Isahluko 14

“Abangabo Abehlabathi”

UBUKHULU becala, unqulo lwanamhlanje luyinxalenye yehlabathi, ngenxa yoko lunenxaxheba kwimibhiyozo yehlabathi yaye lubonakalisa umoya walo wobuhlanga. Abefundisi balo ngokufuthi bayasivuma eso sibakala, yaye abaninzi babo bathanda ukuba kube njalo. Ngokwahluke gqitha koko, uYesu wathi ngabalandeli bakhe bokwenyaniso: “Abangabo abehlabathi, njengokuba nam ndingenguye owehlabathi.”—Yoh. 17:16.

Ingxelo ibonisa ntoni ngamaNgqina kaYehova kule nkalo? Ngaba aye anikela ubungqina obeyisayo bokuba awayonxalenye yehlabathi?

Isimo Sawo Sengqondo Ngakwabanye Abantu

ABafundi beBhayibhile bokuqala babekuqonda kakuhle ukuba amaKristu okwenyaniso ayengayi kuba yinxalenye yehlabathi. IMboniselo yachaza ukuba ngenxa yokuba abalandeli bakaKristu abathanjisiweyo babengcwaliselwe baza bazalwa ngomoya oyingcwele ukuba babe nesabelo kuBukumkani basezulwini, esi senzo sikaThixo sabenza bahluka kulo ihlabathi. Ukongezelela koko, yabonisa ukuba babenembopheleleko yokuwuphepha umoya wehlabathi—iinjongo, amabhongo namathemba alo, kwaneendlela zalo zokuzingca.—1 Yoh. 2:15-17.

Ngaba oku kwayichaphazela indlela aBafundi beBhayibhile ababebajonga ngayo abantu ababeneenkolelo ezahlukileyo kwezabo? Ngokuqinisekileyo akuzange kubenze babe ngamakheswa. Kodwa abo babekusebenzisa ngokwenene oko babekufunda eZibhalweni abazange bafune ukuba nobudlelane nabantu behlabathi kangangokuba bade baphile ubomi obufana nobabo. IMboniselo yalathisela abakhonzi bakaThixo kwisiluleko seBhayibhile sokuba ‘basebenze okulungileyo kubo bonke.’ Kwakhona yaluleka ngelithi xa betshutshiswa bafanele bazabalazele ukuziphepha iimvakalelo zomoya wokuziphindezela yaye, kunoko, njengokuba uYesu watsho, bafanele ‘bazithande iintshaba zabo.’ (Gal. 6:10; Mat. 5:44-48) Yababongoza ngokukhethekileyo ukuba bazabalazele ukwabelana nabanye ngenyaniso exabisekileyo engelungiselelo likaThixo losindiso.

Kuyaqondakala ukuba ukwenza kwabo ezi zinto kwakuya kubangela ukuba ihlabathi libajonge njengabahlukileyo. Kodwa ukungabi yinxalenye yehlabathi kubandakanya okungakumbi—okuninzi ngakumbi.

Ukwahluka Nokungafani NeBhabhiloni Enkulu

Ukuze bangabi yinxalenye yehlabathi, kwafuneka bangabi yinxalenye yeenkqubo zonqulo ezazitshone zwabha kwimicimbi yehlabathi nezazamkele iimfundiso namasiko asuka kwiBhabhiloni yamandulo, utshaba olunexesha elide lukho lonqulo lokwenyaniso. (Yer. 50:29) Xa kwaqhambuka imfazwe yokuqala yehlabathi, kwakusele kudlule amashumi eminyaka aBafundi beBhayibhile bebhenca imvelaphi yobuhedeni yeemfundiso zeNgqobhoko ezinjengoBathathu Emnye, ukungafi komphefumlo womntu nesihogo somlilo. Kwakhona babeyidandalazisile ingxelo yeecawa yokuzama ukulawula oorhulumente ukuze zilungelwe. Ngenxa yeemfundiso zeNgqobhoko noko yayikwenza, aBafundi beBhayibhile babeyifanise ‘neBhabhiloni Enkulu.’ (ISityhi. 18:2) Babonisa ukuba yayixuba inyaniso nemposiso, ubuKristu obudikidiki kunye nokuthanda ihlabathi ngokupheleleyo, yaye babonisa ukuba igama eliseBhayibhileni elithi “iBhabhiloni” (elithetha, “ukuDideka”) laliyichaza kakuhle loo meko. Babongoza abathandi bakaThixo ukuba baphume ‘kwiBhabhiloni.’ (ISityhi. 18:4) Ukuze kufezwe oko, ngasekupheleni kukaDisemba 1917 nasekuqaleni kowe-1918, basasaza imibhalo eli-10 000 000 yenkupho yephecana elithi The Bible Students Monthly eyayibalaselisa umbandela othi “Ukuwa KweBhabhiloni,” owawuyibhenca ngokungenalusini iNgqobhoko. Oku kwaphumela ekubeni abefundisi babe nobutshaba baza bona basebenzisa impambano eyayikho ngexesha lemfazwe ngenjongo yokubhangisa umsebenzi wamaNgqina kaYehova.

Ngokungenakuphepheka, ukuphuma kwiBhabhiloni Enkulu kwakubandakanya ukurhoxa ekubeni lilungu leentlangano ezazifundisa iimfundiso zayo zobuxoki. ABafundi beBhayibhile benjenjalo, nangona kangangeminyaka emininzi babebagqala njengabazalwana abangamaKristu abantu becawa ababesithi bazinikezele ngokupheleleyo yaye bayakholelwa kwintlawulelo. Sekunjalo, aBafundi beBhayibhile abazange baphelele nje ngokubhala iincwadi ezichaza ukuba bayarhoxa kwiicawa zeNgqobhoko kodwa, xa kwakunokwenzeka, abanye babezifunda ngokuvakalayo iileta zabo kwiintlanganiso zecawa ekwakuvumelekile kuzo ukuba amalungu athethe. Ukuba oku kwakungenakwenzeka, babethumela umbhalo wencwadi yabo yokurhoxa kuwo onke amarhamente elo bandla—ebhalwe ngobubele nequlethe ubungqina obufanelekileyo.

Ngaba babeqinisekisa nokuba babewashiya ngasemva onke amasiko nezinto ezazibonisa ukungahloneli Thixo ezazisenziwa kwezo ntlangano? Yayinjani imeko ngexesha langaphambi kweMfazwe Yehlabathi I?

Ngaba Unqulo Lufanele Lugxuphuleke Kwiipolitiki?

Kwezobupolitika, abalawuli bamazwe amaninzi aphambili, ngenxa yokuba babeqhogene necawa yamaKatolika okanye yamaProtestanti, kwakusekukudala besithi balawula ‘ngelungelo abalinikwe nguThixo,’ njengabameli boBukumkani bukaThixo yaye banenkoliseko kaThixo ekhethekileyo. Icawa yayihambisana norhulumente; naye ke urhulumente, wayeyixhasa icawa. Ngaba aBafundi beBhayibhile nabo bangena koku?

