UkuXwilwa

Ingcaciso: Yinkolelo yokuba amaKristu athembekileyo aya kuthi esemzimbeni axwilwe emhlabeni, ngequbuliso ashenxiswe ehlabathini, ukuze amanyaniswe neNkosi “esibhakabhakeni.” Le nkolelo bayisekele kweyoku-1 yabaseTesalonika 4:17.

Xa umpostile uPawulos wathi amaKristu ayeya ‘kuxwilwa’ ukuze abe neNkosi, wayexubusha ngawuphi umbandela?

1 Tes. 4:13-18: “Ke kaloku andithandi ukuba ningazi, bazalwana, mayela nabalele ukufa [“abo balele ekufeni,” NE; “abo bafileyo,” TEV, JB], ukuze ningabi buhlungu njengabanye abangenathemba bona. Kuba xa sikholwa ukuba uYesu wafa, wabuya wavuka, kwangokunjalo naye uThixo woza nabo abalele ukufa ngaye uYesu, kunye naye. Kuba oku siyakutsho kuni ngelizwi leNkosi ukuthi, thina babudlayo ubomi, baya kuba besekho ekufikeni kweNkosi, asisayi kubaphangela abalele ukufa. Ngokuba iNkosi ngokwayo iya kuhla emazulwini inendanduluko, inelizwi leziphatha-zithunywa, inexilongo likaThixo, baze abafele kuKristu bavuke kuqala; sandule thina babudlayo ubomi, basaseleyo, sixwilelwe emafini kwakunye nabo, siye kuyikhawulela iNkosi esibhakabhakeni; size ngokunjalo sihlale sihleli, sindawonye neNkosi. Ngoko ke thuthuzelanani ngala mazwi.” (Ngokucacileyo wambi amalungu ebandla lamaKristu aseTesalonika ayefile. UPawulos wayekhuthaza abaphilayo ukuba bathuthuzelane ngethemba lovuko. Wayebakhumbuza ukuba uYesu wayevusiwe emva kokufa kwakhe; ngokukwanjalo, ekuzeni kweNkosi, loo maKristu athembekileyo aye afa ayeya kuvuswa ukuze abe noKristu.)

Ngoobani abo baya ‘kuxwilelwa emafini,’ njengoko kutshiwo kweyoku-1 yabaseTesalonika 4:17?

Indinyana 15 icacisa ukuba ngabantu abathembekileyo ‘abaya kuba besekho ekufikeni kweNkosi,’ oko kukuthi, baya kuba besaphila ngexesha lokuza kukaKristu. Ngaba baya kuze bafe? Ngokutsho kwamaRoma 6:3-5 neyoku-1 yabaseKorinte 15:35, 36, 44 (ecatshulwe kwiphepha 384, 385), bamele bafe ngaphambi kokuzuza ubomi basezulwini. Kodwa ayikho imfuneko yokuba bahlale kwimeko yokufa belinde ukubuya kukaKristu. Ngoko nangoko baya ‘kuxwilwa,’ “ngephanyazo,” ukuze babe neNkosi.—1 Kor. 15:51, 52; kwaneSityhilelo 14:13.

Ngaba uKristu uya kubonakala ngokwenyama emafini aze ke awathabathele emazulwini amaKristu athembekileyo ngoxa ihlabathi likhangele?

Ngaba uYesu wathi ihlabathi laliya kumbona kwakhona ngamehlo alo enyama?

Yoh. 14:19: “Liselilifutshane ixesha, ukuze ihlabathi lingabi sandibona; ke nina [abafundi bakhe abathembekileyo] niyandibona; ngokuba ndisidla ubomi mna, nani niya kudla ubomi.” (Akekeliswe sithi.) (Thelekisa eyoku-1 kuTimoti 6:16.)

Iyintoni intsingiselo ‘yokuhla ezulwini’ kweNkosi?

Ngaba iNkosi ‘inokuhla ezulwini,’ njengoko kuchazwe kweyoku-1 yabaseTesalonika 4:16, ingabonwa ngamehlo enyama? Ngemihla yeSodom neGomora zamandulo, uYehova wathi wayeza ‘kukha ehle akhangele’ okwakusenziwa ngabantu. (Gen. 18:21) Kodwa xa uYehova walwenzayo olo hlolisiso, akukho mntu wambonayo, nangona bababonayo abameli abazizithunywa zezulu awazithumayo. (Yoh. 1:18) Ngokufanayo, engabuyelanga enyameni, uYesu wayenokuphethulela ingqalelo yakhe kubalandeli bakhe abathembekileyo emhlabeni ukuze abavuze.

Ngoko, abantu baya ‘kuyibona’ ngayiphi ingqiqo iNkosi ‘isiza ngamafu’?

