UkuPhilisa

Ingcaciso: Kubangela umntu obegula ngokomzimba, ngokwengqondo, okanye ngokomoya aphinde abe sempilweni entle. Bambi abaprofeti bamaHebhere bangaphambi kwexesha lobuKristu noYesu Kristu namalungu athile ebandla lamaKristu okuqala benziwa ngumoya kaThixo ukuba bakwazi ukuphilisa ngokungummangaliso.

Ngaba ukuphilisa okungummangaliso kumhla wethu kwenziwa ngomoya kaThixo?

Ngaba ubuchule bokwenza imimangaliso bunokuphuma kumthombo ongenguye uThixo oyinyaniso?

UMoses noAron babonakala phambi koFaro waseYiputa ukuze bacele ukuba uSirayeli avunyelwe aye entlango ukuya kunikela imibingelelo kuYehova. Njengobungqina benkxaso kaThixo, uMoses wayalela uAron ukuba aphose phantsi intonga yakhe yaza yaba yinyoka enkulu. Loo mmangaliso wenziwa ngamandla kaThixo. Kodwa ke ababingeleli baseYiputa ababeqhelisela umlingo baphosa phantsi ezabo iintonga ibe nazo, zaba ziinyoka ezinkulu. (Eks. 7:8-12) Babewenza ngamandla kabani lo mmangaliso wabo?—Thelekisa iDuteronomi 18:10-12.

Kwinkulungwane yama-20 ukuphilisa okuthile kwenziwa kwiinkonzo eziqhutywa ngabefundisi beNgqobhoko. Kwiinkonzo ezingezizo ezamaKristu kukho oosiyazi, amagqirha, amaxhwele, kwanabanye abaphilisayo; badla ngokusebenzisa ubugqi nokuvumisa. Bambi “abaphilisi abanamandla angaphaya kwawemvelo” bathi ukuphilisa kwabo akunanto yakwenza nonqulo. Kuzo zonke ezi meko, ngaba amandla okuphilisa avela kuThixo oyinyaniso?

Mat. 24:24: “Kuya kuvela ooKristu ababuxoki, nabaprofeti ababuxoki, benze imiqondiso [“imimangaliso,” TE, TEV] emikhulu nezimanga, ngokokude bathi, ukuba bekunokwenzeka, balahlekise nabanyuliweyo.”

Mat. 7:15-23: “Balumkeleni abaprofeti ababuxoki, . . . baninzi abaya kuthi kum ngaloo mini, Nkosi, Nkosi, sasingathe na egameni lakho saprofeta, sathi egameni lakho sakhupha iidemon, sathi egameni lakho senza imisebenzi yamandla [“imimangaliso,” TE, JB, NE, TEV] emininzi? Ndandule ndibaxelele, ndithi, Andizanga ndinazi; mkani kum, nina nenza okuchasene nomthetho.”

Ngaba ukuphilisa okubangel’ umdla komhla wethu kwenziwa ngendlela efanayo njengokuphilisa okumangalisayo kukaYesu nabafundi bakhe bokuqala?

Intlawulo yenkonzo: “Philisani imilwelwe, hlambululani abaneqhenqa, vusani abafileyo, khuphani iidemon; namkele ngesisa, yiphani ngesisa.” (Mat. 10:8) (Ngaba abaphilisi namhlanje bayakwenza oko—bapha ngesisa, njengoko uYesu wayalelayo?)

Umlinganiselo wempumelelo: “Zaye izihlwele zonke zifuna ukumchukumisa [uYesu]; ngokuba kube kuphuma amandla kuye, abaphilise bonke.” (Luka 6:19) “Bada bayithwalela phandle imilwelwe ezitratweni, bayibeka ezingqengqelweni nasezinkukweni, ukuze kuthi, akubon’ ukuba uPetros uyeza, kubekho kuyo ethi isityekelwe sisithunzi sakhe. Yaye ibuthelana eYerusalem nenkitha yabemizi ejikelezileyo, ithwele imilwelwe nabakhathazwa ngoomoya abangcolileyo, ababesithi bona baphiliswe bonke.” (Ize. 5:15, 16) (Kumhla wethu, ngaba bonke abaya kubaphilisi abangabonqulo okanye kwizindlu zokuphilisa ezizezonqulo nabafuna unyango bayaphiliswa?)

Ngaba indlela yobomi yamalungu eentlangano “abaphilisi” abayinxalenye yazo inikela ubungqina bokuba anawo umoya kaThixo?

