Ukusetyenziswa Kakubi Kweziyobisi—Sikho Isicombululo!
“KUFUNYENWE I-cocaine Eninzi Kwiibhotile Zewayini.” Inqaku lephephandaba elinaloo mxholo lachaza indlela amapolisa aseJohannesburg, eMzantsi Afrika, awawubamba ngayo umthwalo oneebhotile ezingama-11 600 zewayini yaseMzantsi Merika. Kuloo wayini kwakuxutywe iikhilogram ezili-150 nezili-180 zecocaine. Ukuza kuthi ga ngoku kuthiwa yeyona cocaine ininzi kwezakha zangena kweli lizwe.
Ngoxa kubonisa ukuba izinto ziya ngasekulungeni, inyaniso isekubeni amapolisa abamba i-10 ukuya kwi-15 ekhulwini leziyobisi ezingekho mthethweni ehlabathini lonke. Ngelishwa, oku kuyafana nomlimi oqhawula amagqabi ambalwa okhula olungafunekiyo kodwa eshiya iingcambu zalo.
Ingeniso engaphaya kwengqondo eyenziwa ngeziyobisi iphazamisana namalinge karhulumente okulwa nokuveliswa nokuthengiswa kwazo. EUnited States kuphela, kuqikelelwa ukuba nyaka ngamnye kushishinwa ngeziyobisi ezixabisa amawaka ezigidi zeerandi. Xa sijonga imali engako ebandakanyekileyo, akumangalisi ukuba amapolisa namagosa aseburhulumenteni nabo bakwizikhundla eziphezulu bebhenela kubuqhetseba.
UAlex Bellos wephephandaba eliphuma veki zonke iThe Guardian wanikela ingxelo esuka eBrazil yokuba ngokolunye uphando olwenziwa epalamente, “amalungu amathathu endlu yowiso-mthetho, amabamba ali-12 noosibonda bedolophu abathathu badweliswa . . . kuludwe lwabantu abangaphezu kwama-800 abatyholwa ngokubandakanyeka kulwaphulo-mthetho olulungelelanisiweyo nokuthengiswa kweziyobisi eBrazil.” Olu ludwe lwaluquka “amapolisa, amagqwetha, oosomashishini nabalimi kumazwe ali-17 kwangama-27 alapho.” Ngokuphathelele oko kwafunyaniswayo, unjingalwazi wezobupolitika kwiBrasília University wathi: “Ezi zityholo ziquka inxalenye enkulu yebutho labantu baseBrazil.” Kunjalo ke nakwiindawo ezininzi apho iziyobisi zigqubayo. Umthetho wonaniselwano nguwo obasela le ngxaki.
Xa bejonga ukuwa nganeno komthetho, abanye bathi ezinye iziyobisi mazivunyelwe ngokusemthethweni. Iqhelekile into yokuba abantu bathi umntu ufanele avunyelwe abe nentwana aza kuyisebenzisa. Kucingwa ukuba urhulumente noko uya kukwazi ukutsala iintambo yaye loo nto iya kunciphisa ingeniso engaphaya kwengqondo eyenziwa ngabo bongamela ukuthengiswa kweziyobisi.
Abanye Bayaphumelela
Ukufunxwa kweziyobisi emzimbeni kunokuqala kuyekise amakhoboka eziyobisi kuze kuphucule impilo yawo. Ngelishwa, kusenokwenzeka ukuba xa ikhoboka elo libuyele kwimeko-bume eqhelekileyo, lisenokuhendelwa ekubeni liphinde libuyele kwiziyobisi. Umbhali uLuigi Zoja uchaza isizathu soku: “Akunakwenzeka nje ukuba uphelise indlela ethile yokwenza izinto ngaphandle kokuba utshintshele umguli kwindlela eyahluke ngokupheleleyo kuleyo ebeyihamba.”
UDarren, okhankanywe kwinqaku elingaphambili, wafumana “indlela eyahlukileyo” eyatshintsha ubomi bakhe. Uthi: “Ndandingakholelwa tu kubukho bukaThixo, kodwa ekuhambeni kwexesha, nangona ndandilala ndivuke ngeziyobisi, ndafikelela kwisigqibo sokuba umele ukuba ukho uThixo. Kwisithuba seenyanga ezimbini ukuya kwezintathu, ndazama ukwahlukana neziyobisi, kodwa abatsho ukuvuma abahlobo bam. Nangona ndandisasebenzisa iziyobisi, ndaqalisa ukufunda iBhayibhile rhoqo ngaphambi kokuba ndilale. Ndalinciphisa ixesha endandilichitha nabahlobo bam. Ngobunye ubusuku sikunye nomnye endandihlala naye sasiqhunywe kakhulu. Ndathetha kuye ngeBhayibhile. Ngentsasa elandelayo watsalela umnxeba umntakwabo, owayengomnye wamaNgqina kaYehova. Wasithumela kwelinye iNgqina elalihlala kule dolophu sasihlala kuyo, ndahamba ke ndaya kulityelela.
