IliShwa

Ingcaciso: Umphumo ongenakuthintelwa nodla ngokuba qatha. Ilishwa liyinkolelo yokuba zonke iziganeko zimiselwa ngokuthanda kukaThixo okanye ngamandla athile angaphezu kwawomntu, nokuba sonke isiganeko simele senzeke ngendlela esenzeka ngayo kuba simiselwe kwangaphambili. Eli asilogama okanye asiyomfundiso yeBhayibhile.

Ngaba wonke umntu ‘unexesha lokufa’ elimiselwe kwangaphambili?

Le nkolelo yayidumile phakathi kwamaGrike namaRoma. Ngokweentsomi zamaGrike angabahedeni, Amashwa ayengoothixokazi abathathu ababephotha umsonto wobomi, bamisele ubude bawo, baze bawuqhawule.

INtshumayeli 3:1, 2 ithetha ‘ngexesha lokufa.’ Kodwa, ibonisa ukuba eli asiloxesha elimiselwe kwangaphambili lomntu ngamnye, INtshumayeli 7:17 iluleka isithi: “Musa ukuba ngongendawo ngokukhulu, ungazenzi isidenge; yini na ukuba ufe lingekabi lixesha lakho?” IMizekeliso 10:27 ithi: “Iminyaka yabangendawo iyanqanyulwa.” Ize INdumiso 55:23 yaleke isenjenje: “Abantu bamagazi nenkohliso abayi kuyiqingathisa imihla yabo.” Ngoko, ithetha ukuthini INtshumayeli 3:1, 2? Ixubusha nje ngomjikelo oqhubekayo wobomi nokufa kule nkqubo yezinto ingafezekanga. Kukho ixesha lokuzalwa kwabantu nexesha lokufa kwabo—ngokuqhelekileyo beneminyaka engekho ngaphezulu kwama-70 okanye ama-80 ubudala, kodwa maxa wambi ngaphambi koko nangasemva koko.—INdu. 90:10; bona kwaneNtshumayeli 9:11.

Ukuba ixesha nendlela yokufa kukabani ngamnye ibisel’ imiselwe ngexesha azalwa ngalo okanye ngaphambilana, ibingayi kubakho imfuneko yokuphepha iimeko eziyingozi okanye yokunyamekela impilo kabani, yaye amanyathelo okhuseleko ebengayi kuwaguqula amanani afayo. Kodwa uyalikholelwa na elokuba ithafa ledabi ngexesha lemfazwe likhuseleke njengekhaya likabani elikude lee kummandla onemfazwe? Uyayinyamekela na impilo yakho okanye uyabasa na abantwana bakho kwagqirha? Kutheni le nto ngokwesilinganiselo iintshayi zisifa kwangaphambili ngeminyaka emithathu ukusa kwemine kunabantu abangatshayiyo? Kutheni zimbalwa iingozi ezibulalayo xa abahambi ngeenqwelo-mafutha bezifaka iibhanti zokhuseleko naxa abaqhubi bethobela imithetho yendlela? Ngokucacileyo, ukulumkela ingozi kuyingenelo.

Ngaba yonke into eyenzekayo “kukuthanda kukaThixo”?

2 Pet. 3:9: “INkosi [uYehova] . . . isuka izeke kade umsindo kuthi, ingangi kungatshabalala nabani; inga bonke bangasinga enguqukweni.” (Kodwa asingabo bonke abasabela kumonde wakhe. Ngokucacileyo, ‘asikokuthanda kukaThixo’ xa bambi besilela ukuguquka. Thelekisa ISityhilelo 9:20, 21.)

Yer. 7:23-26: “Ndabamisela eli lizwi [uSirayeli] lokuthi, Phulaphulani ilizwi lam: ndoba nguThixo wenu, nibe ngabantu bam, nihambe ngendlela yonke endinimiselayo, ukuze kulunge kuni. Ke abaphulaphulanga, . . . ndibathumela kuni bonke abakhonzi bam, abaprofeti, ndibathuma imihla ngemihla kwakusasa; ke abaphulaphula kum, abayithoba indlebe yabo; bayenza lukhuni intamo yabo.” (Ngokucacileyo, ububi obabusenzeka kwaSirayeli yayingekuko “ukuthanda kukaThixo.”)

