Iindlela Azisebenzisayo Ukwabelana Nabanye Ngeendaba Ezilungileyo

AMAKRISTU ayalelwa ukuba ‘enze abafundi abantu beentlanga zonke,’ kodwa oku akuthethi ukuba amele abanyanzele okanye abaguqule ngenkani abanye. Umyalelo kaYesu ‘yayikukushumayela iindaba ezilungileyo kwabalulamileyo, ukubopha abantliziyo zaphukileyo, ukuthuthuzela bonke abazilileyo.’ (Mateyu 28:19; Isaya 61:1, 2; Luka 4:18, 19) AmaNgqina kaYehova afuna ukwenza oku ngokuvakalisa iindaba ezilungileyo eziphuma eBhayibhileni. Njengomprofeti uHezekile wakudala, amaNgqina kaYehova namhlanje azama ukufumana abo ‘bancwinayo nabagcumayo ngenxa yezinto ezicekisekayo ezenziwayo.’—Hezekile 9:4.

Eyona ndlela yaziwa kakhulu ayisebenzisayo ukuze afumane abo badandathekiswa ziimeko ezikhoyo kukuya kwindlu ngendlu. Ngaloo ndlela enza umgudu ongqalileyo wokufikelela kuwonke-wonke, kanye njengokuba uYesu wenzayo xa “wahambela kwizixeko ngezixeko nakwiidolophana ngeedolophana, eshumayela yaye evakalisa iindaba ezilungileyo zobukumkani bukaThixo.” Abafundi bakhe bokuqala benza okufanayo. (Luka 8:1; 9:1-6; 10:1-9) Apho kunokwenzeka, namhlanje amaNgqina kaYehova azabalazela ukuya kwikhaya ngalinye izihlandlo eziliqela ngonyaka, efuna ukuncokola nomninimzi imizuzu embalwa ngomnye wemibandela ephambili yasekuhlaleni okanye yehlabathi ebangela umdla okanye exhalatyelweyo. Kusenokuncokolwa ngesibhalo esinye okanye ezibini, yaye ukuba umninimzi ubonisa umdla, iNgqina lisenokulungiselela ukubuyela ngexesha elifanelekileyo ukwenzela incoko engakumbi. IiBhayibhile noncwadi olucacisa iBhayibhile lwenziwa lufumaneke, yaye ukuba umninimzi unomnqweno, kuqhutywa naye isifundo seBhayibhile sekhaya ngesisa. Kuqhutywa rhoqo izigidi zezi zifundo zeBhayibhile eziluncedo kunye nabantu neentsapho ehlabathini lonke.

Enye indlela ezivakaliswa ngayo kwabanye “ezi ndaba zilungileyo zobukumkani” ziintlanganiso eziqhutyelwa kwiiHolo zoBukumkani zasekuhlaleni. AmaNgqina aqhuba iintlanganiso kuzo veki nganye. Enye yezo ntlanganiso yintetho yesidlangalala engombandela obangel’ umdla ngelo xesha, ize ilandelwe sisifundo seminye yemixholo yeBhayibhile okanye isiprofeto, kusetyenziswa iphephancwadi IMboniselo njengomthombo waloo nkcazelo. Enye intlanganiso sisikolo sokuqeqesha amaNgqina ukuze abe ngabavakalisi abafaneleka ngakumbi beendaba ezilungileyo, ilandelwe yinxalenye ekuxutyushwa kuyo umsebenzi wokunikela ubungqina kwintsimi yasekuhlaleni. Kwakhona kanye ngeveki amaNgqina ahlanganisana kumakhaya abanye ngokwamaqela amancinane esenzela izifundo zeBhayibhile.

Bonke abantu bamkelekile kwezi ntlanganiso. Akuqokelelwa nkongozelo. Ezo ntlanganiso ziyingenelo kubantu bonke. IBhayibhile ithi: “Masinyamekelane, ukuba silolane eluthandweni nasemisebenzini emihle; singakuhilizeli ukuhlanganisana kwethu, njengesiko labanye. Masivuselelane kube kokukhona, niyibona nje ukuba imini leyo iyasondela.” Ufundisiso nophando lwangasese lubalulekile, kodwa ukuhlanganisana nabanye kuyavuselela njengokuba: “Isinyithi silola isinyithi, indoda ilola ingqondo yowayo.”—Hebhere 10:24, 25, IBhayibhile YesiXhosa; IMizekeliso 27:17, The New English Bible.

