Iziganeko Eziphawulekayo Kwimbali Yanamhlanje YamaNgqina KaYehova

1870 UCharles Taze Russell neqela lasePittsburgh naseAllegheny, ePennsylvania, eUnited States, baqalisa ukuba nocwangciso lokufundisisa iBhayibhile

1870-75 URussell nezinxulumani awayefundisisa nazo bafunda ukuba ukubuya kukaKristu akusayi kubonakala emehlweni abantu ibe injongo yako iquka ukusikelelwa kwazo zonke izizwe zomhlaba

1872 URussell neqela awayefundisisa nalo baqonda ixabiso lentlawulelo uKristu awalilungiselela uluntu

1876 UC. T. Russell ufumana umbhalo weHerald of the Morning, ngoJanuwari; aze adibane noN. H. Barbour, owayengumhleli wayo, ngelo hlobo ePhiladelphia, ePennsylvania

Inqaku elabhalwa nguC. T. Russell, elapapashwa kwinkupho kaOktobha yeBible Examiner, eBrooklyn, eNew York, lalatha kowe-1914 njengexesha lokuphela kwamaXesha eeNtlanga

1877 Ukupapashwa kwencwadi ethi Three Worlds, kwaba ngumphumo wemigudu emanyeneyo kaN. H. Barbour noC. T. Russell

UC. T. Russell upapasha incwadana ethi The Object and Manner of Our Lord’s Return, kwiofisi yeHerald of the Morning, eRochester, eNew York

1879 URussell uyayeka ngokupheleleyo ukuyixhasa iHerald of the Morning, ngoMeyi, ngenxa yesimo sengqondo sikaBarbour ngentlawulelo

Inkupho yokuqala yeZion’s Watch Tower and Herald of Christ’s Presence, kaJulayi 1879

1881 Amaphecana okuqala awapapashwa ngaBafundi beBhayibhile; ngaphambi kowe-1914, amaphecana aye asasazwa minyaka le ayefikelela kumashumi ezigidi zemibhalo ngelwimi ezingama-30

Ukulungelelaniswa kweZion’s Watch Tower Tract Society; kuhlatywa ikhwelo elithi “Kufuneka Abashumayeli Abali-1 000” ukuze abanye babe ngoovulindlela abathe ngxi, abanye banikele ngalo naliphi na ixesha abanokunikela ngalo ukuze basasaze inyaniso yeBhayibhile

Ukusasazwa kwemibhalo engama-300 000 yephecana elithi Food for Thinking Christians kubantu abahamba icawa kwizixeko ezikhulu zaseBritani

1883 IMboniselo ifikelela eTshayina; kungekudala owayesakuba ngumvangeli waseRhabe uqalisa ukunikela ubungqina kwabanye apho

1884 Iphecana elithi Food for Thinking Christians lifikelela eLiberia, eAfrika; umfundi othile onoxabiso uyabhala ecela imibhalo engakumbi ukuze ayisasaze

IZion’s Watch Tower Tract Society ibhaliswa ngokusemthethweni ePennsylvania; ngoDisemba 15

1885 Iimpapasho zeWatch Tower sele zifundwa ngabantu abathile abalambele inyaniso kuMntla nakuMzantsi Merika, eYurophu, eAfrika, naseAsia

1886 Ukupapashwa kwencwadi ethi The Divine Plan of the Ages, umqulu wokuqala wolu ngcelele olubizwa ngokuthi Millennial Dawn (kamva olwaziwa ngegama elithi Studies in the Scriptures)

1889 Ukwakhiwa kweBible House eArch Street, eAllegheny, ePennsylvania, njengekomkhulu loMbutho

1891 Intlanganiso yokuqala yaBafundi beBhayibhile eyabizwa ngokuba yindibano, eAllegheny, ePennsylvania (Aprili 19-25)

1894 Abaveleli abahambahambayo ekuhambeni kwexesha abaziwa ngokuba ngabahambi ngezonqulo (namhlanje, ngabaveleli besiphaluka nabesithili) bandululwa ukuze bahambisele phambili ucwangciso loMbutho lokutyelela amabandla

