Incwadi Ebekw’ Amabala
“Imfundiso yokuba umhlaba ujikeleza kwiasi yawo neyokuba ujikeleza ilanga ibubuxoki, yaye ichasene ngokupheleleyo neZibhalo Ezingcwele.” Yatsho njalo iCongregation of the Index yeCawa yamaRoma Katolika kumyalelo wayo ngowe-1616.1 Ngaba ngokwenene iBhayibhile iyaphikisana nezibakala zenzululwazi? Okanye ngaba ibekwa nje amabala?
EBUSIKA ngowe-1609/10, uGalileo Galilei wajika isibona-kude awayesandul’ ukuzenzela sona wasijongisa ezulwini waza wabona iinyanga ezine zijikeleza isijikelezi-langa esinguJupiter. Oko wakubonayo kwayichitha tu ingcamango eyayikho yokuba zonke izinto ezisesibhakabhakeni zijikeleza umhlaba. Ekuqaleni, ngowe-1543, isazi ngeenkwenkwezi sasePoland uNicolaus Copernicus seza nengcamango yokuba izijikelezi-langa zijikeleza ilanga. UGalileo waliqinisekisa elokuba oko kuyinyaniso engokwenzululwazi.
Noko ke, abezakwalizwi bamaKatolika babekujonga oku njengokuqhekeka. Icawa kwelayo icala yayimi ngelokuba umhlaba usisazulu sendalo iphela.2 Oku kwakubangelwa kukuba yayizitolika ngokoqobo izibhalo ezichaza umhlaba ngokuthi “wasekwa phezu kweziseko zawo, ukuba ungashukunyiswa naphakade kanaphakade.” (INdumiso 104:5, The Jerusalem Bible) Emva kokuba ebizelwe eRoma, uGalileo wasiwa kwiNkundla Yokuncina Amakholwa. Emva kokwehliswa esenyuswa apho, wanyanzelelwa ukuba arhoxe kwezo zinto wayezifumanisile, yaye wagwetyelwa ukuhlala endlwini ubomi bakhe bonke angaphumi.
Ngowe-1992, kwiminyaka enokuba ngama-350 emva kokufa kukaGalileo, iCawa yamaKatolika yavuma ekugqibeleni ukuba wayechan’ ucwethe.3 Kodwa ukuba uGalileo wayechanile, ngoko ngaba iBhayibhile yayiphazama?
Ukuqonda Intsingiselo Yeendinyana ZeBhayibhile
UGalileo wayekholelwa kwelokuba iBhayibhile iyinyaniso. Xa izinto ezingokwenzululwazi awazifumanisayo zaziphikisana nendlela ezitolikwa ngayo ezinye iindinyana zeBhayibhile, wayeye acinge ukuba abezakwalizwi abayiqondi intsingiselo yezo ndinyana. Ngapha koko, wabhala esithi, “iinyaniso ezimbini azinakuze ziphikisane.”4 Walikhankanya nelokuba isigama esisetyenziswa kwezenzululwazi asiphikisani namagama asetyenziswa eBhayibhileni. Kodwa abezakwalizwi babengafuni nokuva ngaloo nto. Babemi ngelithi oko kuthethwa yiBhayibhile ngomhlaba kumele kuthathwe ngokoqobo. Ngenxa yoko, abazange banele nje ukuphikisa oko kwafunyaniswa nguGalileo kodwa babengayiqondi intsingiselo yoko kuthethwa ziZibhalo.
Eneneni, iingqondo zethu zifanele zisixelele ukuba xa iBhayibhile ithetha ‘ngeembombo zone zomhlaba,’ ayithethi ukuba ababhali beBhayibhile babewujonga umhlaba njengoneekona ezine. (ISityhilelo 7:1) IBhayibhile ibhalwe ngolwimi lwabantu abaqhelekileyo, ibe isoloko isebenzisa izaci ezicacileyo. Ngoko xa iBhayibhile ithetha ‘ngeembombo zone,’ ‘ngesiseko’ esingenakushukunyiswa, ‘ngeentsika,’ ‘nangelitye lembombo’ ayinikeli nkcazelo ingokwenzululwazi yomhlaba; ngokucacileyo sukuba isebenzisa izikweko, njengokuba nathi sisenza xa sincokola mihla le.a—Isaya 51:13; Yobhi 38:6.
