Isahluko 29

‘Ukuthiywa Ziintlanga Zonke’

EBUDENI bobusuku bokugqibela uYesu awabuchitha nabapostile bakhe ngaphambi kokufa kwakhe, wabakhumbuza oku: “Akukho mkhonzi umkhulu kunenkosi yakhe. Ukuba banditshutshisa mna, bonitshutshisa nani; ukuba ilizwi lam baligcina, nelenu boligcina. Ke ezi zinto zonke baya kuzenza kuni ngenxa yegama lam, ngokuba bengamazi owandithumayo.”—Yoh. 15:20, 21.

UYesu wayengacingi nje kuphela ngeemeko ezithile ezimbalwa zokungamkelwa kweembono ezithile zonqulo. Kwiintsuku nje ezintathu ngaphambi koko, wayethe: “Niya kuthiywa ziintlanga zonke ngenxa yegama lam.”—Mat. 24:9.

Sekunjalo, uYesu waluleka abalandeli bakhe wathi xa bejamelene nentshutshiso, abamele babhenele kwizixhobo zokwenyama. (Mat. 26:48-52) Babengafanele babanyelise abo babebatshutshisa okanye bafune ukuziphindezela. (Roma 12:14; 1 Pet. 2:21-23) Akungebi oko kwakungenxa yokuba kwanabo babebatshutshisa babeya kuthi ngaminazana ithile babe ngamakholwa? (IZe. 2:36-42; 7:58–8:1; 9:1-22) Yonke impindezelo yayifanele iyekelwe kuThixo.—Roma 12:17-19.

Yaziwa kakuhle into yokuba amaKristu okuqala ayetshutshiswa ngolunya ngurhulumente wamaRoma. Kodwa kwakhona ifanele iqondwe into yokuba abona babephambili ekutshutshiseni uYesu Kristu yayiziinkokeli zonqulo nokuba uPontiyo Pilato, irhuluneli engumRoma, yamnikela uYesu ukuba abulawe kuba zona zazifuna oko. (Luka 23:13-25) Kwakhona emva kokufa kukaYesu yayiziinkokeli zonqulo ezaziphambili ekutshutshisweni kwabalandeli bakaYesu. (IZe. 4:1-22; 5:17-32; 9:1, 2) Ngaba oko asikuko oko kuye kwenzeka kumaxesha akutshanje?

Abefundisi Bafuna Ingxoxo Yasesidlangalaleni

Njengoko ukusasazwa kwemibhalo kaC. T. Russell kwakhawuleza kwanda kwaya kutsho kumashumi ezigidi zemibhalo ngeelwimi ezininzi, akuzange kube lula ngabefundisi bamaKatolika nabamaProtestanti ukukutyeshela oko wayekuthetha. Becatshukiswe kukubhencwa kweemfundiso zabo njengezingekho zibhalweni, yaye bekhathazwa kukuphulukana namarhamente abo, abefundisi abaninzi babeyinyelisa imibhalo kaRussell ngoxa besepulpitini. Bayalela imihlambi yabo ukuba ingalwamkeli uncwadi olwalusasazwa ngaBafundi beBhayibhile. Abaninzi babo bazama ukuphembelela abasemagunyeni ukuba bawuphelise lo msebenzi. Kwiindawo ezithile eUnited States—phakathi kwazo singabala iTampa, iFlorida; iRock Island, i-Illinois; iWinston-Salem, uMntla Carolina; naseScranton, ePennsylvania—babekhokela ekutshisweni esidlangalaleni kweencwadi ezazibhalwe nguRussell.

Abanye abefundisi bavakalelwa kukuba kwakuyimfuneko ukuphelisa impembelelo kaRussell ngokumbhenca kwingxoxo yasesidlangalaleni. Kufutshane nekomkhulu lomsebenzi wakhe, iqela labefundisi lancomela njengesithethi salo uGqr. E. L. Eaton, umfundisi weNorth Avenue Methodist Episcopal Church eAllegheny, ePennsylvania. Ngowe-1903 wafuna ingxoxo yasesidlangalaleni, waza uMzalwan’ uRussell wasamkela eso simemo.

Iingongoma ezintandathu ekwakuza kuthethelwa phezu kwazo zandlalwa, ngale ndlela ilandelayo: UMzalwan’ uRussell wavuma, kodwa uGqr. Eaton wakhanyela, ukuba imiphefumlo yabafileyo ayikho zingqondweni; ukuba “ukuza kwesibini” kukaKristu kwandulela iMinyaka Eliwaka nokuba injongo ‘yokuza kwesibini’ kwakhe neMinyaka Eliwaka kukusikelelwa kwazo zonke izizwe ezisemhlabeni; kwanokuba ziingcwele ‘zexesha leVangeli’ kuphela ezinesabelo kuvuko lokuqala kodwa isihlwele esikhulu siya kuba nethuba lokusindiswa luvuko oluya kulandela. UGqr. Eaton wavuma, kodwa uMzalwan’ uRussell wakhanyela, ukuba emva kokufa akusayi kubakho thuba lakulingwa kuye nabani na; ukuba bonke abasindisiweyo baya kungena ezulwini; nokuba abangendawo abangaguqukiyo baya kungcungcutheka ngonaphakade. Kwaqhutywa ungcelele lweengxoxo ezintandathu ngezi ngongoma, ngxoxo nganye iqhutyelwa kwiholo eyayizele imi ngeembambo eCarnegie Hall eAllegheny ngowe-1903.

Yintoni eyaxhokonkxa olo celomngeni lweengxoxo? UAlbert Vandenberg, ewujonga lo mbandela ngokusuka kwimbali, kamva wabhala oku: “Ezo ngxoxo zaziqhutywa kukho umfundisi wemvaba eyahlukileyo yamaProtestanti owayengumongameli wengxoxo nganye. Ukongezelela, abefundisi ababevela kwiicawa zeendawo ezahlukahlukeneyo babehlala eqongeni noMfundisi Eaton, kucingelwa ukuba ukuze bamxhase ngezibhalo yaye bamkhuthaze. . . . Kwainto yokuba kude kuqulunqwe umanyano olungekho mthethweni lwabefundisi bamaProtestanti yayibonisa ukuba babewoyika amandla kaRussell okuguqula amalungu eemvaba zabo.”—“UCharles Taze Russell: UMprofeti WasePittsburgh, 1879-1909,” inqaku elapapashwa kwiThe Western Pennsylvania Historical Magazine, kaJanuwari 1986, iphe. 14.

Ngokwentelekiso iingxoxo ezinjalo zazimbalwa. Azizange zivelise imiphumo eyayinqwenelwa lolo manyano lwabefundisi. Abathile bebandla likaGqr. Eaton, bechukunyiswe koko babekuvile ebudeni bongcelele lwezo ngxoxo ngowe-1903, bayishiya icawa yakhe baza bakhetha ukunxulumana naBafundi beBhayibhile. Kwanomnye umfundisi owayekho apho wavuma ukuba uRussell uye ‘wavulela umbhobho wamanzi esihogweni waza wawucima loo mlilo.’ Ukanti, uMzalwan’ uRussell naye wavakalelwa kukuba injongo yenyaniso yayinokuphunyezwa ngokulunge ngakumbi ngokusetyenziswa kwexesha nemigudu kweminye imisebenzi kungekhona kwiingxoxo.

Abefundisi abazange banikezele kuhlaselo lwabo. Xa uMzalwan’ uRussell wayenikela intetho eDublin, eIreland, naseOtley, eYorkshire, eNgilani, babeka abantu kubaphulaphuli bokuba bakhwaze bemphikisa yaye bembeka izityholo zobuxoki uRussell. UMzalwan’ uRussell wazisingatha ngobuchule ezo meko, esoloko ethembele eBhayibhileni njengegunya leempendulo zakhe.

Abefundisi bamaProtestanti, kungakhathaliseki ukuba ngabayiphi na imvaba, babenxulumene koko kwakusaziwa njenge-Evangelical Alliance. Kumazwe amaninzi abameli babo babemvusela uqhushululu uRussell nabo babesasaza uncwadi lwakhe. Ngokomzekelo, eTexas (eUnited States), aBafundi beBhayibhile bafumanisa ukuba mshumayeli ngamnye, kwanakwiidolophu ezincinane nakwizithili zasemaphandleni, wayexhotyiswe ngezityholo zobuxoki ezifanayo nxamnye noRussell nangendlela efanayo yokuguqula oko wayekufundisa.

Noko ke, maxa wambi ezi ntlaselo nxamnye noRussell zaziba nemiphumo ababengayilindelanga abefundisi. ENew Brunswick, eKhanada, xa omnye umshumayeli wathi esepulpitini wanikela intshumayelo eyayimngcikiva uRussell, kubaphulaphuli kwakukho indoda eyayikhe yalufunda ngokobuqu uncwadi olwalubhalwe nguMzalwan’ uRussell. Yacaphuka gqitha xa umshumayeli wabhenela kubuxoki awayebuqulunqile. Malunga naphakathi kuloo ntshumayelo, le ndoda yaphakama, yabamba umkayo ngesandla, yaza yabiza iintombi zayo ezisixhenxe ezazicula ekwayarini: “Yizani, zintombi, siyagoduka.” Bosithoba baphuma, yaye umfundisi wabukela njengoko le ndoda eyakha loo cawa neyayingumxhasi oyintloko webandla ngemali yayisimka. Kungekudala ibandla laqhekeka, waza lo mshumayeli wemka.

Ukubhenela Ekugculeleni Nasekunyeliseni

Kwimizamo yabo yokuzimisela ukuphelisa impembelelo kaC. T. Russell nezinxulumani zakhe, abefundisi balijongela phantsi ibango lokuba wayengumlungiseleli ongumKristu. Ngezizathu ezifanayo, iinkokeli zonqulo zamaYuda ngenkulungwane yokuqala zamphatha umpostile uPetros noYohane ‘njengabantu abangenamfundo, abangenakwazi.’—IZe. 4:13.

UMzalwan’ uRussell akazange afunde kuso nasiphi na isikolo sezakwalizwi seNgqobhoko. Kodwa ngenkalipho wathi: “Sibacel’ umngeni [abefundisi] ukuba bangqine ukuba bamiselwe nguThixo okanye bacinga ukuba baya kuze bamiselwe kusini na. Kuphela bacinga ngokumiselwa, okanye ukugunyaziswa, ngokwamahlelo, ngamnye kwihlelo okanye umbutho wakhe. . . . Ukumiselwa, okanye ukugunyaziswa, nguThixo kwakhe nawuphi na umntu ukuba ashumayele kungokudluliselwa koMoya oyiNgcwele kuye. Nabani na ofumene uMoya oyiNgcwele ufumene amandla negunya lokufundisa nelokushumayela egameni likaThixo. Nabani na ongawamkelanga uMoya oyiNgcwele akanagunya okanye imvume evela kuThixo yokushumayela.”—Isa. 61:1, 2.

Ukuze bangcolise igama lakhe, abanye abefundisi bashumayela baza bapapasha ubuxoki obuphindaphindiweyo ngaye. Obunye ababebusebenzisa ngokufuthi—nabasabusebenzisayo—bubandakanya imeko yomtshato kaMzalwan’ uRussell. Ingcamango abebezama ukuyidlulisela yeyokuba uRussell wayeziphethe kakubi. Zithini izibakala?

Ngowe-1879, uCharles Taze Russell watshata noMaria Frances Ackley. Babenolwalamano oluhle kangangeminyaka eli-13. Kwandula ke ukuziphakamisa kukaMaria nokubangelwa ngabanye ukuba abe nekratshi kwaqalisa ukulonakalisa olo lwalamano; kodwa xa injongo yabo yathi yacaca, kwabonakala ukuba wabuya walungelelana kwakhona. Emva kokuba othile owayesakuba sisinxulumani sakhe esasaze ubuxoki ngoMzalwan’ uRussell, wade wacela imvume yomyeni wakhe ukuba atyelele amabandla amaninzi ukuze ayokuphelisa olo lwimi, ekubeni kwakusithiwa wayemphethe kakubi. Noko ke, kuyabonakala ukuba ukwamkelwa kakuhle awakufumanayo kolo hambo lwakhe ngowe-1894 kwaba negalelo kwinguqulelo ethe ngcembe kwindlela awayezijonga ngayo. Wafuna ukuba nelizwi ngakumbi ekwalathiseni oko kwakuya kuvela kwiMboniselo.a Xa wafumanisa ukuba oko wayekubhala kwakungayi kupapashwa ngaphandle kokuba umyeni wakhe, owayengumhleli welo phephancwadi, wayevumelana noko wayekubhalile (ngokusekelwe ekuvumelaneni kwako neZibhalo), wacaphuka gqitha. Ngokunyanisekileyo wenza umgudu wokumnceda, kodwa ngoNovemba 1897 wamshiya. Sekunjalo, wamlungiselela indawo yokuhlala waza wamxhasa. Kwiminyaka ethile kamva, emva kokushikixwa enkundleni kwesicelo sakhe sokuqhawula umtshato ngowe-1903, ngowe-1908 kwawiswa isigwebo, esingelulo uqhawulo-mtshato, kodwa sokuba bangahlali kunye kodwa aqhubeke efumana inkxaso yakhe.

Engakwazanga ukunyanzelela umyeni wakhe ukuba avumelane noko wayekufuna, wenza umzamo omkhulu emva kokuba emshiyile ukuze angcolise igama lakhe. Ngowe-1903 wapapasha iphecana, elalingazaliswanga ziinyaniso zeZibhalo, kodwa zizinto ezingekhoyo ngokupheleleyo ezingoMzalwan’ uRussell. Wafuna ukuncediswa ngabefundisi beemvaba ezahlukahlukeneyo ukuze awasasaze apho aBafundi beBhayibhile babeqhuba iintlanganiso ezikhethekileyo. Okuvuyisayo kukuba babengebaninzi ngelo xesha ababekulungele ukusetyenziswa ngaloo ndlela. Noko ke, ukususela ngoko abanye abefundisi baye babonakalisa umoya owahlukileyo.

Ngaphambilana, uMaria Russell wayebagxeka, ngamazwi nangokubhala, abo babetyhola uMzalwan’ uRussell ngohlobo oluthile lokuziphatha okubi nto leyo ngoku naye awayeyenza. Esebenzisa amazwi athile angenasiseko awayethethwe ebudeni bokuchotshelwa komcimbi womtshato wabo enkundleni ngowe-1906 (mazwi lawo awacinywayo ezincwadini ngokomyalelo wenkundla), bambi abachasi bonqulo bakaMzalwan’ uRussell bapapasha izityholo ezazenzelwe ukumenza abonakale eyindoda eyayiziphethe kakubi yaye ngenxa yoko engakufanelanga ukuba ngumlungiseleli kaThixo. Noko ke, ingxelo yenkundla icacile ukuba izityholo ezinjalo zibubuxoki. Igqwetha lakhe labuza uNkskz. Russell enoba wayekholelwa kusini na ukuba umyeni wakhe wayenetyala lokukrexeza. Waphendula wathi: “Hayi.” Kwakhona kuyaphawuleka ukuba xa ikomiti yabadala abangamaKristu yaziphulaphulayo izityholo zikaNkskz. Russell nxamnye nomyeni wakhe ngowe-1897, akazange azikhankanye izinto awazikhankanyayo kamva kwinkundla yamatyala ukuze aphembelele inkundla ekubeni kuqhawulwe umtshato, nakuba ezi zityholo esithi zenzeka ngaphambi kwaloo ntlanganiso.

Kwiminyaka esithoba emva kokuba uNkskz. Russell walizisa okokuqala eli tyala enkundleni, uMgwebi James Macfarlane wabhala ileta yokuphendula indoda eyayifuna umbhalo wengxelo yenkundla ukuze omnye wezinxulumani zayo abhence uRussell. Ngokuphandle lo mgwebi wayixelela ukuba oko yayikufuna kwakuya kuba kukuchitha ixesha nemali. Ileta yakhe yathi: “Isicelo sakhe noko inkundla iye yafikelela kuko ngokusekelwe kwisigqibo sabachopheli belo tyala ‘sasikukuthotywa kwesidima’ ingekuko ukukrexeza yaye ubungqina, njengoko ndiqonda, abubonisi ukuba uRussell wayephila ‘ubomi bokukrexeza nomnye umntu.’ Enyanisweni kwakungekho mntu kwakukrexezwe kunye naye.”

UMaria Russell emva kwexesha naye wavuma ngexesha lomngcwabo kaMzalwan’ uRussell eCarnegie Hall ePittsburgh ngowe-1916. Embethe isigqubuthelo, wathi chu ukuya kwibhokisi yomngcwabo waza wabeka kuyo iinyibiba zasemlanjeni. Kuzo wayenamathisele iphetshana elalibhalwe amagama athi, “Kumyeni Wam Othandekayo.”