Marko 3:35: “Kuba othe wakwenza ukuthanda kukaThixo, lowo ngumzalwana wam, nodade wethu, noma.” (Ukuba nantoni na eyenziwa nangubani na ‘ibikukuthanda kukaThixo,’ ngoko wonke umntu ebeya kunandipha uhlobo lolwalamano noYesu aye waluchaza apho. Kodwa wathi kwabathile: “Nina ningaboyihlo uMtyholi.”—Yoh. 8:44.)

Siyintoni isizathu sokwenzeka kwezinto ezininzi ezibonakala zingacaciseki?

INtshu. 9:11: “Bonke bephela bafikelwa lixesha nasisihlo [“naziimeko ezingamabona-ndenzile,” NE, RS].” (Ngaloo ndlela, akungakubona kusengaphambili ebomini bomntu, kodwa usenokuba lixhoba leemeko ezililishwa ngenxa yamabona-ndenzile.)

Ngaba abantu banembopheleleko ngoninzi lobunzima obucinezela bona nabanye boluntu?

Roma 5:12: “Isono sangena ngamntu mnye [uAdam] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Ukungafezeki, kuquka nokutyekela ekwenzeni ububi, kuzuzw’ ilifa sithi sonke kuAdam.)

INtshu. 8:9: “Umntu agunyazele umntu, kube kubi kuye.”

IMize. 13:1: “Unyana osisilumko uva uqeqesho lukayise.” (Okwenziwa ngabazali kunempembelelo enkulu ebomini benzala yabo.)

Gal. 6:7: “Musani ukulahlekiswa; uThixo yena asingowokuhlekisa. Kuba into athe wahlwayela yona umntu, wovuna kwayona.” (KwaneMizekeliso 11:17; 23:29, 30; 29:15; 1 Korinte 6:18)

Ngaba kukho imikhosi engaphezu komntu ekwangunobangela woyeha kuluntu?

ISityhi. 12:12: “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.” (KwaneZenzo 10:38)

Ngaba uThixo wazi kusengaphambili aze amisele kusengaphambili yonke into?

Isa. 46:9, 10: “NdinguThixo, akukho wumbi; ndinguThixo, akukho namnye unjengam; ukuxelayo kwasekuqaleni okungasemva, nakwabamandulo okungekenzeki, ndisithi, Icebo lam liya kuma, ndikwenze konke ukuthanda kwam.” (Wazisa injongo yakhe, umisela kusengaphambili imicimbi ethile ngokunxibelelene nokuphunyezwa kwayo yaye unamandla amakhulu ukuqinisekisa ukuba ezi zinto ziya kuzaliseka.)

Isa. 11:1-3: “Kophuma igatya esiphunzini sikaYese, kuqhame ihlumelo ezingcanjini zakhe [uYesu wazalwa kumnombo kaYese]; ahle ahlale phezu kwalo uMoya kaYehova . . . Ivumba elithozamisayo kuye likukoyika uYehova.” (UYehova ngentembelo wayengakuxela ngenx’ engaphambili oku ngoNyana wakhe kuba Wayesondele isimo sengqondo nehambo yakhe emazulwini ukususela ekuqalekeni kwendalo.) (Ngokuphathelele ubukho bukaYesu bangaphambi kokuba ngumntu, bona iphepha 403, phantsi komxholo othi “UYesu Kristu.”)

Dut. 31:20, 21: “Ndiya kubangenisa [uhlanga lwakwaSirayeli] kuwo umhlaba endafunga kooyise ngawo, obaleka amasi nobusi, badle bahluthe, batyebe; bajike baye thixweni bambi, babakhonze, bandigibe, bawaphule umnqophiso wam. Kothi, xa bathe bafunyanwa bububi obuninzi naziimbandezelo, isuke le ngoma [ibalisa indlela abasabela ngayo ngenxa yokusilela ukuxabisa ubabalo lukaThixo] iphendule phambi kwabo, ibe lingqina: . . . kuba ndiyakwazi ukucamanga kwabo abakwenzayo namhla, ndingekabangenisi nje kwelo zwe ndifunge ngalo.” (Phawula ukuba ubuchule bukaThixo bokuqonda umphumo wekhondo labo babungathethi ukuba wayebekek’ ityala ngalo okanye wayefuna behlelwe yiloo nto, kodwa ngokwesizinzi soko babekwenza wayengawubona kusengaphambili umphumo. Ngokufanayo, ngokwesizinzi soko kupopolwayo, iziko eliqikelela imozulu lisenokuqikelela imozulu ngomlinganiselo omkhulu wokuchana, kodwa ayibangelwa lilo okanye libe liyayithanda ngokuyimfuneko.)