1900 Ukuvulwa kweofisi yesebe yokuqala yeWatch Tower Society eLondon, eNgilani

ABafundi beBhayibhile babenikele ubungqina kumazwe angama-28, ibe isigidimi abasishumayelayo sasifikelele kwamanye amazwe ali-13

1903 Ukusasazwa ngokubanzi kwamaphecana esisa kwizindlu ngezindlu ngeeCawa; ngaphambilana, ubukhulu becala amaphecana ayesasazwa ezitratweni kufutshane neecawa

1904 Iintshumayelo zikaC. T. Russell ziqalisa ukuphuma rhoqo kumaphephandaba; kwithuba leminyaka elishumi zishicilelwa ngamaphephandaba anokuba ngama-2 000

1909 Ikomkhulu loMbutho lifudukela eBrooklyn, eNew York, ngoAprili

1914 Ukuboniswa okokuqala kwe-“Photo-Drama of Creation,” eNew York, ngoJanuwari; ngaphambi kokuba unyaka uphele, sele ibonwe ngabantu abangaphezu kwezi-9 000 000 kuMntla Merika, eYurophu, naseOstreliya

Ngo-Oktobha 2, kwigumbi lokudlela laseBheteli eBrooklyn, UC. T. Russell uthi, “Amaxesha eeNtlanga aphelile”

ABafundi beBhayibhile bashumayela kumazwe angama-43; bangama-5 155 abanesabelo ekunikeleni ubungqina kwabanye; ingxelo ithi eSikhumbuzweni kweza abali-18 243

1916 Ukufa kukaC. T. Russell eneminyaka engama-64 ubudala, ngo-Oktobha 31, ngoxa ehamba ngololiwe eTexas

1917 UJ. F. Rutherford uba ngumongameli woMbutho ngoJanuwari 6, emva kokuba ikomiti yolwalathiso enamalungu amathathu ibisalathisa imicimbi yoMbutho kangangeenyanga ezimbini

Ukukhululwa kwencwadi ethi The Finished Mystery kwintsapho yaseBheteli eBrooklyn ngoJulayi 17; abane abebekhonza kwiqumrhu labalathisi loMbutho bachasa ngamandla; emva koko amabandla amaninzi ayaqhekeka

1918 Intetho ethi “Ihlabathi Liphelile—Izigidi Eziphilayo Ngoku Zisenokungaze Zife” inikelwa okokuqala, ngoFebruwari 24, eLos Angeles, eKhalifoniya. NgoMatshi 31, eBoston, eMassachusetts, le ntetho inomxholo othi “Ihlabathi Liphelile—Izigidi Eziphilayo Ngoku Azisayi Kuze Zife”

Ukukhutshwa komyalelo wokubanjwa kukaJ. F. Rutherford nezinxulumani zakhe ezisondeleyo ngoMeyi 7; ityala liqalisa ngoJuni 5; ngoJuni 21 (omnye ngoJulayi 10) bagwetywa ixesha elide entolongweni

Ikomkhulu eliseBrooklyn liyavalwa ngoAgasti, ize imisebenzi eyayisenziwa apho ibuyiselwe ePittsburgh isithuba esingaphezu konyaka

1919 Ukukhululwa kwamagosa oMbutho nezinxulumani zawo ngebheyile, ngoMatshi 26; ngoMeyi 14 inkundla yezibheno iyasirhoxisa isigqibo senkundla engezantsi, kuze kukhutshwe umyalelo wokuba eli tyala lichotshelwe ngokutsha; kunyaka olandelayo, ngoMeyi 5, urhulumente uyarhoxa kweli tyala, engavumi ukuwamangalela

Ukuze ahlole enokuba umsebenzi waBafundi beBhayibhile wawunokuhlaziywa kusini na, uJ. F. Rutherford ulungiselela ukunikela intetho yesidlangalala ethi “Ithemba Loluntu Olubandezelekileyo,” kwiHolo iClune, eLos Angeles, eKhalifoniya, ngoMeyi 4; izihlwele azaneli, ibe le ntetho imele inikelwe okwesibini

ABafundi beBhayibhile baqhuba indibano eCedar Point, eOhio, ngoSeptemba 1-8; kwenziwa isaziso sempapasho eza kubakho ethi The Golden Age (ngoku eyaziwa ngokuba nguVukani!)

