Icandelo 4
UThixo Usazisa Ngeenjongo Zakhe
1, 2. Sazi njani ukuba uThixo ubalungiselela iimpendulo abo babuza ngokunyanisekileyo?
NGOKWENENE uThixo oluthando uyabatyhilela iinjongo zakhe abo banyanisekileyo nabamfunayo. Ulungiselela ukuba abantu abafuna ulwazi bafumane iimpendulo kwimibuzo engesizathu sokuvumela kwakhe ukubandezeleka.
2 IBhayibhile ithi: “Ukuba uthe wamfuna [uThixo], wofunyanwa nguwe.” “Kukho uThixo emazulwini, ozityhilayo iimfihlakalo.” “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”—1 Kronike 28:9; Daniyeli 2:28; Amosi 3:7.
Ziphi Iimpendulo?
3. Sinokusifumana phi isizathu sokuvumela kukaThixo ukubandezeleka?
3 Iimpendulo zemibuzo engesizathu sokuvumela kukaThixo ukubandezeleka noko aya kukwenza ngako zifumaneka kwingxelo awayiphefumlelayo ukuze ibe yingenelo kuthi. Loo ngxelo liLizwi lakhe, iBhayibhile Engcwele. “Sonke iSibhalo siphefumlelwe nguThixo kwaye siyingenelo ekufundiseni, ekululekeni, ekulungiseni izinto, ekuqeqesheni okusebulungiseni, ukuze umntu kaThixo awufanelekele ngokuzeleyo, ewuxhobele wonke umsebenzi olungileyo.”—2 Timoti 3:16, 17, NW.
4, 5. Yintoni eyenza iBhayibhile ibe yincwadi engenakuthelekiswa nezinye?
4 Ngokwenene iBhayibhile yincwadi engenakuthelekiswa nezinye iincwadi. Iqulethe eyona ngxelo ichanileyo ngembali yomntu yaye ide idlulele nangaphaya kokudalwa kwabantu. Kwakhona inikela inkcazelo esexesheni, kuba iziprofeto zayo zinokuthanani neziganeko zexesha lethu kwanezo zekamva elikufuphi.
5 Ayikho enye incwadi eneemfaneleko ezinjalo ezingokuchana okungokwembali. Ngokomzekelo, kukho imibhalo-ngqangi embalwa kuphela yababhali bamandulo. Kodwa kukho imibhalo-ngqangi emininzi yeBhayibhile, yimbi yinxalenye yaye eminye iphelele: emalunga nama-6 000 yeZibhalo zesiHebhere (iincwadi ezingama-39 ‘zeTestamente Endala’) nemalunga ne-13 000 yeZibhalo zamaKristu zesiGrike (iincwadi ezingama-27 ‘zeTestamente Entsha’).
6. Kutheni sinokuqiniseka ukuba namhlanje ngokusisiseko iBhayibhile isenjengoko yayinjalo xa uThixo wayiphefumlelayo?
6 UThixo uSomandla, owaphefumlela iBhayibhile, uye waqinisekisa ukuba ukugqibelela kombhalo wayo kuye kwalondolozwa kuloo mibhalo-ngqangi ikhutshelweyo. Ngoko ngokusisiseko iiBhayibhile zethu namhlanje zisafana naloo mibhalo-ngqangi yantlandlolo ephefumlelweyo. Omnye uthunywashe wokusinceda sikuqonde oku kukuba eminye imibhalo-ngqangi ekhutshelweyo yeZibhalo zamaKristu zesiGrike ibuyela emva ukusa kwisithuba esikwikhulu leminyaka ukususela kwixesha lokubhalwa kweencwadi zantlandlolo. Imibhalo-ngqangi embalwa ekhutshelweyo yababhali bamandulo behlabathi esekhoyo ayifane ibuyele nkqu nakwisithuba seenkulungwane eziliqela ukususela kubabhali bantlandlolo.
Isipho SikaThixo
7. IBhayibhile isasazwe ngokubanzi kangakanani?
7 IBhayibhile yeyona ncwadi isasazwe ngokubanzi embalini. Kuye kwashicilelwa imibhalo yayo enokuba ngamawaka amathathu ezigidi. Ayikho enye incwadi ekhe yasondela kwaukusondela kwelo nani. Ibe iBhayibhile okanye amacandelo ayo aye aguqulelwa kwiilwimi ezinokuba ngama-2 000. Ngenxa yoko, kuqikelelwa ukuba abemi besijikelezi-langa sethu abangama-98 ekhulwini banokuyifumana iBhayibhile.
8-10. Ziziphi ezinye zezizathu zokuba sifanele siyihlolisise iBhayibhile?
8 Ngokuqinisekileyo sifanele siyihlolisise incwadi ethi ivela kuThixo nenabo bonke ubungqina obuvela ngaphandle nobukuyo ngaphakathi bobunyaniso bayo.a Icacisa injongo yobomi, intsingiselo yeemeko zehlabathi noko kufunjethwe likamva. Ayikho enye incwadi enokwenjenjalo.
9 Ewe, iBhayibhile yindlela uThixo anxibelelana ngayo nentsapho yabantu. Wasebenzisa amandla asebenzayo, okanye umoya wakhe ukuze alathise ukubhalwa kwayo ngabantu abanokuba ngama-40. Ngaloo ndlela uThixo uthetha nathi ngeLizwi lakhe, iBhayibhile Engcwele. Umpostile uPawulos wabhala: “Nathi, ukulamkela ilizwi likaThixo lodaba kuthi, analamkela lililizwi labantu; nalamkela, njengokuba kunjalo okwenyaniso, lililizwi likaThixo.”—1 Tesalonika 2:13.
10 UAbraham Lincoln, umongameli we-16 waseUnited States, wayibiza iBhayibhile ngokuthi “isesona sipho sibalaseleyo uThixo awakha wasinika umntu . . . Ngaphandle kwayo besingenakuze sikwazi okulungileyo nokuphosakeleyo.” Ngoko ke, esi sipho sisesona sibalaseleyo sisixelela ntoni ngendlela okwaqala ngayo ukubandezeleka, ngesizathu sokukuvumela kukaThixo nangoko aya kukwenza ngako?
[Umbhalo osemazantsi]
a Ukuze ufumane inkcazelo eneenkcukacha ngobunyaniso beBhayibhile, bona incwadi ethi IBhayibhile—Ngaba Ililizwi LikaThixo Okanye Lomntu?, epapashwe ngowe-1989 yiWatchtower Bible and Tract Society of New York, Inc.
[Umfanekiso okwiphepha 10]
IBhayibhile, ephefumlelwe nguThixo, yindlela athetha ngayo nentsapho yabantu