Umchasi-Kristu Uyabhencwa
UBUYA kuzikhusela njani ukuba ubusazi ukuba kukho isifo esibulalayo esihlasela kummandla wenu? Ngokuqhelekileyo ubuya kuzikhusela ngokusebenzisa izinto zokusithintela uze ungazidibanisi nabantu abanaso. Simele senze lo nto nangokomoya. IZibhalo zisixelela ukuba umchasi-Kristu “sele ekho ehlabathini.” (1 Yohane 4:3) Ukuba sifuna “ukungosulelwa,” sesi sifo, simele sazi ukuba ngoobani “abanaso” size sibaphephe. Into emnandi kukuba iBhayibhile ayisishiyi ebumnyameni kulo mbandela.
Ibinzana elithi “umchasi-Kristu” lithetha ukuba “nxamnye noKristu.” Eli binzana libhekisela kubo bonke abo bamchasayo okanye abo baxokayo besithi banguKristu okanye bangabameli bakhe. UYesu wathi: “Lowo ungekho ngakum unxamnye nam [okanye ungumchasi-Kristu], nalowo ungahlanganisi kunye nam uyachithachitha.”—Luka 11:23.
Ewe, uYohane wabhala ngomchasi-Kristu emva kweminyaka engama-60 efile waza wavuselwa ezulwini uYesu. Ngenxa yoko imisebenzi yomchasi-Kristu imele iqondwe ngendlela ebachaphazela ngayo abalandeli bakaYesu abanyanisekileyo apha emhlabeni.—Mateyu 25:40, 45.
Umchasi-Kristu Uwachasile AmaKristu
UYesu waxelela abalandeli bakhe ukuba babeza kuthiywa lihlabathi. Wathi: “Abantu baninikele ekubandezelweni, banibulale, nithiywe ziintlanga zonke ngenxa yegama lam. Kuya kuvela abaprofeti bobuxoki abaninzi baze balahlekise abaninzi.”—Mateyu 24:9, 11.
Ekubeni abafundi bakaYesu betshutshiswa ‘ngenxa yegama,’ abatshutshisi babo ngabachasi-Kristu, balwa noKristu. “Abaprofeti bobuxoki,” abanye babo ababengamaKristu nabo bakolu ludwe. (2 Yohane 7) UYohane wathi aba “bachasi-Kristu baninzi, bakreqa kuthi, kuba babengengabo abethu kakade; ukuba babengabethu, ngebabehleli kunye nathi.”—1 Yohane 2:18, 19.
Amazwi kaYesu nakaYohane enza kucace ukuba umchasi-Kristu akangomntu mnye kodwa wenziwa ngabantu abahlukeneyo. Ibe, ekubeni bengabaprofeti bobuxoki, enye yeenjongo zabo kukulahlekisa abantu ngonqulo. Ziziphi ezinye zeendlela abazisebenzisayo?
Ukusasaza Ubuxoki Bonqulo
Umpostile uPawulos walumkisa iqabane lakhe uTimoti ukuba alumkele iimfundiso zabawexuki, abanjengoHimenayo noFileto, ‘abamfundiso yabo isasazeka njengesilonda esibhidlayo.’ UPawulos woleka esithi: “Bona kanye aba bantu baye baphambuka enyanisweni, besithi uvuko selufikile; yaye bayalubhukuqa ukholo lwabathile.” (2 Timoti 2:16-18) Kuyacaca ukuba uHimenayo noFileto babefundisa ukuba uvuko lwalusenzeka ngokomfuziselo kwaye amaKristu ayesele evusiwe ngengqiqo yokomoya. Kuyavunywa, ukuba xa umntu esiba ngumfundi kaYesu wokwenene, utsho aphile emehlweni kaThixo, ibe oko wakutsho phandle uPawulos. (Efese 2:1-5) Kodwa yona imfundiso kaHimenayo noFileto yayisigalela amanzi isithembiso sikaYesu sokuvuswa kwabantu ngokoqobo xa kulawula uBukumkani bukaThixo.—Yohane 5:28, 29.