Kuyabonakala ukuba abefundisi baye basebenzisa amaqhinga afanayo nalawo ayesetyenziswa ngoogxa babo benkulungwane yokuqala. Ngelo xesha, bazabalazela ukungcolisa igama likaYesu ngokumtyhola ngelithi wayesitya naboni nokuba yena wayengumoni nomnyelisi. (Mat. 9:11; Yoh. 9:16-24; 10:33-37) Izityholo ezinjalo azizange ziyiguqule inyaniso engoYesu, kodwa zababhenca abo babhenela kwintlebendwane enjalo—yaye ziyababhenca abo babhenela kumaqhinga anjalo namhlanje—njengabo uyise wabo wokomoya unguMtyholi, gama elo elithetha “uMhlebi.”—Yoh. 8:44.

Ukusebenzisa Umoya Wemfazwe Ukuze Baphumeze Iinjongo Zabo

Ngenxa yomoya wobuhlanga owawugquba ehlabathini lonke ebudeni bemfazwe yehlabathi yokuqala, kwafunyanwa isixhobo esitsha esasiza kusetyenziswa nxamnye naBafundi beBhayibhile. Ubutshaba beenkokeli zonqulo lwamaProtestanti namaRoma Katolika babunokubonakaliswa busithele ngesebe lenkawu lokuthand’ izwe. Basebenzisa iimpambano ebakho ngexesha lemfazwe ukuze batyhole aBafundi beBhayibhile ngokuba ngabaphembeleli bemvukelo—izityholo ezifana nezo zabhekiswa kuYesu Kristu nompostile uPawulos ziinkokeli zonqulo zenkulungwane yokuqala eYerusalem. (Luka 23:2, 4; IZe. 24:1, 5) Kakade, ukuze aba befundisi benze izityholo ezinjalo, babefanele bona ngokwabo babe ngamaqhawe aphambili kwimizamo yemfazwe, kodwa oko akuzange kubonakale kulukhathaza uninzi lwabo, nakuba kwakuthetha ukuthumela abafana ukuba bayokubulala amalungu onqulo lwabo akwelinye ilizwe.

NgoJulayi 1917, emva kokufa kukaRussell, iWatch Tower Society yakhulula incwadi ethi The Finished Mystery, eyayinenkcazelo yeSityhilelo nekaHezekile neyeNgoma yazo IiNgoma. Loo ncwadi yalubhenca ngokuphandle uhanahaniso lwabefundisi beNgqobhoko! Yasasazwa kakhulu ngexeshana nje elifutshane. Ngasekupheleni kukaDisemba 1917 nasekuqaleni kowe-1918, aBafundi beBhayibhile eUnited States naseKhanada baqalisa ukusasaza imibhalo ezizi-10 000 000 yesigidimi esithetha ngokuphandle kwiphecana elithi The Bible Students Monthly. Eli phecana lilingana nephephancwadi elalinamaphepha amane lalinomxholo othi “Ukuwa KweBhabhiloni,” yaye lalinomxholwana othi “Isizathu Sokuba INgqobhoko Ngoku Ifanele Ibandezeleke—Umphumo Wokugqibela.” Lafanisa iintlangano zonqulo zamaKatolika nezamaProtestanti zidibene njengeBhabhiloni yanamhlanje, ekufuneka iwe kungekudala. Ukuze lixhase into eyayithethwa, laphinda lacaphula kwiThe Finished Mystery eyayigqabaza ngeziprofeto ezivakalisa umgwebo kaThixo nxamnye ‘neBhabhiloni Eyimfihlelo.’ Kwiphepha elingasemva kwakukho umfanekiso ohlekisayo owawubonisa ukudilika kodonga. Kumatye amakhulu olo donga kwakukho imibhalo enjengothi “Imfundiso KaBathathu Emnye (‘3 X 1 = 1’),” “Ukungafi Komphefumlo,” “Ingcamango Yentuthumbo Kanaphakade,” “UbuProtestanti—izivumo zokholo, abefundisi, njl.,” “UbuRoma—oopopu, iikhardinali, njl., njl.”—yaye onke ayesiwa.

Abefundisi bajwaqeka ngumsindo ngenxa yokubhencwa okunjalo, kanye njengokuba abefundisi bamaYuda babenjalo xa uYesu wabhenca uhanahaniso lwabo. (Mat. 23:1-39; 26:3, 4) EKhanada abefundisi basabela msinyane koku. NgoJanuwari 1918, abefundisi baseKhanada abangaphezu kwama-600 batyobela isicelo esasibongoza urhulumente ukuba aphelise iimpapasho zeInternational Bible Students Association. Njengokuba kuchazwe kwiWinnipeg Evening Tribune, emva kokuba uCharles G. Paterson, umfundisi weCawa iSt. Stephen eWinnipeg, ethethe kakubi epulpitini ngeThe Bible Students Monthly, eyayinenqaku elithi “Ukuwa KweBhabhiloni,” iGqwetha Eliphambili likaRhulumente uJohnson laqhagamshelana naye ukuze lifumane umbhalo wayo. Kungekudala emva koko, ngoFebruwari 12, 1918, umyalelo karhulumente waseKhanada wakwenza kwalulwaphulo-mthetho olwalunesohlwayo sokuhlawula imali okanye sokuvalelwa entolongweni ukuba nencwadi ethi The Finished Mystery okanye iphecana eliboniswe ngasentla.

Kwangaloo nyanga, ngoFebruwari 24, uMzalwan’ uRutherford, umongameli weWatch Tower Society owayesandul’ ukunyulwa, wanikela intetho eUnited States kwiTemple Auditorium eLos Angeles, eKhalifoniya. Umxholo wakhe wawukhwankqisa: “Ihlabathi Liphelile—Izigidi Eziphilayo Ngoku Zisenokungaze Zife.” Xa wayesandlala ubungqina bokuba ihlabathi njengoko lalisaziwa ngelo xesha laliphele ngokwenene ngowe-1914, walatha kwimfazwe eyayigquba ngelo xesha, ndawonye nendlala eyayihamba nayo, waza wayifanisa njengenxalenye yomqondiso owaxelwa kwangaphambili nguYesu. (Mat. 24:3-8) Wandula ke walathisel’ ingqalelo kubefundisi, esithi:

“Xa bebonke, ngokutsho kwezibhalo, abefundisi ngabona bantu babekek’ ityala emhlabeni ngemfazwe enkulu ethwaxa uluntu ngoku. Kangangeminyaka eli-1 500 baye bafundisa abantu imfundiso yobusathana yokuba ookumkani balawula ngegunya abalinikwe nguThixo. Baye badibanisa iipolitiki nonqulo, icawa norhulumente; baye bangqineka benganyanisekanga kwilungelo labo abalinikwe nguThixo lokuvakalisa isigidimi esingobukumkani bukaMesiya, yaye baye bazinikela ekukhuthazeni abalawuli ukuba bakholelwe ukuba ukumkani ulawula ngegunya alinikwe nguThixo, yaye ngenxa yoko nayiphi na into ayenzayo ilungile.” Ebonisa imiphumo yoku, wathi: “Ookumkani baseYurophu abanamabhongo baye baxhobela imfazwe, kuba benqwenela ukuhlutha umhlaba wabanye abantu; yaye abefundisi baye babaqhwabel’ izandla baza bathi: ‘Phambili, enikwenzayo akuphosakelanga; nantoni na eniyenzayo ilungile.’” Kodwa oku kwakungenziwa ngabefundisi baseYurophu kuphela, nabashumayeli baseMerika babesazi ukuba babekwenza.

Ingxelo eneenkcukacha yale ntetho yapapashwa ngosuku olulandelayo kwiMorning Tribune yaseLos Angeles. Abefundisi baba nomsindo gqitha kangangokuba umbutho wabefundisi waba nentlanganiso kwangolo suku waza wathumela umongameli wawo kubaphathi belo phephandaba ukuze abazise indlela abangakuthandi ngayo oko. Emva koku, kwakusoloko kugqogqwa iiofisi zeWatch Tower Society ngamalungu ecandelo labecuphi bakarhulumente.

Ebudeni beli thuba lomoya wokuthand’ izwe, kwabakho ingqungquthela yabefundisi ePhiladelphia, eUnited States, ekwamkelwa kuyo isigqibo sokuhlaziywa koMthetho Wongcatsho-mbuso ukuze bonke ababekwa izityholo zolwaphulo-mthetho olulolo hlobo bavavanywe yinkundla baze bagwetyelwe ukufa. UJohn Lord O’Brian, isekela legqwetha elikhethekileyo elimele urhulumente kwimicimbi yemfazwe, wanyulwa ukuba ase lo mbandela kwiNdlu yeeNgwevu. Umongameli waseUnited States akazange avume ukuba loo mmiselo ube ngumthetho. Kodwa uNjengele James Franklin Bell, woMkhosi waseUnited States, ecaphuke gqitha waxelela uJ. F. Rutherford noW. E. Van Amburgh oko kwenzekayo kuloo ngqungquthela nomnqweno wokuba kusetyenziswe loo mmiselo nxamnye namagosa eWatch Tower Society.

Iifayile zikarhulumente waseUnited States zibonisa ukuba ubuncinane ukususela ngoFebruwari 21, 1918, ukusa phambili, uJohn Lord O’Brian wayebandakanyeke ngokobuqu kwimigudu yokuyila ityala nxamnye naBafundi beBhayibhile. INgxelo yeNdlu Yowiso-mthetho ka-Aprili 24 nekaMeyi 4 iqulethe iingxelo ezibhaliweyo ezazivela kuJohn Lord O’Brian awayesithi kuzo ukuba umthetho wawuvumela ukuba “kuthethwe inyaniso, ngeentshukumisa ezilungileyo, ukuze kufikelelwe iinjongo ezintle,” njengoko kuchazwe koko kuthiwa luHlaziyo LukaFrance kuMthetho Wongcatsho-mbuso nanjengokuba kuye kwamkelwa yiNdlu yeeNgwevu yaseUnited States, wayengenakubagweba ngokuphumelelayo aBafundi beBhayibhile.

EWorcester, eMassachusetts, “uMfu.” B. F. Wyland wawusebenzisa ngokungakumbi umoya wemfazwe ngokuthi aBafundi beBhayibhile babesetyenziswe lutshaba ukukhohlisa abantu. Wapapasha inqaku kwiDaily Telegram awathi kulo: “Omnye wemisebenzi yenu yokubonakalisa ukuthand’ izwe enijamelene nayo njengabemi kukuthintelwa kweInternational Bible Students Association, ekomkhulu layo liseBrooklyn. Besithele ngonqulo, baye basetyenziswa ngamaJamani ukukhohlisa abantu eWorcester ngokuthengisa incwadi yabo ethi, ‘The Finished Mystery.’” Wabaxelela ngokuphandle abasemagunyeni ukuba yayingumsebenzi wabo ukubamba aBafundi beBhayibhile baze babathintele ekuqhubeni iintlanganiso ezingakumbi.

Entwasahlobo nasehlotyeni ngowe-1918 aBafundi beBhayibhile batshutshiswa ngokubanzi, kuMntla Merika naseYurophu. Phakathi kwabo babephembelela oko yayingabefundisi bamaBhaptizi, baseWesile, bamaEpiscopal, bamaLuthere, bamaRoma Katolika nabezinye iicawa. Uncwadi lweBhayibhile lwathinjwa ngamagosa awayengenalo igunya lokugqogqa, yaye aBafundi beBhayibhile abaninzi baphoswa entolongweni. Abanye babeleqwa ngamahlokondiba, bebethwa, betywatywushwa ngezabhokhwe, beqatywa itela baze bafakwe iintsiba okanye baphulwa iimbambo okanye banqunyulwa iintloko. Abanye bangxwelerheka ubomi babo bonke. Amadoda namabhinqa angamaKristu aphoswa entolongweni aza agcinwa apho engabekwanga tyala namatyala abo engathethwanga. Kwanikelwa ingxelo ngeemeko ezinjalo ezingaphezu kwekhulu zokuphathwa kakubi ngolo hlobo kwiThe Golden Age kaSeptemba 29, 1920.

Babekw’ Ityala Lokungcatsha Umbuso

Oku kwafikelela incopho ngoMeyi 7, 1918, xa eUnited States kwakhutshwa imiyalelo yenkundla yokuba kubanjwe uJ. F. Rutherford, umongameli weWatch Tower Bible and Tract Society, nezona zinxulumani zakhe zisondeleyo.

Kusuku olungaphambi kolo, eBrooklyn, eNew York, uMzalwan’ uRutherford nezinxulumani zakhe babetyholwe ngamatyala amabini. Ukuba imiphumo enqwenelekayo yayingafunyanwa kwelinye ityala, kwakuya kudlulelwa kwelinye. Kwityala lokuqala, kwakutyholwe abantu abaninzi ngezimangalo ezine: Ezibini zazibabek’ ityala lokwenza iyelenqe lokwaphula uMthetho Wongcatsho-mbuso kaJuni 15, 1917; yaye izimangalo ezibini zababek’ ityala lokuzama ukuqhubeka namacebo abo angekho mthethweni okanye ngokwenza oku. Kwakusithiwa babesenza iyelenqe lokubangela ukungathotyelwa nokwaliwa komsebenzi wemikhosi exhobileyo yaseUnited States nokuba babesenza iyelenqe lokuphazamisa ukugaywa nokubhaliselwa kwamadoda umsebenzi onjalo xa ilizwe lisemfazweni, kwanokuba babezama ukwenza okanye babezenza zombini ezi zinto. Esi sityholo sakhankanya ngokukhethekileyo ukupapashwa nokusasazwa kwencwadi ethi The Finished Mystery. Ityala lesibini lalisithi ukuthunyelwa kwetsheke eYurophu (eyayiza kusetyenziselwa umsebenzi wokufundisa ngeBhayibhile eJamani) kwakuchasene nezilangazelelo zaseUnited States. Xa abamangalelwa basiwa enkundleni, kwagxininiswa kwityala lokuqala, elo lalinezimangalo ezine.

Kanti ngelo xesha esinye isityholo esasibekwa uC. J. Woodworth noJ. F. Rutherford phantsi koMthetho Wongcatsho-mbuso sasisabalindile eScranton, ePennsylvania. Kodwa, ngokutsho kweleta kaJohn Lord O’Brian eyabhalwa ngoMeyi 20, 1918, amalungu eSebe Lezobulungisa ayesoyikela ukuba uMgwebi Wenqila uWitmer waseUnited States, elaliza kuxoxwa phambi kwakhe eli tyala, wayengayi kuvumelana nendlela ababeza kuwusebenzisa ngayo uMthetho Wongcatsho-mbuso ekucinezeleni umsebenzi wamadoda awayesithi, ngenxa yeenkolelo ezinyanisekileyo zonqulo, athethe izinto abanye ababezithabatha njengenkcazelo yenkohliso echaseneyo nemfazwe. Ngoko iSebe Lezobulungisa lalirhoxisa ityala laseScranton, lilindele imiphumo yelo laliseBrooklyn. Kwakhona urhulumente wayilawula le meko ukuze uMgwebi uHarland B. Howe, waseVermont, lowo uJohn Lord O’Brian wayesazi ukuba uyavumelana nembono yakhe kwimibandela enjalo, abe ngumgwebi kwelo tyala elalikwiNkundla Yenqila yaseUnited States eyayijongene neNqila yaseMpuma New York. Eli tyala laxoxwa ngoJuni 5, uIsaac R. Oeland noCharles J. Buchner, owayengumRoma Katolika, babengabatshutshisi. Ebudeni bokuxoxwa kwelo tyala, njengoko uMzalwan’ uRutherford waphawulayo, abefundisi bamaKatolika babesoloko becebisana noBuchner no-Oeland.

Njengoko ityala laliqhubeka, kwaboniswa ukuba amagosa oMbutho nabantu ababenegalelo ekubhaleni loo ncwadi babengenanjongo yokuphazamisana nomzamo welo lizwe wemfazwe. Ubungqina obanikelwayo ebudeni bokuxoxwa kwelo tyala babonisa ukuba amalungiselelo okubhalwa kwaloo ncwadi—eneneni, ukubhalwa kwenkoliso yaloo mbhalo-ngqangi—enziwa ngaphambi kokuba elaseUnited States ligqibe kwelokuba liye emfazweni (ngoAprili 6, 1917) nokuba isivumelwano sokuqala sokupapashwa kwayo satyobelwa ngaphambi kokuba elaseUnited States lidlulisele loo mthetho (ngoJuni 15) kwakusithiwa bawaphule.

Abatshutshisi babalaselisa izinto ezongezelelwa kuloo ncwadi ngoAprili nangoJuni we-1917, xa kwakulungiselelwa umbhalo wayo naxa kwakuhlolwa iimpazamo. Ezi zaziquka isicatshulwa sikaJohn Haynes Holmes, umfundisi owalikhupha latsola elokuba imfazwe yayikukwaphulwa kobuKristu. Njengoko kwaboniswa lelinye lamagqwetha amela abamangalelwa, loo magqabaza aloo mfundisi, awayepapashwe phantsi komxholo othi A Statement to My People on the Eve of War, ayesathengiswa eUnited States ngexesha lokuchotshelwa kwelo tyala. Yaye loo mfundisi okanye umntu owayewapapasha akazange amangalelwe ngenxa yawo. Kodwa yayingaBafundi beBhayibhile ababhekisela kwintshumayelo yakhe ababebekw’ ityala ngezinto awazithethayo.