Kunokuxelisa iicawa zeNgqobhoko, bazabalazela ukufunda kwiimfundiso nakumzekelo kaYesu Kristu nabapostile bakhe. Ufundisiso lwabo lweBhayibhile lwababonisa ntoni? Iimpapasho zokuqala zeWatch Tower zibonisa ukuba babeqonda kakuhle ukuba xa uYesu wabuzwa yirhuluneli yomRoma uPontiyo Pilato, wathi: “Ubukumkani bam asibubo obeli hlabathi.” Xa le rhuluneli yambuza ngendima yakhe, uYesu wayiphendula wathi: “Mna ndizalelwe oku; ndizele oku ehlabathini, ukuze ndiyingqinele inyaniso.” (Yoh. 18:36, 37) ABafundi beBhayibhile babesazi ukuba uYesu wabambelela ngokungenakuxengaxenga kweso sabelo. Xa uMtyholi wamthembisa zonke izikumkani zehlabathi nozuko lwazo, akazange azamkele. Xa abantu babefuna ukumenza ukumkani, wabaleka. (Mat. 4:8-10; Yoh. 6:15) ABafundi beBhayibhile abazange basiphephe isibakala sokuba uYesu wabhekisela kuMtyholi ‘njengomphathi weli hlabathi’ waza wathi uMtyholi ‘akananto naye.’ (Yoh. 14:30) Babenokubona ukuba uYesu wayengafuni ukuba yena okanye abafundi bakhe babandakanyeke kwinkqubo yezobupolitika yaseRoma kodwa wayexakeke ngokupheleleyo ekuvakaliseni “iindaba ezilungileyo zobukumkani bukaThixo.”—Luka 4:43.

Ngaba ukukholelwa kwabo kwezi zinto zibhalwe eLizwini likaThixo kwabakhuthazela ekubeni bangalihloneli igunya likarhulumente? Nakanye. Kunoko, kwabanceda baqonda isizathu sokuba iingxaki abalawuli abajongene nazo zinkulu kangaka, isizathu sokuba kubekho ukuchas’ umthetho okungaka, nesizathu sokuba iinkqubo zoorhulumente zokuphucula imeko yabantu ngokufuthi zingaphumeleli. Oko babekukholelwa kwabangela ukuba babe nomonde xa bejamelene nobunzima, ngenxa yokuba babenentembelo yokuba uThixo ngexesha lakhe elifanelekileyo wayeya kubakhulula ngokusisigxina ngoBukumkani bakhe. Ngelo xesha babesithi “amagunya aphezulu,” ekubhekiselwe kuwo kumaRoma 13:1-7 (KJ), ngabalawuli behlabathi. Ngokuvisisana noko, bakhuthaza ukuhlonelwa kwamagosa aseburhulumenteni. Exubusha ngamaRoma 13:7, kwincwadi ethi The New Creation (eyapapashwa ngowe-1904), uC. T. Russell wathi amaKristu okwenyaniso “ngokuzenzekelayo ebeya kunyaniseka ngokwenene kwindlela azigqala ngayo izikhakhamela zeli hlabathi, aze ayithobele ngokwenene imithetho noko kufunwa ngumthetho, ngaphandle kwaxa ezi zingqubana neemfuneko zikaThixo kunye nemithetho yakhe. Bambalwa ukuba bakho abalawuli basemhlabeni kulo mhla wethu abaya kukubona kuphosakele ukugqala uMdali ophakamileyo nokuyithobela kakhulu imithetho yakhe. Ngenxa yoko, [amaKristu okwenyaniso] afanele abe phakathi kwabona bantu bawuthobelayo umthetho kweli xesha—angabi ngabaphembi bodushe, angabi ngabantu beengxwabangxwaba, angahlabi amadlala.”

NjengamaKristu, aBafundi beBhayibhile babesazi ukuba umsebenzi ababefanele bazibhokoxe kuwo yayikukushumayela uBukumkani bukaThixo. Yaye, njengokuba umqulu wokuqala wencwadi ethi Studies in the Scriptures usitsho, “ukuba oku kwenziwa ngokuthembeka, aliyi kubakho ixesha okanye utyekelo lokugxuphuleka kwiipolitiki zoorhulumente abakhoyo.”

Kule nkalo, ngomlinganiselo omkhulu, babefana naloo maKristu okuqala achazwe nguAugustus Neander kwincwadi ethi The History of the Christian Religion and Church, During the Three First Centuries: “AmaKristu ayahlukile yaye engafani norhulumente, . . . yaye ubuKristu babubonakala bukwazi ukuphembelela ubomi babantu abaqhelekileyo kuphela ngendlela ekumele kuvunywe ukuba yeyona inyulu, ngokuzabalazela ukubethelela imvakalelo engcwele ngakumbi kubemi belizwe.”

Xa Kwaqhambuka Imfazwe Ehlabathini

Ehlabathini lonke iziganeko zeMfazwe Yehlabathi I zalivavanya ngokuqatha ibango labo babesithi bangamaKristu. Yayiyeyona mfazwe imanyumnyezi kwezakha zaliwa ukuza kuthi ga ngelo xesha; phantse bonke abemi bomhlaba babebandakanyekile ngandlel’ ithile.

Nangona iVatican yayivelana neeCentral Powers (iJamani namazwe eyayincedisana nawo), uPopu Benedict XV wazama ukubonakala engathabathi cala. Noko ke, kwilizwe ngalinye abefundisi, abamaKatolika nabamaProtestanti, babethabathe amacala. Ethetha ngemeko kwelaseUnited States, uGqr. Ray Abrams, kwincwadi yakhe ethi Preachers Present Arms, wabhala: “Okokuqala kwimbali yonqulo iicawa zamanyana ngenjongo enye. . . . Iinkokeli azizange zilibazise ngaphambi kokuba zizilungelelanise kakuhle ngelo xesha lemfazwe. Kungaphelanga neeyure ezingamashumi amabini anesine kukhutshwe isibhengezo semfazwe, iBhunga Elimanyeneyo leeCawa zikaKristu zaseMerika lenza amalungiselelo okuyixhasa ngokupheleleyo imfazwe. . . . ICawa yamaRoma Katolika, yalungiselela inkonzo efanayo ngaphantsi kweBhunga leSizwe leMfazwe lamaKatolika, elalisalathiswa ngoobhishophu abakhulu abalishumi elinesine yaye uKhardinal Gibbons engumongameli, labonisa ukuzinikela okufanayo kuloo mfazwe. . . . Iicawa ezininzi zenza okungakumbi kunokuba zazicelwe ukuba zenjenjalo. Zaba ngamaziko okugaya abo babeza kuya emkhosini.” Benza ntoni aBafundi beBhayibhile?