Kamva ezi mfundiso zokuvuswa kwabantu ngokomfuziselo zaphinda zashunyayelwa liqela ekwakusithiwa ngamaGnostiki. Ekubeni lalikholelwa ukuba ulwazi (gnoʹsis ngesiGrike) lunokufumaneka ngendlela ezintsonkothileyo, eli qela laxuba iimfundiso zamaKristu awexukileyo nentanda-bulumko yamaGrike neentsomi zaseMpuma. Ngokomzekelo, lalikholelwa ukuba yonke into yokwenyama ingendawo, ngenxa yoko, uYesu akazange abe kumzimba wenyama ngaphandle nje kwento yokuba wayebonakala ngathi unomzimba womntu. Njengokuba siye sabona, yile nto kanye wayelumkisa ngayo umpostile uYohane.—1 Yohane 4:2, 3; 2 Yohane 7.
Obunye ubuxoki obavela kwiinkulungwane kamva, yimfundiso kaBathathu Emnye ongcwele, efundisa ukuba uYesu unguThixo uSomandla aphinde abe nguNyana kaThixo. Kwincwadi yakhe ethi The Church of the First Three Centuries, uGqr. Alvan Lamson uthi imfundiso kaBathathu Emnye “yavela kumthombo owahluke kwaphela kwiZibhalo zamaYuda nezamaKristu; yangeniswa kwiimfundiso zamaKristu ngabalandeli bakaPlato. Babengoobani aba “balandeli bakaPlato”? Babe ngabefundisi abawexukileyo ababethanda iimfundiso zesithandi sobulumko samaGrike uPlato.
Ukufakelwa kwemfundiso kaBathathu Emnye kwamsebenzela gqitha umchasi-Kristu kuba le mfundiso yawenza awacaca umahluko phakathi kukaThixo noNyana wakhe. (Yohane 14:28; 15:10; Kolose 1:15) Cinga nje ukuba umntu ‘unokusondela njani kuThixo,’ njengokuba iZibhalo zikhuthaza, ukuba uThixo akanakwaziwa?—Yakobi 4:8.
Ukongeza kulo mbhodamo, abaguquleli beBhayibhile abaninzi baye balisusa igama likaThixo, elinguYehova kwiinguqulelo zabo, nangona livela izihlandlo ezingaphezu kwama-7 000 kwimibhalo yantlandlolo! Kucacile ukuba, ukuzama ukwenza uSomandla angaziwa, anganeli nje ukungaziwa aphinde angabi nagama, kukungabi nantlonelo okugqith’ emgceni ngoMdali wethu nangeLizwi lakhe eliphefumlelweyo. (ISityhilelo 22:18, 19) Ukongezelela, ukusebenzisa izibizo ezifana nesithi Nkosi nesithi Thixo endaweni yegama lakhe kunxamnye nomthandazo uYesu awawufundisa abalandeli bakhe othi: “Malingcwaliswe igama lakho.”—Mateyu 6:9.
Umchasi-Kristu Uyabugatya UBukumkani BukaThixo
Umchasi-Kristu usebenza ngamandla kule “mihla yokugqibela” eli xesha kanye siphila kulo. (2 Timoti 3:1) Eyona njongo yabakhohlisi bale mihla kukulahlekisa abantu ngendima kaYesu yokuba nguKumkani woBukumkani bukaThixo, urhulumente wasezulwini osele eza kulawula wonke umhlaba.—Daniyeli 7:13, 14; ISityhilelo 11:15.
