IBhayibhile Incwadi Ekhethekileyo

Iye yabizwa ngokuba yeyona ncwadi ithengwa kakhulu, yaye oko kuyinyaniso. IBhayibhile ifundwa yaye ixatyiswa gqitha ngaphezu

kwayo nayiphi na enye incwadi. Ukuza kuthi ga namhlanje, indlela esasazwa ngayo (iphelele okanye inxalenye yayo) iqikelelwa kwimibhalo engamawaka amane ezigidi ngeelwimi ezingaphezu kwama-2000.

Noko ke, okona kubangela umdla ngakumbi kunendlela eye yasasazwa ngayo iBhayibhile, kukuzibanga kwayo njengebhalwe nguThixo. Umpostile uPawulos ongumKristu wabhala: “Sonke iSibhalo siphefumlelwe nguThixo.” (2 Timoti 3:16) Kuthetha ntoni oku? Ibinzana elithi “siphefumlelwe nguThixo” (ngesiGrike the·oʹpneu·stos) ngokoqobo lithetha ukuthi “uThixo waphefumlela.” Igama lesiGrike elisondele kwelo elithi, pneuʹma, lithetha “umoya.” Ngenxa yoko, ingongoma ikukuba umoya oyingcwele kaThixo washukumisela ababhali abangabantu, ubaphefumlela, ngokungathi kunjalo, ukuze oko kuphume apho kubizwe ngokuba ngokwenene kuliLizwi likaThixo, kungekhona elomntu. Eneneni, abaninzi abaye bayifunda iBhayibhile bayamangaliswa kukuvisisana kwayo yonke, ukuchana kwayo ngokwezenzululwazi, ukunyaniseka nokuthetha phandle kwababhali, yaye okona kubaluleke ngakumbi, iziprofeto zayo ezizalisekileyo—zonke eziye zabangela izigidi zabafundi ezicingayo zeyiseka kukuba le ncwadi ivela kumthombo ongaphezulu kunomntu.a

Kodwa uThixo wakhokela ngokusondele kangakanani ekubhalweni kweBhayibhile? Bambi bathi wayalela ukubhalwa kwegama negama leBhayibhile. Abanye bathi waphefumlela iingcinga ezifumaneka eBhayibhileni, kungekhona amazwi. Phofu ke, eneneni, ukuphefumlelwa akunakuze kupheleliselwe kwindlela enye, kuba uThixo “wathetha kwakudala ngeendlela ezininzi kookhokho bethu ngabaprofeti.” (Hebhere 1:1; thelekisa eyoku-1 kwabaseKorinte 12:6.) Kwinqaku elilandelayo, siza kuhlolisisa iindlela awathetha ngazo uThixo kubantu abanokuba ngama-40 ababhala iBhayibhile.

[Imibhalo esemazantsi]