Iindaba Ezilungileyo Afuna Ukuba Uzive
XA UYESU wayesemhlabeni, abafundi bakhe beza kuye baza babuza: “Uya kuba yintoni na umqondiso wobukho bakho nowokupheliswa kwenkqubo yezinto?” Wabaphendula esithi kwakuya kubakho iimfazwe phakathi kweentlanga ezininzi, iindlala, iindyikitya zokufa, iinyikima zomhlaba, ukwanda kokuchas’ umthetho, abafundisi bonqulo bobuxoki balahlekise abaninzi, intiyo nokutshutshiswa kwabalandeli bakhe bokwenyaniso, nokuphola kothando lobulungisa kubantu abaninzi. Xa ezi zinto ziqalisa ukwenzeka, oko kwakuya kubonisa ukuba uKristu ukho ngokungabonakaliyo yaye uBukumkani bamazulu busondele. Ezi yayiza kuba ziindaba—iindaba ezilungileyo! Ngoko uYesu wongezelela la mazwi njengenxalenye yomqondiso: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:3-14.
Zona ngokwazo iziganeko ezenzeka ehlabathini kutshanje zibi, kodwa eyona nto ziyibonakalisayo yinto elungileyo, ubukho bukaKristu. Ezi meko zikhankanywe ngasentla zaqalisa ukuba bubungqina kuloo nyaka wabhengezwa ngokubanzi we-1914! Waphawula ukuphela kwamaXesha Eentlanga nokuqalisa kwexesha leenguqu ukusuka kulawulo lwabantu ukusa kuLawulo LukaKristu Lweminyaka Eliwaka.
Into yokuba kwakuza kubakho ixesha leenguqu iboniswe kwiNdumiso 110, indinyana 1 neye-2, nakwiSityhilelo 12:7-12. Apho kwaboniswa ukuba uKristu wayeya kuhlala ngasekunene kukaThixo ezulwini de kube lixesha lokuba abe nguKumkani. Emva koko kwakuza kubakho imfazwe ezulwini eyayiza kuphumela ekuphoselweni kukaSathana emhlabeni, nto leyo eyayiza kuzisa uyeha emhlabeni, yaye uKristu wayeza kulawula phakathi kweentshaba zakhe. Ubungendawo babuza kuphela ngokupheleleyo ngokufika ‘kwembandezelo enkulu,’ efikelela incopho yayo kwimfazwe yaseHar–Magedon kuze kulandele uLawulo LukaKristu Lweminyaka Eliwaka loxolo.—Mateyu 24:21, 33, 34; ISityhilelo 16:14-16.
IBhayibhile ithi: “Ke, kwazi oku, ukuba ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, abathandi bemali, abazidlayo, abanekratshi, abanyelisi, abangathobeli bazali, abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo, benembonakalo yozinikelo lobuthixo kodwa bengaphili ngokuvisisana nalo; ngoko ke zikhwebule kwabanjalo.”—2 Timoti 3:1-5.
Bambi basenokuma ngelithi ezi zinto bezisenzeka ngaphambili kwimbali yoluntu, kodwa isibakala sesokuba azizange zenzeke ngomlinganiselo ofanayo. Njengoko ababhali-mbali nabahlalutyi besitsho, akuzange kubekho ixesha emhlabeni elifana neli labonwa ukususela kowe-1914. (Bona iphepha 7.) Ooyeha baye banda ngakumbi kunanini na ngaphambili. Ngaphezu koko, ngokubhekisele kwezinye iinkalo zomqondiso kaKristu wemihla yokugqibela, kufanele kuqwalaselwe ezi zibakala: Ubukho bukaKristu noBukumkani buye bavakaliswa emhlabeni ngokubanzi ngendlela engazange ibekho embalini. Ukutshutshiswa ngenxa yokushumayela akuzange kufane noko kuye kwenzeka kumaNgqina kaYehova. Inkitha yawo yabulawa kwiinkampu zoxinaniso zamaNazi. Kude kube ngulo mhla umsebenzi wamaNgqina kaYehova usavaliwe kwezinye iindawo, yaye kwezinye ayabanjwa, avalelwe ngaphaya kwezitshixo, athuthunjiswa, aze abulawe. Konke oku kuyinxalenye yomqondiso owanikelwa nguYesu.