Nangona babezabalazela ukwenza oko babevakalelwa kukuba kwakumkholisa uThixo, babengasoloko bengoondilele ngokupheleleyo. Oko babekwenza kwakuphenjelelwa yinkolelo, ababenayo nabanye ababezibabaza bengamaKristu, yokuba “amagunya aphezulu” ‘ayemiswe nguThixo,’ ngokwendlela ebhalwe ngayo kwiKing James Version. (Roma 13:1) Ngaloo ndlela, ngokuvisisana noko kwavakaliswa ngumongameli waseUnited States, IMboniselo yabongoza aBafundi beBhayibhile ukuba bathelele ekugcineni uMeyi 30, 1918, njengosuku lokuthandaza nokukhunga ngokuphathelele umphumo wemfazwe yehlabathi.a

Ebudeni beminyaka yemfazwe, iimeko aBafundi beBhayibhile ngabanye ababegaxeleka kuzo zazisahluka. Nendlela ababehlangabezana ngayo nezi meko yayisahlukahlukana. Beziva benyanzelekile ukuthobela “amagunya akhoyo,” njengokuba babebabiza njalo abalawuli behlabathi, abanye bephethe imipu neencula baya emfazweni. Kodwa bekhumbula isibhalo esithi, “Akuyi kubulala,” babedubula emoyeni ngezixhobo zabo okanye bazame nje ukubetha isixhobo sotshaba siwe. (Eks. 20:13, App) Imbinana, njengoRemigio Cuminetti, eItali, yala ukunxiba iimpahla zomkhosi. Ngelo xesha urhulumente waseItali wayengenalo ilungiselelo lokukhulula nabani na ukuba ngenxa yesazela angayi emfazweni. Yena wavela enkundleni izihlandlo ezihlanu waza wavalelwa ezintolongweni nakwindawo yabantu abagula ngengqondo, kodwa ukholo nozimiselo lwakhe aluzange lushukunyiswe. ENgilani abanye abenza izicelo zokuba bangayi emfazweni babelwa umsebenzi oya kuba luncedo kwelo lizwe okanye bathunyelwa kwisebe lomkhosi elingahambiyo liyokulwa. Abanye, abanjengoPryce Hughes, bahlala bengoondilele ngokungqongqo, kungakhathaliseki ukuba oko kwakuya kuba nayiphi imiphumo kubo.

Okwelo xesha ke, ingxelo yaBafundi beBhayibhile yayingekafani ncam naleyo yamaKristu okuqala echazwe kwincwadi ethi The Rise of Christianity, ebhalwe nguE. W. Barnes, owanikela le ngxelo: “Ukuyihlolisisa ngenyameko yonke inkcazelo ekhoyo kubonisa ukuba, de kwaba lixesha likaMarcus Aurelius [umlawuli waseRoma ukususela ngowe-161 ukusa kowe-180 C.E.], akukho mKristu waba lijoni; yaye akukho joni, emva kokuba libe ngumKristu, elahlala emkhosini.”

Kodwa ke, ekupheleni kweMfazwe Yehlabathi I, kwavela enye imeko eyabangela ukuba amaqela onqulo acace elona cala kanye kanye angakulo.

Imbonakaliso Yobupolitika YoBukumkani BukaThixo?

NgoJuni 28, 1919, kwatyikitywa isivumelwano soxolo, esasiquka uMgaqo-siseko woManyano Lwezizwe, eVersailles, eFransi. Kwanangaphambi kokutyikitywa kweso sivumelwano soxolo, iBhunga Elimanyeneyo leeCawa zikaKristu zaseMerika lavakalisa ukuba olu Manyano lwaluya kuba “yimbonakaliso yobupolitika yoBukumkani bukaThixo emhlabeni.” Yaye iNdlu yeeNgwevu yaseUnited States yafumana intaphane yeeleta ezivela kumaqela onqulo eyibongoza ukuba iwamkele uMgaqo-siseko woManyano Lwezizwe.

AmaNgqina kaYehova akazange ahambe nomndilili. Kwanangaphambi kokuba isivumelwano soxolo sityikitywe (ngo-Oktobha), uJ. F. Rutherford wanikela intetho eCedar Point, eOhio, ngoSeptemba 7, 1919, awabonisa kuyo ukuba buBukumkani obumiselwe nguThixo kungekhona uManyano lweZizwe obukuphela kwethemba loluntu olubandezelekileyo. Ngoxa babevuma ukuba umanyano lwabantu lokuphucula iimeko lwalunokufeza lukhulu, abo Bafundi beBhayibhile abazange babutyeshele uBukumkani bukaThixo baze bamkele ilungiselelo lezobupolitika elisekwe ngabezobupolitika laza lasikelelwa ngabefundisi. Kunoko, baqhubeka nomsebenzi wokunikela ubungqina emhlabeni wonke ngoBukumkani uThixo abunikele kuYesu Kristu. (ISityhi. 11:15; 12:10) KwiMboniselo (yesiNgesi) kaJulayi 1, 1920, kwacaciswa ukuba lo yayingumsebenzi uYesu awayewuxele kwangaphambili kuMateyu 24:14.

Kwakhona, emva kweMfazwe Yehlabathi II, amaKristu ayejamelene nembambano efanayo. Ngoku, yayibandakanya iZizwe Ezimanyeneyo, ilandela loManyano. Ngoxa iMfazwe Yehlabathi II yayisaqhubeka, ngowe-1942, amaNgqina kaYehova ayesele eqondile ngokusuka eBhayibhileni, kwiSityhilelo 17:8, ukuba intlangano yoxolo lwehlabathi yayiya kuvuka kwakhona, nokuba yayingayi kuphumelela ukuzisa uxolo ngokusisigxina. Oku kwacaciswa nguN. H. Knorr, ngoko owayengumongameli weWatch Tower Society, kwintetho yendibano ethi “Uxolo—Ngaba Lunokuhlala Luhleli?” Ngenkalipho amaNgqina kaYehova ayivakalisa loo mbono ngemeko yehlabathi. Kwelinye icala, iinkokeli zamaKatolika, zamaProtestanti nezamaYuda zazibandakanyeke ngokoqobo kwiingxoxo ezaziseSan Francisco ngowe-1945 ekwakuqulunqwa kuzo uMgaqo-siseko weZizwe Ezimanyeneyo. Kubakhi-mkhanya ababondele ezi ziganeko, wayecacile lowo wayefuna ukuba “sisihlobo salo ihlabathi” nalowo wayezabalazela ‘ukungabi ngowehlabathi,’ njengokuba uYesu wayethe kuya kuba njalo ngabafundi bakhe.—Yak. 4:4; Yoh. 17:14.