Loo ncwadi ayizange ixelele abantu behlabathi ukuba babengenalungelo lokuba nenxaxheba emfazweni. Kodwa, ekuchazeni kwayo isiprofeto, yacaphula izicatshulwa ezithile kwiinkupho zeMboniselo (yesiNgesi) zowe-1915 ukuze ibonise ukungavumelani kwabefundisi ababezibanga bengabalungiseleli bakaKristu kodwa ababesebenza njengabagayi bamazwe babantu bokuya emfazweni.

Xa kwafunyaniswa ukuba urhulumente wayechasene naloo ncwadi, ngokukhawuleza uMzalwan’ uRutherford wathumela ucingo kumzi-mveliso oshicilelayo ukuba uyeke ukuyivelisa, yaye kwangaxeshanye, kwathunyelwa ummeli woMbutho kwicandelo labecuphi boMkhosi waseUnited States ukuba aye kufumanisa oko babekuchasa. Xa kwafunyaniswa ukuba ngenxa yemfazwe eyayiqhubeka ngoko, iphepha 247-53 laloo ncwadi ayegqalwa njengangafanelekanga, uMbutho wayalela ukuba loo maphepha akrazulwe kuyo yonke imibhalo yaloo ncwadi ngaphambi kokuba inikelwe kuwonke wonke. Yaye xa urhulumente wazisa amagqwetha enqila ukuba ukusasazwa okungakumbi kwale ncwadi kwakuya kuba kukwaphulwa koMthetho Wongcatsho-mbuso (nangona urhulumente engazange avume ukuvakalisa uluvo lwakhe kuMbutho ngale ncwadi emva kokuba kwenziwe iinguqulelo kuyo), uMbutho wayalela ukuba kunqunyanyiswe ukusasazwa kwale ncwadi kuwonke wonke.

Kwakutheni Ukuze Bohlwaywe Ngokuqatha Ngolo Hlobo?

Phezu kwako nje konke oku, ngoJuni 20, 1918, inkundla yafikelela kwisigqibo esasifumanisa ngamnye wabamangalelwa enetyala kwisimangalo ngasinye ababebekwa sona. Ngosuku olulandelayo, abasixhenxeb kubo bagwetywa iminyaka engama-20 izihlandlo ezine emnye, ezaziza kuqhubeka ngaxeshanye. NgoJulayi 10, owesibhozoc wagwetywa iminyaka elishumi izihlandlo ezine ezaziza kuqhubeka ngaxeshanye. Zaziqatha kangakanani ezo zigwebo? Kwileta awayibhalela igqwetha elimele urhulumente ngoMatshi 12, 1919, umongameli waseUnited States uWoodrow Wilson wavuma ukuba “ezo zigwebo zokuvalelwa entolongweni ziqatha ngokucacileyo.” Enyanisweni, indoda eyadubula eSarajevo yaza yabulala inkosana eyayiyindlalifa kuBukhosi baseOstriya nobaseHungary—siganeko eso esasingunozala weziganeko ezakhokelela amazwe kwiMfazwe Yehlabathi I—ayizange yohlwaywe ngokuqatha kunoko. Yagwetywa iminyaka engama-20 entolongweni—ingeyiyo iminyaka engama-20 ephindwe izihlandlo ezine, njengakwimeko yaBafundi beBhayibhile!

Yintoni eyabangela ukuba kuwiswe izigwebo eziqatha ngolo hlobo zokuvalelwa entolongweni kwaBafundi beBhayibhile? UMgwebi Harland B. Howe wathi: “Ngokoluvo lweNkundla, inkcazelo eyinkohliso yonqulo aba bamangalelwa abaye bayingqinela ngokubanzi nabathe bayisasaza kulo lonke ilizwe nakumazwe ancedisana nathi, iyingozi enkulu ngakumbi kuneqela loMkhosi waseJamani. . . . Ngokuqhelekileyo umntu oshumayela ngonqulo uba nempembelelo engakumbi, yaye ukuba unyanisekile, uba nempumelelo engakumbi. Oku kuyabandisa ububi ababenzileyo kunokuba kubunciphise. Ngoko ke, njengokuphela kwento yobulumko efanele yenziwe ngabantu abanjalo, iNkundla iye yagqiba kwelokuba isohlwayo sifanele sibe qatha.” Noko ke, kukwaphawuleka ukuba ngaphambi kokuwiswa kweso sigwebo, uMgwebi Howe wathi izinto ezazithethwe ngamagqwetha abamangalelwa ziye zabangela amathandabuzo zaza zaphatha kakubi gqitha kungekuphela nje amagosa ezomthetho karhulumente kodwa “bonke abefundisi kulo lonke eli lizwe.”

Eso sigqibo sadluliselwa ngokukhawuleza kwinkundla yezibheno yesiphaluka saseUnited States. Kodwa ngolunya ibheyile yokulinda isibheno wayikhaba ngaw’ omane uMgwebi Howe,d yaye ngoJulayi 4, ngaphambi kokuba kuchotshelwe isibheno sesithathu nesokugqibela sokucelwa kwebheyile, abazalwana abasixhenxe abagwetywa kuqala ngokukhawuleza basiwa kwintolongo yamabanjwa omkhosi eAtlanta, eGeorgia. Emva koko, kwaboniswa ukuba kwakukho iimpazamo ezili-130 ezenziwa ekuchotshelweni kwelo tyala lalinekhethe gqitha. Kwachithwa iinyanga eziliqela kulungiswa amaphepha afunekayo ukwenzela ukuchotshelwa kwesibheno. Ngelo xesha, imfazwe yaphela. NgoFebruwari 19, 1919, abo bazalwana basibhozo babesentolongweni bathumela kuWoodrow Wilson, umongameli waseUnited States, isicelo sokwenzelwa inceba. Abemi abaninzi bathumela ezinye iileta kwigqwetha elimele urhulumente elalisandul’ ukunyulwa ezazibongoza ukukhululwa kwabo bazalwana. Kwandula ke, ngoMatshi 1, 1919, ephendula umbuzo owawuvela kwigqwetha elimele urhulumente, uMgwebi Howe wancomela “ukurhoxiswa okukhawulezileyo” kweso sigwebo. Ngoxa oku kwakuya kusinciphisa isigwebo, kwakhona kwakuya kuba nomphumo wokuqinisekisa ukuba babenetyala abamangalelwa. Ngaphambi kokuba oku kwenziwe, amagqwetha abazalwana afumana umyalelo wenkundla owadluliselwa kwigqwetha laseUnited States elazisa eli tyala phambi kwenkundla yezibheno.

Kwiinyanga ezisithoba emva kokuba uRutherford nezinxulumani zakhe begwetyiwe—nemfazwe iphelile—ngoMatshi 21, 1919, inkundla yezibheno yayalela ukuba bosibhozo abo bamangalelwa bafumane ibheyile, yaye ngoMatshi 26, bakhululwa eBrooklyn ngebheyile yee-$10 000 emnye. NgoMeyi 14, 1919, inkundla yesiphaluka yezibheno yaseUnited States eNew York yathi: “Abamangalelwa kweli tyala abagwetywanga ngokufanelekileyo nangokungenakhethe njengoko bekufanele, yaye ngenxa yeso sizathu isigwebo siyarhoxiswa.” Elo tyala laphinda lachotshelwa kwakhona. Noko ke, ngoMeyi 5, 1920, emva kokuba abamangalelwa bevele enkundleni, izihlandlo ezihlanu, igqwetha elimele urhulumente, kwinkundla kawonke wonke eBrooklyn, lavakalisa ukuba urhulumente wayerhoxa kweli tyala.e Kwakutheni? Njengoko kutyhilwe kwimbalelwano egcinwe kwiNdlu Yokulondoloza Iincwadi Ezibalulekileyo yaseUnited States, iSebe Lezobulungisa lalisoyikela ukuba xa ezi mbambano zazinokusiwa kwinkundla engenakhethe, yaye nempambano yexesha lemfazwe idlule, babengayi kuphumelela kwelo tyala. Igqwetha laseUnited States uL. W. Ross wathi kwileta awayibhalela igqwetha elimele urhulumente: “Ndicinga ukuba kuya kuba kokulunge ngakumbi, ukuze sibe nolwalamano oluhle nowonke wonke, ukuba thina” silikhuphe litsole elokuba eli tyala alisayi kuhambela phambili.

Kwangalo mini, ngoMeyi 5, 1920, nesinye isigwebo esakhutshwa nxamnye noJ. F. Rutherford nezinxulumani zakhe ezine ngoMeyi 1918 naso sarhoxiswa.

Ngubani Ngokwenene Owayephembelela Oku?

Ngaba konke oku kwakuphenjelelwa ngabefundisi? UJohn Lord O’Brian wakukhanyela oku. Kodwa izibakala zazisaziwa kakuhle ngabo babephila ngelo xesha. NgoMatshi 22, 1919, iphephandaba elithi Appeal to Reason, elalipapashwa eGirard, eKansas, lakhalaza lisithi: “Abalandeli bakaPastor Russell, Ngenxa Yentiyo Yabefundisi ‘BobuOthodoki,’ Bagwetywa Baza Bavalelwa Entolongweni Ngaphandle Kwebheyile Nakuba Benze Yonke Imigudu Abebenokuyenza Ukuze Bahambisane Namalungiselelo Omthetho Wongcatsho-mbuso. . . . Sivakalisa ukuba, kungakhathaliseki ukuba uMthetho Wongcatsho-mbuso wawusebenza ngokufanelekileyo okanye wawuphunyezwa ngokusesikweni kusini na, aba balandeli bakaPastor Russell babanjwa ngokuphosakeleyo phantsi kwamalungiselelo awo. Ukuhlolisisa ubungqina ngengqondo ephangaleleyo kuya kweyisela ngokukhawuleza nabani na kwelokuba ngaphezu kokuba la madoda ayengenazinjongo zakwaphula mthetho, akakhange awophule.”

Kwiminyaka ethile kamva, kwincwadi ethi Preachers Present Arms, uGqr. Ray Abrams wathi: “Kuyaphawuleka ukuba abefundisi abaninzi gqitha ngenkohlakalo baye banenxaxheba ekuzameni ukuphelisa abalandeli bakaRussell [njengoko aBafundi beBhayibhile babebizwa njalo benyeliswa]. Ngoku iingxabano nentiyo yezonqulo ekukudala zikho, ezazingazange zikhe zinikelwe ngqalelo ezinkundleni ngexesha loxolo, ngoku zangena enkundleni phantsi kwempembelelo yembambano egquba ngexesha lemfazwe.” Kwakhona wathi: “Ukuhlolisiswa kwalo lonke eli tyala kukhokelela kwisigqibo sokuba iicawa nabefundisi ngabo ngokuyintloko ababephembelela ukupheliswa kwabalandeli bakaRussell.”—Iphe. 183-5.

Noko ke, ukuphela kwemfazwe akuzange kuzise isiphelo sentshutshiso kuBafundi beBhayibhile. Yasuka nje yeza ngenye indlela.

Abefundisi Baphembelela Amapolisa

Emva kokuba imfazwe idlule, abefundisi baxhokonxa eminye imibandela ukuze baphelise, ukuba phofu kwakunokwezeka, umsebenzi waBafundi beBhayibhile. KwiBavaria yamaKatolika nakweminye imimandla yaseJamani, kwabanjwa abaninzi ngeminyaka yee-1920 phantsi kwemithetho yokuthengisa. Kodwa xa loo matyala ayesisiwa kwiinkundla zezibheno, ngokufuthi abagwebi babevumelana naBafundi beBhayibhile. Ekugqibeleni, emva kokuba amatyala amaninzi anjalo eye asiwa ezinkundleni, iSebe Lemicimbi Yangaphakathi lakhupha isaziso ngowe-1930 elasithumela kumagosa amapolisa liwaxelela ukuba ayeke ukubamba aBafundi beBhayibhile phantsi kwemithetho yokuthengisa. Ngaloo ndlela, okwethutyana, ingcinezelo eyayivela kulo mthombo yadamba, yaye amaNgqina kaYehova aqhubeka nomsebenzi wawo ngomlinganiselo omkhulu gqitha kwintsimi yaseJamani.

Kwakhona abefundisi babenempembelelo enamandla eRomania ebudeni baloo minyaka. Baphumelela ekufumaneni imiyalelo yokuvala uncwadi nomsebenzi wamaNgqina kaYehova. Kodwa abefundisi babesoyika ukuba abantu babesenokulufunda uncwadi ababesele benalo baze ngenxa yoko bafumanise iimfundiso ezingekho zibhalweni namabango obuxoki ecawa. Ukuze bathintele oku, abefundisi babesiya ngokoqobo namapolisa kwindlu ngendlu bekhangela naluphi na uncwadi olwalusasazwe ngamaNgqina kaYehova. Babede babuze nabantwana abancinane abangazi nto enoba abazali babo babamkele uncwadi olunjalo kusini na. Ukuba lwalufunyanwa, abo bantu babesongelwa ngokubethwa nokuvalelwa entolongweni ukuba babenokuphinda bamkele olungakumbi. Kwezinye iidolophana umfundisi wayekwangusibonda nomantyi wasekuhlaleni, yaye wayengenzelwa nceba nabani na owayengakwenzi oko kwakuthethwa ngumfundisi.

Ingxelo engamanye amagosa aseMerika ekwenzeni ukuthanda kwabefundisi ebudeni beli xesha nayo ayintlanga kwaphela. Ngokomzekelo, emva kotyelelo lukaBhishopu wamaKatolika uO’Hara eLa Grange, eGeorgia, usibonda walapho negqwetha lesixeko babangela ukuba kubanjwe amaNgqina kaYehova amaninzi ngowe-1936. Ebudeni bokuvalelwa kwawo, ayelaliswa ecaleni kwemfumba yomgquba phezu komandlalo owawuchanyelwe ziinkomo, etyiswa ukutya okuneempethu, yaye ayenyanzelelwa ukuba asebenze ekulungiseni iindlela.

NasePoland, abefundisi bamaKatolika basebenzisa zonke iindlela ababenokuzifumana ukuze bathintele umsebenzi wamaNgqina kaYehova. Baxhokonxela abantu ukuba babe nogonyamelo, batshisa uncwadi lwamaNgqina kaYehova esidlangalaleni, besithi angamaKomanisi, yaye bawasa enkundleni ngesityholo sokuba uncwadi lwawo ‘lwalunyelisa.’ Noko ke, asingawo onke amagosa awayekulungele ukwenza oko kwakufunwa ngabefundisi. Igqwetha elimele urhulumente kwinkundla yezibheno yasePosen (Poznan), lona alizange livume ukutshutshisa omnye wamaNgqina kaYehova abefundisi ababemtyhola ngelithi wabhekisela kubefundisi bamaKatolika ‘njengentlangano kaSathana.’ Eli gqwetha elimele urhulumente lathi umoya wokuziphatha okubi owawusasazeke kuyo yonke iNgqobhoko ukususela kwinkundla yoopopu ka-Alexander VI (ngowe-1492-1503 C.E.) eneneni, yayingumoya wentlangano kaSathana. Yaye xa abefundisi batyhola elinye lamaNgqina kaYehova ngelithi linyelisa uThixo ngenxa yokusasaza uncwadi lweWatch Tower, igqwetha elimele urhulumente kwinkundla yezibheno eThorn (Toruń) lacela ukuba ityala lirhoxiswe, lisithi: ‘AmaNgqina kaYehova athabatha ukuma okufana ncam noko kwamaKristu okuqala. Nangona etyholwa yaye etshutshiswa, amela ezona ngcamango ziphakamileyo kweli hlabathi lonakeleyo neliwohlokayo.’

Indlu karhulumente yokulondoloza iincwadi ezibalulekileyo yaseKhanada ityhila ukuba kukwenza ngokuvisisana neleta eyayivela kwibhotwe leKhardinali yomKatolika uVilleneuve, waseQuebec, eyayisiya kumphathiswa wezobulungisa, uErnest Lapointe, okwabangela ukuba amaNgqina kaYehova avalwe umlomo eKhanada ngowe-1940. Emva koko amanye amagosa aseburhulumenteni afuna ingcaciso epheleleyo yezizathu zokwenziwa koko, kodwa iimpendulo zikaLapointe zazinganelisi kwaphela kumalungu amaninzi ePalamente yaseKhanada.

Kwelinye icala lomhlaba, abefundisi babeyila amayelenqe afanayo. Kwindlu karhulumente yokulondoloza iincwadi ezibalulekileyo yaseOstreliya kukho ileta eyayivela kubhishopu omkhulu wamaRoma Katolika waseSydney eyayisiya kwiGqwetha Elimele Urhulumente uW. M. Hughes eyayibongoza ukuba amaNgqina kaYehova avakaliswe njengangekho mthethweni. Loo leta yabhalwa ngoAgasti 20, 1940, kwiinyanga nje ezintlanu ngaphambi kokuba avalwe umlomo. Emva kokuba ehlolisise izinto ekwakusithiwa zaziingoonobangela bokuvalwa umlomo, uMnu. Justice Williams weNkundla Ephakamileyo yaseOstreliya kamva wathi “zenza ukumela imigaqo neemfundiso zonqulo lobuKristu kwaba lulwaphulo-mthetho yaye nayiphi na inkonzo yecawa eqhutywa ngamakholwa ngexesha lokuzalwa kukaKristu ibe yingqungquthela engekho mthethweni.” NgoJuni 14, 1943, iNkundla yawisa isigwebo sokuba oko kuvalwa umlomo kwakungavumelani nomthetho waseOstreliya.