Ukupapashwa kweBulletin (ngoku eyaziwa ngokuthi Ubulungiseleli Bethu BoBukumkani) ukuze ikhuthaze inkonzo yasentsimini

Ingxelo yonyaka ibonisa ukuba ngaBafundi beBhayibhile abangama-5 793 abaxakekileyo beshumayela kumazwe angama-43; ingxelo ibonisa ukuba abangama-21 411 babezile eSikhumbuzweni

1920 IWatch Tower Society iqalisa ukushicilela ngokwayo, eBrooklyn

1922 UJ. F. Rutherford usebenzisa unomathotholo okokuqala, ngoFebruwari 26, eKhalifoniya, ukuze asasaze intetho yeBhayibhile

Indibano yaBafundi beBhayibhile eCedar Point, eOhio, Septemba 5-13; kwenziwa esi sibongozo “Mbhengezeni, mbhengezeni, mbhengezeni, uKumkani nobukumkani bakhe”

Abefundisi eJamani bahlokoza amapolisa ukuba abambe aBafundi beBhayibhile xa besasaza uncwadi lweBhayibhile esidlangalaleni

1924 IWBBR (iziko lokusasaza ngonomathotholo lokuqala leWatch Tower Society) iqalisa usasazo lwayo ngoFebruwari 24

1925 IMboniselo (yesiNgesi) kaMatshi 1, ixubusha ngokuzalwa koBukumkani bukaThixo ngowe-1914, ibonisa ukuba kukho iintlangano ezimbini ezahlukahlukeneyo nezichaseneyo—ekaYehova nekaSathana

1926 Kukhuthazwa ukushumayela ngeeCawa kwindlu ngendlu ngeencwadi

1928 ABafundi beBhayibhile bayabanjwa eNew Jersey (eUnited States) ngenxa yokusasaza uncwadi njengenxalenye yomsebenzi wabo wokushumayela kwindlu ngendlu; kwisithuba seminyaka elishumi, kubanjwa abangama-500 ngonyaka eUnited States

1931 Kwamkelwa igama elithi amaNgqina kaYehova kwisindululo esamkelwa kwindibano eseColumbus, eOhio, ngoJulayi 26, lize lamkelwe nakwezinye iindibano ezilandelayo emhlabeni wonke

1932 Incwadi ethi Vindication, iNcwadi 2, icacisa isizathu sokuba iziprofeto zeBhayibhile ezingokubuyiswa zingasebenzi kumaYuda okwemvelo kodwa zisebenza kuSirayeli wokomoya

Kupheliswa ilungiselelo “labadala abanyuliweyo,” ngokuvisisana nengcaciso ekwinkupho ka-Agasti 15 nekaSeptemba 1 zeMboniselo (yesiNgesi)

1933 AmaNgqina kaYehova avalw’ umlomo eJamani. Ebudeni bokutshutshiswa ngenkohlakalo ukuya kutsho ekupheleni kweMfazwe Yehlabathi II, kubanjwa angama-6 262, yaye ixesha alichithela entolongweni xa kudityaniswa elawo onke yiminyaka eli-14 332; angama-2 074 athunyelwa kwiinkampu zoxinaniso, apho xa iyonke iminyaka ayivalelwayo ingama-8 332

AmaNgqina asebenzisa iigramafoni (ezinye zixhonywe kwiinqwelo-mafutha) ukusasaza iintetho zeBhayibhile kwiindawo zikawonke wonke

1934 AmaNgqina asebenzisa iigramafoni ezinokuphathwa ukuze adlalele abantu abanomdla iintetho zeBhayibhile ezimfutshane ezirekhodiweyo

1935 Kwintetho yendibano eyayiseWashington, D.C., ngoMeyi 31, “isihlwele esikhulu” sichazwa njengodidi lwasemhlabeni; kubhaptizwa abantu abangama-840 kule ndibano; ngokuthe ngcembe kugxininiswa kakhulu kwithemba lobomi obungunaphakade kwiparadisi esemhlabeni yabo bangabakhonzi bakaThixo abathembekileyo abaphilayo ngoku