Ingxelo Yokuba Ngoondilele KwamaKristu

Nangona amaNgqina kaYehova aziqonda ngokukhawuleza ezinye iimbambano ezazibandakanya ulwalamano lomKristu nehlabathi, eminye imibandela yafuna ixesha elingakumbi. Noko ke, njengokuba iMfazwe Yehlabathi II yayithabath’ unyawo eYurophu, inqaku elibalulekileyo elaphuma kwiMboniselo (yesiNgesi) kaNovemba 1, 1939, lawanceda ayiqonda intsingiselo yokuba ngoondilele kwamaKristu. Eli nqaku lathi, phambi koThixo abalandeli bakaYesu Kristu banembopheleleko yokuba bazinikele ngokupheleleyo kuye nakuBukumkani bakhe, uLawulo lobuthixo. Bafanele bathandazele uBukumkani bukaThixo, kungekhona ihlabathi. (Mat. 6:10, 33) Eli nqaku laqiqa ngelithi, ngenxa yoko uYesu Kristu wakutyhilayo ngalowo anguye umlawuli ongabonakaliyo wehlabathi (Yoh. 12:31; 14:30), umntu ozinikele kuBukumkani bukaThixo unokukwazi njani ukukhetha elinye icala kunelinye kwiingxwabangxwaba zeli hlabathi? Ngaba uYesu akazange atsho ngabalandeli bakhe ukuba: “Abangabo abehlabathi, njengokuba nam ndingenguye owehlabathi”? (Yoh. 17:16) Ukuba ngoondilele kwamaKristu kwakuyinto ihlabathi ngokubanzi elalingayi kuyiqonda. Kodwa ngaba amaNgqina kaYehova ayeya kuphila ngokuvisisana nako?

Ukuba ngoondilele kwawo kwavavanywa ngokuqatha ebudeni beMfazwe Yehlabathi II, ngokukodwa eJamani. Umbhali-mbali uBrian Dunn wathi: ‘AmaNgqina kaYehova ayengahambisani nobuNazi. Eyona nto ibalulekileyo amaNazi awayengayifuni kuwo yayikukuba ngoondilele kwawo kwezobupolitika. Oku kwakuthetha ukuba akukho kholwa laliya kuphakamisa izixhobo, libe nesikhundla sobupolitika, libe nenxaxheba kwimibhiyozo kawonke wonke, okanye lenze nantoni na ebonakalisa ukuyihlonela.’ (The Churches’ Response to the Holocaust, 1986) Kwincwadi ethi A History of Christianity, uPaul Johnson wongezelela: “Amaninzi agwetyelwa ukufa ngenxa yokungavumi ukungena emkhosini . . . okanye aphelela eDachau okanye kwizibhedlele zamageza.” Mangaphi amaNgqina awavalelwa ezintolongweni eJamani? Kamva amaNgqina kaYehova eJamani anikela ingxelo yokuba angama-6 262 kuwo abanjwa aza angama-2 074 kwelo nani afakwa kwiinkampu zoxinaniso. Ababhali behlabathi ngokuqhelekileyo banikela amanani angaphezulu kwalawo.

EBritani, apho kwakugaywa amadoda nabafazi, umthetho wawunelungiselelo lokukhulula abantu bangayi emkhosini; kodwa iinkundla ezininzi zala ukulidlulisela eli lungiselelo kumaNgqina kaYehova, yaye iijaji zawawisela izigwebo zokuvalelwa entolongweni iminyaka engaphezu kwama-600 xa idityanisiwe. EUnited States, amakhulu amaNgqina kaYehova njengabalungiseleli abangamaKristu awazange abizelwe emkhosini. Amanye angaphezu kwama-4 000, angazange alifumane eli lungiselelo elalilungiselelwe ngoMthetho weNkonzo Ekhethayo, abanjwa aza avalelwa entolongweni iminyaka kwabanye eyayisiba mihlanu. Kuwo onke amazwe asemhlabeni, amaNgqina kaYehova ayenokuma okufanayo kokuba ngoondilele kwamaKristu.

Noko ke, uvavanyo lokunyaniseka kwawo ekubeni ngoondilele akuzange kuphele ekupheleni kwemfazwe. Nangona ixesha lobunzima lowe-1939-45 lalidlule, kwakubakho eminye imilo; kwanangamaxesha awayebonakala engawoxolo, amazwe amaninzi akhetha ukuba nenkonzo yomkhosi esisinyanzelo. AmaNgqina kaYehova, njengabalungiseleli abangamaKristu, aqhubeka ejamelana nokuvalelwa ezintolongweni kwiindawo apho ayengalifumani ilungiselelo lokukhululwa kwinkonzo yomkhosi khona. Ngowe-1949, xa uJohn Tsukaris noGeorge Orphanidis bengazange bavume ukuphakamisa izixhobo baze balwe nabanye abantu, urhulumente waseGrisi wayalela ukuba babulawe. Impatho (engafaniyo) eyafunyanwa ngamaNgqina kaYehova eGrisi izihlandlo ezininzi yayisiba ngqwabalala gqitha kangangokuba ekuhambeni kwexesha iBhunga laseYurophu (iKomiti Elwela Amalungelo Abantu) lazama ukusebenzisa impembelelo yalo ngenxa yawo, kodwa ngenxa yengcinezelo yeCawa yobuOthodoki yamaGrike, kude kube ngowe-1992 izibongozo zalo, ngaphandle kwezimbalwa, ngobuqhophololo bezingasiwa so. Noko ke, abanye oorhulumente bakufumanise kungekuhle ukuqhubeka bewohlwaya amaNgqina kaYehova ngenxa yeenkolelo zawo zonqulo. Ngeminyaka yee-1990, kumazwe ambalwa, anjengeSweden, iFinland, iPoland, iNetherlands, neArgentina, urhulumente ebengawanyanzeleli kwinkonzo yomkhosi okanye kwinkonzo ethabathela indawo inkonzo yomkhosi amaNgqina, nangona imeko nganye yayihlolisiswa ngenyameko.

Kwiindawo ngeendawo, kuye kwafuneka ukuba amaNgqina kaYehova ajamelane neemeko ezikucel’ umngeni ukuba ngoondilele kwawo kobuKristu. Oorhulumente abaphetheyo kuMntla noMzantsi Merika, eAfrika, kuMbindi Mpuma, kuMntla Ireland nakwezinye iindawo baye bajamelana nokuphikiswa ngogonyamelo yimikhosi evukelayo. Ngenxa yoko, oorhulumente nemikhosi ephikisayo baye banyanzelela amaNgqina kaYehova ukuba abaxhase. Kodwa amaNgqina kaYehova aye angoondilele ngokupheleleyo. Amanye aye abethwa ngokungenalusini, ada abulawa, ngenxa yokuma kwawo. Noko ke, ngokufuthi ukuba ngoondilele kwamaNgqina kaYehova njengamaKristu okwenyaniso kuye kwawenza ahlonelwa ngamagosa amacala omabini, yaye amaNgqina ayavunyelwa ukuba aqhubeke engaphazanyiswa kumsebenzi wawo wokuxelela abanye ngeendaba ezilungileyo zoBukumkani bukaYehova.