UYesu waxela kwangaphambili oku: “Baya kwandula ke ukumbona uNyana woMntu [uYesu Kristu], esiza ngelifu, enamandla nobuqaqawuli obukhulu.” (Luka 21:27) La mazwi okanye amanye afana nawo kwezinye iindinyana akaphikisani ngayo nayiphi na indlela noko kwathethwa nguYesu njengoko kubhalwe kuYohane 14:19. Qwalasela oku: KwiNtaba yeSinayi, yintoni eyenzekayo xa uThixo ‘weza ebantwini eselifini elingqingqwa,’ njengoko kuchazwe kwiEksodus 19:9? UThixo wayekho ngokungabonakaliyo; abantu bakwaSirayeli babona ubungqina obubonakalayo bobukho bakhe, kodwa akukho namnye kubo owambona ngokwenene uThixo ngamehlo abo. Ngokukwanjalo, xa uYesu wathi wayeza kuza ‘esemafini,’ kumele ukuba wayethetha ukuba wayengayi kubonakala emehlweni abantu kodwa wayethetha ukuba abantu babeya kubuqonda ubukho bakhe. Babeya ‘kumbona’ ngamehlo abo engqondo, beqonda isibakala sokuba wayekho. (Ngamagqabaza angakumbi, bona umxholo omkhulu othi “UkuBuya KukaKristu.”)

Ngaba kunokwenzeka ngamaKristu ukuba athatyathelwe ezulwini ngemizimba yawo yokwenyama?

1 Kor. 15:50: “Ke, bazalwana, nditsho ukuthi, inyama negazi azinako ukubudla ilifa ubukumkani bukaThixo; nokonakala akunakudla ilifa ukungonakali.”

Ngaba amava omprofeti uEliya ayakuphikisa oku? Akunjalo konke konke. Oku kumele kuqondwe ngokuvisisana namazwi kaYesu acacileyo awawathetha kwiinkulungwane kamva: “Akukho namnye unyukileyo waya emazulwini, ngulowo yedwa wehla ephuma emazulwini, uNyana woMntu.” (Yoh. 3:13) Nangona uEliya wabonwayo njengoko ‘wenyukayo ngomoya ovuthuzayo waya ezulwini,’ oku akuthethi ukuba waba kummandla womoya. Kutheni kungathethi oko nje? Kungenxa yokuba kamva uchazwa njengothumela incwadi yesohlwayo kukumkani wakwaYuda. (2 Kum. 2:11; 2 Kron. 21:1, 12-15) Ngaphambi kokuba abantu benze iinqwelo-moya, uYehova apho wasebenzisa indlela yakhe (inqwelo yomlilo nomoya ovuthuzayo) ukunyusa uEliya emke emhlabeni aye ezulwini apho iintaka zibhabha khona nokumfudusela kwenye indawo.—Thelekisa iGenesis 1:6-8, 20.

Ngaba amaKristu athembekileyo mhlawumbi aya kuthatyathelwa ezulwini ngokufihlakeleyo, ngokusuka nje athi pheselele emhlabeni engafanga?

Roma 6:3-5: “Anazi na ukuba thina sonke, sabhaptizelwayo kuKristu Yesu, sabhaptizelwa ekufeni kwakhe? . . . Kuba xa similiselwe kuye ngentsobi yokufa kwakhe, somiliselwa kuye nangeyokuvuka kwakhe.” (Okwenzekayo kwimeko kaYesu kwamisela umzekelo. Abafundi bakhe kwanabanye babesazi ukuba wayefile. Akabuyiselwanga kubomi basezulwini de kwasemva kokufa kwakhe nokuvuka kwakhe.)

1 Kor. 15:35, 36, 44: “Wosuka ubani athi, Bathini na ukuvuka abafileyo? Beza benamzimba unjani na? Msweli-kuqonda wena, into oyihlwayelayo ayenziwa iphile, ukuba ayikhanga ife. Kuhlwayelwa umzimba ongowemvelo, kuvuka umzimba ongowomoya.” (Ngoko ukufa kufika ngaphambi kokuba ubani afumane loo mzimba wokomoya, akunjalo na?)

Ngaba onke amaKristu athembekileyo aya kuthatyathwa ngokungummangaliso emhlabeni yiNkosi ngaphambi kwembandezelo enkulu?

Mat. 24:21, 22: “Kuba ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.” (Oku akuthethi ukuba bonke “abanyuliweyo” baya kuba bethatyathelwe ezulwini ngaphambi kokuba iqale imbandezelo enkulu, akunjalo na? Kunoko, kusenokubonisa ukuba bambi kubo, kunye nezinxulumani ezisenyameni, baya kusinda kuloo mbandezelo inkulu emhlabeni.)