Okwesihlandlo sokuqala, indawo yokuhlanganisana ibizwa ngokuba yiHolo yoBukumkani, eHonolulu, eHawaii

1936 Okokuqala abavakalisi boBukumkani banxiba iiplacards zokubhengeza ukuze bazise uluntu ngeentetho zeBhayibhile zesidlangalala

Kunikelwa ukhuthazo lokuba kuqaliswe izifundo nabantu abanomdla, kusetyenziswa incwadi yoMbutho ethi Ubutyebi kunye neBhayibhile; ngokufuthi ezi ziba zizifundo zamaqela

1937 AmaNgqina asebenzisa iigramafoni ezinokuphathwa ukuze adlale iintetho zeBhayibhile ezirekhodiweyo eminyangweni yamakhaya abantu

1938 Amalungiselelo obuthixo okumisela abaveleli emabandleni athabatha indawo yeenkqubo zedemokhrasi, ngokuvisisana nenkupho yeMboniselo (yesiNgesi) kaJuni 1 neka 15

Kulungiselelwa iindibano zamacandelo (ngoku ezaziwa ngokuba ziindibano zesiphaluka) ukwenzela amabandla angamaqela

1939-45 Kubo bonke uBukhosi baseBritani naMazwe Anobudlelane neBritani, amazwe angama-23 awaval’ umlomo amaNgqina kaYehova okanye athintela umsebenzi wokusasazwa koncwadi lwawo lweBhayibhile

1940 Ukusasazwa ezitratweni kweMboniselo neConsolation kuba yinkalo eqhelekileyo yomsebenzi wamaNgqina kaYehova

Isigqibo seNkundla Ephakamileyo yaseUnited States ngoJuni 3, sokuba ukukhahlela indwe kube sisinyanzelo kungakhathaliseki iinkolelo zikabani zonqulo kubangela ukuba amaNgqina kaYehova ahlaselwe ngamahlokondiba kulo lonke elo

1941 AmaNgqina akhutheleyo adlula ngaphaya kwe-100 000, efikelela incopho entsha ye-109 371 kumazwe ali-107, phezu kwaso nje isibakala sokuba iMfazwe Yehlabathi II igquba kulo lonke elaseYurophu ibe inwenwela eAfrika naseAsia

1942 Ukufa kukaJ. F. Rutherford ngoJanuwari 8, eSan Diego, eKhalifoniya

UN. H. Knorr uba ngumongameli wesithathu woMbutho ngoJanuwari 13

Isimbuku seeMboniselo ezashicilelwa kuloo nyaka ngeelwimi zonke siba zizi-11 325 143

Kuqaliswa iZifundo Ezikumgangatho Ophakamileyo kuBulungiseleli Bobuthixo ukwenzela abo basebenza kwikomkhulu, ngoFebruwari 16

IWatch Tower Society ishicilela iBhayibhile epheleleyo, iKing James Version, kowayo umatshini wokushicilela (iweb rotary)

1943 Iklasi yokuqala yeSikolo seBhayibhile saseGiliyadi seWatchtower iqalisa izifundo zayo ngoFebruwari 1

IZifundo Zobulungiseleli Zobuthixo (ngoku ezibizwa ngokuba siSikolo Sobulungiseleli Sobuthixo) eziza kuqhutywa kumabandla amaNgqina kaYehova ziqaliswa ezindibanweni ngoAprili

INkundla Ephakamileyo yaseUnited States iwisa izigqibo ezivumelana namaNgqina kaYehova kumatyala angama-20 kwangama-24; ngoJuni 14, iNkundla Ephakamileyo eOstreliya iyakurhoxisa ukuvalwa umlomo kwamaNgqina apho

1945 Ukususela ngo-Oktobha 1, iqumrhu loMbutho labalathisi alisakhethwa ngabantu abavotayo abafaneleka ngenxa yeminikelo yabo yemali

Ngoku izifundo zeBhayibhile zamakhaya eziqhutywayo ngokomlinganiselo nyanga nganye zili-104 814

