UmChasi-Kristu

Ingcaciso: Umchasi-Kristu uthetha onxamnye okanye osendaweni kaKristu. Eli gama libhekisela kubo bonke abakhanyela okuthethwa yiBhayibhile ngoYesu Kristu, bonke abachase uBukumkani bakhe, nabo bonke ababaphatha kakubi abalandeli bakhe. Likwaquka abantu ngabanye, iintlangano neentlanga ezixoka ngokuthi zimela uKristu okanye ezithi ngokungafanelekileyo ziyithabathele kuzo indima kaMesiya.

Ngaba iBhayibhile ithetha ngomchasi-Kristu omnye nje kuphela?

1 Yoh. 2:18: “Bantwana, lilixa lokugqibela eli; njengoko nevayo ukuba umchasi-Kristu uyeza, nangoku kuthe kwabakho abachasi-Kristu abaninzi, ekuthe ngoko sazi ukuba lilixa lokugqibela.”

2 Yoh. 7: “Kungene abalahlekisi abaninzi ehlabathini, abangamvumiyo uYesu Kristu esiza esenyameni. Lowo ngumkhohlisi noMchasi-Kristu.” (Phawula ukuba “abachasi-Kristu abaninzi” beyoku-1 kaYohane 2:18 apha kubhekiselwe kubo ngokuyintlanganisela ‘njengomchasi-Kristu.’)

Ngaba ukuza komchasi-Kristu kulondolozelwe ixesha elithile elizayo?

1 Yoh. 4:3: “Nomoya wonke ongamvumiyo uYesu Kristu eze esenyameni, asingokaThixo; lo ngokamchasi-Kristu, lowo niwuvileyo ukuba uyeza; nangoku uselukho ehlabathini.” (Oko kwakubhalwe ngasekupheleni kwenkulungwane yokuqala C.E.)

1 Yoh. 2:18: “Nangoku kuthe kwabakho abachasi-Kristu abaninzi, ekuthe ngoko sazi ukuba lilixa lokugqibela.” (Ngokuthi “lilixa lokugqibela” kuyacaca ukuba uYohane wayethetha ukuphela kwethuba labapostile. Abanye abapostile babefile, yaye uYohane wayesel’ aluphele.)

Inxenye yabo babefaniswe njengomchasi-Kristu—

Abantu abalikhanyelayo elokuba uYesu ngokwenyaniso unguMesiya

1 Yoh. 2:22: “Ngubani na ixoki, ingenguye okhanyelayo ukuba uYesu unguye uKristu [okanye, uMesiya, umthanjiswa]? Lowo ungumchasi-Kristu.”

Bonke abo balikhanyelayo elokuba uYesu unguNyana kaThixo obalaseleyo

1 Yoh. 2:22: “Lowo ungumchasi-Kristu, omkhanyelayo uYise noNyana.”

Thelekisa uYohane 10:36; uLuka 9:35.

Abawexuki

1 Yoh. 2:18, 19: “Kuthe kwabakho abachasi-Kristu abaninzi . . . baphuma kuthi, babengengabo abethu.”

Abo bachase abalandeli bokwenyaniso bakaKristu

Yoh. 15:20, 21: “Ukuba banditshutshisa mna, bonitshutshisa nani; . . . Ke ezi zinto zonke baya kuzenza kuni ngenxa yegama lam.”

Abantu ngabanye neentlanga ezichase uKristu njengoKumkani okanye ezithi zixoka zikwindima kaMesiya

INdu. 2:2: “Ookumkani behlabathi bazimisile, izidwangube zabhunga ngoYehova nangoMthanjiswa wakhe [uKristu, okanye uMesiya].”

Bona kwaneSityhilelo 17:3, 12-14; 19:11-21.

Mat. 24:24: “Kuya kuvela ooKristu ababuxoki, nabaprofeti ababuxoki, benze imiqondiso emikhulu nezimanga, ngokokude bathi, ukuba bekunokwenzeka, balahlekise nabanyuliweyo.”