“Sancokola kwabetha intsimbi ye-11:00 ngokuhlwa, ndemka ke ndithe mba into eninzi yeempapasho zokufundisisa iBhayibhile. Ndaqalisa ukufundisisa iBhayibhile nalo ndaza ndayeka ukusebenzisa kakubi iziyobisi nokutshaya. Malunga neenyanga ezisithoba kamva, ndabhaptizwa njengomnye wamaNgqina kaYehova.”
Akulula ukwahlukana neziyobisi. UMichael, okhankanywe kwinqaku elingaphambili, uchaza ubunzima awajamelana nabo xa wayeka ukusebenzisa iziyobisi emva kweminyaka eli-11 ezisebenzisa kakubi: “Kwakunzima ukutya, ngoko ndehla emzimbeni. Ndandixholwa yinkantsi, ndibile ndize ndibone iintlantsi. Ndandikufuna ngamandla ukubuyela kwiziyobisi, kodwa ukusondela kuYehova ngomthandazo nokufundisisa iBhayibhile kwandinceda andabuyela kuzo.” Aba babesakusebenzisa iziyobisi bayavuma ukuba kwafuneka baqhawule amakhonkco obuhlobo nabo babenxulumana nabo.
Isizathu Sokuba Imigudu Yabantu Isilele
Ukusetyenziswa kakubi kweziyobisi ezingekho mthethweni kuyenye nje ingxaki kwezininzi ehlabathini. Impembelelo eninzi yobubi, ugonyamelo nenkohlakalo izalise ihlabathi lonke. IBhayibhile ithi: “Ihlabathi liphela lisemandleni ongendawo.” (1 Yohane 5:19) Lo ‘ungendawo’ uchaziwe ngumpostile uYohane kwiSityhilelo 12:9: “Yaphoswa phantsi inamba enkulu, inyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela; waphoswa phantsi emhlabeni, neengelosi zakhe zaphoswa phantsi kunye naye.”
Ukongezelela kubuthathaka babo, abantu kufuneka balwe notshaba lwabo olunamandla. NguSathana owafaka umntu enkathazweni kwasekuqaleni. Usazimisele ukuzisela uluntu ishwangusha aze alwahlukanise noThixo. Ukwenza uluntu lusebenzise kakubi iziyobisi kubonakala kuyenye yeendlela azisebenzisayo. Yonke le nto uyenza enomsindo kuba uyazi ukuba “ixesha analo lifutshane.”—ISityhilelo 12:12.
Siyintoni Isicombululo SikaThixo?
IBhayibhile ichaza ilungiselelo lothando loMdali ukuze ahlangule uluntu kwimeko yalo yesono. Kweyoku-1 kwabaseKorinte 15:22, sixelelwa oku: “Kuba kanye njengoko kuAdam bonke besifa, ngokunjalo nakuKristu bonke baya kwenziwa baphile.” Ngokuzithandela uYesu weza emhlabeni njengomntu ofezekileyo waza wancama ubomi bakhe basemhlabeni ukuze ahlangule uluntu kwimiphumo yesono nokufa.
Ukwazi unobangela wokufa kwakunye nesicombululo kwiingxaki zoluntu kuye kwakhuthaza abaninzi ukuba bahlukane nokukhotyokiswa ziziyobisi. Kodwa iBhayibhile ayipheleli nje ekusincedeni ukuba sihlangabezane nengxaki yeziyobisi ngoku. Isichazela ngexesha lasemva kokupheliswa kwempembelelo kaSathana, xa iingxaki zehlabathi, kuquka ukusetyenziswa kakubi kweziyobisi, kuya kuphela ngokusisigxina.