1946 Ebudeni beminyaka esixhenxe edluleyo, amaNgqina kaYehova angaphezu kwama-4 000 eUnited States nangaphezu kwe-1 593 eBritani aye abanjwa aza agwetyelwa ukuvalelwa entolongweni ixesha elisusela kwinyanga ukuya kwiminyaka emihlanu ngenxa yobundilele bawo njengamaKristu

Kulo nyaka wokuqala emva kweMfazwe Yehlabathi II, bangama-6 504 abanesabelo kwinkonzo yexesha elizeleyo njengoovulindlela

Kuqaliswa ukupapashwa kwephephancwadi uVukani! (ngesiNgesi) (njengelandela lelithi The Golden Age nelithi Consolation); ewonke amaphephancwadi awashicilelwayo ngaloo nyaka azizi-13 934 429

NgamaNgqina angaphezu kwama-470 avela ezinkundleni eGrisi ngenxa yokwabelana nabanye ngeemfundiso zeBhayibhile

1947 EQuebec, eKhanada, ngamatyala ali-1 700 abandakanya umsebenzi wokuhambisa ivangeli wamaNgqina kaYehova alindele ukuchotshelwa ezinkundleni

Ngoku inani lamabandla lidlulela ngaphaya kwe-10 000, lifikelela kwi-10 782 emhlabeni wonke

1950 INew World Translation of the Christian Greek Scriptures ikhululwa ngesiNgesi ngoAgasti 2, kwindibano eseNew York

1953 Kuqaliswa ucwangciso lokuqeqesha amaNgqina kaYehova ngokucokisekileyo kumsebenzi wokushumayela kwindlu ngendlu, ngoSeptemba 1

1957 Kumazwe ali-169, amaNgqina kaYehova achitha iiyure ezili-100 135 016 evakalisa uBukumkani bukaThixo yaye eqhubela izifundo zeBhayibhile abantu abasandul’ ukuba nomdla

1958 Kwindibano yeZizwe Ngezizwe Yokuthanda KukaThixo, eNew York, kuza abantu abangama-253 922 besuka kumazwe ali-123; yaye kubhaptizwa abangama-7 136

1959 Okwesihlandlo sokuqala kuqhutywa iSikolo Sobulungiseleli SoBukumkani, ukususela ngoMatshi 9, kuMzantsi Lansing, eNew York, kusenzelwa abaveleli bamabandla nabaveleli abahambahambayo

1961 Iqela lokuqala labaveleli bamasebe oMbutho liqalisa izifundo zoqeqesho olukhethekileyo lweenyanga ezilishumi eBrooklyn, eNew York, ngenjongo yokumanyanisa ngokungakumbi umsebenzi wamaNgqina kaYehova emhlabeni wonke

INew World Translation of the Holy Scriptures, iBhayibhile epheleleyo engumqulu omnye, ikhululwa ngesiNgesi

1963 INew World Translation of the Christian Greek Scriptures ikhululwa ngeelwimi ezingakumbi ezintandathu (isiDatshi, isiFrentshi, isiJamani, isiPhuthukezi, iSpanish, nesiTaliyane), yaye kuza kulandela nezinye kwiminyaka elandelayo

Ngoku ngamaNgqina kaYehova angaphezu kwesigidi asebenza ngenkuthalo kumazwe ali-198; incopho yabavakalisi kulo nyaka sisi-1 040 836; kubhaptizwa abangakumbi abangama-62 798

1965 IHolo yeNdibano yokuqala, eyiholo yemidlalo yeqonga elungisiweyo, isetyenziswa ngamaNgqina kaYehova eNew York

1967 Ukutshutshiswa ngenkohlakalo kwamaNgqina kaYehova okwathabatha ithuba elide kulo lonke elaseMalawi nokwaqhubeka nakwiminyaka eyalandelayo kuyaqalisa

1969 Izifundo zeBhayibhile zamakhaya zidlula ngaphaya kwesigidi; ingxelo ibonisa ukuba ngokomlinganiselo zisisi-1 097 237

1971 IQumrhu Elilawulayo liyongezwa; ngo-Oktobha 1, usihlalo uqalisa ukuthatyathelw’ indawo lelinye lamalungu alo nyaka ngamnye

1972 Ukususela ngo-Oktobha 1, amabandla amaNgqina kaYehova aqalisa ukuvelelwa liqumrhu labadala lasekuhlaleni, kunokuba ibe ngumntu omnye