Njengeqela ngaba ngokubalaseleyo babonisa iziqhamo zomoya ezinjengothando, ukuzeka kade umsindo, ubulali, nokuzeyisa?—Gal. 5:22, 23.

Ngaba ngokwenyaniso ‘abangabo abehlabathi,’ bephepha konke ukubandakanyeka kwimicimbi yobupolitika yehlabathi? Ngaba baye bahlala bemsulwa kwityala legazi ebudeni bexesha lemfazwe? Ngaba banalo igama elihle ngenxa yokuphepha ihambo yehlabathi yokuziphatha okubi?—Yoh. 17:16; Isa. 2:4; 1 Tes. 4:3-8.

Ngaba amaKristu okwenyaniso namhlanje abonakala ngamandla okuphilisa ngokungummangaliso?

Yoh. 13:35: “Ngayo le nto baya kwazi bonke, ukuba ningabafundi bam, ukuba nithe nathandana.” (Oku koko uYesu wakuthethayo. Ukuba ngokwenene siyamkholelwa, sikhangela uthando, kungekhona ukuphilisa okungummangaliso, njengobungqina bobuKristu bokwenyaniso.)

Ize. 1:8: “Niya kwamkela ke amandla, akubon’ ukuba uMoya oyiNgcwele uhlile phezu kwenu; nibe ngamangqina am . . . kude kuse nasekupheleni komhlaba.” (Ngaphambi nje kokuba abashiye abapostile bakhe ukuze abuyele ezulwini, uYesu wabaxelela ukuba oku, kungekhona ukuphilisa, kwakungumsebenzi obalulekileyo ababemele bawenze. Bona kwanoMateyu 24:14; 28:19, 20.)

1 Kor. 12:28-30: “Inxenye uThixo wayimisa ebandleni, kuqala yaba ngabapostile, okwesibini abaprofeti, okwesithathu abafundisi; kwaza kwaba yimisebenzi yamandla, kwaba zizibabalo zeziphiliso, iintsizo, izilawulo, iintlobo zeelwimi. Bangabapostile bonke yini na? Bangabaprofeti bonke yini na? Bangabafundisi bonke yini na? Bangabenzi bemisebenzi yamandla bonke yini na? Banezibabalo zeziphiliso bonke yini na?” (Ngoko, iBhayibhile ngokucacileyo ibonisa ukuba asingawo onke amaKristu okwenyaniso abeya kuba nesipho sokuphilisa.)

Akabonisi na uMarko 16:17, 18 ukuba amandla okuphilisa abagulayo ayeya kuba ngumqondiso ofanisa amakholwa?

Marko 16:17, 18: “Imiqondiso ke eya kulandelana nabo bakholiweyo nantsi: egameni lam baya kukhupha iidemon; baya kuthetha ngeelwimi ezintsha; baya kuphatha iinyoka; nokuba bathe basela into ebulalayo, ayikukha ibenzakalise bona; baya kubeka izandla phezu kwemilwelwe, iphile.”

Ezi ndinyana zibonakala kwimibhalo-ngqangi neenguqulelo ezithile zeBhayibhile zenkulungwane yesihlanu neyesithandathu C.E. Kodwa azibonakali kwimibhalo-ngqangi emidala yesiGrike, iSinaiticus nombhalo-ngqangi waseVatican 1209 wenkulungwane yesine. UGqr. B. F. Westcott, igosa lemibhalo-ngqangi yeBhayibhile, wathi “ezi ndinyana . . . aziyonxalenye yento eyathethwa ngaphambili kodwa zihlonyelwe.” (An Introduction to the Study of the Gospels, London, 1881, iphe. 338) Umguquleli weBhayibhile uJerome, ngenkulungwane yesihlanu, wathi “phantse zonke iicodices zesiGrike azinaso esi sicatshulwa.” (The Last Twelve Verses of the Gospel According to S. Mark, London, 1871, J. W. Burgon, iphe. 53) INew Catholic Encyclopedia (1967) ithi: “Isigama nohlobo lwayo lwahluke mpela kwiVangeli yonke kangangokuba kubonakala kungangenkankulu ukuba uMarko nguye owayibhalayo [oko kukuthi, indinyana 9-20].” (Umqu. IX, iphe. 240) Ayikho ingxelo yokuba amaKristu okuqala ayisela ityhefu okanye azibamba iinyoka ukungqina ukuba ayengamakholwa.

Kutheni le nto izipho ezinjengamandla okuphilisa ngokungummangaliso zazinikwe amaKristu enkulungwane yokuqala nje?