Ngaba ubuchule bukaThixo bokwazi kusengaphambili nobokumisela iziganeko kusengaphambili kungqina ukuba wenjenjalo kuzo zonke izenzo zazo zonke izidalwa zakhe?

ISityhi. 22:17: “Lowo uvayo makathi, Yiza. Lowo unxaniweyo makeze; lowo uthandayo, makawathabathe amanzi obomi ngesisa.” (Ukhetho alumiselwa kusengaphambili; lushiyelwa kumntu ngamnye.)

Roma 2:4, 5: “Uyabudela na ubutyebi bobubele bakhe, nonyamezelo, nokuzeka kade umsindo; ungazi ukuba ububele bukaThixo bukusa enguqukweni? Ke uthi, ngokuba lukhuni kwakho, nentliziyo yakho engenanguquko, uziqwebele ingqumbo, ngemini yengqumbo nokutyhilwa komgwebo onobulungisa kaThixo.” (Umntu akanyanzelwa ukuba asukele ikhondo elalathiweyo. Kodwa ubani unokuziphendulela ngento ayenzayo.)

Zef. 2:3: “Funani uYehova, nonke balulamileyo belizwe, . . . funani ubulungisa, funani ululamo, mhlawumbi nositheliswa ngemini yomsindo kaYehova.” (Ngaba uThixo osesikweni noluthando ebeya kubakhuthaza abantu benze okulungileyo, ngethemba lomvuzo, ukuba ebesazi ukuba babemiselwe kusengaphambili ukuba abayi kuphumelela?)

Umzekeliso: Umnini-nomathotholo unokuphulaphula iindaba zehlabathi. Kodwa isibakala sokuba enako ukuphulaphula ijelo elithile asithethi ukuba wenjenjalo. Kuqala umele ajije unomathotholo andule ke ukukhetha elo jelo. Ngokukwanjalo, uYehova unobuchule bokuzazi kusengaphambili iziganeko, kodwa iBhayibhile ibonisa ukuba uwasebenzisa ngokukhetha nangobuchule loo mandla, ngokufanelekileyo ecingela ukuzikhethela akuvumelayo ukuba kwenziwe yindalo yakhe engabantu.—Thelekisa iGenesis 22:12; 18:20, 21.

Xa uThixo wadala uAdam, wayesazi na ukuba uAdam wayeya kona?

Nantsi into uThixo awayibeka phambi koAdam noEva: “Qhamani, nande, niwuzalise umhlaba niweyise; nibe nobukhosi ezintlanzini zolwandle, nasezintakeni zezulu, nasezintweni zonke eziphilileyo ezinambuzelayo emhlabeni.” “UYehova uThixo wamwisela umthetho umntu, esithi, Yonke imithi yomyezo ungayidla uyidle; ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Gen. 1:28; 2:16, 17) Ngaba ubuya kukhuthaza abantwana bakho baqalise iphulo elinekamva elimangalisayo, usazi kwazisuka ukuba ligwetyelwe ukusilela? Ngaba ubuya kubalumkisa ngentlekele, ngoxa unolwazi lokuba ucebe yonk’ into kangangendlela yokuba ngokuqinisekileyo baya kuba sentlungwini? Ngoko, kusengqiqweni na ukuthi uThixo wenza izinto ezinjalo?

Mat. 7:11: “Ukuba ngoko nina, nikhohlakele nje [okanye, “ningendawo njengoko ninjalo,” NE], niyakwazi ukubapha abantwana benu izipho ezilungileyo, wobeka phi na yena uYihlo osemazulwini ukugqithisela ngokubapha okulungileyo abo bamcelayo?”