Ngeminyaka yee-1960 neyee-1970, ukuba ngoondilele kwamaNgqina kwavavanywa ngokuqatha xa kwakunyanzeliswa ukuba bonke abemi baseMalawi bathenge iqweqwe elibonisa ukuba bangamalungu eqela lobupolitika elilawulayo. AmaNgqina kaYehova akubona kuphikisana neenkolelo zawo zamaKristu ukuba abe nesabelo koku. Ngenxa yoko, atshutshiswa ngendlela enogonyamelo olungazange lubonwe ngaphambili. Amashumi amawaka anyanzeleka ukuba abhace kwelo, yaye ekuhambeni kwexesha amaninzi abuyiselwa kwilizwe ebekulo ngenkani ukuze aphathwe kakubi ngakumbi.

Nangona etshutshiswa ngogonyamelo, amaNgqina kaYehova akakhange abe nomoya wemvukelo. Iinkolelo zawo aziyongozi kuye nawuphi na urhulumente aphila kwilizwe lakhe. Ngokwahlukileyo koko, iBhunga leeCawa zeHlabathi liye lancedisa ngemali kumalinge okuvukela, abefundisi bamaKatolika baye baxhasa imikhosi yabanqolobi. Kodwa ukuba omnye wamaNgqina kaYehova ebeya kubandakanyeka kwiintshukumo zobhukuqo-mbuso, oko bekuya kufana nokukhanyela ukholo lwakhe.

Liyinyaniso elokuba amaNgqina kaYehova akholelwa ukuba bonke oorhulumente babantu baza kususwa buBukumkani bukaThixo. Oku koko iBhayibhile ikutshoyo kuDaniyeli 2:44. Kodwa, njengokuba amaNgqina esitsho, kunokuthi ngabantu abaya kumisa obo Bukumkani, esi sibhalo sithi “uThixo wamazulu uya kumisa ubukumkani.” Kwakhona, ayacacisa ukuba esi sibhalo asithi uThixo unike abantu igunya lokuba bahlahlel’ indlela obo Bukumkani ngokususa ulawulo lwabantu. AmaNgqina kaYehova ayaqonda ukuba umsebenzi wamaKristu okwenyaniso kukushumayela nokufundisa. (Mat. 24:14; 28:19, 20) Ngokuvisisana nentlonelo anayo ngeLizwi likaThixo, ingxelo ibonisa ukuba akukho namnye kuwo owakhe wazama ukubhukuqa urhulumente walo naluphi na uhlobo naphi na ehlabathini, yaye engazange enze iyelenqe lokwenzakalisa igosa likarhulumente. Iphephandaba laseItali iLa Stampa lathi ngamaNgqina kaYehova: “Angabona bemi banyanisekileyo nabani na anokubanqwenela: awakuphephi ukuhlawula iirhafu okanye azame ukuphepha imithetho enzima ukuze alungelwe.” Sekunjalo, ngenxa yokuba ebuqonda ubunzulu balo mbandela phambi kukaThixo, ngamnye kuwo uzimisele ngokungqongqo ukuhlala ‘engenguye owehlabathi.’—Yoh. 15:19; Yak. 4:4.

Xa Kwathi Kwahlonelwa Imifuziselo Yesizwe

Xa uAdolf Hitler waqalisa ukulawula eJamani, kwabakho umoya wempambano wokuthand’ izwe ehlabathini lonke. Ukuze kukhuthazwe abantu bangenelele emkhosini, ukuba nenxaxheba kwimibhiyozo yokuthand’ izwe kwenziwa isinyanzelo. EJamani wonk’ umntu kwakufuneka akhahlele ngendlela emiselweyo aze athi, “Heil Hitler!” Oku yayikukuphakanyiswa kukaHitler njengomsindisi; kwakusenziwa ngenjongo yokudlulisela ingcamango yokuba onke amathemba abantu ayexhomekeke kukhokelo lwakhe. Kodwa amaNgqina kaYehova ayengenakuthelela kuloo moya. Ayesazi ukuba unqulo lwawo lumele luye kuYehova kuphela yaye wayevuse uYesu Kristu ukuba abe ngumSindisi woluntu.—Luka 4:8; 1 Yoh. 4:14.

Kwanangaphambi kokuba uHitler abe nguzwilakhe waseJamani, amaNgqina kaYehova, kwincwadana ethi The Kingdom, the Hope of the World eyapapashwa ngowe-1931, ayesewuhlolisisile umzekelo weZibhalo wamaqabane amathathu angamaHebhere awayenenkalipho omprofeti uDaniyeli eBhabhiloni. Xa ayalelwa ngukumkani ukuba aqubude phambi komfanekiso xa kudlala umculo othile, loo maHebhere athembekileyo awazange avume ukulalanisa, yaye uYehova wayibonisa ngokucacileyo inkoliseko yakhe ngokuwahlangula. (Dan. 3:1-26) Le ncwadana yabonisa ukuba imibhiyozo yokuthand’ izwe yayilucelo-mngeni lokuthembeka olufanayo kumaNgqina kaYehova anamhlanje.

Ngokuthe ngcembe, ukunyanzelelwa kwimibhiyozo yokuthand’ izwe kwanwenwela ngaphandle kweJamani. NgoJuni 3, 1935, kwindibano eyayiseWashington, D.C., xa uJ. F. Rutherford wabuzwa ngokukhahlel’ indwe ezikolweni, wagxininisa kumba wokuthembeka kuThixo. Emva kweenyanga ezimbalwa, xa uCarleton B. Nichols, Omnci., waseLynn, eMassachusetts, oneminyaka esibhozo ubudala, engazange avume ukukhahlela indwe yaseMerika nokuthelela ekuvumeni ingoma yokuthand’ izwe, oku kwachazwa kumaphephandaba alo lonke elaseUnited States.

Ukuze acacise lo mbandela, uMzalwan’ uRutherford wanikela intetho kunomathotholo ngo-Oktobha 6 ngombandela othi “Ukukhahlela Indwe,” awathi kuyo: “Kubantu abaninzi ukukhahlela indwe ngumbandela nje wesiko nongenantsingiselo kangako okanye ongenantsingiselo kwaphela. Kwabo bakujonga ngokunyanisekileyo ngokusuka eZibhalweni, kuthetha lukhulu.