Njengoko kwaxelwa kwangaphambili kwiSityhilelo 11:18, ‘iintlanga ziye zawaqumbela’ amaNgqina kaYehova athembekileyo, yaye oku kubonisa ukuba “ingqumbo” kaYehova iya kubonakaliswa nxamnye nezo ntlanga. Kwaesi sibhalo sithi uThixo uya ‘kubonakalisa abo bawonakalisayo umhlaba.’ Akuzange ngaphambili embalini yoluntu kubekho ixesha apho amandla omhlaba okuxhasa ubomi aye aba semngciphekweni ngale ndlela. Noko ke, ngoku kwahlukile! Izazinzulu ezininzi ziye zalumkisa zisithi ukuba umntu uyaqhubeka engcolisa umhlaba, umhlaba awuyi kukwazi ukumiwa. Kodwa uYehova ‘wawubumba ukuba umiwe,’ yaye uya kubatshayela neengcambu abo bawungcolisayo ngaphambi kokuba bawonakalise ngokupheleleyo.—Isaya 45:18.
IINTSIKELELO ZASEMHLABENI PHANTSI KOBUKUMKANI
Into yokuba abantu baza kuphila emhlabeni njengabalawulwa boBukumkani bukaThixo isenokubonakala imangalisa kwabaninzi abakholelwa eBhayibhileni abacinga ukuba bonke abasindiswayo basezulwini. IBhayibhile ibonisa ukuba linani elilinganiselweyo kuphela eliya ezulwini, yaye ibonisa ukuba abo baya kuphila ngonaphakade emhlabeni baya kuba sisihlwele esikhulu esilinani elingenamlinganiselo. (INdumiso 37:11, 29; ISityhilelo 7:9; 14:1-5) Into yokuba uBukumkani bukaThixo ngaphantsi kukaKristu buya kuzalisa umhlaba buze bulawule phezu kwawo iboniswe sisiprofeto esikwincwadi yeBhayibhile kaDaniyeli.
Apho uBukumkani bukaKristu bumelwa lilitye eliqephuka kulongamo lukaYehova olunjengentaba. Libetha lize litshabalalise umfanekiso omela izizwe ezinamandla zomhlaba, yaye ‘elo labetha umfanekiso laba yintaba enkulu, lazalisa umhlaba uphela.’ Esi siprofeto sihlabela mgama sisithi: “Ngemihla yabo kumkani uThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:33-35, 43, 44.
Bobu Bukumkani neli themba lixhaswa ziZibhalo lingobomi obungunaphakade kumhlaba ocociweyo nowenziwe wamhle eli amaNgqina kaYehova anqwenela ukukwazisa ngalo. Izigidi eziphilayo ngoku nezigidi ezininzi ezisemangcwabeni ziya kuzuza ithuba lokuhlala kuwo ngonaphakade. Kuya kwandula ke, ngaphantsi koLawulo LukaKristu Yesu Lweminyaka Eliwaka, injongo yantlandlolo kaYehova yokudala umhlaba nokubeka isibini sokuqala esingabantu kuwo izaliseke. Le Paradesi yasemhlabeni ayinakuze ikruqule. Kanye njengokuba uAdam wayabelwe umsebenzi kumyezo wase-Eden, ngokunjalo abantu baza kufumana umsebenzi olucelomngeni wokunyamekela umhlaba nezityalo nezilwanyana ezikuwo. “Baya kunandipha umsebenzi wezandla zabo.”—Isaya 65:22, Revised Standard Version; Genesis 2:15.
Kunokuchazwa izibhalo ezininzi ukubonisa iimeko eziya kubakho xa uphenduliwe umthandazo esawufundiswa nguYesu othi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Noko ke, okwangoku masikwanelise esi isibhalo: “Ndeva ilizwi elikhulu livela etroneni lisithi: ‘Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.’ Waza Lowo uhleli etroneni wathi: ‘Khangela! Zonke izinto ndizenza ntsha.’ Kanjalo, uthi: ‘Bhala, kuba la mazwi athembekile yaye ayinyaniso.’”—ISityhilelo 21:3-5.
[Amagama acatshulweyo akwiphepha 15]
“Amaxesha amanqam ekunzima ukujamelana nawo,”
KODWA ‘kuya kwandula ke kufike ukuphela’
[Umfanekiso okwiphepha 18]
ENetherlands
[Umfanekiso okwiphepha 18]
ENigeria