalusa ookumkani ngemini yomsindo wayo. Iya kugweba phakathi kweentlanga, kuzale zizidumbu; iphaluse intloko ezweni elibanzi.”—INdumiso 110:2, 5, 6.
19. Ngokuphathelele imfazwe ezayo yaloo mini inkulu kaThixo uSomandla, nguwuphi umthandazo esiwenza kuye ngenxa yesihlwele esikhulu sezinye izimvu?
19 Yehova wemikhosi, abakhonzi bakho abathembekileyo abasemhlabeni mababe ngamangqina avuyayo oloyiso lwakho olungenakuthelekiswa nanto olungomphumi-mkhosi wakho onguKumkani, uYesu Kristu, ngesihlandlo saloo mfazwe yaloo mini inkulu kaThixo uSomandla kwindawo ebizwa ngesiHebhere ngokuba yiHar–Magedon! (ISityhilelo 16:14) Sikunye nentsalela yamaSirayeli okwenyaniso okomoya, isihlwele esikhulu sabo babumvu abaye “bazihlamba iingubo zabo ezinde, bazenza mhlophe egazini leMvana” masithi ngovuyo ‘siphume embandezelweni enkulu’ ukuze sibe ngamangqina akho asemhlabeni ngonaphakade! (ISityhilelo 7:14) Phantsi kwenyameko yakho enothando, masithi ngaphandle kokufa sisindele kulawulo olungenamfazwe loNyana wakho owoyisileyo, oya kulawula phezu komhlaba ocociweyo oya kuguqulelwa ekubeni yiparadisi entle, ngokuvisisana nenjongo yakho yantlandlolo. Masibe bubungqina obubonakalayo kubo bonke abavusiweyo bokuthethelelwa kolongamo olulunge kuwe phezu kwayo yonke indalo! Siyakubulela kuba ngelo xesha uya kube uyizinzise ngokupheleleyo imbambano yendalo iphela, ewe, ngonaphakade!
Uyakhumbula na?
◻ Yiyiphi eyona mbambano iphambili ejongene nabantu nezithunywa zezulu?
◻ Nguwuphi umahluko okhoyo phakathi kokulwela kukaYehova uSirayeli wamandulo nokulwela kwakhe uSirayeli wokomoya?
◻ Ebudeni beArmagedon, sisiphi isimo sengqondo aya kuba naso amaNgqina kaYehova, yaye ngoba?
◻ INdumiso 2:1, 2 yaba nenzaliseko engenamanduleli nini?
◻ Imbambano yolongamo lwendalo iphela iya kuzinziswa njani ngokupheleleyo?
[Umfanekiso okwiphepha 24, 25]
‘Isihlwele esikhulu’ siya kuluqhwabel’ izandla uloyiso loMalusi onguKumkani kaThixo