Ngaba Ubomi Bunayo Injongo?
“Umbuzo othi ‘Kutheni silapha nje?’ ngowona mbuzo ubalulekileyo umntu afanele ajamelane nawo. . . . Ndikholelwa kwelokuba ubomi bunentsingiselo phezu kwako nje ukufa okungenantsingiselo endikubonileyo. Ukufa akunantsingiselo, ubomi bunayo.”
LA MAZWI abhalwa nguElie Wiesel, umbhali odumileyo nowasinda kwiinkampu zoxinaniso zamaNazi. Wayengomnye wabaninzi abaphendula umbuzo owabuzwa kwiphephancwadi iLife: “Kutheni silapha nje?” Wayezibonile nezona nkalo zilusizi zobomi, ukanti wayeyisekile kukuba ubomi bunentsingiselo.
Noko ke, asinguye wonk’ ubani owavumayo. Umqhubi weteksi ogama linguJosé Martínez wawuphendula lo mbuzo ngale ndlela: “Silapha ukuze sife, nje ukuba siphile size sife. Ndiqhuba iteksi. Ndiyaloba, ndithabathe intokazi yam siye kubethwa ngumoya, ndihlawule iirhafu, ndithi ukufunda kancinane, ndize ke ndilindele ukufa . . . Ubomi bungumkhohlisi omkhulu.” KuJosé, licacile elokuba ubomi abunantsingiselo, abunanjongo.
Okumangalisayo kukuba, abantu abaninzi abafundileyo babonakala bevumelana nalo mqhubi weteksi kunokuvumelana nombhali. Isazi ngendaleko uRichard E. Leakey noRoger Lewin, kwincwadi yabo ethi Origins, bathi: “Mhlawumbi abantu babakho ngenxa yokwenzeka kwempazamo enkulu kwibhayoloji, eye yaguquguquka ukusa kwinqanaba lokuba ingabi sakwazi ukuzilungelelanisa yona kunye nehlabathi eliyijikelezileyo.” Ubuncinane kubo, ubomi babantu abunantsingiselo.
Ngokufanayo, isazi ngendaleko uStephen Jay Gould sabhala: “Silapha ngenxa yokuba elinye iqela leentlanzi elalahlukile kwamanye amaqela lalinamaphiko angaqhelekanga awayenokuguquka abe yimilenze yezidalwa eziphila emhlabeni; . . . ngenxa yokuba uhlobo oluthile lwezilwanyana oluncinane nolungomelelanga, olwavela eAfrika kwiminyaka eyikota yesigidi eyadlulayo, ukuza kuthi ga ngoku, luye lwakwazi ukuphila ngamabona-ndenzile. Sisenokulangazelela impendulo ‘esengqiqweni ngakumbi’—kodwa ayikho.” Kulo kaGould, ubomi babantu yinto nje eyabakho ngengozi nengenantsingiselo.
UGould uchanile ubuncinane kwinkalo enye. Abaninzi balangazelela impendulo “esengqiqweni ngakumbi” kunaleyo ayinikelayo. Ngamaxesha entlekele, abaninzi bacinga njengoJason oneminyaka eli-11 ubudala. Le nkwenkwana yabhala oku ngokufa komhlobo wayo oselula: “Xa umhlobo wam uKim wabulawa ngumhlaza ndabuza uMama ukuba xa kanti uThixo ebeza kumbulala uKim eseneminyaka nje emithandathu, ebesavumela ntoni ke ukuba azalwe kwaukuzalwa?” Ngethuku uJason wavakalelwa kukuba ubomi bufanele bube nenjongo, yaye ukufa okubuhlungu komhlobo wakhe oselula kwabonakala kuyitshitshisa loo njongo.
Ukubaluleka Kwalo Mbuzo
Ngaba kubalulekile ukwazi enoba ubomi bunenjongo okanye abunayo kusini na? Ngaba lo ngumbuzo nje wokuthanda ubulumko, okanye ufanele ukuxhalabise? Abaninzi baye baphila ngaphandle kokuwucingisisa ngokunzulu lo mbandela. Yaye ukuba uJosé Martínez uchanile, isenokuba bekububulumko ukulandela ikhondo labo.
Noko ke, ukuba uElie Wiesel uchanile yaye ubomi bunayo intsingiselo, ngokuqinisekileyo sifanele sizame ukufumanisa oko ikuko. Kungenjalo, sisenokulahlekelwa yeyona ngongoma ibalulekileyo nesisiseko yamava amangalisayo okuphila. Bekunokufana nokuhamba kwiholo yokubonisa ngezinto zobugcisa ungajonganga mifanekiso okanye nokuhlala kwivenkile yokutyela kodwa ungathenganga nto ityiwayo.
Sinokufumanisa njani enoba ubomi bunenjongo okanye abunayo kusini na? Kwinqaku elilandelayo, siza kuxubusha ngezibakala ezithile ezincedayo ekucombululeni le ngxaki.