ESwitzerland iphephancwadi lamaKatolika lanyanzelisa ukuba abasemagunyeni bathimbe uncwadi lwamaNgqina icawa eyayilugqala njengolwaluphazamisa. Asongela ngelithi ukuba oku kwakungenziwa, ayeya kuwuthabathela ezandleni zawo umthetho. Yaye kwiindawo ezininzi zehlabathi, enza kanye oko!

Iinkokeli Zonqulo Zibhenela Kugonyamelo

KwelaseFransi abefundisi bamaKatolika babevakalelwa kukuba babesakwazi ukubalawula abantu, yaye babezimisele ukungavumeli nayiphi na into ukuba iphazamisane noko. Ebudeni bowe-1924-25, kumazwe amaninzi aBafundi beBhayibhile babesasaza iphecana elalisithi Ecclesiastics Indicted. Ngowe-1925, uJ. F. Rutherford wayeza kunikela intetho eParis enomxholo othi “Ubuqhetseba Babefundisi Bubhenciwe.” Ngokuphathelele okwenzekayo kuloo ntlanganiso, elinye ingqina lokuzibonela lanikela le ngxelo: “Iholo yayizele imi ngeembambo. UMzalwan’ uRutherford wakhwela eqongeni, ibe wamkelwa ngentswahla yokuqhwatywa kwezandla. Waqalisa ukunikela intetho, xa ngequbuliso abefundisi abanokuba ngama-50 namalungu eqela leCatholic Action, ababexhobe ngeentonga, bangena kuloo holo becula iLa Marseillaise [umhobe wesizwe waseFransi]. Baphosa amaphecana bemi phezulu kwizinyuko. Omnye umfundisi wakhwela eqongeni. Abafana ababini bamethula phantsi. Izihlandlo ezithathu, uMzalwan’ uRutherford wayesihla aze aphinde abuyele eqongeni. Ekugqibeleni, akazange aphinde abuyele. . . . Iitafile ekwakubekwe kuzo uncwadi lwethu zabhukuqwa zaza iincwadi zethu zathi saa kuyo yonk’ indawo. Kwakusisiphithiphithi nje!” Kodwa eso yayingesosiganeko singaqhelekanga.

UJack Corr, ngoxa wayenikela ubungqina eIreland, ngokufuthi wayejamelana nengqumbo yabefundisi bamaKatolika. Ngesinye isihlandlo ihlokondiba, elaliphenjelelwe ngumfundisi wesiphaluka, lamvusa elele ezinzulwini zobusuku, laza latshisa lonke uncwadi lwakhe kwindawo kawonke wonke. ERoscrea kwiNqila yaseTipperary, uVictor Gurd noJim Corby bafika kwiindawo ababehlala kuzo baza bafumanisa ukuba abachasi babelubile lonke uncwadi lwabo, balugalela ipetroli, baza balutshisa. Ecaleni kwelo ziko lomlilo kwakumi amapolisa, abefundisi nabantwana baloo ngingqi, becula ingoma ethi “Ukholo Loobawo.”

Ngaphambi kokuba amaNgqina kaYehova ahlanganisane eMadison Square Garden eNew York ngowe-1939, abalandeli bomfundisi womKatolika uCharles Coughlin benza izisongelo zokuba babeza kuyiphelisa loo ndibano. Kwaziswa amapolisa. NgoJuni 25, uMzalwan’ uRutherford wanikela intetho kubantu abali-18 000 okanye ngaphezulu kuloo holo, kwanakubaphulaphuli bakanomathotholo abaninzi ehlabathini lonke, enomxholo othi “Urhulumente Noxolo.” Emva kokuba loo ntetho iqalisile, amaRoma Katolika namaNazi anokuba ngama-200 okanye ngaphezulu, awayekhokelwa ngabefundisi bamaKatolika abaliqela, azalisa evarandeni. Emva kokuba kwenziwe umqondiso othile, bakhwaza kakhulu, besithi “Heil Hitler!” baphinda bathi “Viva Franco!” Babatsho ngezithuko bashiya abangazaziyo yaye babasongela baza bababetha abalindi abaninzi ababezama ukuphelisa eso siphazamiso. Elo hlokondiba alizange liphumelele ekupheliseni loo ntlanganiso. UMzalwan’ uRutherford waqhubeka enikel’ intetho ngamandla nangokungenaloyiko. Xa eso siphithiphithi sasifikelele kwincopho yaso, wathi: “Phawulani namhlanje amaNazi namaKatolika afuna ukuphelisa le ntlanganiso, kodwa ngobabalo lukaThixo awakwazi ukwenjenjalo.” Abaphulaphuli babemxhasa ngokumana besitsho ngentswahlakazi beqhwaba izandla. Oku kuphazamisa kwaba yinxalenye engenakucimeka yoko kwarekhodwa ngeso sihlandlo, yaye kuye kweviwa ngabantu abaninzi kwiindawo ezininzi zehlabathi.

Noko ke, apho kwakunokwenzeka, njengakwiintsuku zokuNcinwa Kwamakholwa, abefundisi bamaRoma Katolika babesebenzisa uRhulumente ukuze baval’ umlomo nabani na owayenobuganga bokuzithandabuza iimfundiso nezinto ezazisenziwa yicawa.

Ukuphathwa Kakubi Kwiinkampu Zoxinaniso

UAdolf Hitler wayekulungele ukuhambisana nabefundisi. Ebudeni bowe-1933, unyaka esatyikitywa ngawo isivumelwano phakathi kweVatican neJamani yamaNazi, uHitler waqalisa iphulo lokuphelisa amaNgqina kaYehova eJamani. Ngowe-1935 kwakuthethwa kakubi ngawo kulo lonke elo lizwe. Kodwa ngubani owayephembelela oku?

Omnye umfundisi ongumKatolika, ebhala kwiDer Deutsche Weg (iphephandaba lesiJamani elalipapashwa eLodz, ePoland), wathi kwinkupho yalo kaMeyi 29, 1938: “Linye kuphela ilizwe emhlabeni abantu ababizwa ngokuba . . . ngaBafundi beBhayibhile [amaNgqina kaYehova] abangafunwayo kulo. Elo lizwe yiJamani! . . . Xa uAdolf Hitler wabekwa esihlalweni, laza iQumrhu Loobhishopu BamaKatolika eJamani laphinda isicelo salo, uHitler wathi: ‘Aba bantu bafane babizwe ngokuba ngaBafundi beBhayibhile Abanyanisekileyo [amaNgqina kaYehova] bangabaqhwayi benkathazo; . . . Ndibagqala njengamabhedengu; andiyinyamezeli into yokuba amaKatolika aseJamani angcoliswe ngale ndlela ngulo Judge Rutherford waseMerika; ndiyawaphelisa [amaNgqina kaYehova] eJamani.’”—Akekeliswe sithi.

Ngaba liQumrhu Loobhishopu BamaKatolika laseJamani kuphela elalifuna kuthatyathwe inyathelo elinjalo? Njengoko kwachazwa kwiOschatzer Gemeinnützige, ka-Aprili 21, 1933, kwintetho awayenza kunomathotholo ngoAprili 20, umfundisi wamaLuthere uOtto wathetha ‘ngentsebenziswano efihlakeleyo’ yeCawa yamaLuthere aseJamani yeLizwana laseSaxony neenkokeli zobupolitika zelo lizwe, waza wathi: “Imiphumo yokuqala yale ntsebenziswano sele inokubonwa ekuvalweni umlomo kwanamhlanje kweInternational Association of Earnest Bible Students [amaNgqina kaYehova] neminye imibutho yayo eSaxony.”

Emva koko, uRhulumente wamaNazi waqalisa enye yezona ndlela ziqatha zokutshutshisa amaKristu kwezakha zabhalwa embalini. Amawaka amaNgqina kaYehova—avela eJamani, eOstriya, ePoland, eCzechoslovakia, eNetherlands, eFransi nakwamanye amazwe—aphoswa kwiinkampu zoxinaniso. Apha aphathwa ngeyona ndlela imbi nebuhlungu ngokungathethekiyo. Kwakungeyonto ingaqhelekanga ukuba bathukwe baze bakhatywe, baze banyanzelelwe ukuba bagobe amadolo, batsibatsibe, baze bakhase kangangexesha elide, de baf’ isiqaqa okanye bawe ngenxa yokudinwa, ngoxa abalindi befile kukuhleka. Wambi ayenyanzelelwa ukuba ame ehamba ze okanye amiswe phandle enganxibanga ngokufudumeleyo phakathi ebusika. Amaninzi ayetyakatywa de angabikho zingqondweni yaye imiqolo yawo iligazi nje. Kwamanye kwakusenziswa ulingelo lwezamayeza. Wambi, ebotshelelwe iingalo zawo emqolo, ayexhonywa ngezihlahla zawo. Nangona ayetyhafile yindlala yaye enganxibanga ngokwaneleyo kwimozulu eyayiqhaqhazelis’ amazinyo, ayenyanzelelwa ukuba enze umsebenzi onzima, esebenza iiyure ezininzi, ngokufuthi esebenzisa izandla zawo xa kwakufuneka kusetyenziswe imihlakulo nezinye izixhobo. Ngaloo ndlela amadoda namabhinqa ayephethwe kakubi. Iminyaka yawo yobudala yayisusela kwishumi elivisayo ukuya kumashumi asixhenxe. Abo babewangcungcuthekisa babekhwaza amazwi okunyelisa uYehova.

Kumzamo wokoyikisa amaNgqina, umphathi wenkampu eSachsenhausen wayalela ukuba uAugust Dickmann, iNgqina eliselula, abulawe phambi kwawo onke amabanjwa, amaNgqina kaYehova emi ngaphambili ukuze akuve kakuhle oko. Emva koko, kwathiwa amanye amabanjwa makahambe, kodwa amaNgqina kaYehova kwafuneka asale. Egxininisa kakhulu umphathi lowo wawabuza oku: ‘Ngubani ngoku okulungeleyo ukutyobela esi sivumo?’—isivumo sokulahla ukholo lukabani nesibonisa ukukulungela ukuba lijoni. Akuzange kubekho namnye kumaNgqina angama-400 nangaphezulu owavumayo. Andula ke amabini aya ngaphambili! Kungekhona ukuze atyobele kodwa ayefuna ukucela ukuba kucinywe amagama awo awayewatyobele kunyaka ongaphambili.

Kwinkampu yaseBuchenwald, kwakusetyenziswa ingcinezelo efanayo. Igosa elingumNazi uRödl wawazisa oku amaNgqina: “Ukuba nabani na kuni uyala ukulwa nxamnye neFransi okanye iNgilani, nonke nimele nife!” Amaqela amabini ama-SS awayexhobe afohlela ayelinde esangweni. Akukho nokuba abe mnye kumaNgqina owanikezelayo. Kwalandela impatho embi, kodwa isisongelo selo gosa asizange siphunyezwe. Kwaqondwa kakuhle ukuba, ngoxa amaNgqina kwezo nkampu ayesenza phantse naluphi na uhlobo lomsebenzi awayewabelwa, sekunjalo, nakuba ayesohlwaywa ngokuvinjwa ukutya nokunikwa umsebenzi omninzi gqitha, ngokomeleleyo ayengavumi ukwenza nayiphi na into yokuxhasa imfazwe okanye enxamnye nomntu awayebanjwe naye.

Kunzima ukuchaza imeko awatyhubela phantsi kwayo. Amakhulu awo afa. Emva kokukhululwa kwasindileyo kwezo nkampu ekupheleni kwemfazwe, elinye iNgqina laseFlanders labhala: “Kuphela ngumnqweno wokuphila, ithemba nokuthembela kuYe, uYehova, onamandla onke, nokuthanda uLawulo Lobuthixo, okwenze ukuba sikunyamezele konke oku size soyise.—Roma 8:37.”

Abazali bahlukaniswa nabantwana babo. Amaqabane atshatileyo ahlukaniswa, yaye abanye baba bagqibelisana ngoko. Kungekudala emva kokuba etshatile, uMartin Poetzinger wabanjwa waza wasiwa kwinkampu eyayidume kakubi gqitha eDachau, wandula ke wasiwa eMauthausen. Umfazi wakhe, uGertrud, wavalelwa eRavensbrück. Abazange babonane kangangeminyaka esithoba. Ekhumbula amava akhe eMauthausen, kamva wabhala: “AmaGestapo azama zonke iindlela zokusiqhubela ekulutyesheleni ukholo lwethu kuYehova. Ukuvinjwa ukutya, abahlobo benkohliso, ukuphathwa ngenkohlakalo, ukuma kwifreyimu umhla nezolo, ukuxhonywa kwisibonda [esiziimitha ezintathu] ukuphakama ngezihlahla ezijikeliswe emqolo, ukutyakatywa—zonke ezi nezinye ekunzima gqitha ukuzikhankanya yayiziindlela ezazanywayo.” Kodwa wahlala enyanisekile kuYehova. Naye waba phakathi kwabasindayo, yaye kamva wakhonza njengelungu leQumrhu Elilawulayo lamaNgqina kaYehova.

Bavalelwa Entolongweni Ngenxa Yokholo Lwabo

AmaNgqina kaYehova awazange asiwe kwiinkampu zoxinaniso kuba ezizaphuli-mthetho. Xa amagosa ayefuna umntu wokuwacheba iinwele, ayenika iNgqina incakuba, kuba ayesazi ukuba akukho Ngqina lalinokuze lisebenzise isixhobo esinjalo ukuze lenzakalise omnye umntu. Xa amagosa ama-SS kwinkampu yaseAuschwitz ekwakubulawelwa kuyo abantu ayefuna umntu wokuwacocela amakhaya awo okanye wokunyamekela abantwana bawo, ayekhetha amaNgqina, kuba ayesazi ukuba ayengayi kuzama ukuwatyhefa okanye azame ukuqhwesha. Xa kwakuphunywa kwinkampu yaseSachsenhausen ekupheleni kwemfazwe, abalindi babeka inqwelo eyayinezinto ababeziphangile phakathi kweqela lamaNgqina. Kwakutheni? Kungenxa yokuba babesazi ukuba amaNgqina ayengayi kuba nantoni na.

AmaNgqina kaYehova avalelwa entolongweni ngenxa yokholo lwawo. Ngokuphindaphindiweyo ayethenjiswa ngokukhululwa kwiinkampu ukuba ayenokuthi nje atyobele isivumo sokulahla iinkolelo zawo. Ama-SS enza konke okwakusemandleni awo ukuze alukuhle okanye anyanzele amaNgqina ukuba atyobele eso sivumo. Le yeyona nto ayeyifuna ngaphezu kweento zonke.

Onke amaNgqina ngaphandle kwambalwa angqineka engabagcini bengqibelelo. Kodwa enza okungakumbi kunokubandezeleka ngenxa yokunyaniseka kwawo kuYehova nokuzinikela kwawo kwigama likaKristu. Enza okungakumbi kunokunyamezela ukuncinwa ngokuthuthunjiswa. Alondoloza amaqhina omeleleyo omanyano lokomoya.

Ayengenamoya wokuzisindisa nokuba sekumnyam’ entla. Abonakalisa uthando lokuzincama. Xa omnye wawo wayesiba buthathaka, amanye ayesabelana naye ngaloo ntwana yokutya awayeyifumana. Xa ayengafumani lunyango lwezamayeza, ayenyamekelana ngothando.

Phezu kwayo nje yonke imigudu yabo babewatshutshisa yokuthintela oku, umbandela wokufundisisa iBhayibhile wawufikelela kumaNgqina—ufihlwe kwizipho ezithandelweyo ezazivela ngaphandle, ngokuxelelwa ngamabanjwa afikayo, nangokufihlwa emlenzeni weplanga webanjwa elifikayo, okanye ngezinye iindlela xa ayekwizabelo zemisebenzi ngaphandle kweenkampu. Ayebolekisana ngemibhalo; maxa wambi kwakusenziwa imibhalo ekhutshelweyo ngokufihlakeleyo koomatshini ababephakathi kanye kwiiofisi zamagosa enkampu. Nakuba kwakubandakanyeke ingozi enkulu, ezinye iintlanganiso zamaKristu zaziqhutywa kwanakwezo nkampu.

