IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g01 8/8 iphe. 30-31
  • Ngubani Umchasi-Kristu?

No video available for this selection.

Sorry, there was an error loading the video.

  • Ngubani Umchasi-Kristu?
  • Vukani!—2001
  • Imixholwana
  • Amanqaku Afanayo
  • Impazamo Yokungaqondwa Kakuhle
  • Ngoobani Abanye Abayinxalenye Yomchasi-Kristu?
  • Ulindelwe Yintoni Umchasi-Kristu?
  • Ngubani Umchasi-Kristu?
    IMboniselo Evakalisa UBukumkani BukaYehova—2015
  • UmChasi-Kristu
    Ukuqiqa NgeZibhalo
  • Kutheni Umele Umazi Umchasi-Kristu?
    IMboniselo Evakalisa UBukumkani BukaYehova—2006
  • Umchasi-Kristu Uyabhencwa
    IMboniselo Evakalisa UBukumkani BukaYehova—2006
Khangela Okunye
Vukani!—2001
g01 8/8 iphe. 30-31

Imbono YeBhayibhile

Ngubani Umchasi-Kristu?

‘NIVILE UKUBA UMCHASI-KRISTU UYEZA.’—1 YOHANE 2:18.

UKUBA ubulunyukisiwe ukuba umgulukudu wesikrelemqa uza kwindawo ohlala kuyo, ubuya kwenza ntoni? Kusenokwenzeka ukuba ubuya kufuna iinkcukacha ezichanileyo ngenkangeleko yakhe kunye neendlela azisebenzisayo. Ubuya kuhlala uphaphile.

Sijamelene nemeko efanayo namhlanje. Siye salunyukiswa ngamazwi ompostile uYohane athi: “Onke amazwi aphefumlelweyo angamvumiyo uYesu akaphumi kuThixo. Kunoko, lawo ngamazwi aphefumlelweyo omchasi-Kristu enevayo ukuba uyeza, yaye ngoku sele ekho ehlabathini.” (1 Yohane 4:3) Ngaba ukho loo mchasi-Kristu, utshaba lukaThixo nomkhohlisi wabantu, otyityimbisel’ umnwe impilo-ntle yoluntu lonke?

UYohane usebenzise ibinzana elithi “umchasi-Kristu” izihlandlo ezihlanu kwiileta zakhe ezimbini. Eli binzana libhekisela kwibutho elichasa oko iBhayibhile ikufundisayo ngoYesu Kristu yaye liquka abakhohlisi abazibanga bemela uKristu okanye abathi bathunywe nguye. IBhayibhile inikela inkcazelo enokuthenjwa malunga nomchasi-Kristu. Kodwa njengoko kusenzeka maxa wambi ngezikrelemnqa, iingxelo ezingenasihlahla ngeli butho lingaqondakaliyo ziye zafumana ingqalelo engakumbi kunenyaniso.

Impazamo Yokungaqondwa Kakuhle

Ukususela ngemihla yompostile uYohane, abantu baye bathi amazwi kaYohane malunga nomchasi-Kristu abhekisela kumntu omnye okhethekileyo. Abantu baye banabantu abahlukahlukeneyo abacinga ukuba ngabachasi-Kristu. Kwiinkulungwane ezidluleyo abaninzi babecinga ukuba uMlawuli waseRoma uNero wayengumchasi-Kristu. Kamva, intiyo noloyiko olwabangelwa nguAdolf Hitler ebantwini lwaqinisekisa abaninzi ukuba wayengumchasi-Kristu. Eli binzana liye lasetyenziswa nakwisithandi-sobulumko saseJamani uFriedrich Nietzsche. Ukanti abanye bakholelwa ukuba “umchasi-Kristu” useza yaye uya kubonakala elilungu lezobupolitika elinobuqili, elikhohlakeleyo nelinenjongo yokulawula ihlabathi. Bakholelwa ukuba irhamncwa leSityhilelo isahluko 13 ligama elithile elikhethekileyo elibhekisela kumchasi-Kristu ekuthethwa ngaye nguYohane. Bathi uphawu lwalo elithi 666 ngandlel’ ithile luya kubhekisela kumququzeleli wexesha elizayo wobungendawo.

Abo baxhasa ezi ngcamango bakholelwa kwelokuba uYohane wayesalatha kumchasi-Kristu omnye. Kodwa abonisa ntoni la mazwi? Khawucinge ngeyoku-1 kaYohane 2:18, ethi: “Kanye njengoko nevayo ukuba umchasi-Kristu uyeza, nangoku sebevele babaninzi abachasi-Kristu.” Ewe ‘abachasi-Kristu abaninzi,’ hayi omnye, babebekek’ ityala ngemeko emaxongo yokomoya yenkulungwane yokuqala. Namhlanje baninzi abachasi-Kristu ababumba udidi lwabachasi-Kristu, akakho mnye. Xa bebonke baye babangela imeko ewohlokileyo yokomoya yoluntu namhlanje. (2 Timoti 3:1-5, 13) Ngoobani ababumba umchasi-Kristu?

