Imibuzo Ekufuneka Iphendulwe

NGAXA lithile ebomini bakho, usenokuba wakhe wazibuza oku: ‘Ukuba uThixo ukho, kutheni evumele ukubandezeleka okungaka? Yaye kutheni ekuvumele ixesha elide kangaka, ukutyhubela yonke imbali yabantu? Ngaba ukubandezeleka kuya kuze kuphele?’

Ngenxa yokungabi nazimpendulo zanelisayo kwimibuzo enjalo, abaninzi bayacaphuka. Bambi bade bayeke nokukholelwa kuThixo, okanye bambek’ ityala ngamashwa abo.

Ngokomzekelo, indoda eyasinda Ekubulaweni Kwabantu Ngenkohlakalo, ukubulawa kwezigidi ngamaNazi kwiMfazwe Yehlabathi II, yaba buhlungu kangangokuba yathi: “Ukuba ubunokuyikhotha intliziyo yam, ibiya kukutyhefa.” Enye indoda eyabandezeleka ngenxa yentshutshiso yohlanga, eyabangela ukufa kwabahlobo namalungu entsapho kwiMfazwe Yehlabathi I, ibuhlungu yabuza isithi: “Wayephi uThixo xa sasimfuna?”

Ngaloo ndlela, abantu abaninzi badidekile. Ngokwendlela abazibona ngayo izinto, kubonakala kungangqinelani noThixo wokulunga nothando ukuvumela izinto ezimbi zenzeke kangangexesha elide kangaka.

Okwenziwe Ngabantu

Ngokuqinisekileyo liyinyaniso elokuba abantu baye benza izinto ezimbi kakhulu kwabanye ukutyhubela iinkulungwane​—⁠enyanisweni, kangangamawaka eminyaka. Ubunzulu nokoyikeka kwako konke oku kungaphaya kokuqonda.

Njengoko kubonakala ngathi impucuko yenza inkqubela, abantu benze izixhobo eziya zisothusa ngakumbi ukwenzela ukutshabalalisa okanye ukwenzakalisa abanye: oombayimbayi, imibhaxa, iinqwelo-moya zokulwa, iitanki, imijukujelwa, iintolo zomlilo, izixhobo ezikhupha imichiza nezenyukliya. Ngenxa yoko, kule nkulungwane kuphela, iimfazwe zeentlanga ziye zabulala abantu abamalunga nekhulu lezigidi! Amakhulu ezigidi angakumbi aye enzakala okanye abandezeleka ngezinye iindlela. Yaye izinto eziye zatshatyalaliswa, ezinjengezindlu nezinye izinto ezixabisekileyo, azinakubalwa.

Cinga ngosizi, intlungu neenyembezi ezingathethekiyo eziye zabangelwa yimfazwe! Phantse ngalo lonke ixesha ngabantu abamsulwa abaye babandezeleka: amaxhego namaxhegokazi, abantwana, iintsana. Yaye izihlandlo ezininzi, abaninzi abenze obo bubi abazange baphenduliswe.

Zwenibanzi, ukubandezeleka kuyaqhubeka kude kube ngulo mzuzu. Suku ngalunye, abantu bayabulawa okanye babe ngamaxhoba olwaphulo-mthetho ngandlel’ ithile. Bayenzakala okanye bafe kwiingozi, kuquka ‘izenzo ezingokwemvelo’ ezinjengeziphango, izikhukula neenyikima. Babandezelwa kukungabikho kokusesikweni, ikhethe, ubuhlwempu, indlala, okanye izifo, okanye ngezinye iindlela ezininzi.

Kunokwenzeka njani ukuba uThixo olungileyo abe wadala okuthile​—⁠uluntu​—⁠oluye ngokufuthi, lwabandezeleka kabuhlungu kangaka kangangeenkulungwane?

Ingxaki Esemzimbeni Womntu

Le ngxaki ibonakaliswa nasemzimbeni womntu. Izazinzulu nabanye abaye bafunda ngomzimba womntu bayavuma ukuba wenziwe ngokumangalisayo nangokubalaseleyo.

Qwalasela ambalwa nje kumalungu awo amangalisayo: iliso lomntu elingakholelekiyo, ekungekho khamera inokufana nalo; ingqondo emangalisayo, eyenza neyona khompyutha yenziwe ngobugcisa ikhangeleke ingento; indlela amalungu omzimba antsonkothileyo asebenzisana ngayo ngaphandle kokulawulwa yimigudu yethu; ummangaliso wokuzala, ukuvelisa umntwana obukekayo​—⁠ongumfanekiso wabazali bakhe⁠—⁠ngeenyanga nje ezilithoba. Abantu abaninzi bagqiba kwelokuba olu yilo lobugcisa, umzimba womntu, kumele ukuba lwadalwa nguMyili oligcisa​—⁠uMdali, uThixo uSomandla.

Kanti, okulusizi kukuba, kwalo mzimba umangalisayo uyawohloka. Ekuhambeni kwethuba woyiswa kukugula, ukwaluphala nokufa. Ekugqibeleni uyavuthuluka ube luthuli. Olunjani lona usizi! Xa kanye umntu efanele azuze iingenelo kwiminyaka emininzi yamava aze abe ngolumke ngakumbi, umzimba uyaphelelwa. Ekupheleni kwawo, onjani ukuba lusizi umahluko, kwimpilo, ukomelelela, nobuhle umzimba owawunokuba nabo ekuqaleni kwawo!