AmaNgqina aqhubeka eshumayela ukuba uBukumkani bukaThixo bukuphela kwethemba loluntu—yaye akwenza oko apho kanye kwiinkampu zoxinaniso! EBuchenwald, ngenxa yomsebenzi olungelelanisiweyo, amawaka amabanjwa aziva iindaba ezilungileyo. Kwinkampu yaseNeuengamme, kufutshane naseHamburg, kwacetywa ngenyameko kwaza kwaqhutywa iphulo lokunikela ubungqina ngokucokisekileyo ekuqaleni kowe-1943. Kwalungiselelwa amaqweqwe obungqina ngeelwimi ezahlukeneyo ezazithethwa kuloo nkampu. Kwenziwa imigudu yokufikelela ibanjwa ngalinye. Kwenziwa amalungiselelo okufundisisa iBhayibhile ngokobuqu rhoqo nabanomdla. AmaNgqina ayenenzondelelo gqitha ekushumayeleni kwawo kangangokuba amanye amabanjwa ezobupolitika akhalaza esithi: “Naphi na apho uya khona, uva kuphela kuthethwa ngoYehova!” Xa kwaphuma umyalelo eBerlin wokuba amaNgqina asasazwe phakathi kwamanye amabanjwa ukuze enziwe buthathaka, eneneni oku kwenza akwazi ukunikela ubungqina kubantu abangakumbi.

Ngokuphathelele amabhinqa athembekileyo angamaNgqina angama-500 nangaphezulu eRavensbrück, umtshana weNjengele yomFrentshi uCharles de Gaulle wabhala oku emva kokukhululwa kwakhe: “Ndiwahlonela ngokwenene. Ayengawezizwe ezahlukahlukeneyo: amaJamani, abasePoland, amaRashiya namaCzech, yaye aye anyamezela ubunzima obungathethekiyo ngenxa yeenkolelo zawo. . . . Onke abonakalisa inkalipho engathethekiyo yaye isimo sawo sengqondo sabangela ukuba ekugqibeleni ade ahlonelwe nangama-S.S. Ayenokukhululwa ngoko nangoko ukuba ayerhoxile kukholo lwawo. Kodwa, ngokuchasene noko, awazange anikezele, ade aphumelela ukungenisa iincwadi namaphecana enkampini.”

NjengoYesu Kristu, azingqina engaboyisi behlabathi elalifuna ukuwenza afane nalo kwindlela yalo yobusathana. (Yoh. 16:33) UChristine King, kwincwadi ethi New Religious Movements: A Perspective for Understanding Society, uthi ngawo: “AmaNgqina kaYehova ayicel’ umngeni inkqubo entsha yobuzwilakhe, yaye olu celomngeni, ndawonye nokuqhubeka kwalo lukho, lwabaphazamisa ngokuphawulekayo abo babeyila le nkqubo entsha. . . . Iindlela zentshutshiso ezazithandwa ngelo xesha, ukuthuthumbisa, ukuvalela entolongweni nokwenza intlekisa azizange ziphumele ekuguquleni naliphi na iNgqina ukuba libe kwicala lamaNazi yaye enyanisweni zazisenza okwakuchasene noko kwakufunwa ngabo babezisebenzisa. . . . Phakathi kwala maqela mabini awayefuna ukunyaniseka, kwabakho umlo okrakra, kwanangakumbi kunoko, ekubeni amaNazi awayenamandla ngakumbi ayengaqinisekanga ngeendlela ezininzi, engaqinanga kakhulu koko ayekukholelwa, engaqinisekanga ukuba uLawulo lwawo lweminyaka eli-1 000 luya kuhlala lukho. AmaNgqina ayengayithandabuzi imvelaphi yawo, kuba ukholo lwawo lwalukho ukususela kwixesha lika-Abheli. Ngoxa amaNazi kwakufuneka aphelise inkcaso aze eyisele abaxhasi bawo, ngokufuthi esebenzisa indlela yokuthetha nezafobe zobuKristu bamahlelo, amaNgqina ayeqinisekile ngokunyaniseka okupheleleyo nokungaguqukiyo kwamalungu awo, de kuse ekufeni.”—Yapapashwa ngowe-1982.

Ekupheleni kwemfazwe, amaNgqina angaphezu kwewaka awasindayo aphuma kwiinkampu, enokholo yaye ethandana ngokomeleleyo. Njengoko imikhosi yamaRashiya yayisondela, ngokukhawuleza abalindi bakhupha bonke abantu eSachsenhausen. Amabanjwa bawadibanisa ngamaqela eentlanga. Kodwa amaNgqina kaYehova ahlala kunye njengeqela elinye—angama-230 awo awayesuka kule nkampu. Xa amaRashiya ayesondela kakhulu emva kwabo, abalindi baba nexhala. Kwakungekho kutya, yaye amabanjwa ayetyhafile; sekunjalo, nabani na owayeshiyeka ngasemva okanye owayesiwa ngenxa yokudinwa wayedutyulwa. Amawaka abanjalo ayethe saa ecaleni kwaloo ndlela umngcelele wawuhamba kuyo. Kodwa amaNgqina ayencedana ukuze noyena utyhafileyo angashiywa equngquluze endleleni! Kanti amanye awo ayeneminyaka ephakathi kwengama-65 nama-72 ubudala. Amanye amabanjwa azama ukuba ukutya kwalapha endleleni, yaye amaninzi adutyulwa ngoxa esenza oko. Ngokwahlukileyo koko, amaNgqina kaYehova asebenzisa amathuba okuxelela abantu kuloo ndlela ngeenjongo zikaYehova zothando, yaye abanye baba, bebulela ngesigidimi esithuthuzelayo, bawanika ukutya ukwenzela bona kunye nabazalwana bawo abangamaKristu.

Abefundisi Bayaqhubeka Besilwa

Emva kweMfazwe Yehlabathi II, abefundisi kummandla osempuma weCzechoslovakia baqhubeka bephembelela ukutshutshiswa kwamaNgqina kaYehova. Ebudeni bexesha lokulawula kwamaNazi, babetyhola amaNgqina ngelithi angamaKomanisi; ngoku bema ngelokuba amaNgqina ayenxamnye norhulumente wobuKomanisi. Maxa wambi, xa amaNgqina kaYehova ayetyelela amakhaya abantu, abefundisi babebongoza abafundisi-ntsapho ukuba bavumele abantwana abaninzi baphume esikolweni baye kugibisela amaNgqina ngamatye.

Ngokufanayo, abefundisi bamaKatolika eSanta Ana, e-El Salvador, baphembelela abantu nxamnye namaNgqina ngowe-1947. Ngoxa abazalwana babeqhuba iSifundo seMboniselo sabo seeveki ngeeveki, amakhwenkwe agibisela amatye emnyango owawuvuliwe. Kwandula ke kwafika umngcelele owawukhokelwa ngabefundisi. Abanye babephethe izikhanyiso; abanye bephethe imifanekiso. Babekhwaza besithi: “Phambili NgeNtombi Enyulu!” “Kwanga uYehova angafa!” Kangangexesha elinokuba ziiyure ezimbini, eso sakhiwo sasigityiselwa ngamatye.

Phakathi kwiminyaka yee-1940, namaNgqina kaYehova aseQuebec, eKhanada, aba ngamaxhoba okuphathwa kakubi gqitha, exhatshazwa ngamahlokondiba amaKatolika nangabasemagunyeni. Abameli ababevela kwibhotwe likabhishopu babefika yonke imihla kwisebe lamapolisa befuna ukuba amapolisa aphelise amaNgqina. Ngokufuthi, ngaphambi kokuba kubanjwe abathile, amapolisa ayebonwa ephuma kumnyango ongasemva wecawa. Ngowe-1949, abavangeli basemazweni bamaNgqina kaYehova bagxothwa eJoliette, eQuebec, lihlokondiba lamaKatolika.

Kodwa asingabo bonke abantu baseQuebec ababevumelana noko kwakusenziwa. Namhlanje, kukho iHolo yoBukumkani yamaNgqina kaYehova entle ecaleni kwenye yezona ndlela zinkulu zaseJoliette. Isikolo sabefundisi esasilapho savalwa, sathengwa ngurhulumente, saza saguqulelwa ekubeni yikholeji kawonke wonke. Yaye eMontreal, amaNgqina kaYehova aqhuba iindibano ezinkulu zezizwe ngezizwe, ekwakukho kuzo abantu abafikelela kuma-80 008 ngowe-1978.

Sekunjalo, iCawa yamaKatolika iye yasebenzisa zonke iindlela enako ukuzisebenzisa ukuze iqhubeke ibalawula ngegqudu abantu. Ngokuphembelela amagosa aseburhulumenteni, yaqinisekisa ukuba abavangeli basemazweni abangamaNgqina kaYehova bayagxothwa eItali ngowe-1949 nokuba, xa kunokwenzeka, iimvume ezazinikwe amaNgqina zokuba aqhube iindibano apho zirhoxiswe ebudeni beminyaka yee-1950. Phezu kwako nje oku, amaNgqina kaYehova aqhubeka esanda, yaye ngowe-1992 bekukho abahambisi bevangeli abangamaNgqina abangaphezu kwe-190 000 eItali.

Njengakwixesha lokuNcinwa Kwamakholwa, abefundisi baseSpeyin balingcolisa igama lawo baza bayekela kuRhulumente ukuba enze umsebenzi ongcolileyo. Ngokomzekelo, eBarcelona, apho ubhishophu omkhulu waqalisa iphulo lokulwa nxamnye namaNgqina ngowe-1954, abefundisi basebenzisa iipulpiti zabo nezikolo kunye nonomathotholo ukuze bacebise abantu ukuba xa amaNgqina ebatyelela, bafanele bangawamkeli ezindlwini zabo—baze babize amapolisa ngokukhawuleza.

Abefundisi babesoyikela ukuba abantu baseSpeyin babesenokufunda oko kwakuseBhayibhileni baze mhlawumbi bade babonise nabanye oko bakubonileyo. Xa uManuel Mula Giménez wabanjelwa “ulwaphulo-mthetho” lokufundisa abanye iBhayibhile eGranada ngowe-1960, umfundisi womkhosi owayetyelela iintolongo (umfundisi ongumKatolika) wayisusa ekuphela kweBhayibhile eyayikwithala leencwadi lentolongo. Yaye xa elinye ibanjwa laboleka uManuel umbhalo weencwadi zeVangeli, nayo yahluthwa kuye. Kodwa ngoku iBhayibhile iye yafikelela kubo bonke abantu eSpeyin, baye banethuba lokuzibonela oko ikuthethayo, yaye ngowe-1992, bebengaphezu kwama-90 000 abebenqula uYehova njengamaNgqina akhe.

KwiDominican Republic, abefundisi babesebenzisana noZwilakhe uTrujillo, bemsebenzisela ukuphumeza iinjongo zabo njengoko naye wayebasebenzisela ezakhe iinjongo. Ngowe-1950, emva kokuba amanqaku ephephandaba awayebhalwe ngabefundisi angcolisa igama lamaNgqina kaYehova, umveleli wesebe leWatch Tower Society wabizelwa ukuya kubonana noMphathiswa Wezangaphakathi Namapolisa. Njengoko wayelinde ngaphandle kwaloo ofisi, umveleli wesebe wabona abefundisi ababini abangamaJesuit bengena baza baphuma. Kamsinya emva koko, wabizelwa kwiofisi yaloo Mphathiswa, yaye lo Mphathiswa ebonakala engakhululekanga wafunda umyalelo wokuvalwa komsebenzi wamaNgqina kaYehova. Emva kokuba oko kuvalwa komsebenzi kwarhoxiswayo okwexeshana ngowe-1956, abefundisi basebenzisa unomathotholo namaphephandaba benyelisa amaNgqina. Kwakubanjwa abantu bebandla lonke baze bayalelwe ukuba batyobele isivumo sokulahla ukholo lwabo baze bathembise ukubuyela kwiCawa yamaRoma Katolika. Xa amaNgqina engavumi, ayebethwa, ekhatywa, etyakatywa, ibe ayentlithwa ebusweni ngemiva yemipu. Kodwa ahlala omelele, yaye ayesanda.

ESucre, eBolivia, kwakukho ugonyamelo olungakumbi. Ngexesha ekwakuqhutywa ngalo indibano yamaNgqina kaYehova ngowe-1955, iqela lamakhwenkwe elalivela kwiSikolo samaKatolika iSacred Heart larhanqa loo ndawo eyayinendibano, likhwaza, ibe ligibisela ngamatye. Kwisakhiwo secawa esasiphesheya kwesitrato, ilizwi elalivakala kwisandisi-lizwi esinamandla labongoza onke amaKatolika ukuba akhusele icawa ‘neNtombi Enyulu’ nxamnye ‘namaProtestanti angabaqhekeki.’ Ubhishophu nabefundisi bazama ngokobuqu ukuphazamisa loo ndibano kodwa amapolisa abayalela ukuba baphume kuloo holo.

Kunyaka ongaphambi kwalowo, xa amaNgqina kaYehova ayeqhuba indibano eRiobamba, e-Ecuador, ucwangciso lwawo lwabalaselisa intetho yesidlangalala eyayinomxholo othi “Uthando, Ngaba Lunokubonakaliswa Kwihlabathi Elizingcayo?” Kodwa umfundisi ongumJesuit waxhokonxa abemi abangamaKatolika, ebabongoza ukuba bayithintele loo ndibano. Ngenxa yoku, njengoko intetho yayiqhubeka, beva ihlokondiba likhwaza: “Phambili NgeCawa YamaKatolika!” nokuthi, “Phantsi NgamaProtestanti!” Ngokuncomekayo amaPolisa abanqanda, ephethe amakrele. Kodwa elo hlokondiba lagibisela amatye kwindawo eyayinaloo ndibano laza, kamva, lagibisela nesakhiwo ababehlala kuso abavangeli basemazweni.

Abefundisi bamaRoma Katolika bebephambili ekutshutshiseni, kodwa babengebodwa. Abefundisi bobuOthodoki bamaGrike bebekhohlakele ngokufanayo yaye bebesebenzisa iindlela ezifanayo, kwimimandla embalwa ababenempembelelo kuyo. Ukongezelela, apho babecinga ukuba babenokuphumelela, abefundisi abaninzi bamaProtestanti baye babonakalisa umoya ofanayo. Ngokomzekelo, eIndonesia baye bakhokela amahlokondiba awachitha izifundo zeBhayibhile emakhayeni abantu aza awatyakatya kanobom amaNgqina kaYehova awayelapho. Kwamanye amazwe aseAfrika, baye bazabalazela ukuphembelela abasemagunyeni ukuba bawagxothe amaNgqina kaYehova kuloo mazwe okanye bangawaniki inkululeko yokuthetha ngeLizwi likaThixo nabanye. Nakuba besenokwahluka kweminye imibandela, abefundisi bamaKatolika nabamaProtestanti xa bebonke bayavumelana ekuchaseni amaNgqina kaYehova. Ngamaxesha athile bade basebenzisana ekuzameni ukuphembelela amagosa aseburhulumenteni ukuba aphelise umsebenzi wamaNgqina. Apho iinkonzo ezingezozabuKristu zilawula indlela yokuphila, ngokufuthi nazo ziye zasebenzisa urhulumente ukuba akhusele abantu bazo kuko nakuphi na ukuchanabeka kwiimfundiso ezisenokubangela ukuba baluthandabuze unqulo abazalelwa kulo.

Maxa wambi, la maqela angengomaKristu aye asebenzisana nabo bazibabaza bengamaKristu kumacebo okulondoloza imeko ekhoyo yonqulo. EDekin, eDahomey (ngoku eyiBenin), umfundisi wejuju nomfundisi ongumKatolika bavumelana ukuba benze abasemagunyeni baphelise umsebenzi wamaNgqina kaYehova ekuqaleni kweminyaka yee-1950. Ngelokuncama benza izityholo ezazilungiselelwe ukuxhokonxa ubutshaba. Bawatyhola amaNgqina ngokuthi abongoza abantu ukuba bavukele urhulumente, ayengahlawuli zirhafu, ayengunobangela wokuba iijuju zinganisi mvula, yaye ayebekek’ ityala ngokungaphendulwa kwemithandazo yaloo mfundisi. Zonke iinkokeli zonqulo ezinjalo zazisoyikela ukuba abantu bazo babesenokufunda izinto ezaziya kubakhulula kwiinkolo nakubomi bentobelo emfamekileyo.

Noko ke, ngokuthe ngcembe, impembelelo yabefundisi yaphela kwiindawo ezininzi. Ngoku abefundisi bafumanisa ukuba abamapolisa awasoloko ebaxhasa xa bephatha kakubi amaNgqina. Xa omnye umfundisi wobuOthodoki bamaGrike wazama ukuphelisa indibano yamaNgqina kaYehova ngogonyamelo lwehlokondiba eLarissa, eGrisi, ngowe-1986, umtshutshisi wenqila neqela elikhulu lamapolisa bathethelela la maNgqina. Yaye maxa wambi amaphephancwadi ayethetha ngokuphandle egxeka izenzo zokunganyamezeli iimbono ezahlukileyo zonqulo.

Sekunjalo, kwimimandla emininzi ehlabathini, ezinye iimbambano ziye zakhokelela kwiintshutshiso. Enye yezi mbambano iye yabandakanya ukuma kwamaNgqina kaYehova ngokuphathelele imifuziselo yesizwe.