Ukuba kunokwenzeka, makhe sihlolisise irhamncwa elineentloko ezisixhenxe leSityhilelo isahluko 13. Umpostile uYohane wabhala: “Irhamncwa endalibonayo lalinjengehlosi, kodwa iinyawo zalo zazinjengezebhere, nomlomo walo unjengomlomo wengonyama.” (ISityhilelo 13:2) Amela ntoni la marhamncwa?

Abaphengululi beBhayibhile baphawule ukuba kukho unxulumano phakathi kweSityhilelo isahluko 13 noDaniyeli isahluko 7. UThixo wanika uDaniyeli umbono ongokomfuziselo wamarhamncwa, aquka ihlosi, ibhere kunye nengonyama. (Daniyeli 7:2-6) Umprofeti kaThixo wathi amela ntoni? Wabhala ukuba loo marhamncwa ayemela ookumkani behlabathi okanye oorhulumente. (Daniyeli 7:17) Ngoko ngeliphandle sinokugqiba kwelokuba irhamncwa leSityhilelo limela oorhulumente babantu. Ekubeni aba rhulumente bechase uBukumkani bukaThixo, nabo bayinxalenye yomchasi-Kristu.

Ngoobani Abanye Abayinxalenye Yomchasi-Kristu?

Xa uKristu, uNyana kaThixo wayelapha emhlabeni, wayeneentshaba ezininzi. Nangona ngoku zingenakumfikelela, unabo abachasi banamhla. Phawula ukuba baquka bani.

Umpostile uYohane wathi: “Ngubani na olixoki ukuba asinguye lowo ukhanyelayo ukuba uYesu unguKristu? Umntu onjalo ungumchasi-Kristu, okhanyela uBawo noNyana.” (1 Yohane 2:22) Abawexuki neenkokeli zonqulo lobuxoki bagqwetha iimfundiso ezicacileyo zikaYesu bazenze amasolotya onqulo obuqhinga. Abantu abanjalo bayayigatya inyaniso yeBhayibhile yaye basasaza ubuxoki besebenzisa igama likaThixo noKristu. Ngemfundiso yabo kaBathathu Emnye bayalukhanyela ulwalamano oluphakathi koBawo noNyana. Ngoko ke, nabo bayinxalenye yomchasi-Kristu.

UYesu wabalumkisa kwangaphambili abafundi bakhe kuLuka 21:12 wathi: “Abantu baya kunibeka izandla baze banitshutshise, beninikela kwizindlu zesikhungu nasezintolongweni . . . ngenxa yegama lam.” Ukususela ngenkulungwane yokuqala, amaKristu okwenyaniso ebenyamezele intshutshiso eqatha. (2 Timoti 3:12) Abantu abaphambili kuloo mpatho banxamnye noKristu. Nabo bayinxalenye yomchasi-Kristu.

“Lowo ungekho ngakum unxamnye nam, nalowo ungahlanganisi kunye nam uyachithachitha.” (Luka 11:23) Apha uYesu uvakalisa ukuba abo banxamnye naye namalungiselelo angokobuthixo awaxhasayo bakwiqela lomchasi-Kristu. Siya kuba yintoni isiphelo sabo?

Ulindelwe Yintoni Umchasi-Kristu?

INdumiso 5:6 ithi: “[UThixo] uya kubatshabalalisa abo bathetha ubuxoki. Umntu ophalaza igazi nonenkohliso uYehova uyamcekisa.” Ngaba oku kubhekisela kubachasi-Kristu? Ewe. Umpostile uYohane wabhala: “Kungene abakhohlisi abaninzi ehlabathini, abangavumiyo ukuba uYesu Kristu weza esenyameni. Abantu abanjalo ngabakhohlisi nabachasi-Kristu.” (2 Yohane 7) Ngenxa yobuxoki nenkohliso yabo, uThixo uSomandla uya kubatshabalalisa abachasi-Kristu.

Njengoko ixesha lokuphumeza eso sigwebo lisondela, amaKristu okwenyaniso akafanele avumele amaqhinga nengcinezelo yabachasi-Kristu, ingakumbi eyabawexuki, iwadimaze elukholweni. Isilumkiso sikaYohane singxamisekile: “Lumkani ke, ukuba ningaphulukani nento ebeniyisebenzela, kodwa zabalazelani ukuzuza umvuzo opheleleyo.”—2 Yohane 8.

[Inkcazelo Ngomfanekiso okwiphepha 30]

UNero kwiphepha 2 nelama-30: Courtesy of the Visitors of the Ashmolean Museum, Oxford

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share