Incwadi yeSityhilelo ithetha ‘ngomlambo wamanzi obomi, ongcwengeke njengekristale, uqukuqela uphuma kwitrone kaThixo neyeMvana.’ (ISityhilelo 22:1) Lo mlambo wokomfuziselo ubhekisela kwilungiselelo likaThixo ngoYesu Kristu lokubuyisela uluntu kubomi obufezekileyo kumhlaba oyiparadesi. ISityhilelo sithetha ngemithi yobomi ekhula ngasemlanjeni yaye sithi: “Amagqabi emithi ayengawokuphilisa iintlanga.” (ISityhilelo 22:2) Loo magqabi okomfuziselo abhekisela kumalungiselelo kaYehova okunyanga ukuze abuyisele uluntu kwimfezeko yokomoya neyasemzimbeni.
Ekugqibeleni, uluntu luya kukhululeka, kungekuphela nje ekusebenziseni kakubi iziyobisi kodwa nakwezinye iinkathazo neengxaki eziluthwaxayo kule nkqubo ingendawo!
[Ibhokisi/Umfanekiso okwiphepha 9]
Ukhuseleke Kangakanani Umya?
Amazwe aliqela acinga ngokuwuvumela ngokusemthethweni umya, ubukhulu becala ngenxa yeenjongo zonyango. Kuye kwafunyaniswa ukuba esi siyobisi siphelisa isichefu-chefu esibangelwa yichemotherapy, yaye kuyacaca ukuba siyabanceda abo banoGawulayo ukuba balwe nokungabi namdla wokutya. Kwakhona siye sasetyenziselwa ukunika isiqabu kwiintlungu.
Ngoxa kukho ukungavumelani ngemiphumo yohlolisiso, ulingelo olwavela kwiphephancwadi iNew Scientist luye lwabonisa eminye imiphumo eyingozi yomya.
Uhlolisiso olwenziwa eHarvard University lwathelekisa iqela elitshaya umya mihla le neqela elingafane liwusebenzise. Akuzange kufunyaniswe mahluko xa kwakukhangelwa ingqondo. Noko ke, kolunye uhlolisiso olwalukhangela enoba abanye banokukwazi ukuyeka kusini na, abo baziingedle zomya boyisakala.
Enye iyunivesithi yahlola iqela labo bawusebenzisa rhoqo umya neqela labo batshaya umdiza, kangangesithuba seminyaka eli-15. Abo batshaya umya babebopha kathathu okanye kane ngosuku, ngoxa abo basebenzisa umdiza babetshaya engama-20 okanye engaphezulu ngosuku. Ngokulinganayo la maqela ayenengxaki yokukhohlela nesifo semiphunga. Ekuhlolisisweni kwemiphunga yawo omabini la maqela kwafunyaniswa ukuba iiseli zawo zonakele.
Nangona abo batshaya umya bengafane batshaye, kwafunyaniswa ukuba umntu obophe kwakanye ufumana itela ephindwe kathathu kunotshaya umdiza. Ukongezelela, iNew Scientist inikela le ngxelo: “Abo batshaya umya bafunxa kakhulu yaye bawugcina ixesha elide umoya.”
Ukongezelela, iiseli ezikhusela imiphunga yabo batshaya umya zafunyaniswa zisoyisakala kangangama-35 ekhulwini ukulwa neentsholongwane kunokuba zazinjalo iiseli zabo batshaya umdiza.
[Inkcazelo]
U.S. Navy photo
[Ibhokisi ekwiphepha 11]
“Ukuhlungiswa” Kwabazali
Inqaku lomhleli kwiphephandaba laseMzantsi Afrika iSaturday Star lavakalisa inkxalabo ngokwanda kokusetyenziswa kweziyobisi lulutsha lwaseMzantsi Afrika laza lenza la magqabaza:
“Xa abantwana bethu besenza le nto [besebenzisa iziyobisi] kudla ngokuba buhlungu kuthi bazali nakwibutho labantu ngokubanzi. Veki nganye sibila sisoma sisebenzela imali, sifuna izinto eziphathekayo. Abantwana bethu basebenzisa iingqondo zethu namandla ethu. Ngaba sichitha elona xesha lininzi nabo? Kulula ukubanika imali ukuze bangaphindi basikhathaze. Loo nto ilula gqitha kunokuba sibaphulaphule—sive izinto eziboyikisayo, amathemba abo neengxaki zabo. Ngokuhlwanje, njengoko siya kube sihleli kwivenkile yokudlela okanye sithe khakhalala ngaphambi komabonwakude, ngaba siyazi ukuba baya kuba besenza ntoni?”
Okanye, ukongezelela, ngaba siyazi ukuba bacinga ntoni?
[Umfanekiso okwiphepha 10]
Abaninzi baye bakhuthazelwa ukuba bahlukane nokusebenzisa kakubi iziyobisi