Ngenxa Yokuba Anqula UYehova Kuphela

Kumaxesha akutshanje okokuqala kwakukwiJamani yamaNazi awathi amaNgqina kaYehova ajamelana ngokubalaseleyo nemibandela ebandakanya imibhiyizo yobuzwe. UHitler wazama ukulawula uhlanga lwamaJamani ngokwenza isikhahlelo samaNazi esithi “Heil Hitler!” sibe sisinyanzelo. Ngokutsho komcholacholi weendaba waseSwitzerland nomsasazi we-BBC uBjörn Hallström, xa amaNgqina kaYehova ayebanjwa eJamani ebudeni bexesha lamaNazi, ngokufuthi izityholo awayebekwa zona zaziquka “ukungavumi ukukhahlela indwe nokutsho isikhahlelo samaNazi.” Kungekudala namanye amazwe aqalisa ukufuna ukuba wonk’ ubani akhahlele indwe yawo. AmaNgqina kaYehova akazange avume—kungekuba ayenganyanisekanga kodwa ngenxa yesazela sobuKristu. Ayayihlonela indwe kodwa ukukhahlela indwe akugqala njengesenzo sonqulo.f

Emva kokubanjwa kwamaNgqina ali-1 200 eJamani ekuqaleni kwexesha lamaNazi ngenxa yokungavumi ukwenza isikhahlelo samaNazi nokungavumi ukutyeshela ubundilele bawo bobuKristu, angamawaka kuwo aphathwa kakubi eUnited States kuba ayengavumi ukukhahlela indwe yaseMerika. Ebudeni beveki kaNovemba 4, 1935, abantwana besikolo abaninzi eCanonsburg, ePennsylvania, basiwa kwigumbi lesikolo elalinezixhobo zokufudumeza amanzi (boiler) baza batywatyushwa kuba bengavumi ukuyikhahlela. UGrace Estep, owayengumfundisi-ntsapho, wagxothwa kwisikhundla sakhe kweso sikolo ngenxa yesizathu esifanayo. NgoNovemba 6, uWilliam noLillian Gobitas abazange bavume ukukhahlela indwe baza bagxothwa esikolweni eMinersville, ePennsylvania. Uyise wamangala ukuze abantwana bakhe bamkelwe kwakhona. Inkundla yenqila nenkundla yesiphaluka yezibheno zawisa isigwebo esivumelana namaNgqina kaYehova kwelo tyala. Noko ke, ngowe-1940, xa elo lizwe lalisele liza kungenela imfazwe, iNkundla Ephakamileyo yaseUnited States, kwityala elalibizwa ngokuthi Minersville School District v. Gobitis, ngesigqibo sabantu abasibhozo nxamnye nomnye, yabambelela kwisinyanzelo sokukhahlelwa kwendwe kwizikolo zikawonke wonke. Oku kwakhokelela ekuphathweni ngogonyamelo kwamaNgqina kaYehova kulo lonke elo lizwe.

AmaNgqina kaYehova ahlaselwa izihlandlo ezininzi gqitha kangangokuba uNkskz. Eleanor Roosevelt (umfazi kaMongameli F. D. Roosevelt) wabongoza abantu ukuba bawayeke. NgoJuni 16, 1940, igqwetha likarhulumente elimela ummangalelwa laseUnited States, uFrancis Biddle, kusasazo lukanomathotholo olufikelela kulo lonke elo lizwe, wabhekisela ngokungqalileyo kwizenzo zenkohlakalo ezazisenziwa kumaNgqina waza wathi aziyi kunyanyezelwa. Kodwa oku akuzange kuzidambise.

Nakuyiphi na indawo ekunokucingwa ngayo—ezitratweni, kwiindawo zengqesho, xa amaNgqina etyelela amakhaya abantu kubulungiseleli bawo—kwakuphakanyiswa indwe phambi kwawo, kufunwe ukuba ayikhahlele—kungenjalo ajamelane nemiphumo! Ekupheleni kowe-1940, iYearbook of Jehovah’s Witnesses yathi: “Iinkokeli zonqulo noMkhosi Omkhulu wamaMerika, zisebenzisa amahlokondiba anjalo aye awuthabathela ezandleni zawo umthetho, ziye zabangela umonakalo ongathethekiyo. Amangqina kaYehova aye axhatshazwa, abethwa, aqweqwediswa, agxothwa ezidolophini, kwiinqila nakumazwana, aqatywa itela afakwa neentsiba, anyanzelwa ukuba asele icastor oil, abotshelelwa kunye aza aleqwa ezitratweni ngokungathi ngamarhamncwa angenazingqondo, athenwa aza angxwelerhwa, agculelwa aza athukwa zizihlwele eziphenjelelwa ziidemon, amakhulukhulu awo abanjwa engamangalelwanga aza ahlukaniswa nabantu engalinikwa nelungelo lokuncokola nezalamane, abahlobo okanye ukuthetha namagqwetha. Amanye amakhulukhulu amaninzi aye avalelwa ezintolongweni kusithiwa ‘ayakhuselwa’; amanye aye adutyulwa ebusuku; wambi aye asongelwa ngokuxhonywa aza abethwa de af’ isiqaqa. Kuye kwakho iintlobo ezininzi zogonyamelo lwamahlokondiba. Amanye aye akrazulelwa iimpahla azinxibileyo, iiBhayibhile noncwadi lwawo lwahluthwa lwaza lwatshiswa esidlangalaleni; iinqwelo-mafutha, iinqwelo ezirhuqwayo, amakhaya neendawo zawo zeendibano zonakaliswa zaza zatshiswa . . . Kwiimeko ezininzi apho kuye kwachotshelwa amatyala kwimimandla elawulwa ngamahlokondiba, amagqwetha kunye namangqina aye ahlaselwa aza abethwa ngoxa esenkundleni. Phantse kwityala ngalinye apho bekukho ugonyamelo lwamahlokondiba amagosa karhulumente aye asonga izandla aza akavuma ukukhusela abantu, yaye kwiimeko ezininzi amagosa omthetho aye aba nenxaxheba kumahlokondiba yaye maxa wambi aye akhokela amahlokondiba.” Ukususela ngowe-1940 ukusa kowe-1944, ngamahlokondiba anogonyamelo angaphezu kwama-2 500 awahlasela amaNgqina kaYehova eUnited States.

Ngenxa yokugxothwa kwabantwana abaninzi bamaNgqina kaYehova ezikolweni, okwexesha elithile ngasekupheleni kweminyaka yee-1930 nasekuqaleni kweyee-1940 kwafuneka azivulele ezawo izikolo eUnited States naseKhanada ukuze afundise abantwana bawo. Ezi zazibizwa ngokuba ziZikolo zoBukumkani.

Kwanamanye amazwe awatshutshisa ngokuqatha amaNgqina kuba ayengavumi ukukhahlela okanye ukuncamisa imifanekiso yelizwe. Ngowe-1959, abantwana bamaNgqina kaYehova eCosta Rica ababengatheleli koko umthetho wawukuchaza ‘njengonqulo Lwemifanekiso Yelizwe’ babengamkelwa ezikolweni. Babephathwa ngendlela efanayo nabantwana bamaNgqina baseParaguay ngowe-1984. INkundla Ephakamileyo kwiiPhilippines ngowe-1959 yawisa isigwebo sokuba, phezu kwako nje ukungafuni ngenxa yonqulo lwabo, abantwana bamaNgqina kaYehova babenokunyanzelwa ukuba bakhahlele indwe. Kodwa, abaphathi bezikolo apho, kwiimeko ezininzi, babesebenzisana namaNgqina ukuze abantwana bawo bakwazi ukuya esikolweni ngaphandle kokuphazamisa izazela zabo. Ngowe-1963, abasemagunyeni eLiberia, kwiNtshona Afrika, batyhola amaNgqina ngelithi akanyanisekanga kuRhulumente; banyanzela ukuba ipheliswe indibano yamaNgqina eyayiseGbarnga baza bayalela ukuba wonk’ ubani owayelapho—abemi baseLiberia nabamanye amazwe—enze isifungo sokunyaniseka kwindwe yelo lizwe. Ngowe-1976 ingxelo eyayinomxholo othi “AmaNgqina KaYehova ECuba” yathi ebudeni beminyaka emibini edluleyo, abazali abaliwaka, amadoda nabafazi, bathunyelwe entolongweni kuba abantwana babo bengayikhahleli indwe.

Asingabo bonke abantu abavumelanayo nokucinezelwa ngolo hlobo kwabantu abathi, ngenxa yesazela, ngentlonelo bakuphephe ukuthelela kwimibhiyozo yokuthand’ izwe. IThe Open Forum, eyapapashwa liSebe elikuMzantsi Khalifoniya loMbutho Wenkululeko Yabemi waseMerika, ngowe-1941 yathi: “Sifanele sibuyele ezingqondweni ngokuphathelele lo mbandela wokukhahlela indwe. AmaNgqina kaYehova awangobemi baseMerika abanganyanisekanga. . . . Asingobantu abazizaphuli-mthetho ngokubanzi, kodwa aphila ubomi obundilisekileyo nobulungeleleneyo, anegalelo kwimisebenzi elungileyo.” Ngowe-1976 umbhali wemihlathi kwiphephandaba laseArgentina, kwiHerald yaseBuenos Aires, ngokuphandle wathi “iinkolelo [zamaNgqina] zicaphukisa kuphela abo bacinga ukuba ukuthand’ izwe ngokuyintloko kungumbandela wokuphakamisa indwe nokucula umhobe wesizwe, kungekhona umbandela wentliziyo.” Wongezelela oku: “UHitler noStalin babengawathandi [amaNgqina], baza bawaphatha kakubi gqitha. Abanye abalawuli abaninzi abangoozwilakhe abafuna ukuxhaswa ngabantu bonke baye bazama ukuwacinezela. Yaye abakhange baphumelele.”

Yaziwa nanguthathatha into yokuba amanye amaqela onqulo aye axhasa ugonyamelo lwezixhobo nxamnye noorhulumente angabathandiyo. Kodwa akukho ndawo emhlabeni apho amaNgqina kaYehova akha abandakanyeka kumzabalazo wezobupolitika. Asikokunganyaniseki—ngenxa yokuxhasa omnye urhulumente othile wabantu—okubangela ukuba angavumi ukukhahlela umfanekiso welizwe. Anokuma okufanayo kuwo onke amazwe afumaneka kuwo. Isimo sawo sengqondo ayisiso esokungabi nantlonelo. Awabethi khwelo okanye akhwaze ukuze aphazamise imibhiyozo yokuthand’ izwe; awayitshiceli indwe, awayinyhashi, okanye ayitshise. Awamchasanga urhulumente. Ukuma kwawo kusekelwe koko uYesu Kristu wakuthethayo, njengoko kubhalwe kuMateyu 4:10: “YiNkosi uThixo wakho oya kuqubuda kuyo, ukhonze yona yodwa.”

Ukuma kwamaNgqina kaYehova kufana noko kwamaKristu okuqala ngemihla yoBukhosi bamaRoma. Ngokuphathelele loo maKristu okuqala, incwadi ethi Essentials of Bible History ithi: “Isenzo sokunqula umlawuli sasiquka ukusasaza iinkozo ezimbalwa zesiqhumiso okanye amathontsi ambalwa ewayini kwisibingelelo esasimi phambi komfanekiso oqingqiweyo womlawuli. Mhlawumbi ngenxa yokuba siphila emva kwethuba elide ladlulayo elo xesha asiboni mahluko phakathi koko . . . nokuphakanyiswa kwesandla kukhahlelwa indwe okanye umlawuli othile obalaseleyo welizwe, amazwi abonis’ imbeko, intlonelo, nokuthand’ izwe. Kusenokwenzeka ukuba abantu abaninzi gqitha kwinkulungwane yokuqala babevakalelwa kanye ngaloo ndlela kodwa kwakungenjalo ngamaKristu. Wonke lo mcimbi ayewujonga njengobonakalisa ukunqula, njengovuma umlawuli njengothixo ibe ke ngoko ebonisa ukunganyaniseki kuThixo nakuKristu, ibe akazange avume ukwenza oko.”—NguElmer W. K. Mould, ngowe-1951, iphe. 563.

Athiywa ‘Ngokungabi Ngabehlabathi’

Kuba uYesu wathi abafundi bakhe ‘babengayi kuba ngabehlabathi,’ amaNgqina kaYehova awanasabelo kwimicimbi yalo yezobupolitika. (Yoh. 17:16; 6:15) Kwanakule nkalo, afana namaKristu okuqala, ababhali-mbali abathi ngawo:

“UbuKristu bokuqala babungaqondwa kakuhle yaye bungathandwa ngabo babelawula ihlabathi lobuhedeni. . . . AmaKristu akugatya ukuba nesabelo kwimisebenzi ethile yabemi baseRoma. . . . Ayengasamkeli isigxina sobupolitika.” (On the Road to Civilization—A World History, nguA. K. Heckel noJ. G. Sigman, ngowe-1937, iphe. 237-8) “Awazange avume ukuba nayo nayiphi na inxaxheba kulawulo lwaseburhulumenteni okanye ukuthelela umkhosi wokhuselo wobo bukhosi. . . . Kwakungenakwenzeka ukuba amaKristu, ngaphandle kokurhoxa kumsebenzi ongcwele ngakumbi, amkele umsebenzi wokuba ngamajoni, oomantyi, okanye iinkosana.”—History of Christianity, nguEdward Gibbon, ngowe-1891, iphe. 162-3.

Oku kuma akuthandwa lihlabathi, ngokukodwa kumazwe apho abalawuli bafuna ukuba wonk’ ubani abe nenxaxheba kwimisebenzi ethile njengobungqina bokuxhasa inkqubo yezobupolitika. Umphumo unjengokuba uYesu wachazayo: “Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi.”—Yoh. 15:19.

Kwamanye amazwe, ukuvota kunyulo lwezobupolitika kugqalwa njengesinyanzelo. Ongavotiyo wohlwaywa ngokuhlawuliswa imali, ngokuphoswa entolongweni, okanye ngendlela embi ngakumbi. Kodwa amaNgqina kaYehova axhasa uBukumkani bukaThixo obungoMesiya, bona, njengoko uYesu watsho, ‘obungebubo obeli hlabathi.’ Ngoko ke, awabi nanxaxheba kwimicimbi yezobupolitika yamazwe eli hlabathi. (Yoh. 18:36) Esi sisigqibo sobuqu; awanyanzelisi izimvo zawo kwabanye. Apho kungekho kunyamezela iimbono ezahlukileyo zonqulo, amagosa karhulumente aye abhenela kwisibakala sokungabi nanxaxheba kwamaNgqina njengesebe lenkawu lokuwatshutshisa ngokukrakra. Ngokomzekelo, ebudeni bexesha lamaNazi, oku kwakusenziwa kumazwe awayephantsi kolawulo lwawo. Kuye kwenziwa naseCuba. Noko ke, kumazwe amaninzi abasemagunyeni baye banengqondo ephangaleleyo.

Sekunjalo, kwezinye iindawo abo basemagunyeni baye bafuna ukuba wonk’ ubani abonakalise ukuxhasa iqela lezobupolitika elilawulayo ngokukhwaza amazwi athile. Kuba ngenxa yesazela engenakwenjenjalo, amawaka amaNgqina kaYehova kwimimandla esempuma yeAfrika abethwa, ahluthwa izinto zawo zokuziphilisa, yaye agxothwa emakhayeni awo ebudeni beminyaka yee-1970 neyee-1980. Kodwa amaNgqina kaYehova kuwo onke amazwe, nakuba ekhuthele yaye ethobela umthetho, angoondilele abangamaKristu kwimibandela yezobupolitika.

EMalawi, kukho umbutho omnye kuphela wezobupolitika, yaye ukuba nekhadi lawo kubonisa ukuba ulilungu lawo. Nangona amaNgqina engumzekelo ekuhlawuleni iirhafu zawo, ngokuvisisana neenkolelo zawo zonqulo, ayala ukuthenga amakhadi emibutho yezobupolitika. Ukwenjenjalo bekuya kuba kukulukhanyela ukholo lwawo kuBukumkani bukaThixo. Ngenxa yoku, ngasekupheleni kowe-1967, ekhuthazwa ngamagosa aseburhulumenteni, amaqela olutsha kulo lonke elaseMalawi aqalisa ukuhlasela onke amaNgqina kaYehova ngenkohlakalo embi nekrakra ngendlela engathethekiyo. Amabhinqa angamaKristu azinikeleyo angaphezu kwewaka adlwengulwa. Amanye ayekhululwa ahanjiswe ze phambi kwamahlokondiba amakhulu, abethwe ngeentonga nangamanqindi, andule ke axhatshazwe ngokwesini ngabantu belandelelana. Kwakubethelelwa izikhonkwane ezinyaweni zamadoda kuze kufakwe amacingo evili lebhayisikile emilenzeni yawo, kwandule ke kuthiwe mawabaleke. Kulo lonke elo lizwe amakhaya, ifanitshala, impahla yokunxiba nokutya kwawo kwatshatyalaliswa.