Heb. 2:3, 4: “Sothini na thina ukusinda, sakuba siluhilizele usindiso olungakanana, lona lwaqala ukuthethwa yiyo iNkosi, lwaza lwaqiniselwa kuthi ngabo baluvayo; uThixo engqinelana nabo ngemiqondiso kwanezimanga, nemisebenzi ngemisebenzi yamandla, nezabelo zoMoya oyiNgcwele, ngokokuthanda kwakhe?” (Eneneni, apha kwakukho ubungqina obeyisayo bokuba ibandla lamaKristu, elalilitsha ngelo xesha, ngokwenyaniso yayilelikaThixo. Kodwa kwakuba kumiselwe ngokupheleleyo oko, ngaba babuza kuba yimfuneko ubungqina obuphindaphindiweyo?)

1 Kor. 12:29, 30; 13:8, 13: “Bangabapostile bonke yini na? . . . Banezibabalo zeziphiliso bonke yini na? Bathetha ngalwimi zimbi bonke yini na? . . . Uthando aluze lutshitshe; nokuba ke ziziprofeto, ziya kubhangiswa; nokuba ziilwimi, ziya kupheza; . . . Kungoku ke kuhleli ukholo, ithemba, uthando, ezo zinto zontathu; eyona inkulu ke kuzo apho luthando.” (Xa ziyifezile injongo yazo, ezo zipho zingummangaliso zaziya kupheza. Kodwa iimpawu ezixabisekileyo eziziziqhamo zomoya kaThixo zazisaya kubonakala kubomi bamaKristu okwenyaniso.)

Lo gama nje umntu ephilisiwe, ngaba ngokwenene ibalulekile indlela okwenziwe ngayo oku?

2 Tes. 2:9, 10: “Kwalowo, ukufika kungokusebenza kukaSathana, ngayo imisebenzi yonke yamandla [“ngazo zonke iintlobo zemimangaliso,” JB] nemiqondiso, nezimanga zobuxoki, nangako ukulukuhla konke kokungalungisi kwabo batshabalalayo; ngenxa enokuba bengakwamkelanga ukuyithanda inyaniso, ukuze basindiswe.”

Luka 9:24, 25: “Osukuba ethanda ukuwusindisa umphefumlo [“ubomi,” TE, RS, JB, TEV] wakhe, wolahlekelwa nguwo; ke othe wawulahla umphefumlo wakhe ngenxa yam, wowusindisa lowo. Kuba kumnceda ntoni na umntu ukuthi azuze ihlabathi liphela, abe ke ezilahlile, mhlawumbi ezonakalisile?”

Liliphi ithemba elikhoyo lokuphiliswa ngokwenene kuzo zonke izigulo?

ISityhi. 21:1-4: “Ndabona izulu elitsha, nomhlaba omtsha; kuba elokuqala izulu nowokuqala umhlaba udlule, . . . Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”

Isa. 25:8: “Iya kuginya ukufa kuphele, izisule iNkosi uYehova iinyembezi ebusweni bonke.” (KwaneSityhilelo 22:1, 2)

Isa. 33:24: “Akayi kuthi ummi wakhona, Ndiyafa.”

Ukuba Ubani Uthi—

‘Ngaba uyakholelwa ekuphiliseni?’

Usenokuphendula uthi: ‘Nawuphi na ongakholelwayo ukuba uThixo unawo amandla okuphilisa akakholelwa eBhayibhileni. Kodwa ndiyazibuza enoba abantu bakwenza kakuhle na oku namhlanje.’ Mhlawumbi usenokongeza uthi: (1) ‘Mandikufundele isibhalo, ndize ndibone enoba uyaluphawula na uqheliselo olwahluke gqitha kumhla wethu. (Mat. 10:7, 8) . . . Ngaba uyayiphawula into uYesu apha awathi abafundi bakhe babenokuyenza kodwa abaphilisi namhlanje abangakwazanga ukuyenza? (Abanakubavusa abafileyo.)’ (2) ‘Thina asingobagwebi babanye abantu, kodwa kuyaphawuleka ukuba uMateyu 24:24 ukhankanya into ekufuneka siyilumkele.’

Okanye unokuthi: ‘Ngokuqinisekileyo ndiyakholelwa ukuba okuthethwa yiBhayibhile ngokuphilisa kuyinyaniso. Kodwa nakuphi na ukuphilisa okwenziwa kule nkqubo yezinto kuzisa iingenelo zokwexeshana kuphela, akunjalo na? Ekugqibeleni sonke siyafa. Loze libekho na ixesha laxa ubani ophilayo eya kunandipha impilo entle yaye angaze afe? (ISityhi. 21:3, 4)’