AmaNgqina awasebenzisa kakuhle namathuba avelayo okuthetha ngeendaba ezilungileyo njengoko edibana nabanye abantu kwimicimbi yawo yobomi bemihla ngemihla. Asenokuthetha amazwana nje ambalwa nommelwane wawo okanye omnye umntu akhwele naye ebhasini okanye kwinqwelo-moya, isenokuba yincoko ende nomhlobo okanye isalamane, okanye ingxubusho nalowo asebenza naye ebudeni beyure yokuphumla. Ubungqina bukaYesu obuninzi xa wayesemhlabeni wabunikela ngale ndlela—njengoko wayehamba elunxwemeni lolwandle, ehleli ethambekeni, esidlweni kwikhaya lothile, eye emtshatweni, okanye ehamba ngesikhephe kuLwandle lwaseGalili. Wayefundisa kwizindlu zesikhungu nasetempileni eYerusalem. Naphi na apho akhoyo, wayefumana amathuba okuthetha ngoBukumkani bukaThixo. AmaNgqina kaYehova azabalazela ukulandela emanyathelweni akhe kule nkalo.—1 Petros 2:21.

UKUSHUMAYELA NGOMZEKELO

Akukho nanye kwezi ndlela zokukwazisa ngeendaba ezilungileyo ebiya kuba nentsingiselo kuwe ukuba ubani lowo ukwazisa zona ebengazisebenzisi ezo mfundiso kuye. Ukuthetha into uze wenze enye luhanahaniso olo, ibe uhanahaniso lwabantu bonqulo luye lwenza izigidi zabantu zayichasa iBhayibhile. IBhayibhile ayifanele ibekw’ ityala ngenxa yoko. Ababhali nabaFarasi babenazo iZibhalo zesiHebhere, kodwa uYesu wabagxeka njengabahanahanisi. Wathetha ngokufunda kwabo uMthetho kaMoses, waza wongezelela oku kubafundi bakhe: “Zonke izinto abanixelela zona, zenzeni, nizigcine, kodwa ningenzi ngokwezenzo zabo, kuba bathetha baze bangenzi.” (Mateyu 23:3) Ukuba umKristu ungumzekelo ekuphileni ngokufanelekileyo oko kuthetha lukhulu kuneeyure azishumayelayo. Oku kwavakaliswa kubafazi abangamaKristu ababenamadoda angakholwayo: “Azuzeke ngaphandle kwelizwi ngenxa yehambo yabafazi bawo, kuba eye angamangqina okuzibonela ehambo yenu enyulu ndawonye nentlonelo enzulu.”—1 Petros 3:1, 2.

Ngoko ke, amaNgqina kaYehova azama ukuncomela iindaba ezilungileyo kwabanye kwanangale ndlela: ngokuba ngumzekelo ngehambo yamaKristu ayincomelayo kwabanye. Azama ‘ukwenza izinto kwabanye ngendlela ebeya kuthanda ukuba benze ngayo kuwo.’ (Mateyu 7:12) Azama ukuziphatha ngale ndlela kubantu bonke, kungekhona nje kwamanye amaNgqina, abahlobo, abamelwane, okanye izalamane kuphela. Ekubeni engafezekanga akasoloko ephumelela ngokugqibeleleyo ekwenzeni oku. Kodwa ngumnqweno wawo osuk’ entliziyweni ukwenza okulungileyo kubantu bonke, kungekhona nje ekuvakaliseni kubo iindaba ezilungileyo zoBukumkani kuphela, kodwa nasekufakeni isandla nanini na kunokwenzeka.—Yakobi 2:14-17.

[Umfanekiso okwiphepha 19]

EHawaii

[Umfanekiso okwiphepha 19]

EVenezuela

[Umfanekiso okwiphepha 19]

EYugoslavia

[Imifanekiso ekwiphepha 20]

IiHolo zoBukumkani, ziyilwe ngendlela elula, ziindawo zokuxubusha iBhayibhile

[Imifanekiso ekwiphepha 21]

Kubomi bawo bentsapho, nakwiinkqubano zawo nabanye, ngokunyaniseka amaNgqina azama ukwenza izinto azishumayelayo