Kwakhona, ngowe-1972, kwaphinda kwaqhambuka inkohlakalo enjalo emva kwengqungquthela yaminyaka le yeMalawi Congress Party. Kuloo ngqungquthela kwagqitywa ngokusemthethweni ukuba amaNgqina kaYehova angaqeshwa nakonjani na umsebenzi aze akhutshwe emakhayeni awo. Kwanezibongozo zabaqeshi zokugcina aba basebenzi bathembekileyo zawa phantsi. Amakhaya, izilimo nemfuyo yawo yathinjwa okanye yatshatyalaliswa. AmaNgqina ayengavunyelwa akhe amanzi kwiqula lelali. Amaninzi abethwa, adlwengulwa, angxwelerhwa, okanye abulawa. Ngalo lonke elo xesha, ayesenziwa intlekisa yaye egculelwa ngenxa yokholo lwawo. Angaphezu kwama-34 000 ekugqibeleni asaba kwelo lizwe ukuze angabulawa.

Kodwa kwakungaphelelanga apho. Kumazwe ngamazwe, ayephindiswa indlela ebuyiselwa kwabo babewatshutshisa, aze aphathwe ngenkohlakalo ngakumbi. Sekunjalo, phezu kwako konke oku, awazange alalanise, yaye awazange aphelelwe lukholo lwawo kuYehova uThixo. Angqineka efana nabo bakhonzi bakaThixo iBhayibhile ethi ngabo: “Bambi ke benziwa intlekisa, batyakatywa; phezu koko ke baviswa imixokelelwane nentolongo; baxulutywa ngamatye; basarhwa; bahendwa; bafa kukubulawa ngekrele; bahamba ngeengubo zeegusha nangeengaga zeebhokhwe, beswele, bebandezelwe, bephathwa kakubi elalingabafanele ihlabathi.”—Heb. 11:36-38.

Ukutshutshiswa Ziintlanga Zonke

Ngaba ngokwentelekiso ngamazwe ambalwa ehlabathi aye enza ngokuchaseneyo nenkululeko athi anayo ngentshutshiso enjalo yonqulo? Nakanye! UYesu Kristu walumkisa abafundi bakhe wathi: “Niya kuthiywa ziintlanga zonke ngenxa yegama lam.”—Mat. 24:9.

Ebudeni bemihla yokugqibela yale nkqubo yezinto, ukususela ngowe-1914, loo ntiyo iye yaqatha kakhulu. IKhanada neUnited States ngamazwe okuqala awavala uncwadi lweBhayibhile ebudeni bemfazwe yehlabathi yokuqala, ibe kungekudala athelelwa yi-Indiya neNyasaland (ngoku ebizwa ngokuba yiMalawi). Ebudeni beminyaka yee-1920, kwawiswa imiqathango engekho sikweni kuBafundi beBhayibhile eGrisi, eHungary, eItali, eRomania naseSpeyin. Kwamanye ala mazwe, ukusasazwa koncwadi lweBhayibhile kwakuvalilwe; maxa wambi, kwakungavumelekanga nokuqhuba iintlanganiso zangasese. Amazwe angakumbi athelela kule ntlaselo ebudeni beminyaka yee-1930, xa ukuvalwa (maxa wambi kwamaNgqina kaYehova, maxa wambi koncwadi lwawo) kwamiselwayo eAlbania, eBulgaria, e-Estonia, eLatvia, eLithuania, eOstriya, ePoland, kwizithili ezithile zaseSwitzerland, kuloo ndawo ngoko yayiyiYugoslavia, eGold Coast (ngoku eyiGhana), kwimimandla yaseAfrika eyayiphantsi kweFransi, eTrinidad naseFiji.

Ebudeni beMfazwe Yehlabathi II, amaNgqina kaYehova, ubulungiseleli bawo basesidlangalaleni, noncwadi lwawo lweBhayibhile lwavalwa kwiindawo ezininzi ehlabathini. Oku kwakunjalo kungekuphela nje eItali, eJamani naseJapan—mazwe lawo ayephantsi kolawulo loozwilakhe—kodwa kwanakumazwe amaninzi ngokungqalileyo okanye ngokungangqalanga awayephantsi kolawulo lwawo ngaphambi okanye ebudeni baloo mfazwe. Phakathi kwawo kwakukho iAlbania, iBelgium, iCzechoslovakia, iKorea, iNetherlands, iNetherlands East Indies (ngoku eyi-Indonesia), iNorway neOstriya. Ebudeni baloo minyaka yemfazwe, iArgentina, iBrazil, iFinland, iFransi neHungary zakhupha imiyalelo engokwasemthethweni nxamnye namaNgqina kaYehova okanye umsebenzi wawo.

IBritani ayizange iwuvale ngokungqalileyo umsebenzi wamaNgqina kaYehova ebudeni bemfazwe, kodwa yamgxotha umveleli wesebe leWatch Tower Society owayeyinzalelwane yaseMerika yaza yazabalazela ukuwucinezela umsebenzi wamaNgqina ngokuvala ukuthunyelwa koncwadi lwawo lweBhayibhile ebudeni bexesha lemfazwe. Kubo bonke uBukhosi baseBritani nakuManyano Lwamazwe anobudlelane neBritani, amaNgqina kaYehova avalwa umlomo ngokupheleleyo okanye uncwadi lwawo lwamiselwa imiqathango. IBahamas, iBasutoland (ngoku eyiLesotho), iBechuanaland (ngoku eyiBotswana), iBritish Guiana (ngoku eyiGuyana), iBurma (ngoku eyiMyanmar), iCeylon (ngoku eyiSri Lanka), iCyprus, iDominica, iFiji, iGold Coast (ngoku eyiGhana), i-Indiya, iJamaica, iKhanada, iiLeeward Islands (B.W.I.), uMntla Rhodesia (ngoku oyiZambia), uMzantsi Afrika, uMzantsi Rhodesia (ngoku oyiZimbabwe), iNew Zealand, iNigeria, iNyasaland (ngoku eyiMalawi), iOstreliya, iSingapore neSwaziland onke athabatha amanyathelo anjalo okuphatha ngenkohlakalo abakhonzi bakaYehova.

Emva kokuphela kwemfazwe, abanye bayeka ukuwatshutshisa kodwa abanye bathi chatha. Ebudeni beminyaka engama-45 eyalandelayo, ukongezelela kwisibakala sokuba amaNgqina kaYehova ayengamkelwa ngokusemthethweni kumazwe amaninzi, kumazwe angama-23 aseAfrika, kwali-9 eAsia, kwasi-8 eYurophu, kwama-3 kuMzantsi nakuMbindi Merika nakwama-4 kwiziqithi ezithile, umsebenzi wawo wavalwa. Ngowe-1992, amaNgqina kaYehova ebesephantsi kwemiqathango kumazwe angama-24.

Oku akuthethi ukuba onke amagosa aseburhulumenteni awuthiye ngokobuqu umsebenzi wamaNgqina kaYehova. Abasemagunyeni abaninzi bakhuthaza inkululeko yonqulo yaye bayaqonda ukuba amaNgqina ayingenelo kwibutho labantu. Amadoda anjalo awavumelani nabo babhenela kwizenzo ezingokwasemthethweni nxamnye namaNgqina. Ngokomzekelo, ngaphambi kokuba i-Ivory Coast (ngoku eyiCôte d’Ivoire) ibe lilizwe elizimeleyo, xa umfundisi ongumKatolika nomfundisi waseWesile bazama ukuphembelela igosa elithile ukuba ligxothe amaNgqina kaYehova kwelo lizwe, bafumanisa ukuba babethetha namagosa awayengakulungele ukusetyenziswa ngabefundisi. Xa igosa elithile lazama ukuwisa umthetho eNamibia, ngowe-1990, owawucalucalula iimbacu azazisaziwa ukuba zingamaNgqina kaYehova, iNgqungquthela Yokuqulunqa uMgaqo-siseko ayizange ikuvumele oko. Yaye kumazwe amaninzi apho amaNgqina kaYehova ayekhe avalwa umlomo, ngoku amkelwe ngokusemthethweni.

Ukanti, ngeendlela ezahlukahlukeneyo, kuzo zonke iindawo zomhlaba, amaNgqina kaYehova ayatshutshiswa. (2 Tim. 3:12) Kwezinye iindawo, loo ntshutshiso inokuvela ngokuyintloko kubaninimizi abakhohlakeleyo, kwizalamane ezichasayo, okanye kwabo asebenza okanye afunda nabo abangabonakalisi kumoyika uThixo. Noko ke, kungakhathaliseki ukuba bangoobani na abo bawatshutshisayo okanye indlela abazama ukukuthethelela ngayo oko bakwenzayo, amaNgqina kaYehova ayakuqonda oko ngokwenene kubangela ukuba amaKristu okwenyaniso atshutshiswe.

Imbambano

Kangangexesha elide iimpapasho zeWatch Tower bezibonisa ukuba ngokufuziselayo incwadi yokuqala yeBhayibhile yaxela kwangaphambili ngobutshaba, okanye intiyo, uSathana uMtyholi nabo baphantsi kolawulo lwakhe abanayo ngentlangano kaYehova yasezulwini nabameli bayo abasemhlabeni. (Gen. 3:15; Yoh. 8:38, 44; ISityhi. 12:9, 17) Ngokukodwa ukususela ngowe-1925, IMboniselo iye yabonisa ngokusuka eZibhalweni ukuba kukho iintlangano ezimbini kuphela—ekaYehova nekaSathana. Yaye, njengoko eyoku-1 kaYohane 5:19 ibonisa, “ihlabathi liphela”—oko kukuthi, lonke uluntu olungaphandle kwentlangano kaYehova—“lilele kongendawo.” Kungenxa yoko onke amaKristu okwenyaniso etshutshiswa.—Yoh. 15:20.

Kodwa kutheni uThixo eyivumela? Ngaba ikho into elungileyo ephunyezwayo? UYesu Kristu waxela kwangaphambili ukuba ngaphambi kokuba yena njengoKumkani wasezulwini atshabalalise uSathana nentlangano yakhe engendawo, kuya kubakho ukwahlulwa kwabantu bazo zonke iintlanga, njengoko umalusi waseMbindi Mpuma esahlula izimvu ezibhokhweni. Abantu babeya kunikwa ithuba lokuva ngoBukumkani bukaThixo nelokubumela. kXa abavakalisi bobo Bukumkani betshutshiswa, umbuzo wokuqala osaphakamayo ngulo: Ngaba abo bevayo ngabo baya kwenza okulungileyo ‘kubazalwana’ bakaKristu nezinxulumani zabo baze ngaloo ndlela babonakalise ukuthanda uKristu? Okanye ngaba baya kuthelela abo banyelisa abameli boBukumkani bukaThixo—okanye mhlawumbi bathule ngoxa abanye besenjenjalo? (Mat. 25:31-46; 10:40; 24:14) EMalawi abathile bababona ngokucacileyo abo babekhonza uThixo oyinyaniso ibe ngaloo ndlela bawathelela amaNgqina awayetshutshiswa. Amabanjwa nabalindi abaninzi kwiinkampu zoxinaniso zaseJamani benza okufanayo.

Nangona ebekwa izityholo zobuxoki yaye exhatshazwa emzimbeni, ade agculelwe ngenxa yokholo lwawo kuThixo, amaNgqina kaYehova awavakalelwa kukuba alahliwe nguThixo. Ayazi ukuba uYesu Kristu wajamelana nezinto ezifanayo. (Mat. 27:43) Kwakhona ayazi ukuba ngokunyaniseka kwakhe kuYehova, uYesu wamngqina uMtyholi elixoki waza waba negalelo ekungcwalisweni kwegama likaYise. Ngumnqweno weNgqina likaYehova ngalinye ukwenza okufanayo.—Mat. 6:9.

Imbambano ayikokuba anokukunyamezela na ukuthuthunjiswa aze asinde ekufeni. UYesu Kristu waxela kwangaphambili ukuba abanye abalandeli bakhe babeya kubulawa. (Mat. 24:9) Naye wabulawa. Kodwa akazange alalanise kuTshaba lukaThixo oluyintloko, uSathana uMtyholi, “umphathi weli hlabathi.” UYesu waloyisa ihlabathi. (Yoh. 14:30; 16:33) Ngoko, imbambano ikukuba abanquli boThixo oyinyaniso baya kuhlala bethembekile na kuye phezu kwabo nabuphi na ubunzima abasenokujamelana nabo. AmaNgqina kaYehova anamhlanje aye anikela ubungqina obuyintabalala bokuba anengqondo efanayo neyompostile uPawulos, owabhala oku: “Nokuba sithi sidle ubomi, sibudlela iNkosi; nokuba sithi sife, sifela iNkosi. Ngoko ke, nokuba sithi sidle ubomi, nokuba sithi sife, singabeNkosi.”—Roma 14:8.

[Footnotes]

[Blurb on page 642]

Abona babephambili ekutshutshiseni uYesu Kristu yayiziinkokeli zonqulo

[Blurb on page 645]

“Ukumiselwa, okanye ukugunyaziswa, nguThixo kwakhe nawuphi na umntu ukuba ashumayele kungokudluliselwa koMoya oyiNgcwele kuye”

[Blurb on page 647]

Incwadi ethi “The Finished Mystery” yalubhenca ngokuphandle uhanahaniso lwabefundisi beNgqobhoko!

[Blurb on page 650]

Amadoda namabhinqa angamaKristu ahlaselwa ngamahlokondiba, aphoswa entolongweni, aza avalelwa ngaphandle kokubekwa ityala okanye ngaphandle kokuchotshelwa kwalo

[Blurb on page 652]

“Ezo zigwebo zokuvalelwa entolongweni ziqatha ngokucacileyo”—Umongameli waseUnited States uWoodrow Wilson

[Blurb on page 656]

Wayengenzelwa nceba nabani na owayengakwenzi oko kwakuthethwa ngumfundisi

[Blurb on page 666]

Abefundisi babebongoza abafundisi-ntsapho ukuba bavumele abantwana baphume esikolweni baye kugibisela amaNgqina ngamatye

[Blurb on page 668]

Abefundisi babesebenzisana ukuze bachase amaNgqina

[Blurb on page 671]

Amahlokondiba ayehlasela amaNgqina kaYehova eUnited States

[Blurb on page 676]

Kuzo zonke iindawo emhlabeni, amaNgqina kaYehova ayatshutshiswa

[Box on page 655]

Abefundisi Babonakalisa Iimvakalelo Zabo

Intsabelo eyabonakaliswa kwiincwadi zonqulo ekugwetyweni kukaJ. F. Rutherford nezinxulumani zakhe ngowe-1918 iyaphawuleka:

◆ “The Christian Register”: “Eyona nto uRhulumente ayilwayo apha yinkolelo yokuba iingcamango zonqulo, enoba zibubudenge yaye ziyingozi kangakanani na, zinokuhanjiselwa phambili ngaphandle kwesohlwayo. Leyo yimpazamo ekukudala ikho, yaye ukuza kuthi ga ngoku besiyekelele. . . . Oku kubonakala kusisiphelo sehlelo likaRussell.”

◆ “The Western Recorder,” impapasho yamaBhaptizi, yathi: “Ayothusi kwaphela into yokuba inkokeli yeli hlelo lixakileyo ivalelwe kwelinye lamaziko eenjubaqa. . . . Ingxaki edida ngokwenene ngokuphathelele oku kukuba abamangalelwa babefanele bathunyelwe kwindawo yokugcina amageza okanye entolongweni kusini na.”

◆ “The Fortnightly Review” yatsalel’ ingqalelo kumagqabaza awayekwi-“Evening Post,” yaseNew York, awayesithi: “Sithemba ukuba kuyo yonk’ indawo abafundisi ngezonqulo baya kuluphawula uluvo lwalo mgwebi lokuba ukufundisa ngalo naluphi na unqulo ngaphandle kolo luvumelana ngokupheleleyo nemithetho emiselweyo kululwaphulo-mthetho olunzulu, oluba nzulu ngakumbi ukuba, njengomlungiseleli kwenzeka ukuba ube usanyanisekile.”

◆ “The Continent” ngendlela ephoxayo yathi abamangalelwa “ngabalandeli baka-‘Pastor’ Russell ongasekhoyo” yaye yazijika iinkolelo zabo ngokuthi babesithi “ngaboni kuphela ababefanele balwe nomlawuli waseJamani.” Yathi ngokutsho kwegqwetha elimele urhulumente eWashington, “ngaxa lithile ngaphambili urhulumente waseItali wakhalaza kwiUnited States ngelokuba uRutherford nezinxulumani zakhe . . . baye basasaza kwimikhosi yamaTaliyane okuninzi okuyinkcazelo enxamnye nemfazwe.”

◆ Kwiveki elandelayo i-“The Christian Century” yapapasha inkoliso yokuchazwe ngasentla kanye ngendlela okwakubhalwe ngayo, ibonisa ukuba yayivumelana ngokupheleleyo nako.

◆ Iphephancwadi lamaKatolika i-“Truth” ngokufutshane lanikela ingxelo ngesigwebo esawiswayo landula ke lavakalisa iimvakalelo zabahleli balo, lisithi: “Uncwadi lwalo mbutho luzaliswe kukuhlasela iCawa yamaKatolika nabefundisi bayo ngolunya.” Izabalazela ukunamathelisa uphawu “lokuvukela” kuye nabani na osenokungavumelani ngokuphandle neCawa yamaKatolika, yongezelela: “Kuya kucaca ngakumbi ukuba umoya wokunganyamezelani unxulumene ngokusondeleleyo nalowo wemvukelo.”