1974 Incopho yabavakalisi emhlabeni wonke ifikelela kwizi-2 021 432; oovulindlela bayanda ukususela kuma-94 604, ngowe-1973, ukusa kwi-127 135

1975 IQumrhu Elilawulayo liyalungelelaniswa kwakhona; ngoDisemba 4, imbopheleleko yenkoliso yomsebenzi yabelwa iikomiti ezintandathu, eziqalisa ukusebenza ngoJanuwari 1, 1976

1976 Ukususela ngoFebruwari 1, iofisi nganye yesebe yeWatch Tower Society yonganyelwa yikomiti yamadoda amathathu okanye angakumbi aqolileyo ngokomoya, kunokuba ibe ngumveleli omnye

1977 ISikolo Senkonzo Yobuvulindela siqalisa ukuqeqesha ngokukhethekileyo amashumi amawaka oovulindlela emhlabeni wonke

1984 Ngoku izifundo zeBhayibhile zamakhaya eziqhutywa ngamaNgqina kaYehova ngokomlinganiselo zizizi-2 047 113

1985 Kuqaliswa ilungiselelo labasebenzi bokuzithandela bamazwe ngamazwe, umsebenzi woMbutho wokwakha emhlabeni wonke ulungelelaniswa kwikomkhulu

Ingxelo ibonisa ukuba bazizi-3 024 131 abanesabelo kumsebenzi wokushumayela ngoBukumkani kumazwe angama-222; ngoku ngokomlinganiselo oovulindlela bangama-322 821; kulo nyaka kubhaptizwa abantu abali-189 800

1986 Kumiselwa iiKomiti Zokwakha Zenqila ukuze zincede ekulungelelaniseni ukwakhiwa kweeHolo zoBukumkani

1987 Umsebenzi wokwenza abafundi uyaqhubeka usanda, njengokuba izifundo zeBhayibhile ngoku ziqhutyelwa abantu neentsapho abazizi-3 005 048, inkoliso yazo iqhutywa veki nganye; ababhaptizwayo kulo nyaka bangama-230 843

Ngo-Oktoba 1, kuqalisa iSikolo Sokuqeqesha Abalungiseleli, iklasi yaso yokuqala iqhutyelwa eCoraopolis, ePennsylvania

1989 Ukuguquka kweemeko eMpuma Yurophu kwenza ukuba kube nokuqhutywa iindibano ezintathu ezinkulu zezizwe ngezizwe ePoland, nakwamanye amazwe kwiminyaka elandelayo

1990 Ukususwa kwemiqathango ebibekelwe amaNgqina kaYehova kumazwe aseAfrika naseMpuma Yurophu kwenza kube lula ukushumayela ivangeli phakathi kwabantu abali-100 000 000 abangakumbi

Abavakalisi boBukumkani bafikelela incopho entsha yezi-4 017 213; izintlu zoovulindlela zanda ziye kufikelela kuma-536 508; iiyure ezingama-895 229 424 zichithelwa kumsebenzi ongxamisekileyo wokuvakalisa uBukumkani

1991 Ukushenxiswa kwemiqathango yokuvalwa komsebenzi eMpuma Yurophu naseAfrika kwenza kube lula ukufikelela abantu abangakumbi abangama-390 000 000 ngeendaba ezilungileyo zoBukumkani bukaThixo

1992 Ngokwesilinganiso kushicilelwa imibhalo yeMboniselo eli-15 570 000 ngeelwimi ezili-111; uVukani!, ufumaneka ngeelwimi ezingama-67, ngokwesilinganiso kushicilelwa imibhalo eli-13 110 000

Obona bungqina bubalaseleyo bakha banikelwa, njengokuba abantu abazizi-4 472 787 benesabelo ekuvakaliseni uBukumkani kumazwe angama-229; ngokomlinganiselo oovulindlela bangama-605 610 ngenyanga; zili-1 024 910 434 iiyure ezichithelwa ekunikeleni ubungqina; kuqhutywa izifundo zeBhayibhile ezizizi-4 278 127; kubhaptizwa abafundi abatsha abangama-301 002