Icandelo 1
Ngaba Ngokwenene UThixo Usikhathalele?
1, 2. Nguwuphi umbuzo abantu abawubuzayo ngoThixo, yaye ngoba?
NGAXA lithile ebomini bakho, usenokuba ukhe wabuza: ‘Ukuba ukho uThixo osikhathalele ngokwenene, kutheni evumela ukubandezeleka okungaka?’ Sonke sikhe sabandezeleka okanye sazi uthile okhe wabandezeleka.
2 Eneneni, kuyo yonke imbali abantu baye beva iintlungu nokungcungcutheka ngenxa yemfazwe, inkohlakalo, ulwaphulo-mthetho, ukungabikho kokusesikweni, ubuhlwempu, ukugula nokufa kwabo babathandayo. Kule nkulungwane yethu yama-20 kuphela, iimfazwe zisube ubomi babantu abangaphezu kwezigidi ezili-100. Amakhulukhulu ezigidi zabanye aye angxwelerheka okanye aphulukana namakhaya nempahla yawo. Zininzi gqitha izinto ezimanyumnyezi eziye zenzeka kweli xesha lethu, nto leyo ephumele kusizi olukhulu, ekuphalaleni kweenyembezi nasekuphelelweni lithemba kwabantu abaninzi gqitha.
3, 4. Abaninzi bavakalelwa njani ngokuvumela kukaThixo ukubandezeleka?
3 Bambi baye bakhathazeke gqitha baze bavakalelwe kukuba ukuba uThixo ukho, akasikhathalelanga ngokwenene. Okanye basenokude babe noluvo lokuba uThixo akakho. Ngokomzekelo, indoda eyayilixhoba lentshutshiso ngenxa yobuzwe ntshutshiso leyo eyaphumela ekufeni kwabahlobo nentsapho yayo kwiMfazwe Yehlabathi I yabuza: “Wayephi uThixo ngexesha kanye esasimfuna ngalo?” Enye, eyasinda ekubulaweni kwezigidi ngamaNazi kwiMfazwe Yehlabathi II, yayibuhlungu gqitha koku kubandezeleka yakubonayo kangangokuba yathi: “Ukuba ubunokuyikhotha intliziyo yam, ibingakutyhefa.”
4 Ngenxa yoko, abantu abaninzi abasiqondi isizathu sokuba uThixo olungileyo engavumela ukuba kwenzeke izinto ezimbi. Bayazibuza enoba usikhathalele ngokwenene na okanye ukho kwaukubakho kusini na. Kwaye abaninzi kubo banoluvo lokuba logama nje abantu besekho baya kubandezeleka.
[Umfanekiso okwiphepha 2, 3]
Ngaba ihlabathi elitsha elingenakubandezeleka likufuphi?