UMdali onothando wayenokukwenzela ntoni okuthile okubalasele njengomzimba womntu, ukuze nje akuyeke kuphele ngokulusizi ngolo hlobo? Wayenokuwudalela ntoni umatshini oqala kakuhle ngolo hlobo, unamandla kangako, kodwa uphele ngendlela enjalo ukuba mbi?

Indlela Abanye Abakucacisa Ngayo

Abanye baye bathi ubungendawo nokubandezeleka zizixhobo zikaThixo zokuphucula ubuntu bethu esebenzisa inkxwaleko. Umfundisi waseWisile wathi: “Ukuhlawula kwabalungileyo ngenxa yababi kuyinxalenye yecebo likaThixo losindiso.” Wayethetha ukuba ukuze bakhe ubuntu babo baze basindiswe, abantu abalungileyo bamele babandezeleke ngenxa yezenzo zabantu ababi njengenxalenye yecebo likaThixo.

Kodwa ngaba ubawo onothando ongumntu ebenokuzama ukuphucula ubuntu babantwana bakhe ngokuceba ukubavumela ukuba babe ngamaxhoba ezaphuli-mthetho ezineengcwangu? Kwakhona, qwalasela ukuba abantu abaselula abaninzi bayafa kwiingozi okanye bayabulawa okanye bayafa emfazweni. Loo maxhoba aselula akayi kuba nathuba limbi lokuphucula ubuntu bawo kuba aya kuba efile. Ngoko ingcamango yokuba ukubandezeleka kuvunyelwe ukuze nje kuphuculwe ubuntu ayikho ngqiqweni.

Akukho bawo ungumntu onengqiqo nonothando obeya kufuna ukuba abathandekayo bakhe babandezeleke okanye bahlelwe yintlekele. Enyanisweni, ubawo obeya kuceba ukuba abathandekayo bakhe babandezeleke ukuze ‘bakhe ubuntu’ ebeya kugqalwa engafanelekanga, engalungelelananga nangokwasengqondweni.

Ngoko ngaba kunokutshiwo ngokusengqiqweni ukuba uThixo, uBawo onothando ongoyena uphakamileyo, uMdali onobulumko bonke wendalo iphela, wakulungiselela ngabom ukubandezeleka njengenxalenye ‘yecebo lakhe losindiso’? Oko ibiya kuba kukongezelela uphawu lwenkohlakalo engathethekiyo nolothusayo kuye, uphawu sonke esingalwamkeliyo kwanakubantu abaphantsi.

Ukufumana Iimpendulo

Sinokuphethukela phi ukuze sifumane iimpendulo kwimibuzo emayela nokuvumela kukaThixo ukubandezeleka nobungendawo? Ekubeni imibuzo ibandakanya uThixo, kusengqiqweni ukubona ukuba yena ngokwakhe uzilungiselele njani na iimpendulo.

Sizifumana njani iimpendulo zakhe? Ngokuya kumthombo uThixo athi uwubhalile njengokhokelo loluntu​—⁠iBhayibhile Engcwele, iZibhalo Ezingcwele. Kungakhathaliseki ukuba ubani ucinga ntoni na ngaloo mthombo, ukufanele ukuhlolisiswa, kuba, njengokuba umpostile uPawulos watshoyo: “Sonke isibhalo, siphefumlelwe nguThixo nje, sikwancedela . . . ukululeka.” (2 Timoti 3:​16) Wakwabhala esithi: “Nathi, ukulamkela ilizwi likaThixo lodaba kuthi, analamkela lililizwi labantu; nalamkela, njengokuba kunjalo okwenyaniso, lililizwi likaThixo.”a​—⁠1 Tesalonika 2:⁠13.

Ukufumana iimpendulo kwimibuzo emalunga nokuvunyelwa kokubandezeleka kungaphezulu kunokuba ibe kukuvavanya nje amandla engqondo. Iimpendulo zibalulekile ukuze sikwazi ukuqonda oko kwenzekayo ngoku ehlabathini, oko kuya kwenzeka kwikamva elingekude nendlela ngamnye wethu achaphazeleka ngayo.

Kokokulungelwa kwethu ukuba sivumele iBhayibhile, eyindlela kaThixo yokunxibelelana nentsapho engabantu, izithethele ngokwayo. Ngoko, ithini ngendlela okwaqala ngayo ukubandezeleka nesizathu sokuba uThixo ekuvumele?

Into eya kusinceda ukuba siyiqonde impendulo inento yokwenza nendlela esenziwe ngayo ngokwengqondo nangokweemvakalelo. IBhayibhile ibonisa ukuba uMdali wafaka olu phawu lubalulekileyo kwindlela esenziwe ngayo njengabantu: umnqweno wenkululeko. Ngokufutshane makhe siqwalasele eyona nto ibandakanyekileyo kwinkululeko yabantu yokuzikhethela nendlela oku okukuchaphazela ngayo ukuvumela kukaThixo ukubandezeleka.

[Umbhalo osemazantsi]