◆ UGqr. Ray Abrams, kwincwadi yakhe ethi “Preachers Present Arms,” wathi: “Xa iindaba zesigwebo seminyaka engamashumi amabini zafikayo ezindlebeni zabahleli beempapasho zonqulo, ngokoqobo nganye yezi mpapasho, ezinkulu nezincinane, yasivuyela eso siganeko. Andifumananga mazwi ovelwano kuye nawuphi na ulindixesha wezonqulo lobu-othodoki.”

[Box on page 660]

“Lalitshutshiswa Ngenxa Yonqulo”

“Kwinkampu Yoxinaniso YaseMauthausen kwakukho iqela labantu elalitshutshiswa ngenxa yonqulo kuphela: amalungu ehlelo ‘laBafundi beBhayibhile Abanenzondelelo,’ okanye ‘amaNgqina kaYehova’ . . . Ukuchasa kwabo isifungo esibonisa ukunyaniseka kuHitler nokungavumi kwabo ukwenza nayiphi na inkonzo yezomkhosi—umphumo wezobupolitika wonqulo lwabo—kuko okwabangela ukutshutshiswa kwabo.”—“Die Geschichte des Konzentrationslagers Mauthausen” (Imbali Yenkampu Yoxinaniso YaseMauthausen), eyabhalwa nguHans Maršálek, waseVienna, eOstriya, ngowe-1974.

[Box/Picture on page 661]

Inguqulelo Yesivumo Ama-SS Awazama Ukunyanzelela AmaNgqina Ukuba Asityobele

Inkampu yoxinaniso .......................................

ISebe II

ISIVUMO

Mna, o ...................................................

owazalwa ngowe ..................................................

e .......................................................

ndenza esi sivumo silandelayo:

1. Ndiyazi ukuba i-International Bible Students Association ivakalisa iimfundiso eziyinkohliso yaye isithele ngonqulo ilandela iinjongo zotshaba nxamnye noRhulumente.

2. Ngoko ke ndiyishiye ngokupheleleyo le ntlangano ndaza ndazahlukanisa ngokupheleleyo neemfundiso zeli hlelo.

3. Ndinikela isiqinisekiso sokuba andinakuze ndiphinde ndibe nenxaxheba kumsebenzi weInternational Bible Students Association. Nabaphi na abantu abeza kum nemfundiso yaBafundi beBhayibhile, okanye nabaphi na abathi ngayo nayiphi na indlela babonakalise ukunxibelelana nabo, ndiya kubagxotha ngoko nangoko. Lonke uncwadi lwaBafundi beBhayibhile oluthunyelwa ekhayeni lam ngoko nangoko ndiya kulusa kwisikhululo samapolisa esikufutshane.

4. Kwixesha elizayo ndiya kuyithobela imithetho kaRhulumente, ngokukodwa ngexesha lemfazwe, ndiphethe isixhobo, ndiya kulikhusela ilizwe loobawo, ibe ndiya kuthelela abantu basekuhlaleni ngayo nayiphi na indlela.

5. Ndiye ndaziswa ukuba ndiya kuphinda ndithatyathwe ndiyokuvalelwa ukuze ndibe selugcinweni ngoko nangoko ukuba ndinokwenza ngokuchasene nesi sivumo senziwe namhlanje.

.................................., Umhla ................ ...........................................................

Utyobelo

[Box on page 662]

Iileta Ezivela Kwabathile Abagwetyelwa Ukufa

Evela kuFranz Reiter (owayeza kubulawa ngokunqunyulwa intloko) isiya kunina, ngoJanuwari 6, 1940, kwintolongo yaseBerlin-Plötzensee:

“Ndeyiseke ngokupheleleyo kwinkolelo yam yokuba ndenza okuchanileyo. Njengokuba ndilapha, ndisenako ukucinga ngenye indlela, kodwa kuThixo oku bekuya kuba kukunganyaniseki. Sonke thina esilapha sinqwenela ukuthembeka kuThixo, ukuze azukiswe. . . . Ngokokwazi kwam, ukuba bendenze isifungo [somkhosi], bendiya kuba ndenze isono esifanelwe sisohlwayo sokufa. Oko bekuya kuba bububi kum. Bendingayi kuvuka. Kodwa ndinamathela koko uKristu wakuthethayo: ‘Lowo uya kubusindisa ubomi bakhe uya kulahlekelwa bubo; kodwa lowo uphulukana nobomi bakhe ngenxa yam, uya kubuzuza.’ Yaye ngoku, Mama othandekayo nani nonke banakwethu noodade wethu abathandekayo, namhlanje ndiye ndaxelelwa isigwebo sam, yaye ningothuki, sikukufa, yaye ndiza kubulawa ngomso kusasa. UThixo undomelezile, njengoko kwakunjalo kuwo onke amaKristu okwenyaniso kwixesha elidluleyo. Abapostile babhala, ‘Bonke abazelwe nguThixo abenzi sono.’ Kunjalo nakum. Oku ndikungqinile kuni, ibe ninokukuqonda. Mama wam endimthandayo, musa ukuba buhlungu. Kuya kuba kuhle ngani nonke ukuba niqhubeke nizazi ngakumbi iZibhalo Ezingcwele. Ukuba niya kuma niqinile de kube sekufeni, siya kubonana kwakhona eluvukweni. . . .

“Owakho uFranz

“De sibuye sibonane.”

Evela kuBerthold Szabo, owabulawa liqela lamajoni elidubula umntu ogwetyelwe ukufa, eKörmend, eHungary, ngoMatshi 2, 1945:

“Dade wethu othandekayo, Marika!

“Kule yure enesiqingatha eseleyo, ndiza kuzama ukukubhalela ukuze ukwazi ukwazisa abazali bethu ngemeko yam, ndiza kubulawa ngokukhawuleza.

“Ndibanqwenelela uxolo lwengqondo endinalo ngale mizuzu yokugqibela kweli hlabathi lizele zizinto ezimanyumnyezi. Ngoku yintsimbi yeshumi, yaye ndiza kubulawa ngecala emva kweyeshumi elinanye; kodwa ndizole gqitha. Ubomi bam bexesha elizayo ndibunikele ezandleni zikaYehova nakuNyana wakhe Oyintanda, uYesu Kristu, uKumkani, ongayi kuze abalibale abo babathanda ngokunyanisekileyo. Kwakhona ndiyazi ukuba kungekudala kuza kubakho uvuko lwabo bafileyo okanye, kunoko, baleleyo, bekuKristu. Kwakhona ndithanda ukukhankanya ngokukhethekileyo ukuba ndininqwenelela iintsikelelo zikaYehova ezityebileyo nonke ngothando enalubonakalisa kum. Nceda undincamisele uTata noMama, kwanoAnnus. Abafanele bazikhathaze ngam; siza kubonana kungekudala. Isandla sam sidiniwe ngoku, yaye ndiza kuphumla de uYehova andibize kwakhona. Kwanangoku ndiza kusigcina isibhambathiso endasenzayo kuye.

“Ngoku ixesha lam liphelile. Kwanga uThixo anganani kunye nam.

“Ngothando olukhulu, . . .

“Berthi”

[Box on page 663]

Ayesaziwa Ngenxa Yenkalipho Neenkolelo Zawo

◆ “Phezu kwabo nje bonke ubunzima ayejamelana nabo, amaNgqina awayesezinkampini ayehlanganisana aze athandaze kunye, elungiselela uncwadi yaye eguqula abantu. Esomelezwa bubudlelane bawo, ibe, ngokungafaniyo namanye amabanjwa amaninzi, esazi kakuhle isizathu sokubakho kweendawo ezinjalo nesizathu sokuba atsale nzima ngolo hlobo, amaNgqina angqineka eliqela elincinane lamabanjwa kodwa elingasokuze lilibaleke, ayephawulwe ngoonxantathu abamsobo ibe ayesaziwa ngenxa yenkalipho neenkolelo zawo.” Wabhala njalo uGqr. Christine King, kwi-“The Nazi State and the New Religions: Five Case Studies in Non-Conformity.”

◆ “Values and Violence in Auschwitz,” eyabhalwa nguAnna Pawełczyńska, ithi: “Eli qela lamabanjwa lalingumkhosi owomeleleyo kwiinkolelo zalo yaye laliphumelela idabi lalo nxamnye nobuNazi. Iqela lamaJamani leli hlelo lalilibathwana labantu elaqhubeka libuchasile ubuNazi ngoxa lalingqongwe luhlanga lwabantu aboyikayo, yaye linaloo moya mnye wokungoyiki lasebenza kwinkampu eseAuschwitz. Lakwazi ukuzuza intlonelo yamabanjwa awayekunye nalo . . . yabagcini-mabanjwa kwaneyamagosa ama-SS. Wonk’ ubani wayesazi ukuba akukho ‘Bibelforscher’ [iNgqina likaYehova] elaliya kwenza into enxamnye nenkolelo yalo yonqulo.”

◆ URudolf Hoess, kwibali elingobomi bakhe, elapapashwa kwincwadi ethi “Commandant of Auschwitz,” wabalisa ngokubulawa kwamanye amaNgqina kaYehova ngenxa yokungavumi ukutyeshela ubundilele bawo bobuKristu. Wathi: “Ndicinga ukuba abafeli-nkolo bokuqala abangamaKristu babefana nawo njengoko babelinde irhamncwa lokubaqwenga esekisini. Ubuso babo bujike ngokupheleleyo, bejonge ezulwini, yaye izandla zabo zidityanisiwe yaye ziphakanyisiwe bethandaza, bade bayokufa. Bonke abababona besifa babechukumiseka ngokunzulu, kwaneqela elibulalayo lalichukumiseka.” (Le ncwadi yapapashwa ePoland phantsi komxholo othi “Autobiografia Rudolfa Hössa-komendanta obozu oświęcimskiego.”)

[Box on page 673]

“Awalichasanga Ilizwe Akulo”

“Awalichasanga ilizwe akulo; kuphela nje amela uYehova.” “Awawatshisi amakhadi awabizela emkhosini, awaphembeleli mvukelo . . . okanye abandakanyeke kulo naluphi na uhlobo lokudala udushe.” “AmaNgqina ahlala enyanisekile yaye egcine ingqibelelo. Nokuba umntu ucinga ntoni ngamaNgqina—ibe abantu abaninzi bacinga izinto ezininzi ezingafanelekanga—aphila ubomi obungumzekelo.”—“Telegram,” yaseToronto, eKhanada, kaJulayi 1970.

[Box on page 674]

Ngubani Owayalelayo?

AmaNgqina kaYehova ayazi ukuba imbopheleleko yawo yokushumayela ayixhomekekanga ekusebenzeni kweWatch Tower Society okanye nawuphi na omnye umbutho osemthethweni. “Nokuba iWatch Tower Society ingavalwa neeofisi zayo zamaSebe kumazwe ahlukahlukeneyo kunyanzeleke ukuba zivalwe ngenxa yokuphazamisa kukarhulumente! Oko akuwutshitshisi okanye kuwuphelise umyalelo kaThixo kumadoda namabhinqa azinikele ukwenza ukuthanda kukaThixo nawanike umoya Wakhe. Umyalelo othi ‘shumayelani!’ ubhalwe ngokucacileyo eLizwini lakhe. Lo ngumyalelo oza kuqala kunalowo womntu.” (“IMboniselo” [yesiNgesi], kaDisemba 15, 1949) Eqonda ukuba imiyalelo yawo ivela kuYehova uThixo nakuYesu Kristu, ayazingisa ekuvakaliseni isigidimi soBukumkani phezu kwayo nje inkcaso ajamelana nayo.

[Box on page 677]

NjengamaKristu Okuqala

◆ “AmaNgqina kaYehova anonqulo aluthabatha ngokunzulu gqitha kunenkoliso yabantu. Imigaqo yawo isikhumbuza amaKristu enkulungwane yokuqala awayengathandwa nawayetshutshiswa gqitha ngamaRoma.”—“Akron Beacon Journal,” yaseAkron, eOhio, kaSeptemba 4, 1951.

◆ “[AmaKristu okuqala] ayephila ubomi obundilisekileyo, bokuziphatha okuhle nobungumzekelo ngokwenene. . . . Kuyo nayiphi na inkalo ngaphandle kwaloo mbandela wokuqhumisa iziqhumiso ayengabemi abangumzekelo.” “Ngoxa ukubingelela kuBulumko bomlawuli kwahlala kuluvavanyo lokuthand’ izwe, ngaba abasemagunyeni eburhulumenteni babenokukubetha ngoyaba ukuxhathisa kwala maKristu angengobathandi belizwe? Ingxaki amaKristu azifumanisa ekuyo ekugqibeleni ifana nqwa nengxaki elathi, ebudeni beminyaka yemfazwe, elo hlelo linenkalipho laziwa njengamaNgqina kaYehova lazifumanisa likuyo eUnited States ngombandela wokukhahlela indwe yelizwe.”—“20 Centuries of Christianity,” nguPaul Hutchinson noWinfred Garrison, ngowe-1959, iphe. 31.

◆ “Mhlawumbi eyona nto yaziwayo ngamaNgqina kukugxininisa kwawo ngokusisiseko ekunyanisekeni kuThixo, ngaphambi kwalo naliphi na elinye igunya emhlabeni.”—“These Also Believe,” nguGqr. C. S. Braden, ngowe-1949, iphe. 380.

[Picture on page 644]

I-“The Pittsburgh Gazette” yazisasaza ngokubanzi iingxoxo ezabakho ngenxa yocelomngeni lukaGqr. Eaton kuC. T. Russell

[Picture on page 646]

Ubuxoki obuphinda-phindeneyo ngemibandela yomtshato kaCharles noMaria Russell basasazwa ngokubanzi ngabachasi

[Picture on page 648]

Abefundisi bajwaqeka ngumsindo xa kwasasazwa imibhalo ezizi-10 000 000 yeli phecana elalibhenca iimfundiso nezenzo zabo ngokusekelwe kwiLizwi likaThixo

[Picture on page 649]

Amaphephandaba aphembelela ukutshutshiswa kwaBafundi beBhayibhile ngowe-1918

[Pictures on page 651]

Ebudeni bokuchotshelwa kwetyala apha lamalungu abasebenzi bekomkhulu loMbutho, kwanikelwa ingqalelo kakhulu kwincwadi ethi “The Finished Mystery”

Inkundla yelizwe neposi, eBrooklyn, eNew York

[Picture on page 653]

Isigwebo sasiqatha ngakumbi kuneso sombulali owathi ngokudubula kwakhe wabangela iMfazwe Yehlabathi I. Ukusuka ekhohlo ukuya ekunene: W. E. Van Amburgh, J. F. Rutherford, A. H. Macmillan, R. J. Martin, F. H. Robison, C. J. Woodworth, G. H. Fisher, G. DeCecca

[Pictures on page 657]

Xa kwakuqhutywa le ndibano yamaNgqina eNew York ngowe-1939, amalungu angama-200 ehlokondiba elalikhokelwa ngabefundisi bamaKatolika azama ukuyiphelisa

[Pictures on page 659]

Ebudeni beMfazwe Yehlabathi II, amawaka amaNgqina kaYehova aphoswa kwezi nkampu zoxinaniso

Umqondiso wokhakayi wabalindi abangama-SS (ekhohlo)

[Picture on page 664]

Inxalenye yencwadi eyayenzelwe ukufundisisa iBhayibhile eyancitshiswa ngoomatshini bokukhuphela, yafakwa kwibhokisi yematshisi, yaza yathunyelwa ngokufihlakeleyo kumaNgqina awayekwinkampu yoxinaniso

[Pictures on page 665]

Amanye amaNgqina ukholo lwawo olwakunyamezelayo ukuphathwa kakubi kwiinkampu zoxinaniso zamaNazi

EMauthausen

EWewelsburg

[Picture on page 667]

Ugonyamelo lwehlokondiba kufutshane naseMontreal, eQuebec, ngowe-1945. Ugonyamelo olunjalo olwaluphenjelelwa ngabefundisi nxamnye namaNgqina lwaluxhaphakile ebudeni beminyaka yee-1940 neyee-1950

[Picture on page 669]

Amawaka amaNgqina kaYehova (kuquka uJohn Booth, oboniswe apha) abanjwa xa ayesasaza uncwadi lweBhayibhile

[Pictures on page 670]

Emva kwesigqibo seNkundla Ephakamileyo nxamnye namaNgqina ngowe-1940, kwakugquba ugonyamelo lwamahlokondiba kulo lonke elaseUnited States, iintlanganiso zaziphazanyiswa, amaNgqina ayebethwa, yaye izinto zawo zazitshatyalaliswa

[Pictures on page 672]

Kwiindawo ezininzi kwakuyimfuneko ukuseka iZikolo zoBukumkani kuba abantwana bamaNgqina babegxothiwe kwizikolo zikawonke wonke