ISityhi. 7:9, 10, 14: “Emva koko ndabona, naso isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi, simi phambi kwetrone naphambi kweMvana, bethiwe wambu ngeengubo ezinde ezimhlophe, benamasundu ezandleni zabo, bedanduluka ngezwi elikhulu, besithi: Usindiso kuye uThixo wethu, lowo uhleli phezu kwetrone, nakuyo iMvana!. . . Aba ngabaphumayo embandezelweni enkulu.” (Ukuze umntu ‘aphume’ entweni kumele angene kuyo okanye abe kuyo. Ngoko esi sihlwele sikhulu simele ukuba ngabantu ngokwenene abangena kwimbandezelo enkulu baze baphume kuyo njengabasindi.) (Ngokubhekisele kubukho babo emhlabeni, funda iphepha 432, 433.)

Yiyiphi inkuselo eya kufumaneka kumaKristu okwenyaniso ebudeni bembandezelo enkulu?

Roma 10:13: “Bonke abasukuba belinqula igama leNkosi [“uYehova,” NW] bosindiswa.”

Zef. 2:3: “Funani uYehova, nonke balulamileyo belizwe, bakwenzileyo okusesikweni kwakhe; funani ubulungisa, funani ululamo, mhlawumbi nositheliswa ngemini yomsindo kaYehova.” (KwanoIsaya 26:20)

Ngaba onke amaKristu okwenyaniso mhlawumbi aya kuthatyathelwa ezulwini emva kwembandezelo enkulu?

Mat. 5:5: “Banoyolo abanobulali; ngokuba umhlaba baya kuwudla ilifa bona.”

INdu. 37:29: “Amalungisa aya kulidla ilifa ilizwe [“umhlaba,” AP, Ro, NW], ahlale kulo ngonaphakade.” (Kwanendinyana 10, 11, 34)

1 Kor. 15:50: “Inyama negazi azinako ukubudla ilifa ubukumkani bukaThixo.”

Bona kwanomxholo omkhulu othi “IZulu.”

Kutheni le nto amaKristu athile ethatyathelwa ezulwini ukuze abe noKristu?

ISityhi. 20:6: “Baya kusuka babe ngababingeleli bakaThixo nabakaKristu, babe ngookumkani kunye naye iminyaka eliwaka.” (Ekubeni beza kulawula noKristu, kumele kubekho abantu abaza kulawula phezu kwabo. Bangoobani aba? Bona uMateyu 5:5 neNdumiso 37:29.)

Bona kwanomxholo omkhulu othi “UkuZalwa Ngokutsha.”

Ngaba abo baya ezulwini kamva bobuyiselwa emhlabeni ukuze baphile ngonaphakade apha eParadisi?

IMize. 2:21: “Abathe tye baya kulima ilizwe [“kuma umhlaba,” AP, NE], basale kulo abagqibeleleyo.” (Phawula ukuba esi sibhalo asithi abantu abathe tye abanjalo baya kubuyela emhlabeni kodwa sithi baya kuhlala apho.)

1 Tes. 4:17: “Size [amaKristu axwilelwe ezulwini] ngokunjalo sihlale sihleli, sindawonye neNkosi.”

Ukuba Ubani Uthi—

‘Ngaba uyakholelwa ekubeni abantu baza kuxwilwa?’

Usenokuphendula uthi: ‘Ndifumanisa ukuba asingabo bonke abantu abanengcamango efanayo ngento ethethwa kukuxwilwa kwabantu. Wena ucinga ntoni ngalo mbandela? . . . Kuwo nawuphi na umbandela, kukho ingenelo ekuthelekiseni iingcamango zethu noko kuthethwa yiBhayibhile. (Sebenzisa amacandelo ombandela ongasentla asebenzisekayo.)’

Okanye unokuthi: ‘Ukuxwilwa ndiye ndakucaciselwa njengelungiselelo lokusinda kwamaKristu. Abaninzi banoluvo lokuba le yindlela abaya kusinda ngayo kwimbandezelo enkulu ezayo. Ngaba leyo yindlela ovakalelwa ngayo?’ Mhlawumbi usenokongeza uthi: (1) ‘Ngokuqinisekileyo siyayifuna inkuselo kaThixo ngelo xesha, ibe ndizifumanisa zikhuthaza gqitha ezinye iindinyana ezibonisa indlela esinokungenelwa ngayo koku. (Zef. 2:3)’ (2) ‘Into ebangel’ umdla kukuba, iBhayibhile ibonisa ukuba uThixo uya kubalondoloza abanye abathembekileyo apha emhlabeni. (IMize. 2:21, 22) Oko kuvisisana nenjongo kaThixo xa wathi ekuqaleni wadala uAdam waza wambeka eParadisi, akunjalo na?’

Enye indlela: ‘Xa uthetha ngokuxwilwa uthetha ukuba amaKristu aphila ekupheleni kwale nkqubo yezinto aza kuthatyathelwa ezulwini, andibi kunjalo? . . . Wakha wazibuza na ngento aya kuyenza xa efika ezulwini? . . . Phawula oko ISityhilelo 20:6 (nesesi-5:9, 10) sikuthethayo. . . . Kodwa baya kulawula oobani? (INdu. 37:10, 11, 29)’