Ngokomzekelo, zimbi inkokeli zonqulo zifundisa ukuba uBukumkani bukaThixo bungaphakathi emntwini, nto leyo engafundiswayo ziZibhalo. (Daniyeli 2:44) Abanye balilisela ngelithi uKristu usebenzisa oorhulumente babantu nemibutho yabantu ukwenza imisebenzi yakhe. Kodwa uYesu wathi: “Ubukumkani bam abuyonxalenye yeli hlabathi.” (Yohane 18:36) Enyanisweni, nguSathana kungekhona uKristu “umlawuli wehlabathi” ‘nothixo wale nkqubo yezinto.’ (Yohane 14:30; 2 Korinte 4:4) Oku kusichaza kakuhle isizathu sokuba uYesu eza kubatshabalalisa ngokukhawuleza bonke oorhulumente babantu kuze kulawule yena yedwa. (INdumiso 2:2, 6-9; ISityhilelo 19:11-21) Nguloo rhulumente othandazelwa ngabantu xa becaphula amazwi akumthandazo weNkosi athi: “Mabufike ubukumkani bakho. Makwenzeke ukuthanda kwakho nasemhlabeni.”—Mateyu 6:10.
Ekubeni zixhasa iinkqubo zezopolitiko zehlabathi, inkoliso yeenkokeli zonqulo iye yachasa, yade yatshutshisa nabo bashumayela inyaniso yoBukumkani bukaThixo. Nantsi into ebangel’ umdla, incwadi yeSityhilelo ithetha ngehenyukazi—“iBhabhiloni Enkulu”—‘elinxile ligazi labangcwele naligazi lamangqina kaYesu.’ (ISityhilelo 17:4-6) Lihenyuza ngokomoya ngokuxhasa “ookumkani,” bomhlaba okanye abalawuli bezopolitiko, ukuze lifumane amaqithiqithi. Eli bhinqa lokomfuziselo kuthethwa ngalo apha lunqulo lobuxoki lehlabathi. Luyinxalenye ephambili yomchasi-Kristu.—ISityhilelo 18:2, 3; Yakobi 4:4.
Umchasi-Kristu ‘Ubanyumbaza Iindlebe’ Abantu
Ngaphandle kokuchasa iinyaniso zeBhayibhile, abanye abathi bangamaKristu baye bayigatya imilinganiselo yeBhayibhile yokuziphatha bakhetha imilinganiselo ethandwayo kule mihla. ILizwi likaThixo lakuchaza kwangaphambili oku, lisithi: “Kuya kubakho ixesha laxa [abantu abathi banqula uThixo] bengayi kuyinyamezela imfundiso ephilileyo, kodwa basuke ngokweminqweno yabo baziqwebele abafundisi bokubanyumbaza iindlebe.” (2 Timoti 4:3) La maqothaqikili akwachazwa ‘njengabapostile bobuxoki, abasebenzi benkohliso, abazimilisa okwabapostile bakaKristu.’ IBhayibhile ihlabela mgama ithi: “Isiphelo sabo siya kuba ngokwemisebenzi yabo.”—2 Korinte 11:13-15.
Imisebenzi yabo iquka ‘ihambo evakalala,’ ukungayithobeli ngenkani imigaqo yokuziphatha. (2 Petros 2:1-3, 12-14) Ngaba asiliboni iqela leenkokeli zonqulo nabalandeli bazo abakhuthaza izinto ezinxamnye nobuKristu, njengobufanasini nokwabelana ngesondo nomntu ongatshatanga naye? Khawuziphe ixesha uthelekise ezi mbono neendlela zokuphila ezithandwa ngabantu noko kutshiwo yiBhayibhile kwiLevitikus 18:22; Roma 1:26, 27; 1 Korinte 6:9, 10; Hebhere 13:4; nekaYude 7.
“Wavavanyeni Amazwi Aphefumlelweyo”
Ngenxa yezi zibakala zikhankanywe ngasentla, sifanele sithobele amazwi kampostile uYohane okuba singazithabathi lula iinkolelo zethu. Ulumkisa athi: “Musani ukuwakholelwa onke amazwi aphefumlelweyo, kodwa wavavanyeni amazwi aphefumlelweyo ukuze nibone enoba aphuma kuThixo kusini na, kuba kuye kwavela abaprofeti bobuxoki abaninzi ehlabathini.”—1 Yohane 4:1.