“Indwe imela amagunya abonakalayo alawulayo. Ukuzama ukunyanzela ngomthetho ummi okanye umntwana wommi ukuba akhahlele nayiphi na into, okanye avume oko kufane kuthiwe ‘ziingoma zokuthand’ izwe’, akulunganga yaye kuphosakele ngokupheleleyo. Imithetho imiselwe kwaye iyanyanzeliswa ukuze kuthintelwe ukwenziwa kwezenzo zasekuhleni nezinokwenzakalisa omnye, yaye ayimiselwanga ukuze kunyanzelelwe umntu ukuba enze okungqubanayo nesazela sakhe, yaye ngokukodwa xa eso sazela silawulwa ngokuvisisana neLizwi likaYehova uThixo.

“Ukungavumi ukukhahlela indwe, nokuma uthule, njengokuba le nkwenkwe yenzile, bekungenakwenzakalisa mntu. Ukuba umntu ngokunyanisekileyo ukholelwa kwelokuba ukukhahlela indwe kuchasene nomthetho kaThixo, ngoko ke ukunyanzela loo mntu ukuba akhahlele indwe ngokuchaseneyo neLizwi likaThixo, nangokuchaseneyo nesazela sakhe, kumenzakalisa kakhulu loo mntu. URhulumente akanalungelo ngokomthetho okanye ngenye indlela lokwenzakalisa abantu.”

Izizathu ezingakumbi zokuma kwamaNgqina kaYehova zacaciswa kwincwadana ethi Loyalty, eyapapashwa kwangowe-1935. Kwatsalelwa ingqalelo kwizibhalo ezinjengezi zilandelayo: IEksodus 20:3-7, eyayalela ukuba kunqulwe uYehova kuphela nokuba abakhonzi bakaThixo babengafanele benze okanye baqubude phambi kwawo nawuphi na umfanekiso okanye into emilise okwento esezulwini okanye emhlabeni; uLuka 20:25, apho uYesu Kristu wayalela ukuba kunokunikelwa okukaKesare kuKesare kuphela kodwa okukaThixo nako kunikelwe kuYe; neZenzo 5:29, apho ngenkalipho abapostile bathi, “Simelwe kukuthi sive uThixo [njengomlawuli, NW] kunokuba sive abantu.”

EUnited States, ukufaneleka kokunyanzelisa ukuba nabani na akhahlele indwe kwaphakanyiswa ezinkundleni. NgoJuni 14, 1943, iNkundla ePhakamileyo yaseUnited States yasirhoxisa isigqibo sayo sangaphambili yaza, kwityala leWest Virginia State Board of Education v. Barnette, yawisa isigqibo sokuba ukunyanzelisa ukuba umntu akhahlele indwe kwakungqubana nesiqinisekiso senkululeko esibhalwe kumgaqo-siseko welo lizwe.b

Imbambano yemibhiyozo yobuhlanga ibingapheleliselwanga kwelaseJamani naseUnited States. KumNtla nakuMzantsi Merika, eYurophu, eAfrika naseAsia, amaNgqina kaYehova aye atshutshiswa ngogonyamelo ngenxa yokungabi nanxaxheba kwawo kule mibhiyozo, nangona esima ngentlonelo ebudeni bokukhahlelwa kwendwe okanye kokwenziwa kweminye imibhiyozo efana nalo. Abantwana baye babethwa; abaninzi baye bagxothwa ezikolweni. Kuye kwaliwa amadabi amaninzi ezinkundleni zamatyala.

Noko ke, abakhi-mkhanya baye baziva benyanzelekile ukuba bavume ukuba kulo umbandela, njengakweminye, amaNgqina kaYehova azingqine efana namaKristu okuqala. Ukanti, njengokuba incwadi ethi The American Character isitsho: “Kwabaninzi gqitha . . . ukungavumi kwamaNgqina ukwenza oku kwakungaqondakali njengokuba nokungavumi kwamaKristu [kuBukhosi baseRoma] ukubingelela kumLawuli onguThixo kwakungaqondakali kuTrajan noPliny.” Oku kwakumele kube njalo, ekubeni amaNgqina kaYehova, ngokufanayo namaKristu okuqala, ayengayijongi imicimbi ngendlela ihlabathi eliyijonga ngayo kodwa eyijonga ngokuvisisana nemigaqo yeBhayibhile.

Ukuma Kwawo Kucaciswe Kakuhle

Emva kokuba amaNgqina kaYehova enyamezele uvavanyo oluqatha kangangeminyaka emininzi ngenxa yobundilele bobuKristu, IMboniselo kaJuni 1, 1980, (kaNovemba 1, 1979, ngesiNgesi) yakuqinisa ukuma kwawo. Yacacisa nesizathu soko kwenziwa ngamaNgqina njengabantu ngabanye xa yathi: “Ngenxa yokufundisisa ngenyameko iLizwi likaThixo, la maKristu aselula akwazi ukwenza isigqibo. Akukho mntu wumbi wawenzela esi sigqibo. Umntu ngamnye kuwo wakwazi ukuzenzela, ngokusekelwe kwisazela sakhe ngamnye esiqeqeshwe ngeBhayibhile. Isigqibo sawo sibe kukuzinxwema kwizenzo zentiyo nezobundlobongela nxamnye nabanye abantu bezinye iintlanga. Ewe, ayekholelwa, yaye efuna ukuba nesabelo kwinzaliseko yesiprofeto esaziwayo sikaIsaya esithi: ‘Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.’ (Isa. 2:4) Aba bafana bazo zonke iintlanga benza kanye oko.”

Ebudeni beminyaka ukubambelela kwabo kubundilele bobuKristu okwakuvavanywa ngayo, ukukuhlolisisa kwakhona oko iBhayibhile ikutshoyo, kumaRoma 13:1-7, ‘ngamagunya awongamileyo’ kwakhokelela ekubeni luchazwe kakuhle ulwalamano lwamaNgqina noorhulumente behlabathi. Oku kwapapashwa kwinkupho yeMboniselo kaMeyi 1, Meyi 15, nekaJuni 1, 1963, (kaNovemba 1, Novemba 15 nekaDisemba 1, 1962, ngesiNgesi) kwaza kwaqinisekiswa kwinkupho kaNovemba 1, 1990. Loo manqaku abethelela isikhundla sikaYehova uThixo ‘njengaLowo uPhakamileyo,’ ngoxa ebonisa nokuba abalawuli behlabathi ‘bangamagunya awongamileyo’ kuphela ngokubhekisele kwabanye abantu nakwimisebenzi yabo uThixo abavumele ukuba bayenze kule nkqubo ikhoyo yezinto. La manqaku abonisa ukuba amaKristu okwenyaniso ngokuqhutywa zizazela kufuneka abahlonele abalawuli behlabathi abanjalo aze abathobele kuyo yonke imibandela engangqubaniyo nomthetho kaThixo nezazela zawo eziqeqeshwe ngeBhayibhile.—Dan. 7:18; Mat. 22:21; IZe. 5:29; Roma 13:5.

