Iindlela Azisebenzisayo Ukuzivakalisa Kuwe
AmaKristu ayalelwa ukuba ‘enze abafundi bazo zonke iintlanga,’ kodwa oku akuthethi ukuba amele abanyanzele abanye okanye abaguqule ngesinyanzelo. Umyalelo kaYesu wawungowokuba ‘kuvakaliswe iindaba ezilungileyo kwabalulamileyo,’ “ukubopha abantliziyo zaphukileyo,” “ukuthuthuzela bonke abanesijwili.” (Mateyu 28:19; Isaya 61:1, 2; Luka 4:18, 19) AmaNgqina kaYehova afuna ukwenza oku ngokuvakalisa “iindaba ezilungileyo” eziphuma eBhayibhileni. Njengomprofeti uHezekile wakudala, amaNgqina kaYehova namhlanje azama ukufumana abo ‘bagcumayo, bancwinayo ngenxa yamasikizi onke awenzekayo.’—Hezekile 9:4.
Eyona ndlela yaziwa kakhulu ayisebenzisayo yokufumana abo banxunguphaliswe ziimeko ezikhoyo kungokuya kwindlu ngendlu. Ngaloo ndlela enza umgudu ongqalileyo wokufikelela kuwonke wonke, kanye njengokuba uYesu wenzayo xa ‘wahamba imizi ngemizi, nemizana ngemizana, ezivakalisa ezishumayela iindaba ezilungileyo zobukumkani bukaThixo.’ Abafundi bakhe bokuqala benza okufanayo. (Luka 8:1; 9:1-6; 10:1-9) Namhlanje, apho kunokwenzeka, amaNgqina kaYehova azabalazela ukutyelela khaya ngalinye amaxesha aliqela ngonyaka, efuna ukuncokola nomninimzi kangangemizuzu embalwa ngomxholo wasekuhlaleni okanye wehlabathi obangel’ umdla okanye oxhalatyelweyo. Kusenokuncokolwa ngesibhalo esinye okanye ezibini, yaye ukuba umninimzi ubonisa umdla iNgqina lisenokulungiselela ukubuyela ngexesha elifanelekileyo ukwenzela incoko engakumbi. IiBhayibhile noncwadi olucacisa iBhayibhile lwenziwa lufumaneke, yaye, ukuba umninimzi uyanqwena, kuqhutywa isifundo seBhayibhile sekhaya ngesisa. Ebudeni bowe-1986 umlinganiselo wezifundo zeBhayibhile ezingaphezu kwezigidi ezibini ezinekota zaziqhutywa ngokuthe rhoqo kwihlabathi lonke.
Enye indlela “iindaba ezilungileyo zobukumkani” ezivakaliswa ngayo kwabanye kungeentlanganiso eziqhutyelwa kwiiHolo zoBukumkani zasekuhlaleni. AmaNgqina aqhuba iintlanganiso apho veki nganye. Enye intlanganiso yeyentetho yesidlangalala engombandela obangel’ umdla ngelo xesha. Enye kukufundisiswa komxholo othile okanye isiprofeto esithile seBhayibhile, kusetyenziswa iphephancwadi IMboniselo njengombandela ongumthombo. Intlanganiso yesithathu sisikolo sokuqeqesha amaNgqina ukuba abe ngabavakalisi abafaneleke ngakumbi ‘beendaba ezilungileyo,’ ibe eyesine inikelwe ekuxubusheni umsebenzi wokunikela ubungqina kummandla wasekuhlaleni. Kwakhona, kanye ngeveki amaNgqina ahlanganisana kumakhaya abantu, engamaqela amancinane, ukwenzela izifundo zeBhayibhile.
Zonke ezi ntlanganiso zivulekele uwonke wonke. Akuze kwamkelwe zinkongozelo. Iintlanganiso ezinjalo ziyingenelo kubo bonke. IBhayibhile ithi: “Silolane eluthandweni nasemisebenzini emihle; singakuhilizeli ukuhlanganisana kwethu, njengesiko labanye. Masivuselelane kube kokukhona, niyibona nje ukuba imini leyo iyasondela.” Ufundisiso lwangasese nophengululo zizinto ezifunekayo, kodwa ukuhlanganisana nabanye kuyakhuthaza: “Isinyithi silola isinyithi, indoda ilola ubuso bowayo.”—Hebhere 10:24, 25; IMizekeliso 27:17.