Cinga ngomzekelo wabantu abathile ‘ababechubekile’ ababehlala eBhereya ngenkulungwane yokuqala. “Balamkela ilizwi ngeyona ntumekelelo inkulu yengqondo, bezincina ngenyameko iZibhalo mihla le mayela nokuba zinjalo kusini na ezo zinto [zazithethwa nguPawulos noSilas].” (IZenzo 17:10, 11) Ewe, nangona ayenentumekelelo yokufunda, amaBhereya aqinisekisa ukuba oko aye akuva aza akwamkela kwakusuka eZibhalweni.
Nanamhlanje, amaKristu okwenyaniso akathi swii ziimbono ezivakala kamnandi zabantu kodwa abambelela kwinyaniso yeBhayibhile ngokuqinileyo. Umpostile uPawulos wathi: “Ndiqhubeka ndithandazela ukuba uthando lwenu luphuphume ngakumbi nangakumbi lulwazi oluchanileyo nokuqonda okupheleleyo.”—Filipi 1:9.
Ukuba awukakwenzi oko, zibekele usukelo lokuzuza “ulwazi oluchanileyo nokuqonda okupheleleyo” ngokufunda oko kufundiswa yiBhayibhile. Abo baxelisa amaBhereya abalahlekiswa “ngamazwi alalanisayo” abachasi-Kristu. (2 Petros 2:3) Kunoko, bakhululwa yinyaniso yokomoya kaKristu wokwenene neyabalandeli bakhe.—Yohane 8:32, 36.
[Ibhokisi/Umfanekiso okwiphepha 4]
OKO KUTHETHWA YIBHAYIBHILE NGOMCHASI-KRISTU
“Bantwana abaselula, sekulilixa lokugqibela [ngokucacileyo ixesha lokuphela kwabapostile], yaye, kanye njengoko nevayo ukuba umchasi-Kristu uyeza, nangoku sebevele babaninzi abachasi-Kristu.”—1 Yohane 2:18.
“Ngubani na olixoki ukuba asinguye lowo ukhanyelayo ukuba uYesu unguKristu? Umntu onjalo ungumchasi-Kristu, okhanyela uBawo noNyana.”—1 Yohane 2:22.
“Onke amazwi aphefumlelweyo angamvumiyo uYesu akaphumi kuThixo. Kunoko, lawo ngamazwi aphefumlelweyo omchasi-Kristu enevayo ukuba ayeza, yaye ngoku sele ekho ehlabathini.”—1 Yohane 4:3.
“Kungene abakhohlisi abaninzi ehlabathini, abangavumiyo ukuba uYesu Kristu weza esenyameni. Abantu abanjalo ngabakhohlisi nabachasi-Kristu.”—2 Yohane 7.
[Ibhokisi/Imifanekiso ekwiphepha 5]
UMKHOHLISI OZIVEZA NGENDLELA NGEENDLELA
Igama elithi “umchasi-Kristu” libhekisela kubo bonke abakhanyela oko kuchazwa yiBhayibhile ngoYesu Kristu, bonke abo bachasa uBukumkani bakhe baze babaphethe kakubi abalandeli bakhe. Liquka abantu, imibutho neentlanga ezithi zimela uKristu okanye ezo zithi ziza kuphumeza indima kaMesiya ngokuzigwagwisa zisithi ziza kufeza oko kunokufezwa nguKristu kuphela—ukuzisa uxolo lokwenyaniso nonqabiseko.
[Inkcazelo]
Augustine: ©SuperStock/age fotostock
[Umfanekiso okwiphepha 7]
NjengamaBhereya, simele ‘sizincine iZibhalo yonk’ imihla’