Ukuba uThixo wayesimisele yaye esazi kusengaphambili isono sika-Adam noko kwakuya kuba ngumphumo waso, bekuya kutheth’ ukuba ngokudala uAdam, uThixo wabuqalisa ngabom bonke ubungendawo obenziwe embalini yoluntu. Ubeya kuba nguMthombo wazo zonke iimfazwe, ulwaphulo-mthetho, ukuziphatha okubi, ingcinezelo, ukuxoka, uhanahaniso nezifo. Kodwa iBhayibhile ithi ngokucacileyo: “Wena akunguThixo onanze okungendawo.” (INdu. 5:4) “Yena ongendawo nothanda ukugonyamela, umthiyile umphefumlo wakhe.” (INdu. 11:5) “UThixo [akanakuxoka].” (Tito 1:2) “Akhulule [Lowo utyunjwe nguThixo njengoKumkani onguMesiya] imiphefumlo yawo ekuxinezelweni nasekugonyamelweni; linqabile emehlweni akhe igazi lawo.” (INdu. 72:14) “UThixo uluthando.” (1 Yoh. 4:8) “Ngumthandi wobulungisa nokusesikweni.”—INdu. 33:5.

Ngaba uThixo wabamisela kusengaphambili uYakobi noEsawu?

Gen. 25:23: “Wathi uYehova kuye [uRebheka], Zimbini iintlanga esizalweni sakho; kuya kwahluka zizwe zibini esiswini sakho, esinye somelele ngaphezu kwesinye; omkhulu [uEsawu] uya kukhonza omnci [uYakobi].” (UYehova wayekwazi ukubona imizila yemfuza yamawele angekazalwa. Usenokuba waqwalasela oko xa wayebona kusengaphambili iimpawu ezaziya kuveliswa yinkwenkwe nganye yaye wawuxela ngenx’ engaphambili umphumo. [INdu. 139:16] Kodwa apha akukho mbonakaliso yokuba wasimisela isiphelo sabo sikanaphakade okanye akukho mbonakaliso yokuba uyimisele kusengaphambili indlela ebesiya kuthi isiganeko ngasinye siphumele ngayo ebomini babo.)

Ngaba uYuda Sikariyoti wamiselwa kwangaphambili ukungcatsha uYesu?

INdu. 41:9: “Kwanendoda ebixolelene nam, ebe ndikholose ngayo, ebisidla isonka sam, indiphakamisele isithende sayo.” (Phawula ukuba isiprofeto asizange sibalule ukuba yayiya kuba sisiphi na isinxulumani esisenyongweni sikaYesu. UYehova wayesazi ukuba uMtyholi wayesebenzise umcebisi kaDavide uAhitofele ukumngcatsha, yaye Yena oko wakubangela ukuba kubhalwe kuba kwabonisa indlela asebenza ngayo uMtyholi nento awayeya kuyenza kwixesha elizayo. YayingengoThixo koko ‘yayinguMtyholi owayefake entliziyweni kaYuda Sikariyoti, okaSimon, ukuba amgcatshe uYesu.’ [Yoh. 13:2] Kunokuxhathisa, uYuda wayekelela kuloo mpembelelo ibusathana.)

Yoh. 6:64: “Ebesazi kwasekuqalekeni uYesu, . . . [ukuba] ngubani na oya kumnikela.” (Kungekhona ekuqalekeni kwendalo, okanye nangexesha azalwa ngalo uYuda, kodwa “kwasekuqalekeni” kokwenza kwakhe ngenkohliso. Thelekisa iGenesis 1:1, uLuka 1:2, neyoku-1 kaYohane 2:7, 13, ekusetyenziswe kwisibhalo ngasinye igama elithi “ekuqalekeni” ngengqiqo elinganiselweyo. Phawula kwanoYohane 12:4-6.)

Akathi na umpostile uPawulos athethe ngamaKristu ‘njengamiselwe ngenxa engaphambili’?

Roma 8:28, 29: “Siyazi ke ukuba zonke izinto zisebenziselana okulungileyo kwabo bamthandayo uThixo, kwababiziweyo ngokwengqibo yakhe. Ngokuba abo wabaziyo ngenxa engaphambili, wabamisela ngenxa engaphambili ukuba bafane nomfanekiselo woNyana wakhe, ukuze abe ngowamazibulo kubazalwana abaninzi.” (KwanamaEfe. 1:5, 11) Kanti, ibhekisa kwakwaba bantu, eyesi-2 kaPetros 1:10 ithi: “Makube kukhona nikhuthalele ukulwenza luqine ubizo nonyulo lwenu; kuba nakuzenza ezo zinto, anisayi kukha nikhubeke.” (Ukuba umntu ngamnye wayemiselwe ngenxa engaphambili elusindisweni, bekungayi kwenzeka basilele, ingakhathaliseki into abayenzileyo. Ekubeni kufuneka umgudu emntwini ngamnye, bamele babe baludidi abo bamiselwe ngenx’ engaphambili. UThixo wayenenjongo yokuba lonke udidi luvisisane nomzekelo omiselwe nguYesu Kristu. Noko ke, abo banyulwe nguThixo ukuba babe yinxalenye yolo didi bamele bazingqine bethembekile ukuba okunene baya kuwufumana umvuzo obekwe phambi kwabo.)

