Ngaba Uya Kuxwilelwa Emazulwini?
ABANTU abaninzi bakholelwa ukuba baya kuya ezulwini xa besifa. Kodwa bambi bacinga ukuba baya kuthiwa xwi basiwe emazulwini ngoko kubizwa ngokuba kukuxwilwa. Ngaba oko koko ukulindeleyo?
Omnye umshumayeli ongumProtestanti wathi ukuxwilwa “kukuthi shwaka ngesiquphe kwezigidi ngezigidi zabantu kungabikho mkhondo wokuba bayephi!” Ngokwe-Evangelical Dictionary of Theology, ibinzana elithi “ukuxwilwa” libhekisela “ekumanyaneni kwecawa noKristu xa ebuya okwesibini.”
Bambi bakubona kuphazamisa ukucinga ngokushiya abahlobo namalungu entsapho ngasemva ukuze bakhawulele uYesu Kristu. Kanti, abaninzi bakholelwa ukuba ukuxwilwa kumele kubekho. Ngaba kuya kwenzeka? Ukuba kunjalo, nini?
Iimbono Ezahlukahlukeneyo Ngokuxwilwa
IBhayibhile ibonisa ukuba ngaphambi kokuqalisa koLawulo lukaKristu oluthenjisiweyo Lweminyaka Eliwaka, kuya kubakho isihlandlo esibizwa ngokuba ‘yimbandezelo enkulu.’ UYesu wathi: “Ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.” (Mateyu 24:21; ISityhilelo 20:6) Abanye bacinga ukuba baya kuxwilwa ngaphambi kwembandezelo enkulu. Bambi balindele ukuxwilwa ebudeni belo thuba. Kanti abanye bacinga ukuba baya kuxwilwa emva kwaloo mbandezelo engenakuthelekiswa nanto.
Ingcamango yokuxwilwa emva kwembandezelo yayibalasele de kwasekuqaleni kwenkulungwane ye-19. Ngelo xesha, eNgilani kwakhula inkqubo eyayikhokelwa ngowayesakuba ngumfundisi weCawa yaseIreland, uJohn Nelson Darby. Yena namanye amaTshetshi awayecinga njengaye baqalisa ukwaziwa njengaBazalwana. Esuka kwicawa eyayisePlymouth, uDarby wayehamba aye kushumayela eSwitzerland nakwezinye iindawo eYurophu. Wayesithi ukubuya kukaKristu kwakuya kwenzeka ngeendlela ezimbini. Kwakuya kuqalisa ngokuxwilwa ngokufihlakeleyo, apho “iingcwele” zaziya kuxwilwa ngaphambi kokuba imbandezelo eyayiya kuthabatha iminyaka esixhenxe itshabalalise umhlaba. Emva koko uKristu wayeya kubakho ngokubonakalayo, ephelekwe zezi “ngcwele,” yaye ekunye nazo wayeya kulawula umhlaba iminyaka eliwaka.
UDarby wagxininisa kwelokuba kwakufuneka bahluke ehlabathini, yaye ekugqibeleni abo babeneembono ezifana nezakhe baziwa njengaBazalwana Abakhethekileyo. UB. W. Newton wayekhokela elinye iqela elahlukileyo elalikholelwa ekuxwilweni kodwa kungekhona ngaphambi kwembandezelo. Umxhasi wengcamango yokuxwilwa emva kwembandezelo uAlexander Reese wangqina ukuba “ingcamango Zokuxwilwa Ngokufihlakeleyo ziyingozi kwithemba Lokubuya kukaKristu.”
Abo bakholelwa ekuxwilweni ngaphambi kwembandezelo bakholelwa ukuba oku kwahluka kweembono kuyingozi kangangokuba kungachaphazela “indalo kwithemba [layo] ngokunxulumene nokubuya kukaKristu.” Bambi bathembele “kwingcamango yokuxwilwa ngokwahlukahlukeneyo,” bekholelwa kwelokuba abo bathembeke kakhulu kuKristu baya kuxwilwa kuqala baze abo batyekele kakhulu ekwenzeni izinto zehlabathi bathatyathwe mva.
Amaqela amaninzi abashumayeli avakalisa ukuxwilwa okukhawulezileyo kumaKristu athembekileyo. Noko ke, ngenxa yeengcamango ezahlukeneyo incwadana eyapapashwa yiElim Pentecostal Church yaseBritani yathi: “Ngoxa siwakholelwa amagqabaza amaninzi angeziganeko ezinxulumene nokubuya kweNkosi uYesu . . . , kuvumelekile ukuba umntu asicacise isiprofeto ngendlela akholelwa ngayo. Abaninzi abamkeli nanye inkolelo kwezi, balinde ngomonde ukuba ibe ziziganeko ezityhila isiprofeto.”
ILizwi likaThixo eliphefumlelweyo, iBhayibhile, lisisikhokelo esinokuqonda ngaso ubunyaniso bazo zonke iinkolelo. (2 Timoti 1:13; 3:16, 17) Ngoko, ithini ngokuxwilwa?