Ukubambelela ngokuqinileyo kwamaNgqina kaYehova kule milinganiselo yeBhayibhile kuwenze aziwa njengabantu abahlukileyo ehlabathini ngendlela ebakhumbuza abantu ngamaKristu okuqala.

Xa Ihlabathi Laliba Neeholide Zalo

Xa amaNgqina kaYehova ahlukanayo neemfundiso ezazinemvelaphi yobuhedeni, ayeka nokuba nesabelo kumasiko amaninzi awayenemvelaphi efanayo. Kodwa okwethuba elithile, iiholide ezithile azizange zihlolisiswe ngenyameko njengokuba kwakufuneka. Enye yezi yayiyiKrismesi.

Le holide yayibhiyozelwa minyaka le kwanangabo babesebenza kwikomkhulu leWatch Tower Society kwiKhaya laseBheteli eliseBrooklyn, eNew York. Kwakusele kuyiminyaka emininzi besazi ukuba uDisemba 25 wayengenguwo umhla ochanileyo, kodwa babeqiqa ngelokuba loo mhla kwakukudala unxulunyaniswa ngabantu abaninzi nokuzalwa koMsindisi yaye ukwenzela abanye okulungileyo kwakufanelekile nangawuphi na umhla. Noko ke, emva kokuphanda ngakumbi ngalo mbandela, abo basebenza kwikomkhulu loMbutho, kwanabo babesebenza kwiiofisi zamasebe zoMbutho eNgilani naseSwitzerland, bagqiba kwelokuba bayeke ukuba nesabelo kwimibhiyozo yeKrismesi, ngoko akuzange kubhiyozelwe iKrismesi apho emva kowe-1926.

UR. H. Barber, omnye owayesebenza kwikomkhulu owenza uhlolisiso olucokisekileyo ngemvelaphi yamasiko eKrismesi nesiqhamo awayesivelisa, wakuchaza kwinkqubo kanomathotholo oko wayekufumanisile. Loo nkcazelo yapapashwa nakwiThe Golden Age kaDisemba 12, 1928. Yayidandalazisa ngokucokisekileyo imvelaphi enyelis’ uThixo yeKrismesi. Ukususela ngoko, imvelaphi yobuhedeni yamasiko eKrismesi iyaziwa ngabantu ngokubanzi, kodwa bambalwa abantu abayiguqulayo indlela yabo yokuphila ngenxa yoku. Kwelinye icala, amaNgqina kaYehova akulungela ukwenza utshintsho oluyimfuneko ukuze amkeleke ngakumbi njengabakhonzi bakaYehova.

Xa aboniswa ukuba ukubhiyozela ukuzalwa kukaYesu kwakuye kwaba yinto ebaluleke ngakumbi ebantwini kunentlawulelo eyalungiselelwa kukufa kwakhe; ukuba imibhiyozo yale holide nomoya ezazinikelwa ngawo izipho oko kwakungamzukisi uThixo; ukuba izazi ekwakuxeliswa ukukhupha kwazo izipho eneneni zazingoojong’ iinkwenkwezi abaphefumlelwe ziidemoni; ukuba abazali babemisela abantwana babo umzekelo wokuxoka ngokubaxelela ngoSanta Claus; ukuba kuyavunywa ukuba igama elithi “St. Nicholas” (Santa Claus) yayilelinye igama likaMtyholi; nokuba imibhiyozo enjalo, njengokuba uKhardinal Newman kwincwadi yakhe ethi Essay on the Development of Christian Doctrine evuma, “yayiyimixokelelwane yokuqamangela abantu kunqulo lweedemoni” icawa eyayiyamkele—xa enziwa azazi ezi zinto, amaNgqina kaYehova ngokukhawuleza nangokusisigxina ayeka ukuba nenxaxheba kwimibhiyozo yeKrismesi.

AmaNgqina kaYehova ayazonwabisa neentsapho nabahlobo bawo. Kodwa awabi nanxaxheba kwiiholide nemibhiyozo enxulumene noothixo babahedeni (njengokuba kunjalo ngeeholide ezinjengeIsta, uSuku loNyaka Omtsha, iMay Day, noSuku looMama). (2 Kor. 6:14-17) NjengamaKristu okuqala,c awabhiyozeli nemihla yokuzalwa. Kwaye ngentlonelo awabi nanxaxheba kwiiholide zesizwe zokukhumbula iziganeko zobupolitika okanye zomkhosi yaye awanikeli imbeko ebonisa unqulo kumaqhawe esizwe. Ngoba? Ngenxa yokuba amaNgqina kaYehova awayonxalenye yehlabathi.

Ukunceda Abanye Abantu

Ubomi basekuhlaleni nobesithethe kuBukhosi bamaRoma babusekelwe ekuhloneleni oothixo. Ekubeni amaKristu ayengabi nanxaxheba kuyo nantoni na engcoliswe ngoothixo babahedeni, abantu babebugqala ubuKristu busisinyeliso kwindlela bona ababephila ngayo; yaye ngokutsho kombhali-mbali uTacitus, kwakusithiwa amaKristu abathiyile abantu. Edlulisela imvakalelo efanayo, uMinucius Felix, kwiincwadi zakhe, ucaphula umRoma esithi kumKristu awayeqhelene naye: “Aniyi kwimiboniso; aninanxaxheba kwimingcelele . . . niyayicekisa imidlalo engcwele.” Abemi beRoma yamandulo babengawaqondi kakuhle amaKristu.

Ngokufanayo namhlanje, amaNgqina kaYehova awaqondwa ngabantu abaninzi ehlabathini. Abantu basenokuba bayayibuka imilinganiselo ephakamileyo yokuziphatha yamaNgqina kodwa bavakalelwa kukuba amaNgqina afanele abelane nehlabathi eliwangqongileyo kwimicimbi yalo yaye abe negalelo ekwenzeni ihlabathi libe yindawo elunge ngakumbi. Noko ke, abo baye bawazi kakuhle amaNgqina kaYehova baye baqonda ukuba zonke izinto azenzayo zinesizathu esiseBhayibhileni.

Kunokuba azinxweme kolunye uluntu, amaNgqina kaYehova anikela ngobomi bawo ekuncedeni abanye abantu ngendlela uYesu Kristu awamisela umzekelo ngayo. Anceda abantu bafunde indlela yokuhlangabezana ngokunempumelelo neengxaki zobomi ngoku ngokubaqhelanisa noMdali nemigaqo yokufumana ubomi eyandlalwe eLizwini lakhe eliphefumlelweyo. Abelana ngokukhululekileyo nabamelwane bawo ngeenyaniso zeBhayibhile ezinokuguqula imbono yomntu iphela ngobomi. Iinkolelo zawo zisekelwe ekuqondeni ukuba “ihlabathi ke liyadlula,” ukuba kungekudala uThixo uya kungenelela ukuze aphelise le nkqubo ikhoyo ingendawo yezinto, nokuba abo bahlala bengeyonxalenye yehlabathi yaye benokholo ngokupheleleyo kuBukumkani bukaThixo balindwe likamva elizukileyo.—1 Yoh. 2:17.