Efe. 1:4, 5: “Wathi, ngaphambi kokusekwa kwehlabathi, wasinyulela kuye [uYesu Kristu], ukuba sibe ngcwele, singabi nasiphako phambi kwakhe; othe ngokusithanda wasimisela ngenxa engaphambili, ukuba senziwe oonyana kuye ngokwakhe ngoYesu Kristu, ngokwenkolelo yokuthanda kwakhe.” (Kuphawuleka ukuba, kuLuka 11:50, 51, uYesu unxulumanisa ‘ukusekwa kwehlabathi’ nexesha lika-Abheli. UAbheli ungumntu wokuqala owahlala engokholisekileyo kuThixo ebomini bakhe. Ngaloo ndlela, ukuyila kukaThixo injongo yakhe yokuvelisa “imbewu” ekwakuya kuthi kulungiselelwe ngayo intlangulo kwaba semva kwemvukelo yase-Eden kodwa ngaphambi kokukhawulwa kuka-Abheli. [Gen. 3:15] Injongo kaThixo yayikukumanyanisa neMbewu eyintloko, uYesu Kristu, iqela labalandeli bakhe abathembekileyo ababeya kwabelana naye kuburhulumente obutsha phezu komhlaba, uBukumkani obungoMesiya.)

Ngaba iinkwenkwezi nezijikelezi-langa zinempembelelo kwiziganeko ebomini bethu okanye ngaba zisinika umqondiso esifanele siwuhlolisise xa sisenza izigqibo?

Iyintoni imvelaphi yokuvumisa ngeenkwenkwezi?

“Ukuvumisa ngeenkwenkwezi kwaseNtshona kunokulandwa ngqo kuphuma kwiingcamango noqheliselo lwamaKaledi namaBhabhiloni eminyakeni yama-2000 B.C.”—The Encyclopedia Americana (1977), Umqu. 2, iphe. 557.

“Ukuvumisa ngeenkwenkwezi kwakusekelwe phezu kweengcamango ezimbini zaseBhabhiloni: izodiac nobuthixo beziqu zasemazulwini. . . . AmaBhabhiloni azukisa izijikelezi-langa ngokuthi zineempembelelo ezinokulindelwa ngubani koothixo bawo.”—Great Cities of the Ancient World (New York, 1972), L. Sprague de Camp, iphe. 150.

“Njengamahlumelo empucuko yaseBhabhiloni kwiBhabhiloni neAsiriya . . . ukuvumisa ngeenkwenkwezi kunendawo yako kumasiko asemthethweni njengenye yeendlela ezimbini eziphambili ezisetyenziswa ngababingeleli . . . ukuqinisekisa ukuthanda nenjongo yoothixo, enye ikukuhlolwa kwesibindi sesilwanyana esenziwe idini. . . . Ukuhamba kwelanga, inyanga nezijikelezi-langa ezihlanu kwakujongwa njengokumela umsebenzi woothixo abahlanu ekwakuthethwa ngabo, kunye noSin onguthixo oyinyanga, noShamash onguThixo olilanga, ababelungiselela izihlo emhlabeni.”—Encyclopædia Britannica (1911), Umqu. II, iphe. 796.

Iyintoni imbono yoMdali woluntu ngolu qheliselo?

Dut. 18:10-12: “Maze kungafunyanwa namnye kuwe . . . [ovumisayo], nolitola, nohlaba izihlabo, . . . Kuba balisikizi kuYehova bonke abenza ezo zinto.”

Wathi kumaBhabhiloni: “Udiniwe bubuninzi bamaqhinga akho; mabamise kaloku, bakusindise oonocanda bezulu, oojongiinkwenkwezi, abakwazisayo ekuthwaseni kwenyanga ngenyanga izinto ezikuzelayo. Yabona, basuke baba njengeendiza; . . . Boba njalo kuwe abo uzixhamle ngabo, ababerhwebelana nawe kwasebuncinaneni bakho; elowo uya kundwendwela ecaleni lakhe, kungabikho ukusindisayo.”—Isa. 47:13-15.