Kwincwadi yakhe ethi Galileo Galilei, umbhali ngobomi babantu uL. Geymonat wathi: “Abezakwalizwi abaneengqondo ezingaphangalalanga ababefuna ukudodobalisa inzululwazi besebenzisa indlela abayiqiqa ngayo iBhayibhile babesenza iBhayibhile ithandatyuzwe.”5 Ibe oko bakwenza ngokwenene. Eneneni, yindlela abezakwalizwi abayitolika ngayo iBhayibhile—kungekhona iBhayibhile—ephikisana ngokungekho ngqiqweni nenzululwazi.
Ngokufanayo, abo babambelela ngokungqongqo kwiinkolelo zonqulo namhlanje bayayigqwetha iBhayibhile xa besithi umhlaba wadalwa ngemihla emithandathu eneeyure ezingama-24. (Genesis 1:3-31) Loo ngcamango ayivisisani kwaphela nenzululwazi neBhayibhile. EBhayibhileni, kanye njengaxa sincokola, igama “umhla” linokuthetha izinto eziliqela, lisenokuchaza amaxesha anobude obungalinganiyo. KwiGenesis 2:4, yomithandathu imihla yokudala ibizwa ngegama elinye lokuba ‘ngumhla.’ Igama lesiHebhere eliguqulelwe ngokuthi “umhla” eBhayibhileni lisenokuthetha “ixesha elide.”6 Ngoko, asikho isizathu esingokweZibhalo sokucinga ukuba imihla yokudala yayiyimihla eneeyure ezingama-24. Ngokufundisa into ephikisana noko, abo babambelela ngokungqongqo kwiinkolelo zonqulo bayibek’ amabala iBhayibhile.—Kwakhona bona eyesi-2 kaPetros 3:8.
Kuyo yonke imbali, abezakwalizwi bebesoloko beyigqwetha iBhayibhile. Qwalasela ezinye iindlela iinkonzo zeNgqobhoko ezikubek’ amabala ngayo oko kuthethwa yiBhayibhile.
Ibekw’ Amabala Lunqulo
Izenzo zabo bathi balandela iBhayibhile zisoloko ziyibeka ibala elibi le ncwadi bazingomb’ isifuba ngelokuba bayayihlonela. Abo bazibanga bengamaKristu baye babulalana egameni likaThixo. Ukanti, iBhayibhile ibongoza abalandeli bakaKristu ukuba ‘bathandane.’—Yohane 13:34, 35; Mateyu 26:52.
Bambi abefundisi bayayixhaphaza imihlambi, ngobuqhetseba besitya imali eyibileleyo—nto leyo ekhabana mpela nomyalelo weZibhalo othi: “Namkele ngesisa, yiphani ngesisa.”—Mateyu 10:8; 1 Petros 5:2, 3.
Licacile elokuba, asinakugweba iBhayibhile ngenxa yamazwi nezenzo zabo bathetha nje ngayo okanye abo bathi bayayilandela. Umntu ongqondo iphangaleleyo usenokuba nomdla wokuzibonela ngokwakhe oko kuthethwa yiBhayibhile nesizathu sokuba iyincwadi ebalaseleyo.
[Umbhalo osemazantsi]
a Ngokomzekelo, kwanezona zazi ngeenkwenkwezi zizithatha ngokoqobo izinto namhlanje ziye zithethe “ngokuphuma” “nokutshona” kwelanga, kweenkwenkwezi nezinye izikhanyiso—nangona ikukujikeleza komhlaba okwenza ezi zinto zibonakale zihamba.
[Umfanekiso okwiphepha 4]
Izibona-kude ezibini zikaGalileo
[Umfanekiso okwiphepha 5]
UGalileo phambi kwabo babemncina