[Imibhalo esemazantsi]

[Amagama acatshulweyo akwiphepha 188]

Abangomakheswa, kodwa abaphili ubomi obufana nobabantu behlabathi yokuphila

[Amagama acatshulweyo akwiphepha 189]

Baphuma kwiicawa zeNgqobhoko

[Amagama acatshulweyo akwiphepha 190]

“AmaKristu ayahlukile yaye engafani norhulumente”

[Amagama acatshulweyo akwiphepha 194]

Ubundilele bamaKristu buyavavanywa

[Amagama acatshulweyo akwiphepha 198]

‘Akukho mntu wumbi wawenzela isigqibo’

[Amagama acatshulweyo akwiphepha 199]

Isizathu sokuyeka kwabo ukubhiyozela iKrismesi

[Ibhokisi ekwiphepha 195]

Awasosisongelo Kuye Nawuphi Na Urhulumente

◆ Inqaku lomhleli elalithetha ngokuphathwa kwamaNgqina kaYehova kwilizwe elikuMzantsi Merika, elalikwi-“World-Herald” yaseOmaha, eNebraska, eUnited States, lathi: “Ufanele ube akunambono iphangaleleyo yaye ugula ngengqondo ukuze ukholelwe ukuba amaNgqina kaYehova asisisongelo kuye nawuphi na urhulumente wezobupolitika; alelona qela lonqulo lingenamvukelo nelithanda uxolo onokulifumana, ekuphela kwento ayifunayo kukuyekwa aqhubeke nokholo lwawo ngendlela yawo.”

◆ Iphephandaba laseItali, i-“Il Corriere di Trieste,” lathi: “AmaNgqina kaYehova afanele anconywe ngokuqina nokumanyana kwawo kwimigaqo yawo. Ngokungafaniyo nezinye iinkonzo, umanyano lwawo njengabantu luyawathintela ekuthandazeni kuThixo omnye, egameni loKristu omnye, ukuba asikelele amacala achaseneyo edabini, okanye ekudibaniseni iipolitiki nonqulo ukuze afeze iinjongo zabaLawuli beLizwe okanye amaqela ezobupolitika. Okokugqibela, alungele ukujamelana nokufa kunokuba ophule . . . umthetho othi UZE UNGABULALI!”

◆ Emva kokuba amaNgqina kaYehova enyamezele ukuvalw’ umlomo iminyaka engama-40 eCzechoslovakia, ngowe-1990, iphephandaba i-“Nová Svoboda” lathi: “Ukholo lwamaNgqina kaYehova luyakwalela ukusetyenziswa kwezixhobo nxamnye nabanye abantu, yaye lawo angazange avume ukuya emkhosini aza akaya kusebenza kwimigodi yamalahle aya entolongweni, maxa wambi iminyaka emine. Kuphela ngokusuka koku kucacile ukuba abambelela ngokuqinileyo kwimilinganiselo emihle yokuziphatha. Abantu abangazingciyo abanjalo besinokubasebenzisa nakwezona zikhundla ziphezulu kwezobupolitika—kodwa abasokuze bavume. . . . Kambe ke, ayawahlonela amagunya karhulumente kodwa akholelwa kwelokuba buBukumkani bukaThixo kuphela obunokuzicombulula zonke iingxaki zabantu. Kodwa ungaphazami—awaphambenanga. Angabantu abazinikele ngokunzulu kuluntu.”

[Ibhokisi/Umfanekiso okwiphepha 200, 201]

Izinto Eziyekiweyo

Lo mbhiyozo weKrismesi wawungowokugqibela kwiBheteli yaseBrooklyn ngowe-1926. Ngokuthe ngcembe aBafundi beBhayibhile baqonda ukuba imvelaphi yale holide nezinto ezenziwayo ngokunxulumene nayo azimzukisi uThixo

Kangangeminyaka, aBafundi beBhayibhile babenxiba ibheji enomnqamlezo nesithsaba njengendlela yokubafanisa, yaye lo mfanekiso wawukwiphepha elingaphambili le-“Mboniselo” (yesiNgesi) ukususela ngowe-1891 ukusa kowe-1931. Kodwa ngowe-1928 kwabethelelwa ukuba asingomfanekiso wokuhomba kodwa ngumsebenzi kabani njengengqina owawubonisa ukuba ungumKristu. Ngowe-1936 kwaboniswa ukuba ubungqina bubonisa ukuba uKristu wafela emthini, kungekhona kumnqamlezo onemiqadi emibini

Kwincwadi yabo ethi “Daily Manna,” aBafundi beBhayibhile babegcina uludwe lwemihla yokuzalwa. Kodwa emva kokuba beyekile ukubhiyozela iKrismesi naxa baqondayo ukuba ukubhiyozela imihla yokuzalwa yayikukunika izidalwa imbeko eyayingazifanelanga (esinye isizathu esabangela amaKristu okuqala angayibhiyozeli imihla yokuzalwa), aBafundi beBhayibhile bakuyeka noku

Kangangeminyaka enokuba ngama-35, uPastor Russell wayecinga ukuba iGreat Pyramid yaseGizeh yayililitye likaThixo elimisiweyo, elingqinelana namaxesha eBhayibhile. (Isa. 19:19) Kodwa amaNgqina kaYehova ayilahlile ingcamango yokuba isakhiwo esingunxantathu saseYiputa sinento yokwenza nonqulo lokwenyaniso. (Bona inkupho ye-“Mboniselo” [yesiNgesi] kaNovemba 15 nekaDisemba 1, 1928)

[Umfanekiso okwiphepha 189]

Kwasasazwa imibhalo ezizigidi ezilishumi

[Imifanekiso ekwiphepha 191]

Abanye bephethe imipu babesiya emfazweni, kodwa abanye, kuquka uA. P. Hughes waseNgilani noR. Cuminetti waseItali, abazange bavume ukubandakanyeka ngolo hlobo

[Imifanekiso ekwiphepha 193]

AmaNgqina kaYehova akazange alwamkele uManyano Lwezizwe okanye iZizwe Ezimanyeneyo njengezivela kuThixo kodwa amela uBukumkani bukaThixo ngoKristu kuphela

[Umfanekiso okwiphepha 197]

UCarleton noFlora Nichols. Xa unyana wabo engazange avume ukukhahlela indwe, oku kwaba ngundaba-mlonyeni kulo lonke ilizwe