AmaNgqina akwawasebenzisa kakuhle amathuba okuthetha ‘ngeendaba ezilungileyo’ njengoko edibana nabanye abantu kwimicimbi yawo yobomi bemihla ngemihla. Asenokuthetha nje kancinane nommelwane wawo, okanye nomntu ahamba naye ngoduladula okanye ngenqwelo-moya; isenokuba yintetho ende nomhlobo okanye isalamane; ingxubusho nomntu elisebenza naye ebudeni beyure yokuphumla. Ubungqina obuninzi uYesu awabunikelayo xa wayesemhlabeni babulolu hlobo—njengoko wayehamba elunxwemeni lolwandle, okanye ehleli ethambekeni, okanye ngoxa wayesidla kwikhaya lothile, okanye emtshatweni, okanye kwiphenyane lokuloba kuLwandle lwaseGalili. Wayefundisa kwizindlu zesikhungu nasetempileni eYerusalem. Naphi na apho wayekhona, wafumana amathuba okuthetha ngoBukumkani bukaThixo. AmaNgqina kaYehova azabalazela ukulandela emanyathelweni akhe nakule nkalo.—1 Petros 2:21.
Ukushumayela ngomzekelo
Akukho nanye kwezi ndlela zokukwazisa ‘ngeendaba ezilungileyo’ ebiya kuba nentsingiselo kuwe ukuba ubani ebekwazisa zona ebengazisebenzisi iimfundiso kuye. Ukuthetha into uze wenze enye kukuhanahanisa, ibe ukuhanahanisa kwabantu bonqulo kubangele izigidi zabantu zayinikel’ umva iBhayibhile. IBhayibhile ayinakubekw’ ityala ngokufanelekileyo. Ababhali nabaFarisi babenazo iZibhalo zesiHebhere, kodwa uYesu wabagxeka njengabahanahanisi. Wathetha ngokufunda kwabo umthetho kaMoses, waza ke wongezelela oku kubafundi bakhe: “Konke ngoko abasukuba besithi kuni kugcineni, ze nikugcine nikwenze; kodwa ze ningenzi ngokwemisebenzi yabo; kuba bathetha baze bangenzi.” (Mateyu 23:3) Ukuba umKristu ungumzekelo wokuphila ngokufanelekileyo oko kuthetha okungakumbi kuneeyure zokuvakalisa intshumayelo. Oku kwavakaliswa kubafazi abangamaKristu ababenamadoda angakholwayo: “Athi ngehambo yabafazi, lingekho ilizwi, azuzeke; ebonela ihambo yenu enyulu.”—1 Petros 3:1, 2.
Ngoko ke, amaNgqina kaYehova azama ukuncomela “iindaba ezilungileyo” kwabanye kwanangale ndlela: ngokuba ngumzekelo kwihambo yobuKristu ayincomelayo kwabanye. Azama ‘ukwenza kwabanye njengoko ebengafuna abanye benze kuwo.’ (Mateyu 7:12) Azama ukuziphatha ngale ndlela kubantu bonke, kungekhona nje kumaNgqina angoowawo okanye kubahlobo okanye kubamelwane okanye kwizalamane. Ekubeni engafezekanga, akasoloko ephumelela ngokusemagqabini. Kodwa kungumnqweno weentliziyo zawo ukwenza okulungileyo kubantu bonke, kungekhona nje ekuvakaliseni kubo iindaba ezilungileyo zoBukumkani, kodwa kwanasekubancedeni nanini na kunokwenzeka.—Yakobi 2:14-17.
[Amagama acatshulweyo akwiphepha 21]
Ukubazuza ngaphandle kwelizwi
[Imifanekiso ekwiphepha 20]
IiHolo zoBukumkani, eziyilwe ngendlela eluncedo, ziziindawo ekuxoxwa ngeBhayibhile kuzo
[Imifanekiso ekwiphepha 22]
Kubomi bawo bentsapho, nasekudibaneni kwawo nabanye abantu, amaNgqina ngokunyanisekileyo azama ukwenza izinto azimelayo kwabanye abantu