Ngaba Yincwadi Ebhalelwe Wena?

“Ukwenza iincwadi ezininzi akunakuphela,” watsho njalo uSolomon kwiminyaka engama-3 000 eyadlulayo. (INtshumayeli 12:12) Loo mazwi achane ngeyona ndlela namhlanje. Minyaka le kushicilelwa amawakawaka eencwadi ezintsha zisongezelelwa kwiincwadi zakudala. Ekubeni zininzi kangaka iincwadi onokukhetha kuzo, kutheni ufanele ufunde iBhayibhile?

ABANTU abaninzi bafunda iincwadi kuba befuna ukuzonwabisa okanye befuna ulwazi, okanye mhlawumbi ngenxa yezo zizathu zozibini. Kunjalo ke nangokufunda iBhayibhile. Usenokuyifunda ngenjongo yokwandisa ulwazi lwakho, kwanangenjongo yokuzonwabisa. Kodwa iBhayibhile ayipheleli nje apho. Ingumthombo ongenakufaniswa nanto wolwazi.—INtshumayeli 12:9, 10.

IBhayibhile iphendula imibuzo ebisoloko idida abantu ithuba elide—imibuzo engezinto zamandulo, ezikhoyo, nezekamva lethu. Abaninzi bayazibuza: Sasivela phi? Iyintoni injongo yobomi? Singalufumana njani ulonwabo ebomini? Ngaba kuya kusoloko kukho izidalwa emhlabeni? Yintoni esiyifunjathelwe likamva?

Bonke ubungqina obunikelwe apha busiqinisekisa ngokucacileyo ukuba iBhayibhile ichanile yaye iyinyaniso. Sele siyixubushile indlela isiluleko sayo esinokusinceda ngayo siphile ubomi obunentsingiselo nobonwabisayo namhlanje. Ekubeni iimpendulo zayo ngexesha esiphila kulo zisanelisa, ngokuqinisekileyo simele sinikele ingqalelo kwiziprofeto zayo ezingekamva lethu.

Indlela Yokungenelwa Ngokonakona

Abantu abaninzi baye baqalisa ukufunda iBhayibhile kodwa bathi xa befika kwiindawo ekunzima ukuziqonda bayeka. Ukuba nakuwe kukhe kwenzeka into efanayo, zikho izinto ezisenokukunceda.

Khetha inguqulelo ethembekileyo nebhalwe ngentetho yale mihla, njengeNew World Translation of the Holy Scriptures.a Bambi abantu baqala ngeengxelo zeVangeli ezingobomi bukaYesu, oneemfundiso zobulumko, ezinjengezo zikwiNtshumayelo yaseNtabeni, ezibonisa ukuba wayekwazi kakuhle ukubunjwa komntu yaye zibonisa indlela yokuphucula ubomi bethu.—Bona uMateyu isahluko 5 ukusa kwesesi-7.

Ukongezelela ekufundeni yonke iBhayibhile, ukuyifunda ngokwemibandela kunokukunika ulwazi. Oku kuquka ukuhlolisisa oko kuthethwa yiBhayibhile ngombandela othile. Usenokumangaliswa kukufumanisa oko iBhayibhile ikuthethayo ngemibandela enjengomphefumlo, izulu, umhlaba, ubomi nokufa kwanangoBukumkani bukaThixo—oko bukuko noko buya kukuphumeza.b AmaNgqina kaYehova anenkqubo yokufundisisa iBhayibhile ngokwemibandela, efumaneka ngesisa. Usenokufumana inkcazelo ngokubhalela abapapashi bale ncwadana, usebenzisa ikhelingi efanelekileyo kwezidweliswe kwiphepha 2.

Emva kokuhlolisisa obu bungqina, abantu abaninzi baye bagqiba kwelokuba iBhayibhile ivela kuThixo, iZibhalo ezimbiza ngokuthi “Yehova.” (INdumiso 83:18) Usenokuba akweyisekanga lelokuba iBhayibhile ivela kuThixo. Kodwa kutheni ungakhe uzihlolele ngokwakho? Siqinisekile ukuba emva kokuyifundisisa, ucamngce ngayo, uze mhlawumbi usebenzise ubulumko bayo obuxabisekileyo nobungaphelelwa lixesha, uya kuvakalelwa kukuba iBhayibhile ngokwenene yincwadi yabantu bonke, yaye ngapha koko—yincwadi eyenzelwe wena.

[Imibhalo esemazantsi]